وصفة الحب

II

        _من مور تلاتة دالسوايع ديال الغيبوبة وصلات 18:00،ناضت مريم وهي رااشقة ليها مشات تفيق كل وحدة بالهراج حيت هوما مكيآمنوش بشي حاجة سميتها بشويا،دارت الما يطيب باش تعمر أتاي بينما سلمى حداها كتوجد الطبلة أما ياسمين مشات تجيب الكومير

مريم:ناريي هاد السيمانة عندنا الليل وااشحال مكنحملوش

سلمى:أنا العكس كتعجبني الخدمة دالليل كتكون زاهية القضية

مريم:واختي أنا مكنقدرش على السهير

سلمى:لا الكبيدة نتي تموتي على النعاس كون كنتي كتخلصي عليه كون خرجتينا من هاد الدرب

مريم:ومالو كيف جاك هاد الدرب،فين تلقاي حسنة البرگاگة ولا مروان الحباس الملقب برويحة ولا عباس خايب السيفة

سلمى:هههه الله يمسخك،وجه الفقرههه و ااه رويحة راه خرج دابا يقصدك تاني

مريم(كتضرب يديها مع الپوطاجي):شكيكو ماحنا على فالك فمك لحسو كلب مالكي أختي آش بغيتي عندي؟!

ياسمين(داخلة كتنهج):مريم مريم قودتيهاا

مريم:أويلي مالي؟؟

ياسمين:رويحة خررج

سلمى:إيوا هاء ياله وصلاتك ولا شنو؟؟

مريم:أويلي كانت غادي تطيح ليا النقطة، أنا بغيت ليه غبارة وعشر سنين نافدة

سلمى:لواه باب،زيدي زيدي خلينا نجغدروا نمشيو فحالنا

ياسمين:على خدامين؟؟معاش اتمشيو؟

مريم:موالفين 18:00 ولكن گالت ليا سلمى ليوما حتى ل 20:00

سلمى:اه راه قال ليا زياد كان عندهم شي حفلة فالريسطو وغادي يتعطلوا

مريم:كون غير هنانا وقال لينا بلا ماتجيو خزييت

سلمى:وااا شحال معگازة.
{گلسوا فالطبلة وبداو الماكلة وهوما مطلعينها على بعضياتهم،غير سالاو ناضت سلمى ومريم يوجدوا راسهم باش يخرجوا.سلمى لبسات أونسومبل خفيف ومستور فالباج ودارت معاه شال فالكحل وصندالة خفيفة حيت الصهد،أما مريم لبسات كسوة نص كم فالغوز كتجي مزيرة من الفوق ومرخوفة عند الخصر حدها حد الركبة وهزات واحد الجاكيط ديال الدجين على حساب الرجعة يكون البرد،ضفرات شعرها ولبسات سبرديلة بيضة.خرجوا وخلاو ياسمين اللي كانت كتفرج فالمسلسل ديالها.}

سلمى:أجي ماشي هداك هو رويحة؟؟

مريم(كتحقق فيه):أويييلي ولاهيلا هو،زيدي زيدي نقلبو الدورة

سلمى:تي شغتقلبي راه شافنا شوفي الضحكة فين وصلات ليه

مريم:ويلي ويلي جاي لعندنا يااك؟!