انا احبك مابها زيف وخداع رغم الذي نخفيه والي نخافه

بارت ٤٦

زاد الالم على ديم اتصلت بكايد: كايد وينك.
فهم من صوتها ان فيها شي اول مره تكلمه كذا بجديه : لاه علامتس فيتس شي.
ديم: انت وينك .
كايد داخل مع باب الحوش : جيت افتحي الباب .
بكت تنطق : مقدر .
فتح الباب بالمفتاح الي معاه بميدالية سيارته ودخل بخطوات سريعه يشوفها على السرير : ديم علامتس.
تنطق وهي تبكي بألم : بطني يوجعني .
فتح الدولاب ياخذ عبايتها : قومي قومي اخذتس للمستشفى.
قامت معاه يساعدها تلبس وشالها لسياره يقابل بتال : ودو امي وخواتي انا مقدر .
صد ينطق : طيب طيب .
ودخل عنده امه وخواته ولا قال لهم شي اما كايد اخذ ديم للمستشفى وهي طول الطريق تتألم وتبكي واول ماوصلو دخولها الطواري وكايد يحوس برى ينتظر خبر وبعد وقت طال على كايد جاء الدكتور: الحمدلله على سلامتها لكن الجنين الله يعوضكم .
انقهر كايد على ديم اكثر من قهره على الجنين الي راح لانه يدري انها بتنهار: دكتور وش السبب.
الدكتور: في التحليل اتضح لي انها ماخذه شي سبب لها هالمغص والاجهاض.
قطب حواجبه: شي مثل ايش.
الدكتور: غالباً اعشاب طبيه .
هز راسه : طيب اقدر اشوفها.
الدكتور: تقدر تفضل.
دخل كايد وكانت ديم منهاره بكي : حبيبتي الي خذاه بيجيب غيره.
تبكي بحرقه : انا السبب.
قطب حواجبه: كيف انتي السبب.
بدت تحكي له.
"فلاش باك"
العصر عند ديم الي دخلت وشافت ساره النفاس تاخذ اعشاب وهي تكلم ريم ويبدو انها شايفه ديم وتبي تسمعها وفعلاً سمعتها ديم: هاذي الاعشاب ياريم امي مسويتها لي تجنن ترم العظم وتقويك تخيلي من اول ماحلمت وانا اخذها والدكتوره كل مره تسالني وش تاخذين صحة الجنين ممتازه ووزنها كبير ،، عاد انا اخذ ملعقتين كبار على كوب حليب شي شي .
ريم الي قطبت حواجبها واشرت لها ساره ان ديم تسمع وكملت ريم الكذبه: اهاااا ايه ايه يمدحونها ذالاعشاب.
ساره حطتها على جنب وطلعو من المطبخ وديم دخلت وخذت من اعشاب ساره بسرعه قبل تطلع.
___
كايد انصدم بس سمع هالكلام: انتي متاكده من ذالكلام.
تمسح دموعها : اي بس مين بيصدقني ساره ماعطتني اياها بالغصب انا من بعدها وعندي مغص.
ازفر شهيقه بقوه : الله يهديتس بس ماتشاورين احد ماتنشدين احد امي وخواتي عندتس.
بكت بحرقه : ماكنت ابي احد يدري اني اخذتها من ساره،، انا قتلته قتلت ولدي ياكايد قتلته.
جلس عندها يمسك كفوفها : انتي اخذتي ذاللي اخذتيه ونيتك تنفعين به ولدتس ماكانت نيتس تطيحينه.
انهارت اكثر: الحين خلاص ماعاد فيني نونو.
قرب منها ولمها لصدره وهي تبكي ولا وقفت بكي ابد وكايد مقهوره منها وعليها.

