انا احبك مابها زيف وخداع رغم الذي نخفيه والي نخافه

بارت ٥١

" الصباح "

صحت لطيفه منهاره ومقهوره ومن امس في غرفتها واكلها يوصلها عندها دقت ديم الباب : يمه انا جيت.
كانت امها تبكي وقتها وديم ام دميعه بس شافتها تصيح تجمعت دموعها فتحت امها يدينها لديم الي ماصدقت جتها ركض وحضنتها وانهارو بكي : يمه تكفين لاتصيحين .
تنطق بقهر : سامحيني يايمه لهيت عنك وعن اختك خذتني الدنيا واشغالها عنكم وعن تربيتكم كبرتو بعيد عني وحنا بنفس البيت حتى يوم سقطتي ماجيتك ولا وقفت معك .
كانت  ديم تشم ريحة امها الي يااااااه وش كثر مشتاقه لها ولحضنها : يمه انا ماني زعلانه والله انا احبك انتي امي حتى لو ماكنتي قريبه مننا بس عمرك ماحرمتينا من شي ولا رفعتي يدك علينا بيوم ،، واكيد انا معك على ابوي والي سواه .
شدتها لحضنها تنطق :  يابعد قلبي يابنتي.
دخل ثنيان على اصواتهم بإستغراب ولا سبق وشاف امه كذا منهاره ومكسوره : يمه انتي تصيحين .
افتحت يدها الثانيه له وحضنته: تعال يايمه تعال خليكم حولي ياثنيان انا ماني قويه الا فيكم لاتقفون مع الغريب عليه
باس يدها : والله اننا معك يمه انتي امنا جنتنا ونارنا.
وحاوطها بيدينه وصارت هي الي تبكي بحضنه: عيشني كل هالسنين بخدعه وكذبه .
يمسح على ظهرها : ماعليه يمه والله انك الاساس ولو ماتبينا نتعامل معهم ابشري والله مانتعامل معهم بس لاتنهارين ماعهدتك الا شامخه وراسك سماء.
وبعد كلام كثير قالوه لها هدت .
ثنيان : شرايك اخذك مشوار.
امه : لا والله مالي نفس.
ديم : الا خذها فطرها .
ثنيان : بروح البس واجيك.
وطلع وديم ساعدت امها تبدل وتلبس عباتها ديم بابتسامه وتردد : يمه انا حامل.
حضنتها وهالمره من كل قلبها : يابعد قلب امك الله يجيبه بالسلامه لك وله.
تبتسم : يعني مانك زعلانه.
تبتسم : لاوالله ماني زعلانه الا فرحانه .
حضنتها ديم تبوسها بصدرها ودخلت شوق: وانا مالي حضن انا وكرشتي.
فتحت امهاويدها الثانيه ودخلت شوق مع ديم بحضن امهم وكان هالحضن كفيل انه ينسي ديم وشوق جفا امهم وقساوتها طول هالسنين فرقهم دخول ثنيان : يالله مشينا.
شوق: وين .
ديم : بيطلع غير جو لأمي.
شوق : زين
طلعو ثنيان وامه وشوق وديم راحو ركض لهديل ولا صحى هديل الا نطتهم معها فوق السرير قامت هديل : يا الله صباح.
تبتسم ديم : الله يادنيا نسينا يوم جدي يصحيك قبل الفجر تسوين له فطور.
تتمغط بكسل : ومات جدي عساك ماتلحقينه ،، ممكن انام.
ديم بدلع : لا ولد اخوك يرفس ببطني يبي عريكه .
تمسك هديل راسها : الله اكبر الي يرافس تراه باقي نتفه.
ديم : وش عرفك انتي ذا ولد الشيخ كوكو.
ذيب ذيب يرفسني من اول اسبوع.
وانهارو الثلاثه ضحك.
تنطق هديل: الذيب ماياكل عجينه يبي له لحم.
ديم: اي البارح اكل لحم اليوم يبي عجينه وش دخلك انتي.
رمت  هديل المخده عليها : دام وش دخلني مالي دخل بالعريكه بعد.
تاخذ ديم جوالها : انا اعلمك كيف تسوين عريكه طرق.
هديل  بصدمه وبابتسامة : بنت تعقبين الا طرق عاد.
اتصلت  بكايد وحطت مكبر الصوت اول مافتح الخط : لبيه ياديم قلب كايد.
تنطق بدلع : كوووكوووو شوف هديل.
هديل واقفه تناظرها بصدمه .
كايد: وش مسويه هديل.
تنطق : فهودي يبي عريكه وهي عيت تسوي لي .
كايد : ماعليك بتسوي وهي ماتشوف الدرب.
هديل بضحكه : ماعندكم احترام انتم قلو  لو سمحتي طيب.
كايد: هديل والله اني مشغول سوي لها  الي تبيه.
توسعت عيونها : الله اما الي تبيه يمكن تقول طبي من السطح.
كايد ببرود : عاد الله عينتس تطبين.
تنطق بغبنه : قفل قفل ياكلب والله لعلمك انت وياها.
كايد: المهم سوي عريكه لاتقعد بخاطر الديم.
تناظرها تزفر : طيب عشانك بس وعشان ولد الشيخ كوكو ولا امه ماهي وجه حشيمه.
ديم كانت مبتسمه قفل كايد ولفت هديل لديم الي قالت : طرق .
هديل : ااااخ ياربي وش ذالعقوبه صدق.
شوق وهي تضحك :  هديييييل .
تنطق هديل بحده : خييير.
تنطق : بنت خالك تبي  كرك.
تتوجهت هديل  للباب : لا صدق بروح اطب من السطح.
ومسكوها وهم يضحكون: تعالي تعالي.
ديم :  انا ابي قهوتك تعرفين عاد ولد  الشيخ مايشرب قهاوي الشغالات.
انهارت  هديل ضحك هالمره : ابدل واجيكم جعل ولد الشيخ يطلع عيونك.