انا احبك مابها زيف وخداع رغم الذي نخفيه والي نخافه

بارت ٥٢

"بغرفة كايد "
ديم  مخبيه يدينها وراها : فيه شي بس لاتزعل.
قطب حواجبه : ازعل ليه مسويه شي يزعل.
تنطق بإبتسامه بريئه : لا بس لاتزعل.
ابتسم  على خبالها وجلس على طرف السرير ونزل فروته : تعالي تعالي اجلسي.
جات وجلست وهي لسى مبتسمه اردف كايد : هاه وش مسويه .
مدت له الجوال: اشتريت لك هديه.
قطب حواجبه وعبس وجهه : ليه ياديم ليه.
تنطق برجاء : كايد لاتزعل تكفى مافيها شي اذا هديتك.
كايد: المفروض انا الي اهديتس مو انتي .
تناظره : تكفى انا جايبه لك هديه فيه احد يزعل من هديه.
ابتسم ولمها لصدره : خلاص خلاص ماني زعلان بس والله انتس كلفتي على نفستس بعدين من وين لتس فلوس لايكون من عمي
تنطق بتوتر : هاه  لالا ،،عندي حصالة اجمع فيها فلوس من زمان واليوم قررت اكسرها واهديك هالجوال لان جوالك مره قديم.
يقلب بجواله القديم : بس والله انه عزيز علي.
ديم: لاترميه خله ذكرى بس خذ ذا اخر شي نزل.
كان منحرج منها : والله اني استحيت منتس.
وقفت وباست جبينه : والله اني اتنفسك .
مسكها بيدها: تبينا نطلع نسهر معهم.
ديم: اي .
فتح الجوال : لازم اوديه محل بيرمجه لي.
ديم : مايحتاج انا اضبطه لك.
توسعت عيونه: اما ،،تعرفين؟؟
ديم : اي جيبه اضبطه لك برى
توجه كايد للباب واردفت ديم: كايد اذا ماتبي تقوله انه مني عادي قول جايبه لنفسك.
ابتسم وهز راسه بالايجاب: طيب تعالي.
ولبست حجابها وطلعو وكايد كان منحرج من موقف ديم ومبسوط فيها بنفس الوقت انو كيف فكرت فيه كذا
سند اول ماشافهم: اشوى جيتو .
تجلس ديم : شخباركم .
الكل رد مابين : بخير انتي شلونتس،، وبخير عساتس بخير.
الا سند: بخير لين شفناتس.
ديم : اننن مابيك تشوفني اصلاً .
جلس  كايد وجو البنات وجملا هالمره معهم وجلسو حول النار قام بتال وجلس جنب امه ودخلها معاه بالفروه وهمس باذنها: اكلتي الليمون والتفاح.
امه بنفس الهمس :  بكره جيب لي غيرهن.
انهار ضحك والكل صار يسال وش يقولون.
بتال : سر سر بيني وبين بنت مخلد وش تبون انتم.
كايد : اييييه لنا الله  امي ماتحب الا انت.
جملا: احبكم كلهم مير بتال بتال.
باس بتال راسها : يابعد راس بتال.
سند: يمه لاتزوجينه خليه عندتس يتحضنتس.
بتال: من قال اني ابي الزواج.
جملا وهي تناظر كايد : كنك عارف ياسند اني الي يعرس يلهى  عن امه.
كايد كان يحوس النار بالملقاط رفع راسه بضحكه : ااااافااااا يايمه والله ماحد يلهيني عنتس.
جملا بحده: اسكت اسكت بس خل عنك الهلس .
سند: اما يمه تغارين من ديم.
جملا حذفته بحجر : ما غار ماغار.
قام كايد جاء عندها يراضيها وهي تدفه ماتبيه يقرب منها جلس جمبها ولمها لصدره : والله انتس بقلب كايد الاولى يابنت مخلد.
هديل : امي ماتوحم الا  على هالضعيف.
التفت كايد : تتوحم علي ويطلع جني مثل سند.
ديم :  الحين امك بقلبك وانا وين.
لف لها بابتسامه: انتي؟  انتي القلب الي امي فيه.
جملا دفته : قم قم عني يالسلوقي.
هديل منهاره ضحك : ياعزتي لك ضعت في هرمونات الحوامل .
قام كايد مبتسم وجلس مكانه.
هديل كانت لابسه فروه مشتريتها لديره: ديم وين فروتك ليش مو لابستها.
ديم :  مابي البسها بالديره عشان كوكو يدخلني معاه بفروته.
رفع يده يفتح لها الفروه وقامت عنده : ترا امزح مستحيل اغار من امك وشي طبيعي حب الام غير.
