بارت ٣٧

9.6K 279 63
                                        

"بالمستشفى"
اخذ  كايد سند يتمشى بعد اصراره .
سند: وين امي .
كايد : هاه خلك من امي الدكتور وش قال لك بالاشاعه الاخيره.
سند ابتسم يغمز له :  يقول اذا ماوداك  كايد تشوف احمر الخدين يمكن قلبك يوقف .
توسعت عيونه وانصدم انه يدري : اي احمر خدين انت صاحي امش امش خلنا نرجع لايجي بتال مايلقانا.
ينطق بترجي : خذني لها ياكايد ادري انها معك بالسياره.
مسح وجهه بانزعاج وعصبيه بس ماكان وضع سند الصحي يسمح له ينفجر بوجهه اخذ نفس عميق يزفر العصبيه من صدره : سند كذا ماينفع.
سند بانزعاج : خلاص ياكايد خذني لها ولا تكثر كلام.
تنهد بقوه : الله المستعان بس.
وخذاه للسياره وهو خايف من الجاي تقدم سند يدق على امه القزاز وترف منسدحه على فخذتها تفتح امه بخوف : سند امي انت ليه نازل.
يبلع ريقه : نازل اشوف احمر الخدين يمه .
كانت ترف  تعشق هالكلمه من سند ،، مثلت انها نايمه عشان ماتضطر تواجهه وهي تدري انه بيسالها اذا تبيه ولالا اردف سند : طل يا احمر الخدين ادري انتس واعيه وتسمعيني.
رفعت راسها  تجلس تطالعه انصدمت تشوفه كيف بظرف اسبوع تبدل حاله ونزل وزنه كثير  وبشرته شاحبه وعيون مرهقه  وهالات سوداء : ليه شكلك كذا ياسند ليه
سند حس ان قلبه المريض التعبان المرهق رجع للحياه : ياقلب سند الي بغيتي تذبحينه.
كانت خايفه يسالها اذا تبي ولد سلطان ولالا : سند وش فيك ليش لابس كذا .
بلل شفايفه : مافيني شي بس بسألتس سؤال واحد انتي تبين ولد سلطان ولالا تكفين تصدقين معي ياترف لاتكذبين علي ،، لاتخافين والله اذا ماتبينه اني لا اذبحه والله لبعده عن طريقتس.
سكتت خافت تقول ابيه ويتعب سند وخافت تقول مابيه ويسوي له سند شي فالتزمت الصمت .
سند الي بدت تخنقه العبره :قلي شي تكفين لاتذبحيني بسكوتس .
نزلت راسها تبكي : شقول ياسند شقول.
نزلت دمعته على بكاها: لاتبكين ياروح سند الي عايش عشانها .
ترف كانت بس تصيح كايد مسك سند يسحبه عن الشباك : خلاص ياسند لاتضغط عليها وعلى نفسك خلاص.
دفه  ينطق بحده : خلني ياكايد خلني اسمعها منها بعدها ان متت لاتبكون علي.
انصدمو من الصوت  الي قال : وش تسمع ترف ماهيب لك ياسند هاذي وصية جدك قدام يموت .
لف يشوف عمه مشعل الي ماكان عمه الي يعرفه ينطق : جدي مات .
مشعل :  مات الله يسامحه بس.
سند بحده : الله لايسامحه.
انصدم مشعل وبعصبيه: سند وش ذالكلام.
يصرخ بقوه : الله لايحلله ولا يبيحه وهو خصمي امام رب العالمين.
قطع صوته كف عمه الي خلا ترف تشهق وكأن الكف بوجهها : لا يبه لا دخيلك .
يبعد كايد عمه : لا ،، لا تمد يدك عليه .
فتح  مشعل الباب يسحب ترف بقوه : لو مايبقى بالعالم الا انت ماجوزتك بنتي ياسند
وينزلها لسيارة ثنيان اما سند واقف مكانه مصدوم قفل عيونه بقهر يسند نفسه على سيارة كايد : انا وش سويت عشان يسوون فيني كذا انا ماني عدوهم انا ولدهم ليه يعذبوني كذا ليه .
وصار يضرب قلبه بيده : ليه يعادوني كذا ليه يارب خذني وريحني.
مسك كايد يده  يبعدها عن صدره : لاعاد تضرب قلبك ياسند لاتسوي كذا بنفسك الي مايبيك لاترخص نفسك له تراك غالي علينا ياخوي لاتقهر نفسك وتقهرنا فيك ياضلعي والله لو تبي روحي ماتغلى عليك.
انهار سند بكي وهو اصلاً مو سامع مواساة كايد كان وقتها يتردد على مسامعه كلام عمه الاخير : اااااااخ يارب وش مسوي لهم انا عشان يعادوني كذا انا ولدهم والله اني ولدهم .
نزلت  امه تحضنه ضمها سند بقوه : ضميني يمه ضميني خذيني بحضنتس
الدنيا قاعده على قلبي ،، ياليتني بقيت ولد سنتين باقي بحجرتس ولا كبرت تعبوني  ظلموني وقهروني وجلطوني ،، ادعي الله ياخذني ويريحني.
كانت امه تسمعه وتصيح : دخيلك ياسند لاتحرق قلبي يايمه لاتدعي على نفسك .
يشد كفه على كتفها : خذو مني احمر الخدين يايمه خذوها مني  خذوها مني .
كايد كان يتصدد يخبي دمعته الي نزلت من عينه وهو يسمع صياحه ونياحه لدرجة ان الناس بدت تطالع فيهم من كثر ما سند يصيح بحضن امه بصوت عالي وكانه طفل.

انا احبك مابها زيف وخداع رغم الذي نخفيه والي نخافهحيث تعيش القصص. اكتشف الآن