انا احبك مابها زيف وخداع رغم الذي نخفيه والي نخافه

بارت ٤٣

"بيت محسن"
خذت اسر وطلعت غرفتها ونيمته
دخل ثنيان يناظر الاكياس على السرير مد يده يشوف لكنها سحبت منه الكيس : لا تشوف .
يبتسم : ليه .
هديل :  بكره تشوفه وانا لابسته.
سحبها بيدها : شرايك بكره نروح اوتيل بعد الزواج.
بعدت تشتت انظارها عنه : لا مقدر اخلي اسر .
يبتسم : طيب خلاص الي تبينه يصير .
خذت اغراضها وراحت لدولاب وهي ماتدري وش قاعده تسوي من كثر ماتوترت.
ثنيان مسكها بيدها: هدييييل خلاص انا اسف ماكان قصدي انسي .
جلست على السرير بتوتر وهو طلع : بروح انام تبين شي .
هديل تناظره : لا مابي شي تصبح على خير .
ثنيان: وانتي من اهله .
طلع وهي قفلت الباب وبدلت ونامت وهي مرعوبه من فكرة تقرب ثنيان منها .
"بالديره "
سند راجع هو وبتال من العزبه: كيف خليف معك .
بتال : خلها على الله بس عل كبدي عل قلتو بتال بيتحمله حطوه معه وبتال بلش.
سند: انا لو يحطوني معه امسى الليل وانا وياه نتجالد.
ينطق : انا لا يارجال الي مايسويه اسويه واسكت .
قاطعهم دخول كايد شايل ثلاجه صغيره يادوب تشيل خرابيط ديم : تعالو عاونوني انقطع ظهري.
سند تقدم وبعده بتال: انا بعاونه انت قلبك يوجعك.
سند: قلبي طيب خليتوني مريض غصب.
يناظره بتال : وش ذا .
كايد : ثلاجه لديم.
ابتسم سند: صدق انها ثلاجة ديم.
التفت له كايد وبابتسامة : اكرمني بسكوتك .
"بالرياض"
اليوم الثاني بعد ماكشخو  ونزلو كان ثنيان ماسك ولده بعد مااصرت هديل يبقى على راس امه .
يطالع ثنيان هديل الي كانت فتنه طالعها فوق لتحت يناظر فخذتها الي كانت طالعه هديل بس شافته سحبت فستانها تخبيها ابتسم يحط ولده بحضن امه يقوم عندها شوق انسحبت : بسبقك لسياره .
مسك هديل بيدها  ياخذها لصالة الجانبيه هديل كانت ودها الارض تنشق وتبلعها حزتها من كثر ماهي ذايبه خجل : تاخرت على شوق.
ثنيان : خليك من شوق وطالعيني .
طالعته وصدمها لما قبلها بدون اي كلام وكانت هاذي اول قبله بينهم.
بعدت وهي يالله تتنفس من كثر ماتوترت بلعت ريقها : خلني اروح.
ابتسم : طيب واسف لو ضايقتك.
ابتسمت  تبلع ريقها : لا ماضايقتني.
ابتسم فرح كثير بس سمع وشاف الابتسامه على محياها : يعني احجز الاوتيل.
هزت راسها بالايجاب وطلعت تركض متوجهه للباب وثنيان يطالعها ينطق بفرح :  يس.
ماهو مصدق انها وافقت كانت هاذي اكثر لحظات حياته سعاده هديل الي تشوفه مجرد ولد المدينه المراهق النسونجي المغازلجي صار بعيونها كل شي وبيصير زوجها بشكل رسمي كان ينتظر الدقايق الي صارت ساعات تمشي اتصل بالاوتيل ونسق معاهم لعريس وعروسته اما هديل كانت بقمة سعادتها وهي تشوف ثنيان كيف نضج وتغير بس عشان يكسبها كانت طول الليل تفكر كيف بتقضي هالليله معاه ولاول مره بيكونون لحالهم لفت لشوق: شوق فيه شي .
شوق: وش
هديل: ثنيان يبي نطلع اوتيل واسر.
قاطعتها : ماعليك انا بنام الليله عنده روحي استانسي واسوري حبيب عمته عندي لاتشيلين هم ابد
هديل: طيب مشكوره.
شوق: العفو.

"بالديره"
عند ديم الي بس وجهها بذا الثلاجه وتاكل ٢٤ ساعه .
كايد : بنت وش فيتس اكلتس كله خرابيط.
تفتحت الشوكلت وتاكل ومفتوح قدامها موزه تنهدت: وش اسوي نفسيتي تعبانه .
يبتسم : افا من ايش ياديم قلب كايد.
تزفر شهيقها: ابي احمل مدري كيف.
انهار ضحك : الحين بنشدتس لو حملتي وجبنا ولد وشلون بتهتمين فيه انتي ماتعرفين شي.
ديم :  سهله انا اجيبه وانت تهتم فيه.
كايد كان يضحك وهو ذايب فيها : لا لا اذا مابتهتمين فيه لاتجيبينه.
تنطق بحماس : خلاص من بكره اتعلم كيف اهتم فيه باخذ كورسات عند هديل.
كايد:  بعرف صدق ليه تخلطين موز وقهوه وشوكلاته .
ديم : خذ جرب .
كايد: لا لا تكفين بتغثني.
ضرب العناد براسها : ليه يعني انا وسخه والله لتاكلها .
يبتسم : محشومه ماقلت وصخه بس يعني.
ديم: بس ايش وسخه صح.
اخذ الموزه من يدها واكل شوي واخذ شوكلت وشرب قهوه : خلاص ارتحتي.
انهارت ضحك : شاطر كوكو الي يسمع الكلام .
يبلعها : قمي فرشي اسنانتس وتعالي نامي.