وصفة الحب

V

_صبح صباح جديد واللي كان باين غادي يدوز طويل عند أوس اللي فاق بالحريق ديال يديه،تفكر بلي قال ليه قصي خاصو يخيطها ناض غسل وجهو لبس حوايجو اللي كانوا تيشورت بالكحل اللي جا مزير على كتافو ودجين مع سبرديلة بيضة،ركب اللوطو ديالو وقصد أقرب صبيطار غير وصل قال ليهم شنو عندو ودخلوه يخيطوا ليه بلا بنج،أي واحد فبلاصتو كان غادي يتقصح ويقدر گاع يغوت ولكن هو لا حدو كان مزير على سنانو وجامع يدو لاخرا على شكل بونية وكيشوف داك المنضر اللي فكرو غير بيها البارح وهي هازة الموس،وكيف كانت كتبان ليه،غير شاف راسو بدا يفكر فيها وهو يتجمع كانت ديك الساعة نيت سالات الممرضة الخياطة،غطاتها بفاصمة وعطاتو واحد المسكن يهدأ عليه الألم،خلص اللي عليه وخرج من تما قاصد خدمتو.

_عندهم هوما اللي فاقوا على خاطرهم ماتابعهم حتى حاجة،ناضت سلمى تفيق فمريم

سلمى:نوضي أمريم ياله راه 12 هادي،أودي أودي على ننعس حداك لاتفيقي هههه عولت على الخلا

مريم(كتتكسل):ومال مك الليل كامل وأنا نتگلب گاع ضهري ضرني

سلمى:ناريي بديتي تاني أنا غادي نهرب.{خرجات من مور ماغسلات ولقات ياسمين موجدة ليهم الفطور،هزات البراد دارتو يسخن فحين مريم ناضت غسلات وجهها ودارت روتينها الصباحي عاد مشات عند سلمى اللي لقاتها ياله حطات الفطور.}

سلمى:خاصني نعيط لليلى نشوف خوها كيف بقا،وييلي على شوهة

مريم:واش هو اللي تلاقيتي معاه فلكابيني عندها؟؟

سلمى:امم هو

مريم:وياختي ماگلتيش ليا زوين وطويل ومگدر وعندو اللحية

سلمى(كتجغم أتاي):والله ماكدبات فاطنة فاش گالت عليك گملة تموتي على الزغب، وأنا مالي فزينو إيلا زوين راه زوين لراسو،وأجي بعدا نتي كنتي معايا ولا كنتي تدوري فدوك العينين؟!

مريم:إيوا أختي آش غندير ليك أنا عيني كيدورو غير راسهم، حتى ليلى العفريتة مدبرة على تيتيييز ولاهيلا تريكة ديال التواتز حتى من خوها لاخر ههههه ياسلام

سلمى:ياااربي السلامة حتى حاجة ماتفلت ليك،وخطيبها راه فنفس الوقت ولد خالتها

مريم:إيوا هادو هوما العائلات ههه،هي طبيبة،خطيبها طبيب وخوها عميد ممتاز فحالي أنا ههه أنا اللي مطفراه فيهم مامكملة حتى لعبة

سلمى(جابت ليها الضحكة):ههه وا الله يمسخك،كولي ونوضي تگعدي راك داخلة مع 17:00

مريم:أويلي وعلاش؟؟

سلمى:صيفط ليا زياد ميساج گال ليك تجي بكري باش تخرجي بكري حيت زعما غادي تكوني غير بوحدك

مريم:اممم ولاهيلا فكر مزيان فهادي

سلمى:إيوا يالله تهزي جمعي أنا راه باقة مريضة