يَلوموني
وأحسك تكبر بروحي
ويلوموني
وأنا بلا شوفتك
شينفعن عيوني؟
ياشوفي ورجوتي ودنياي
ودنياتي ولوني وعذابي
وبسماي وشكواي وضنوني...
***********************************
يوم الاثنين الساعة 5:24 صباحاً
گاعده اراجع وحاطه التلفون يمي مؤقته علمود تصير بالسته واكوم ابدل
الجو تراب وهوى وانا كاعده بالمخزن وشبابيكه شبه مكسره جزء مكسور وجزء صاحي گاعده على فراش مكوم
نزلت راسي اباوع ع الملزمة واقرا وانسى حاصرتني البچية فاتت ريام للغرفة باوعتله ورجعت اقرا وهي تفتر دوختني اخر شي وكفت گدام الجامه وتباوع جان اكو عمال يشتغلون
- والله قهرني هذا يشتغل وحده
- هَـو منو ؟
- يمعوده هذا العامل من الصبح جاي يشتغل وحده ونوب شكد حمل طابوك
- ريام عفيه انا شردت منج علمود اقرا ولحكتيني روحي نامي
- يمعوده شلون انام انقهرت عليه
عفته وشلت الملزمة وكعدت اقرا وافتر ومتوترة خاف مالحك
- يااا هذاا منين طلع
- منووه
- ولج طلع واحد لابس مناظر وشفقه مدري من بيت ابو حيدر مااعرف عامل ويا
باوعت من ورا الجام جانوا اكو اثنين ولد ديشتغلون عفته ورجعت اراجع وهي بس تلغي تحير شتسوي
لزمت تلفوني وباوعت للساعة جانت 5:57
ردت اروح ابدل بس كلت تصير ضبط اروح
قريت ع سريع بين مادك المنبه
فتت للغرفة الي كاعدة بيه ريحانة لكيته تقرا
- يلا كومي خنبدل
- بيش الساعه ؟
- ب6:00 يلا كومي
هزت راسه وكامت اخذت تلفوني وفتت لغرفتنه فتحت الايت وكعدت اطلعلي ملابس من الكنتور حبيت اخالف اخذت شال
اسود وقميص اسود واخذت غراضي وبطاقة
الوزاري وطلعت للغرفة الثانية بدلت ملابس وفاتت ريحانة باوعت عليه وگالت
ريحانة : شتكولين اخالف ؟
- خالفي بقت عليج ترى المدرسة كلها مخالف بس احنه مطبقين القانون !
- لعد راح البس مثلج
هزيت راسي وبدلت انتظرته هَـي تكمل اخذت فلوس من محفظه بابا وشلت ملزمتي وطلعنه
اخذت الطريق كله ادعي علمود اجاوب بالامتحان لان صار امتحانين انا مو زينة بيهم
وصلنه للمدرسة شفت صديقتي كاعده تراجع ويه البنات
ركضتله وحضنتني شاورته وكرصتني بخصري خلتني اكمز
- وجع هسه واذا
ابتعدت عني وتباوعلي صفح هزت ايدها وكعدت انا هم كعدت فتحت حلوياتي وكعدت اقرا واكل بدت البنات يجن ويسلمن علينه انا وريحانه
YOU ARE READING
بين قيود الشهم
Romanceفي لحظةٍ واحدة، تحوّلت من فتاةٍ عادية إلى محور قصّة لم تخترها. هناك من يراقبها باسم الحب، وهناك من يعرف أكثر مما يجب. والسؤال ليس: ماذا يحدث؟ بل: من الذي بدأ كلّ هذا؟
