انا احبك مابها زيف وخداع رغم الذي نخفيه والي نخافه

بارت ٤١

.
ثنيان: لا لا غرفة امل الله يرحمها.
هديل : لا ولدي يبقى معي.
ثنيان : مو انتي بتذاكرين خليني اخذه عنك.
هديل بترجي: لا تكفى اخاف عليه .
وتجي عنده تاخذه منه : آسر امانه عندي.
ثنيان بابتسامه: هدوله تراني ابوه.
تميل فمها : لاتزعل بس انا ما اوثق فيك.
قطب حواجبه بزعل: يعني معقوله بضر ولدي،، عموما تصبحين على خير.
وطلع ينام بغرفة امل.
وهديل لفت آسر ونيمته بعد تقريباً ساعه وطلعت وهي تشوف اسر بكاميرا جوالها اذا صحى ترجع له ونزلت تحت بالحديقه تذاكر بعد ماسوت لها ثلاجة قهوه سعوديه كان الجو بارد شوي جلست هديل تفكر كيف بتترك اسر بعد ماتخلص دراستها وترجع الديره يقطع تفكيرها ثنيان الي لحفها بوشاحه وجلس جنبها لفت له هديل: ليش جيت مو كنت زعلان مني.
دخل معها بالوشاح يحاوط خصرها بيده هديل بعدت يده : لاتلمسني.
ابتسم : ليه تختبصين .
تقطب حواجبها : ثنيان انا جايه اذاكر لحالي بسرعه قبل يصحى آسر.
بعد يده عنده ياخذ كتابها ويفتحه : وش الي مو فاهمته بشرحهه لك.
هديل طالعته : صدق.
ثنيان: ايه صدق.
عدلت جلستها تتربع وتفتح الصفحات وتاشر لثنيان الي كان يناظرها مايناظر الكتاب هديل لفت له وبابتسامة: ثنيان الكتاب هنا مو بوجهي.
ثنيان : بس وجهتي بوجهك.
هديل : خلني اذاكر ساعدني ولا روح نام.
عدل جلسته يبدا يشرح لها وبعد نص ساعه: فهمتي.
هديل وهي تضحك واول مره تضحك كذا مع ثنيان وتاشر له بلا : لا
ابتسم : اعيده لك اول شي تقسمين المسألة جزئين كذا يعني.
وبدا يشرح لها : هاه فهمتي.
هديل بحماس : ايه فهمت مره سهله .
ثنيان : سهله اذا فهمتيها سهله.
تبتسم: مره شكرًا تقدر تروح تنام.
ثنيان : يعني خلاص كذا.
تهز راسها : اي خلاص واذا صادفت شي مو واضح لي كلمتك.
باس خدها بسرعه وقام وهي سكتت ،، ولفت له : ثنيان بشويش وانت طالع عشان اسر .
رجع جلس وانسدح على فخذتها : شرايك انام هنا .
هديل كانت متوتره : الارض بارده لاتنسدح عليها بكره تمرض وابلش فيك مع اسر قوم سريرك ليه العناد.
ثنيان : ابشري قايم.
وقام وطلع : تصبحين على خير .
هديل : وانت من اهله .
استانس انها متغيره معه وشوي شوي بدت تفك من شدتها معاه
تنهدت بس راح : اووووف هديل وش فيك عندك هدف هو دراستك وبس .
"بالديره "
"بغرفة ديم".
جملا : ليه وانا خالتس تعذبين نفستس وتعذبين كايد معتس ليه تبين الحمل الحين انتي باقي صغيره والعمر وراتس وعندتس مدرسه .
ديم: خالتي كوكو يبي يصير اب.
جملا: هو قاله لتس.
ديم : لا بس عيونه تقوله.
جملا : الله يهديتس بس ترى مابيخرب عليتس الا حنتس وزنتس الي يسمعتس يقول لكم عشر سنين متزوجين وانتم حتى سنه مامرت .
ديم : خالتي شوق حملت وساره بعد ليش انا ماحملت.
جملا: ساره عمرها ٢٣ وشوق بعد انتي بنت ١٦ سنه وش تبين بالحمل وراتس مدرسه.
ديم: اخاف كوكو يتزوج عليه.
جملا: ياويل جملا ويلاه يتزوج صاحي ولا مجنون كايد عاقل ماهو من الريجيل الي يتخبطون مايدرون وش يبون هو يبيتس انتي قال لي مابي عيال الا من ديم بعدين ماتدرين يمكن البلا فيه هو ماهو فيتس انتي.
ديم بخوف : لا بسم عليه كوكو مافيه شي.
جملا عرفت انها تتكلم مع بزره وفتحت يدينها تعالي تعالي .
حضنتها ديمً : الرجال مايتزوج الا اذا مرته نكديه كايد اخر فتره ماصار يرتاح معتس كله صياح وبكي.
ديم مسحت دموعها : لا خالتي تكفين .
جملا: هيا قمي غسلي وجهتس وتعوذي من ابليس ولا عاد تطرين له الحمل ابد.
هزت رأسها بالإيجاب وقامت تغسل وطلعت جملا ودخل كايد الي كان يحوس برى ينتظر امه : هاه يمه وش قلتو.
جملا: وش تبي بلي قلناه ادخل ولا تنشدها عن شي ابد.
هز راسه بالايجاب ودخل عن ديم الي حضنته اول مادخل وهي تناظر وجهه : خلاص مابي احمل.
كايد استغرب من كلامها وهو يدري ان هالكلام غير عن الي تحسه بس اكيد امه لها يد بهالكلام حاوطها بيدينه : انا مقدر مابي عيال لاني ماقدر اربي اثنين .
ديم طالعته: مين الاثنين.
كايد: انتي وولدنا لو جاء خل اربيتس واكبرتس عشان تساعديني نربيه سواء.
ديم ضحكت تحضنه : ابي اندومي .
كايد : ابشري وش بعد.
ديم: وتاكل معي .
كايد ابتسم : تم اكل معتس،، شرايتس نزود الكميه وناكله مع بتال وسند والبنات.
ديم: يالله نروح نجيبه ،، وفيه شي ثاني.
كايد: وشنهو.
ديم: سند بسوي فيه مقلب.
كايد: ابدا معتس لو تبينا نحرقه المهم اشوفتس مبسوطه.
انهارت ضحك : لا كوكو مو كذا ترى قاعد تخوفني .
كايد قبص خدها : تعالي نروح البقاله ولاتقلين للبنات يوم خاص لتس.
لبست عباتها وتسللت هي وكايد لسياره قبل يشوفهم احد.