انا احبك مابها زيف وخداع رغم الذي نخفيه والي نخافه

بارت ٦٧

"بالمستشفى"
عند نجد الي طفشت من المستشفى اندق الباب ودخل بوكيه ورد وشوكلت نجد باستغراب: من مين .
دخل بتال: مني.
نجد ابتسمت : ياااااعمري الي جاي ليه جيت.
حضنها:  ماقدرت اخليتس لحالتس قلبي عيى يرتاح .
نجد: والدوره.
بتال : بحضرها عن بعد.
نجد. : ياعمري انت يابعد كل العالم .
جلس معها بطرف السرير وباسها : طمنيني عنتس.
نجد: والله العظيم ماصرت زينه لين شفتك.
يبتسم : تطلعين واذا جاتس ولاده رديتس.
نجد : هذا رايك.
بتال: اي نشدت الدكتور يقول مطوله.
نجد: اجل يالله بطلع معك .
بتال : اجل اجهزي وانا اخلص اوراقتس.
يووه يافرحة نجد وقتها بجيت بتال ابو قلب حنون الي ماقدر يتركها لحالها قامت تجهز نفسها وهو راح يخلص اوراق الخروج

"في حوش سعود "
جو العيال
ثنيان : الليله انا الي بزين لكم العشاء.
سند: عزالله ماتعشينا انت وسروالك ذا الله يرحم جدي الي خلاك تنسى البناطيل بذا الديره.
ثنيان بضحكه : عاد مات جعلك ماتلحقه.
سند : جعل الي ببالي يحلقه
ثنيان طالعه بضحكه وهو يدري انه يقصده وسكت.
اما فهد الي راح ينادي امه : ديم.
ديم توسعت عيونها :  بنات كنه قال ديم ولأ يتهيأ لي.
شوق: الا والله قال ديم.
حطت نايف بحضن ترف وقامت بحده : فهد مين ديم.
فهد الي حاط بفمه عود اسنان : انتي،، رجلتس يبيتس.
ديم خذت جلالها : تعال تعال والله لربيك انت وابوك.
وراحت غرفتهم: كايد .
كايد : سمي.
ديم: ولدك جايني بنص الناس يناديني باسمي.
كايد: ازيدتس من الشعر بيت غير اسم ناقته سماها شيهانهً والطامه الكبرى انه صار ولد خلف.
ديم توسعت عيونها : ولد خلف هاه.
فهد : ايه .
ديم : وليش عندي رح عند امك وابوك يالله رح لاهلك.
فهد يطالع ابوه بس شافها صامله وبصوت واطي:  بابا سو حركاتك.
كايد كان ميت ضحك قرب عند ديم : ليه ياديم قلب كايد وراتس معصبه.
ديم بكت : ليه يقول ماني ولدكم انا امه.
كايد انصدم وفهد نطقً بحده : ليه تصيحين عشان اسامحتس ، ماني مسامحتس
وطلع لعمه سند بالحوش.
كايد حضنها : بس جعلني فداتس والله لربيه.
ديم : ليه هو قليل ادب كذا ،،كله منك.
كايد قطب حواجبه وهو يشوفها قلبت عليه: مني انا .
ديم : ايه انت الي مقوي راسه عليه .
يمسح دموعها : خلاص ابشري والله ماعديها له وليتعاقب والي تبينه يصير.
تنطق : اول شي ماعاد فيه بقاله ولا عاد يروح للعزبه ولا تعطيه جوالك .
ضايع فيها وفي دلعها : ابشري.
تنطق بحده : اتكلم صدق انا لاتسلك لي ولا والله لتنام معه بغرفته.
ضحك :  لاوالله تكفين والله ماسلك لتس الي تبينه يصير.
خمته : قهرني فهود .
كايد حس انه توهق بينهم ولا يدري وش يسوي،، تروش  كايد وطلع يشوف ديم تجهز جاء عندها وهي واقفه على المرايه حضنها من ورى  وباسها تحت اذنها : زعلانه مني.
ديم : للحين لا وركز على كلمة للحين .
كايد: ادري ان فهد زودها وابشري بلي تبينه كل شي الا قلة الادب ماني معه  فيها.
ديم رفعت عينها تناظره بالمرايه : احبك طيب .
لفها جهته : والله اني اعشقتس ياديم انتي ام فهد ونايف الغاليه.
ديم : اذا انا غاليه لاتكسر كلمتي قدام فهد .
يحط اصبعه على خشمه : على هالخشم ابد الي تبينه يصير.
باسته بصدره: يالله نايف مع البنات بطلع لهم.
ارتخى يبوسها : احب لما ماتلحقين وجهي وتبوسين صدري احسه صار دافي من كثر ما تبوسيه.
ديم داخت على كلامه : ادوخ انا ادوخ على قولة هديل وش هالكلام الحلو.
قطع عليهم ثنيان الي ينادي كايد بعد ماطلع فهد حرته بالصغار.
لبس بسرعه وطلع : وش العلم.
فهد: مرجيحتي مابيهم معي الا شيهانه.
كايد: يوووه شيهانه ماتبيك.
فهد بعصبيه : مو على كيفها.
شيهانه حضنته: الا ابيه .
طخ فهد وابتسم وباس خدها : خلاص تعالو سامحتكم .
سند منصرع يضحك وثنيان نفس الوضع.
كايد: انا  ابن ابوي صدق يالخفيف.
فهد: نفسك لما  تعصب و ديم تبوسك وتضحك.
كايد ضحك وسند وثنيان انهارو زود واستلمو كايد طقطقه.
قطع عليهم بتال الي دخل  بعد مادخل نجد عند امها وراح له فهد يركض : عمو بتال جااااء.
بتال شاله يبوسه: يالبيه صدق.
كايد: وراك تجي.
بتال: ماتبوني رجعت.
سند : لا لا نقصد غريبه يعني.
بتال: جيت اشوف مرتي الي طرحتوها بالمستشفى وخليتوها.
سند: وش تبينا نسوي نحرسها .
بتال سلم على ثنيان : هديل هنا ياحظي والله.
جات هديل: انا الي ياحظي ماحد يحب ولدي غيرك.
بتال باسها : يازينك انتي وياه هو وينه.
هديل: روشته ونام توه جاي من العزبه.
يبتسم: اووخس صاير حمش.
تضحك : معلوم وانتم خواله .
سند : بروح اجيب اغراض من البقالة.
فهد : بجي معك.
كايد : لا انت مُعاقب ماتروح.
ينطق بحده : لييييه.
كايد بحده: اول شي لاترفع صوتك ثاني شي كذا مابيك تروح عشان تحترم امك.
سند بعناد : بيروح معي طرق.
كايد بغضب : والله مايتبعك.
بتال: عشاني خله يروح.
كايد بصوت واطي وهو يناظر ديم بطرف عينه : يارجال فيها طرده الليله.
بتال ابتسم وشال فهد : انا ابيك يافهد بوريك شي معي.
فهد : اذا جيت توريني.
كايد: روحه منت برايح الا اذا امك سمحت لك.
فهد راح لها يركض : ماما خليني اروح تكفين.
ديم : لا .
فهد: ماما والله اسمع كلامك والله.
ديم : لا ماتروح انا زعلانه منك .
فهد طول يحاول  فيها بس رفضت وزعل وراح يجلس بالجلسه مطنقر وساكت وسند اخذ الصغار وراوح وكايد مقهور على فهد الي دمعته بعينه  بس هو مايقدر على ديم.