انا احبك مابها زيف وخداع رغم الذي نخفيه والي نخافه

بارت ٤٠

"بالعرس "
لطيفه الي من كثر مالحريم سألوها عن هديل طلع ريش وهي تقول مرت ولدي ثنيان: هديل قومي ابي ارقص معك.
هديل باستغراب: معي انا.
لطيفه: اي معك انتي فيه هديل غيرك.
لفت تطالع شوق الي قالت : قومي امي مريشه فيك الليله.
قامت هديل مع لطيفه الي طلعت قبل هديل ومدت يدها لها عشان الكعب والدرج مسكت هديل يدها وطلعت وصارت ترقص مع خالتها بكل ثقل ورزانه لطيفه كانت تناظرها بإعجاب وشوفة نفس وهي تشوف العيون عليها وبعد ماخلصو رقص ونزلو يجلسون جات عندها حرمه كبيره وجلست جنب شوق: هاذي منهي ياشوق.
شوق بابتسامه : بنت عمي سعود هديل.
الحرمه مدت يدها تصافح هديل: انا ام وليد ادور لولدي عروسه بمواصفات خاصه هو طالبها.
وقبل تكمل قاطعتها ام ثنيان: ام وليد هاذي زوجة ثنيان الثانيه.
ام وليد طالعتها بحسره : هاذي ماتنوخذ ثانيه هاذي تنحط على عرش القلب .
شوق ابتسمت لهديل الي ابتسمت بخجل وحسره بنفس الوقت وقامت: عن اذنكم بروح اعدل شكلي.
شوق قربت من امها: يمه ممكن ماعاد تقولين مرت ثنيان الثانيه فرحانة بخيبة ولدك.
لطيفه بحده : اجل اشوفهن يخطبنها واسكت.
شوق: تكسرين خاطر هديل عادي بس يخطبونها لا،، بروح اشوفها المسكينه.
___
انتهى الزواج ورجعو  مع السواق وهم داخلين كان ثنيان يلعب على جواله.
شوق : ياعيني الي جالس يلعب وزوجته مابقي احد ماخطبها.
ثنيان عدل جلسته وقطب حواجبه وبحده : مين الكلبه الي خطبتها.
شوق : ام وليد الطيار وام فهد الدكتور وام خالد المهندس.
ثنيان : يمه صدق كلام شوق.
امه وهي تجلس جنبه : صدق اذني الحريم ليلهن كله رايحات جايات وينشدني عنها.
شوق: كنت ناويه اكذب عليك واقول انخطبت بس صدق انخطبت
هديل كانت واقفه تناظرهم قام ثنيان جاء عندها : وانتي طبعاً جابك الوضع.
هديل : اي وضع .
ثنيان بحده : الخطاب الي رايحين جايين.
تنطق بحده:  ماهو ذنبي  اذا انت حسيت بالنقص لانك مو رجال.
لطيفه بعصبيه: هديل .
ثنيان بحده : انا مو رجال .
تهز راسها بالنفي : لا مو رجال.
مسكها بيدها يسحبها لغرفتهم فوق وهديل تحاول تفك يدها منه وشوق تحاول تهدي الوضع وبس ثنيان وقتها ماكان شايف قدامه.
طلع محسن من غرفته وهو يشوف المنطر قدامه وبعصبيه : ثنياااان .
وقف ثنيان يناظره وفكت هديل يدها منه وهي تصيح وراحت ركض عند عمها الي حضنها : روحي غرفتس ياهديل.
بعدت عنه تشوفه يتوجه لثنيان ويضربه كف بقوه: ماهي مراجل تسحبها بذالطريقه انت بدال ماتحببها فيك كرهتها فيك .
شوق خذتها غرفتها وهي منهاره صياح واكثر خوف هديل انه ياخذ الي يبيه بالقوه هذا الي خوفها منه وشوق تهديها : خلاص هديل اعرفك اقوى من كذا وش فيك انهرتي كذا.
هديل بصدمه : اول مره اشوفه كذا معصب ماتوقعته بيقدر يقسى عليه كذا.
شوق حضنتها: ثنيان نادراً يعصب بس كلمتك ترى قويه يعني مافي رجال بيرضى ينقال له هالكلام .
تمسح دموعها : ادري اني استفزيته بس لانه قلل ادب معي .
شوق تناظر جوالها : شاهر يتصل مضطره اروح.
هديل بخوف : لاتروحين خليك معي
شوق : ياعمري انتي شاهر تحت مقدر اقول بجلس وانتي قفلي باب غرفتك وما اظن انه بيجي بعد كف ابوي ولو جاء لاتفتحين.
هزت راسها بالايجاب وباستها شوق وطلعت وهديل قفلت الباب ودخلت تبدل.
وقبل تفتح سحاب فستانها تنصدم لما الباب يدق: هديل ممكن نتكلم شوي.
هديل ماكانت ترد واردف ثنيان : هدوله افتحي والله ماسوي لك شي بس افتحي لي تكفين.
جلست على السرير بيأس : ياربي انا وش اسوي هنا وبداية السنه الدراسية لسى باقي ثلاثه شهور .
ثنيان: هديل افتحي الباب.
قامت وفتحت له : ودني الديره.
ثنيان بلع ريقه : لاتكفين لاتقولين كذا.
بكت : مابي اجلس معك بروح عند الرجال الي صدق يخافون على هديل يدارون دمعتها مو انت ثنيان قاعد تخوفني منك كل مره اكرهك اكثر من اول .
ينطق : جن جنوني يوم قالو لي ان الحريم خطبوك .
هديل: ليش يجن جنونك مو احنا متفقين نطلق خلاص والي بينا بس اتفاق مو اكثر.
بلع ريقه وبترجي :  ارحميني تكفين انا مو بس احبك آنا أعشقك اموت واحيا فيك تكفين عطيني فرصه تكفين حبيني.
هديل : مستحيل احبك مستحيل انت رجل متزوج وراح تصير اب قريب ثنيان انا ابي رجال اكون انا الوحيده بقلبه ابيه لي لحالي ماقدر اشاركه احد مقدر .
اخذ عطرها يرميه على المرايه الي تكسرت وطارت شضيه منها وجرحت عضدت هديل الي صرخت بالم : اااااه.
مسك يدها : انا اسف اسف والله ماكان قصدي.
هديل جلست على السرير وهي تصيح : انا تعبت تعبت منك ومن العيشه معك ليش تصعبها عليه ياثنيان ليه انا احاول اتعايش مع الوضع هنا بس انت جالس تصعبها عليه.
جلس على الارض عند رجولها يبوس كفوفها : والله مايصير الا الي تبينه والله تكفين عطيني فرصه اخيره بس فرصه اخيره بعدها سوي الي تبينه.
قام يضمد جرها ويحط لها لصقه هديل تناظره وهو ميت خوف عليها : ثنيان انا صرت اخاف منك فقدت الامان الي كنت احسه معك ماحبك بس ماكنت اكرهك ياليت الحين تنسى اني زوجتك وكل الليالي نامها عند امل انا راضيه ماعاد يهمني اذا امل بتعرف وش بيننا او لا الحين ياليت تطلع غرفتك اقصد غرفتكم.
ثنيان طلع بدون كلام وهو كان عنده امل تهدى ويتكلمون.