"بيت سعود "
بعد ما انتهت الملكه دخلت هديل للمجلس بالعبايه تاخذ اسر وتشوف ثنيان لابس بنطلون وهودي واسع و منسدح على ظهره ويلعب بجواله واسر مختفي.
هديل بصدمه : وين ولدي.
لف يطالعها كان مدخل اسر بينه وبين ملابسه بالهودي كان نايم على بطنه
على صدر ابوه ثنيان سحب الهودي ويوري هديل وبصوت خفيف : نايم .
خقت على المنظر وبابتسامة عريضه: يامجنون كيف خطر على بالك تدخله هٍنا.
ثنيان : عيى ينام مدري وش فيه.
هديل بدلع: يمكن فاقدني.
ثنيان : مو بس هو الي فاقدك .
نزلت تبوس خد اسر وباس ثنيان خدها وشعرها الي بوجهه : اوووخ وش هالروايح الحلوه .
هديل ابتسمت بخجل: شيل ملابسك باخذه.
شال الهودي وهديل كانت مستحيه منه وهي تشوف بطنه وصدره بدون ملابس مدت يدها وشالت اسر: تصبح على خير.
ثنيان: اي خير وديه وتعالي بشوفك بالفستان.
ابتسمت : طيب دقايق بس اوديه.
ثنيان : لاتطولين انتظرك.
تنطق : يالله جايه.
وراحت تودي اسر الي كان دافي بصدر ابوه هديل باست خده وهي تشم ريحة جسم ثنيان بخده وكانت مبتسمه: عنود .
عنود الي رجولها مكسره: هاه.
هديل: بخلي اسر عندك شوي ثنيان يبيني.
عنود: تكفين رجولي مكسره .
ترف: جيبيه انا اخذه .
هديل : ياحلوك بس جعل سند يعرس عليك.
ترف ابتسمت بخجل بدون تعليق ،، عطتها هديل اسر وراحت ركض لثنيان الي كان ينتظرها.
"بالمستشفى "
ديم بس تصيح وكايد يهون عليها بس مافيه فايده صاحت الين صار جوفها يرجف وتتنهد هنا دخلت جملا الي جابها سند بعد ماكلمه كايد وبس شافت خالتها الي قالت : ديم علامتس ياامي انتي.
حضنتها وانهارت صياح من بشكل اقوى وكايد قام طلع لسند وهو شوي ويصيح معها.
جملا : خلاص يا امي انتي الله الي عطاك والله الي اخذ انا اجهضت ثلاثه واحد قدام كايد واثنين بعد سند والحمدلله رزقني الله وعوضني.
تنطق بحرقه : خالتي انا اكلت اعشاب هي الي طيحته هو ماطاح لحاله انا طيحته.
تحضنها : ماعليه لو فيه خير لتس ماخذاه الله منتس ماهو مكتوب لكم يايمه وتراه يشفع لتس يوم القيامه عند رب العالمين لاتحسبين الله ياخذه بدون مايعوضتس.
ديم حضنت خالتها بقوه وهي تصيح نياح وبكي يسمعه سند اخر السيب : احس اني مخنوقه احس اني بموت ماقدر اتحمل الالم الي بقلبي تكفين ساعديني تكفين.
جملا نزلت دمعتها الي تحاول تخفيها عن ديم وهي تمسح على ظهرها : بسم الله عليتس وعلى قلبتس .
وبدات تقراء عليها وبعد وقت طويل عطوها مهدي هدت ديم و تعبت من الصياح لكنها سكتت وهي بس دموع تنزل انسدحت على جنبها الايمين ونامت وجوفها يرجف حتى بعد نومها دخل كايد الي كان مقهور عندها.
ينطق : يعطيتس العافيه يمه تعبناتس معنا.
حضنته وكان كايد بحاجة هالحضن الي طال بدون كلام : رح وانا انا بقعد عندها.
يهز راسه : لا يمه بجيب العنود عندها انتي رحي مع سند ارتاحي وعشان صقر بعد .
امه : لا يايمه انا بقعد معها العنود ماهيب عارفه لها.
كايد: يمه نعلم امها ولا نخليها .
امه: الليل سرا لا تفجعهم بكره كلم عمك وعلمه وهو عاد كيفه هو وياها ان علمها وان قعد.
باس راسها : الله يخليتس لكايد يابنت مخلد.
ابتسمت تحب لما ينادونها عيالها بنت مخلد: ويخليكم لي ويرزقك ويعوضك ديم تراها صغيره لاتزعل منها جاهله وامها مافيها خير ولا فيه بنت ماتعرف ان الاعشاب ماهي زينه للحامل.
تنهد : والله ماني زعلان منها بس اعرفها تتعب على ماتحمل يايمه .
امه : ماعليه بتحمل ان شاء الله.
باس راسها: الله يعين بس ، انا بمشي وبجيب لتس ملابس ولحاف المستشفى بارد.
جملا: خل بتال يجيبه انت تعبت.
كايد: لا لا انا بجيبها وبجيب لديم ملابس .
هزت راسها وطلع يسحب رجوله مقهور ويفكر بديم