يهمس يخاف تسمعه امه : والله انتس انتي الي حبتس غير .
طلعت الجوال الجديد وصارت تشتغل فيه.
سند: اوووخس جوال جديد.
ديم: جوال كايد.
بتال وسند انهارو ضحك .
سند: اخيراً عتقت جوالك هالضعيف.
بتال: مابغينا المفروض تحطه بمتحف .
ابتسم كايد : الديم جايبته لي هديه.
الكل صرخ : اوووووه ،، حركات،،
هديل : ياحليلها تعرف تفكر.
لفت لها ديم : انطمي بس لااعلم كايد عليتس وش مسويه.
هديل : انتي الي انطمي لا اعلمه عليتس.
ديم انخرشت : خلاص خلاص ماراح اعلم.
كايد همس باذنها: وش مسويه.
ديم  بنفس الهمس: ماسويت شي انت بس تبي تهاوش.
ابتسم : اكيد لا بس ماحب تسوين شي غلط من وراي.
ديم : مافيه شي هديل تمزح.
هديل شافته يحقق معها: هي ترى امزح بس قلت واجه الصياح بصياح تسلم.
طالعها ينطق : الله لايسلطتس على مسلم.
ديم : خذ صار جوالك جاهز .
سند: اما برمجتيه.
ديم : اي سهل سويته على ايميلي عشان اراقب تحركاته.
ابتسم وهو يدخله جيبه : ماعندي ولا تحركات ارتاحي.
سند : بجيب لتس جوال ترف سويه وخلي الايميل واحد مثل ماسويتي مع كايد.
ديم : كم تعطيني.
سند: وش اعطيتس ماعندي الا قمل ثيابي جوال ترف شحاذه من ابوي.
ديم : تذبح لي تيس وتعطيني الكبد.
سند : ابشري والله من تيوس كايد.
كايد : عشان ديم تبشر به.
ديم. : تسلم بس لا ابي من سند .
سند : عندي ارانب بكره اجيب لتس واحد.
ديم انهارت ضحك: مابي الارانب.
كايد: تبين كبد صدق.
ديم : لا ابي شي ثاني.
كايد : وشنهو.
ديم : خاطري بحليب ناقه.
الكل انصدم لان ديم ماتطيق شي اسمه حليب نياق .
كايد بضحكه: صادقه.
ديم: ايوالله .
هديل : لا صدق اثبتت انه ولد الشيخ .
ديم: ماقلت انه ولد شيخ عبث
سند: هذه ناوي يعضل وهو في بطن امه .
كايد : ابشري به والله بكره الفجر ينزل لتس اطلق حليب.
جاء سعود يشوفهم مجتمعين : وش عندكم سامرين لاتعزمون ولا تنادون.
قامت هديل تبوس راسه : انا جيت يبه.
ابوها : حيا الله بنت الرياض.
هديل : لا يبه انا بنت الديره.
سند: يبه خلك من هديل وتعال لم مرتك الي ناشبه لكايد عند مرته.
جملا بحده : سند انت ماتعرف تقول كلام زين.
سعود جاء يم جملا وقام بتال من جنب امه وترك لها الفروه سعود قعد مكانه ولم جملا يده اليمين وباس راسها : هاذي بنت مخلد هاذي ام العيال.
العيال صاحو اول ماشافوه يلمها.
لحفهم  بتال بالفروه وراح يقعد عند سند الي لحفه معاه بفروته : ايييه الله عطاك سنتين بعدها ادخل احمر الخدين معي.
ابتسم : يصير خير منه لاوقتها فيها فرج.
سعود: الا يابتال ماتبيني اجوزك.
بتال: لا يبه انا صغير وش لي بالعرس الحين.
كايد : مانك بصغير تزوج جب لك ولد يكبر معك.
سعود: ايوالله نبي نشوف احفادنا انا وبنت مخلد.
سند : انا بملا لكم الحوش ذا وراعين.
كايد: الحوش لي انا وعيالي.
سند: والله لحط لي  لغرفتين مثلك هناك بزواية الحوش الثانيه.
بتال : جيبو وراعين وانا الي ابلش.
ديم : تعبت بدخل انام.
قام كايد : خذيني اجي معتس.
سند وبتال مسكوه : اقعد اقعد تراها ماراحت لاهلها الا امس .
كايد بضحكه : برقد يامسلمين وراي دوام.
بتال فكه : خله خله صدق دوامه سبعه.
فكه سند وراح كايد : تصبحون على خير.
الكل: وانت من اهله ،، وانت بخير.
ودخل غرفته ينام.