في قلب العاصفة

بارت 1

بارت 1
الأول ديال شهر 9...
الشمس ضاربة فالزجاج ديال صالون واسع فـ حي راقٍي الطابلة عامرة أطباق والريحة ديال الماكلة ناشرة فـ الدار والضحك داير بين أفراد العائلة.
عمر الأب كيشرب عصيرو وهو كيتفرج فمراتو لطيفة كتضحك مع ولادها.
سلمى الكبيرة كانت كتشوف فـ تليفونها وتقطع الكلام بضحكة:
– مامااا، واش بدر قطع لينا تيكي؟ خاصنا نمشيو بكري يلاه نوصلو غدا نقدرو ندفعو فـ الليسي.
إيناس خواها بوجه طفولي ساخر:
– وا خلينا نكملو الغداء ديالنا، راك غادي تنقزي علينا بلا ما نشبعو.
ضحك الأب  والأم قالت:
– ما عندكم فين تمشيو بلا ما تاكلو مزيان كازا كبيرة وماشي بحال الرباط خاصكم الطاقة
وفجأة دخل بدر، أخوهم الصغير، بوجه فيه لمعة فرحة:
– إيوا لخبار الزوينة  جبت ليكم تيكي ديال التران!
فرحت البنات وقامو يكملو الغداء بسرعة
من بعد مشاو يجمعو حوايجهم كل وحدة بدات كتقلب فتيابها الشنط ديال السفر وسط البيت
إيناس دخلات للمطبخ بسرعة خذات واحد الكيس، وبدات كتجمع فيه:
– نحتاجو شي حاجة فالطريق…
خدات 4 رايبي، 4 مادلين و جوج كبار ديال برينجلز.
ضحكات بيناتها وبين راسها وقالت:
– إيوا مع هاد الشي ما نجوعوش حتى نوصلو كازا
الأم كانت كتشوفهم من بعيد وقلبها مشدود بحال اللي حاسّة هاد السفر ماشي عادي…