انا احبك مابها زيف وخداع رغم الذي نخفيه والي نخافه

بارت ٤٢

"الصباح "
كايد  نايم بغرفته وديم نامت عند شوق داخل اندق الباب  فتح عيونه وقام بكسل يسحب رجوله وفتح الباب وكانت ديم  تصيح وحضنته يناظرها باستغراب وعدم استيعاب: فيتس شي.
ديم وهي تشاهق وتصيح :  شفت كابوس شفت  فيك حلم مو زين.
ابتسم : وش حلمتي.
ديم بالقوه قالته وبعدها انهارت صياح : حلمت انك متت.
ماسك ضحكته : ليه تصيحين طيب هذاني قدامتس مافيني الا العافيه.
ديم : خفت خفت.
يرفع راسها يناظر وجهها الي مفقع نوم وصياح : باقي مزاعلتني.
تهز راسها بالنفيي : لا سامحتك خلاص.
كايد : زين الله يجزاء هالكابوس خير
سامحتيً كوكو خلاص .
انهارت ضحك تسمعه اردف كايد: كم الساعه.
ديم: ٧
سحبها بيدها وقفل الباب: يمدينا ننام ساعه زياده.

"بيت مشعل"
عرف بالعشاء الي جابه سند: ومن قال له يعشيكن هاه.
فاطمه بحده : مشعل انت علامك عيال سعود طول عمرهم مثل عيالك خلاص لاتزوج ترف وسند بس لاتحاربهم تراك انت الخسران طول عمرهم ماسكين شغلك وسند ساكت لك عشان ترف ماهوب ذالٍ منك وانت خابر.
مشعل قعد يهدي من نفسه بعد كلام فاطمه الي كان صدق .

"بيت سعود"
صحى  ثنيان متاخر عيونه حمراء وارسل لهديل يسالها عن آسر: صباح الخير ياشمس سماي وقمرها.
ابتسمت وهي تشوف رسالته : صباح النور .
ثنيان : بس كذا.
هديل: حالياً اي بس كذا.
ثنيان : يالله امري لله راضي ،، كيف اصبحتي.
هديل: الحمدلله زينه.
ثنيان : واسر كيفه.
هديل: نايم ياقلبي .
يبتسم : قلبك انا ولا هو.
هديل: اكيد هو .
ثنيان : ههههههههههههه طيب فيه فطور .
هديل: ابشر .
ثنيان : انا لحالي بالمقلط تعالي لي.
هديل: اجهز الفطور واجيك.
ثنيان : يالله انتظرك.
وقام يغسل ويفرش اسنانه شويات وجات هديل ومعها اسر : صباح الخير بابا ثنيان.
ثنيان باسه وباس خد هديل : صباح النور ياروح بابا ثنيان .
هديل : اقعد وامسكه ياويلك توقف فيه مسموح لك تمسكه وانت جالس.
جلس يمسكه : يالله كذا .
هديل : اي كذا الفطور جاهز بجيبه واجي.
ثنيان: وين ابوي وعمي والعيال.
هديل: راحو للعزبه يقولون بنتعشى هناك الصدق ماودي اروح عشان اسر.
مسكها بيدها ويسحبها بقوه جلست هديل : يوه ياثنيان وش هالجلافه خلعت يدي.
ابتسم وهو يبوس يدها: ياحظ اسر فيك وفي قلبك وحنانك .
توسعت عيونها: وش فيها عيونك كذا حمراء.
ثنيان وهو يفركها: عشان قربت من النار البارح وفيني عدسات.
تنطق بدون تركيز : ياروحي دقيقه عندي مرطب للعين.
ابتسم ومسكها بيدها: يا ايش وش قلتي
هديل باستغراب لانها ماكانت مركزه : مافهمت وش تقصد.
ثنيان: قلتي ياروحي.
هديل: لاتفرح هالكلمه على لساني  اقولها حتى  لصخلة امي.
انهار ضحك وهي قامت تجيب الفطور: والله انك حياه ياهديل.
ويطالع ولده الي كان صاحي ويناظر ابوه : هُنا الديره.
ماطولت هديل وجات وتحط الفطور : هاك سم بالله وافطر ولاتروح للعزبه عشان عيونك وخذ هاذي القطره افطر واحط لك منها.
مد لها اسر وحطته على جنب : على فكره اسوري ماعنده حليب .
ينطق: ابشري انت واسوري افطر واروح اجيب له.
هديل: بتال جاب له وعيى ياخذ مني فلوس.
ثنيان: خلاص انا اكلمه.
هديل: اخواني زعلانين منك.
يميل فهمه بعدم اهتمام : بس كايد .
هديل: ياعمري كايد ،، تراك يعني سويت شي كبير بحقهم وبحقي انا .
ثنيان تنهد: والله زواجي من امل كان نزوه غلطه.
توسعت عيونها : لاتقول كذا قدام اسر شوف وش زينه كيف يناظر والله انك اجمل شي صار يامامي انا .
يبتسم : انا ماعلي من احد اهم شي انتي سامحتيني .
ابتسمت : انا سامحتك ماني زعلانه منك ابد خلاص اسوري طيح كل الزعل من راسي شوفته خلتني انسى كل الزعل والعتب .
ثنيان : يعني انتي جالسه معي عشانه.
هديل تناظره وتناظر اسر : ايه .
يبتسم : وانا راضي المهم انك تجلسين معي عشان اسر ولا عشان غيره.
هديل  تشتت توترها ونظرات ثنيان لها : افطر  افطر عشان احط لك قطره بعيونك.
بدا ياكل وهديل تلعب مع اسر الي يضحك ويكاغي بس يشوفها وكأنهم ام وطفلها وثنيان يتأملهم.
هديل : اكلتنا بعيونك هلي كنها اشارة مرور اليوم.
ثنيان انهار ضحك ماهو متعود على هديل كذا معاه وبنغزه ينطق : عطينا الضوء الاخضر ننطلق.
تناظره بعبط : حريمتك اعطيك الضوء الاخضر بقوم اروش اسوري امي تقول بعد الحراره روشيه عشان تطلع من جسمه.
ثنيان: طيب .
قامت هديل وهو كمل فطوره .