انا احبك مابها زيف وخداع رغم الذي نخفيه والي نخافه

بارت ٥٠

شبو النار وتجمعو حولها العيال وهديل .
بدا سند يغني : خلي وراء العرق والوادي تكفون مرو بنا صوبه يازين دله وبرداي عند الغضي داعج عيونه.
تبتسم هديل بخبث : الا  على طاري الغضي الي داعج عيونه بعلمكم وش شفت.
سند بحده : هديل والله لقص لسانتس.
كايد : علمينا بس وش شفتي.
تناظر سند : احمر الخدين بغت تنوكل خدوده.
صار سند يرمي عليها حجر صغير وكايد يمسك يده واردفت هديل: دخلت عليها الا سند عاض خدها.
بتال انهار ضحك
كايد بضحكه : لالا اما عاض خدها.
سند: والله اني نويت ادميها بس دخلت علينا ذالمصروعه وعفستنا.
ضربه كايد على كتفه: ماهوب كذا ياسند.
سند: والله لاكل خدها والايام بينا .
بتال: ولد انت صاحي.
ينطق : هذا حلم عندي اني اعضها بخدها .
كايد يناظره بصدمه وبتال ميت ضحك.
جاء خلف وجلس :هاه سند كيف القلب.
يضرب صدره : عشره على عشره.
ابتسم خلف : الله يوفقك ويرزقك الذريه الصالحه.
سند: امين يارب .
جات ديم ومعها ثلاثه اكياس وجلست : سند جبت لك هدية ملكتك ان شاء الله تعجبك.
لفت  هديل : اووخس يلي جايبه هديه وانا ماجبت.
سند: تعلمي منها السنع على كثر ماحارشتها جايبه لي هديه.
ابتسمت تمدها لكايد : هاذي لكايد لانه زوجي مقدر اخليه وهاذي لبتال حرام مابقى الا هو.
خلف بمزحه : وانا.
كايد يعدي هديته على خلف :  افا والله سم .
ديم: لا كايد لاتعطيه هديتي.
ناظرها  كايد بحده وقال خلف: امزح والله مابي شي.
كايد: يارجال خذها والله ما تغلى عليك.
قام خلف : انا بنام تصبحون على خير .
كايد: ديم ليش قلتي كذا.
تنطق بحده : ياخي ماحبه مو غصب ماحبه ولا احب سوير حقته.
سند: ماعليتس  منهم وش الهديه.
ديم بعباطه : جبت لك مصحف.
سند : ليه بدخل الاسلام انا.
انهارو ضحك وقالت ديم: امزح جبت لكم ساعات براند ،، ماركه يعني اصليه تجلس معك لين تصير شايب .
يبتسم : والله انتس كفو اول مره تسوين شي زين.
ديم بضحكه: عشانك عريس بعديها لك.
قضو الليله سواليف وضحك وطقطقه

"بعد شهر،،
كان  كايد بدوامه جات ديم عند جملا : خالتي بطني يوجعني عندي مغص بالمعده ومن الصباح بس ارجع.
جملا الي نفس وضع ديم : الظاهر انه فيروس منتشر والله اني مثلتس من يوم اصبحت مير اجهزي بنروح للمستشفى انا وياتس مع سند.
ديم: طيب بروح البس.

"فلاش باك "
بليلة ملكة سند  قبل شهر دخلت شوق وشاهر بيت مخلد.
شيخه : حياء الله شوق.
شوق: شوق زعلانه منك.
شيخه باستغراب: ليه.
شاهر : ليه ماقلتو لها انكم بتسوون زفه لجملا وهدايا.
شيخه: قلنا لك ياشوق.
شوق: لا ماحد قال لي.
شيخه : الا ياقلبي بالقروب اتفقنا على كل شي هناك.
شوق تناظر شاهر وبرد وجها وهي تتذكر انها القروب حقهم مؤرشف : هاه اما مانتهبت يالله حصل خير .
وتدخل غرفتها ويلحقها شاهر : شفتي قايل لك خواتي مايخلونك.
شوق : عاد ماني فاضيه للقروبات الحق وراهم واقراء.
شاهر: بس لا تشرهين عليهم والشرهه عليك انتي .
شوق : خلاص تكفى بنام تعبانه مالي حيل اجادل.
"بالوقت الحالي "
دخل شاهر عليها تفكر بخبصتها ليلة الملكه : الا شاهر تتوقع شيخه للحين زعلانه مني.
شاهر : من قال انها زعلانه صار  سوء تفاهم وانحل.
تبتسم : الصدق انا احبها .
شاهر : حتى هي تحبك .
تأشر له : جيب المرطب ودهن لي كرشتي.
ينطق مبتسم: انا ادهنها.
تنطق : اي بشويش على تموت بنتي.
يرد بضحكه : لا لا تخافين بنتك هي بنتي.