وصفة الحب

I

_فواحد الحي شعبي،10:00 دالصباح ها اللي عاد غادي لخدمتو ها اللي غادي يقرا ها اللي واقف فراس الدرب، ها اللي كيطل من الشراجم باغي يشوف هاد الصداع والهراج منين جاي.

_عندهم فواحد الدار كتكون من تلاتة ديال البيوت وصالون وكوزينة وحمام داكشي الحد فالقد،كيسمعوا صوت الدقان على الجهد[سلمى حلي الباااب]،هوما اللي خارجين كيتجاراو بااينة كانوا جابدين عليها

مريم(مفزوعة):أويلي أش هاد الخرا؟؟!

سلمى(كتقاد زيفها على راسها):وشكون من غيرو؟!عباس جا للشهر تاني

مريم:تفوو على گنس اللي يسمعوا يگول مامخلصينش عام، راه ياله بدا الشهر الله يلگيها ليه

سلمى:واصافي أنا غادي نحل ليه.مشات هي ومريم حلوا الباب

سلمى:السي عباس مالنا على هاد الحالة على الصباح؟؟

عباس:فلوس الكرا

مريم:إيوا لاواه بايت تحلم بينا ولا مالك؟!راه ياله واحد فالشهر

عباس:مكندويش معاك الگرطيطة

مريم(معصصبة):شناهواااا؟؟؟(قرصاتها سلمى باش تسكت)

سلمى:السي عباس راك شفتينا اليوما مامشيناش الخدمة، غدا إن شاء الله نتخلصوا ونجيبهم حتى لعندك

عباس:أنا ماشي شغلي سيروا ولا گلسوا،أنا بغيت فلوسي. ياله بغات تهضر مريم وهي تدفعها سلمى تدخل للدار وسدات عليها الباب عرفاتها غادي تزبلها.

سلمى:واش أنا عمري كليتك فرزقك السي عباس؟!گلت ليك غدا هي غدا

عباس:واخا على وجهك،غدا إيلا ماجبتيش الفلوس غير جمعوا حوايجكم وخرجوا عليا من داري

سلمى:إيوا نعل الشيطان من الصباح وحنا نرطبو معاك ماگلنا حتى حاجة دالعيب وغدا فلوسك يكونو عندك،دابا الله يعرضك السلامة.خلاتو ودخلات مع سدات الباب لقات مريم واقفة عليها كيف قباط الرواح

مريم:مالو جهل ولا مالو؟؟؟؟

سلمى:مررريم واش حماقيتي كتدوي مع السيد هكاك بغيتيه يلوحنا للزنقة،وحنا بزز باش لاقيين هاد الدار وبتمن مزيان

مريم:وراه عصبني،مفيقني من وااحد الحلمة كون خلاني غير حتى شفت وجهو

سلمى:شكون هادا؟؟

مريم(شدات لسلمى يديها):عرفتي ياسلمى حلمت كنت مع واااحد الطولة والتجريدة و الهضمة يااا سلام وياله بغيت نطلع عيني نشوف وجهو وهو يجي داك خايب السيفة حررمها عليا الله يعطيه غبارة

سلمى(جراتها من كتافها مقدماها):إيوا زيدي أحبيبة شوفي واحد الهضمة ديال الماعن بقاو من البارح

مريم:اييه راها نوبة ياسمين ماشي نوبتي أحنونتي،تسنايها حتى تجي أنا مالي!!؟

سلمى(دارت الدزارة عليها):وا غي زيدي بغيت ليك غبارة أنا غادي نغسلهم نتي غير وجدي الفطور