انا احبك مابها زيف وخداع رغم الذي نخفيه والي نخافه

بارت ٣٦

"بالمستشفى "
عند سند الي صراخه زلزل الطوارئ الدكاتره تجمعو عليه ويسالون وش وصله لكذا.
بتال بخوف :تكفى يادكتور اخوي لايروح سوو له شي وقفوه صياح قبل يوقف قلبه
الدكتور: عنده احد ميت .
سند: ياليت عندي احد ميت ولا خذوها مني وقف قلبي يادكتور ماعاد مابيه بعدها يادكتور قلبي ذبحني قلبي انطحن وتحطم ..
وصل له المغذي وحط له مهدى وبقى سند يهوجس تحت تأثير المهدى.
الدكتور: الواضح ان عنده صدمه نفسيه.
كايد كان يكفكف دموعه وهو يسمع انين سند الي كان يضرب قلبه بيده الين غلبه المنوم ودخل بنومه عميقه.
بتال كان منهار بقوه : وش بنسوي بنسكت بتمر عادي ياكايد اخونا بغى يوقف  قلبه بسبب هالشايب ونرجع بيته ولا كأن صار شي كفايه ضعف كفايه قهر كفايه ظلم .
كايد الي رغم قساوته كان يمسح دموعه بكمه : اكيد ماراح نسكت لازم ناخذ امنا ونترك له البيت.
بتال: وين نروح.
كايد: نشوف لنا بيت ثاني.
بتال: وابوي.
ينطق بحده : هذه ابو هذه الله لايجعلني عاق بس على سوايا ابوي.
بتال : ياعزتي لك ياسند تعبك هالحب وتعبنا معك ،،الحب الي المفروض يكون قوتك صار ضعفك اهلك الي المفروض يكونون سندك صارو عدوينك.
بعد وقت طويل صحى سند الي قام مثل المجنون يسحب المغذي من يده :خذوني لترف.
كايد : سند حبيبي البنت خلاص بتعرس .
ضربه سند كف بقوه قفل كايد عيونه بالم وسكت اما سند انهل عليه بالشتايم: لاتقول بتعرس لاتقول بتعرس ترف لي انا ترف ماراح تاخذ غيري فاهمين ولالا.
ويطلع من المستشفى يركض وجرح المغذي ينزف دم.
ولحقوه بتال وكايد يركضون مسكوه يدخلونه السياره وبتال يمسك جرحه يضغط عليه يمنع النزيف وسند صافن ودموع تنهمر بغزاره : الله ياخذكم الله يكسركم ليه يايبه ليه ليه تشوفني انظلم وتسكت ليه.
حرك كايد يتوجه للبيت وسند ماجفت عينه ونزل يركض  يدخل بيت عمه مشعل ويطلع له عمه  وهو  يبكي مثل الطفل : عمي تكفى لاتعطيها ولد سلطان  تراني طالبك ترف لي ترف حبيبة سند ياعمي.
عمه : ترف ماتبيك ياسند
قالها ودموعه تنزل انفلت سند يروح تحت شباك ترف  وهو يالله يتكلم من الصياح : تررررف طلي على سند ياترف قلبي تكفين لاترخصين بحبي لتس ياترف طل علي يااحمر الخدين .
ويطيح على ركبه يصيح : ادري انتس مغصوبه وادري انتس تبيني مير حالو بيني وبينتس ياترف طلي علي وقولي لي ابيك ياسند والله لحرق الدنيا عشانتس .
طول وهو يكلم ترف الي كانت تسمعه وتصيح بحضن امها ماتقدر تخالف ابوها وجدها وبعد وقت طويل بتال وكايد سندو اخوهم  ياخذونه بيت جدهم مخلد ويتوجهون لبيت جدهم كايد وهم ناويين يخربونها خلاص.

"في مجلس سعود"
دخلو  كايد وبتال على جدهم بخطوات واسعه وبكل شموخ
ينطق كايد: جدي هي كلمتين ورد غطاها ياتوفف هالعرس يامالنا قعده معك بذالبيت.
وقف سعود الي سبق ابوه بيضرب كايد كف ولكن لاول مره يمسك كايد يد ابوه وينزلها : خلاص ياسعود زمنك راح زمن الاهانات والظلم والكفوف والتلطيش راح الحين زمن كايد وبتال وسند والله يايبه ان خذت ترف فيصل لتموت ماشفتني انا وخواني.
الجد قام وقف ينطق بحده : جايين تهددوني انت وياه.
بتال: افهمها زي ماتبي ،، توقف العرس ولا مالنا قعده.
الجد : الباب يفوت جمل والله لايردكم.
كايد هز راسه : طيب والله لتشوف ايام تتمنى فيها يوم واحد اوقف معك فيه .
يمسك يد بتال يتوجهون لقسم الحريم : هديل عنود شهد ديم لمن اغراضكن.
دخل جده يمسك يد ديم : ديم ماتروح معك.
سحبها  كايد بقوه من يد جده : بتروح معي غصباً عن الي يرضى والي مايرضى
الجد لديم : ان رحتي معه انسي ان عندتس ام وابو يابنت .
ديم تناظر كايد وتحاوط ذراعه بيدينها : بروح معك ياكايد.
ام ثنيان بحده : ديم انتي صاحيه.
تنطق : اي صاحيه،، انا ابي زوجي وهو يبيني .
يشد كايد على يدها : رحي لمي اغراضتس بنروح بيت جدي مخلد لين نلقى بيت برى الديره والي بيروح معي ينسى هالبيت بلي فيه .
دخل محسن ولف له ابوه : بنتك بتروح تتبعه يامحسن لاتخليها تروح.
محسن : يبه غصبت عيالي الثلاثه  على العرس ديم من كايد وشوق من شاهر وثنيان من هديل وسكت وكنت ادعي الله انه يولف بين قلوبهم الحين يايبه جاي تقول فرقهم يامحسن ماني مفرقهم ،، انتي ياديم رحي مع كايد وانتي ياشوق رحي معهم لرجلتس.
الجد: شوق لا ماتروح.
يلتفت محسن : رحي ياشوق رحي الله يرضى عليتس مانتس لاقيه مثل شاهر واخلاق شاهر،، وانتي يالطيفه انتي وهديل لمو شناطكم بنرجع للرياض البيت الي جملا وعيالها مانهم فيه مالنا قعده فيه بنت الاصول الي شايلتنا شيل هي وعيالها.
الجد ضرب محسن كف مفاجىء الكل انصدم منه اردف محسن بكل برود: ثنيان متزوج بنت خاله عدنان كنت مخبي عليك اداري خاطرك لكن بيعتك لسند خلت كل الاحترام الي اكنه لك يطيح يايبه والشيخه انا مابيها خلها لسعود الي بياخذها وهو لحاله لاسند ولا بتال ولاكايد وصقر،، وانتي ياهديل تبين ثنيان تعالي معنا ماتبينه الي بخاطرتس بيصير.
وطلع محسن لسيارته  بعد ماخربها.
كايد لهديل: هاه بتجين معنا ولا بتروحين معه .
هديل : انا سجلت بالجامعه ياكايد ابي اكملها .
كايد: ابشري جامعتس عندي،، تعالي معنا
تفرقو والكل يجمع اغراضه والجد الي منصدم من محسن اكثر شي واقف يناظرهم وهو عاجز كيف يمنعهم يهونون،، محسن اخذ زوجته وعياله ورجع للرياض