انا احبك مابها زيف وخداع رغم الذي نخفيه والي نخافه

بارت٣٥

"في بيت سعود"
دخل غرفته يشوفها تجهز بعد ماحطت بثوبه الف ريال من فلوسها
كايد: ثوبي جاهز.
تلف تطالعه : كوكو لقيت بثوبك الشتوي فلوس وحطيتها لك بثوب العيد .
كايد: كم لقيتي.
ديم: الف ريال.
ابتسم يجلس ويسحبها عنده ويجلسها على فخذته : حاطه لي من فلوستس صح.
تنزل عينها : لا مو صح.
يرفع ذقنها : الا والله انتس حاطه .
باسته بخده : والله اني مقهوره منك ليش تسوي كذا معي يعني انا معي فلوس وانا وانت واحد تكفى خذها مني.
تنهد بحب : ويقولون ليش متغير ياكايد وليش صاير خفيف وليش يخليها تناديه كوكو والله انك اجمل شي صار بحياة كايد ياديم.
تبوس خده : هيا خذ الفلوس تكفى.
يطالعها بحب : شرايتس اعاديتس قبل العيد.
بعدت عنه تلم اغراضها وتتوجه للباب تركض : بروح عند هديل اشوفك بعد صلاة العيد.
فلت نفسه على السرير وهو يضحك: ياكبرتس بقلبي
اما ديم راحت لهديل ركض.
____
"بالحوش"
فتح الباب : حي الله ترف.
ترف تمد يدها : هاك مانسيت تجيب لي حلاوه وانا مانسيتك من الشعثه.
مد يده من ورى الباب ويشوف الحنا بيدها اخذ الصحن وعلى طول ياكل حبه : يعطيتس العافيه بروح قدام يشوفني جدي .
ترف : طيب طيب مع السلامه.
راح سند وترف دخلت حوشهم و سكرت الباب وانصدمت وهي تشوف رجال واقف يناظرها وكان صافن فيها باعجاب خافت وغطت وجهها وتهرب للبيت اما هو ضاع بجمالها بخدودها المورده بعيونها بشفايفها صفن شوي وهو ناسي وش كان جاي عشانه وينادي: ياولد يابو ترف.
طلع مشعل من المجلس : ياهلا ياهلا يالله حي فيصل اقلط اقلط قلط فيصل وهو باله مع ترف وزين ترف .
_____
عند هديل الي كشخت لابسه فستان ابيض طويل باكمام طويله كان مره انيق وخلصت وراحت للمطبخ كالعاده تجهز قهوه وفطور للرجال .
وهي فاله شعرها الي سايح حوالينها ويفي و بميكب ناعم وروج احمر .
دخل كايد كاشخ وكان هالسنه ستايله غير بسيدري اسود وغتره بيضاء وجزمه جلد سودا : صبحهم وربحهم .
هديل توسعت عيونها وهي تدري انها لمسات ديم: اوف اوف يالكشيخ.
اقبل يبوسها ويعايدها: كل عام وانتي حياة هالبيت يانحلة هالبيت.
ابتسمت : لاتصيحني تكفى صاير ذرب من يوم اعرست.
سحبها باذنها : الشرهه علي الي جاي اعايدتس قدام امي ومرتي.
هديل حضنته : ياحبيبي انت والله انك ابوي بعد ابوي ياكايد.
قاطعهم صوت ديم وهي تلف: ترارااا .
لف يطالعها يبعد هديل ويصفن بديم الي توسعت عيونه بس شم ريحة عطرها ا
مدت يدها تصافحه مد لها يده يصافحها سحبته عندها ينزل لمستواها وتبوسه سلام خد مثل خواته واخر شي تبوس راسه: اعايدك نفس خواتك.
سحبها عنده يبوس كفها : بس انتي مانتس اختي.
ضحكت بدلع : صلاة العيد راحت عليك.
لف يشوف هديل معاهم بالمطبخ تجهز السفره طالع ديم الي قالت : عاد عيدك حبيبي.
رجع يبوس كفها : ‏
عاد عيد اللي وجوده لذة العيد السعيد
‏جعل زوله ما يغيب وكل عام اعايده .
تنطق بغنج وهي تلعب بشعرها : شرايك بطلتي البهيه .
يرد : ف العيد لا شافوك و أنتي تطلّين
‏تروح كشخات العَذارى خساره.
هديل بصوت عالي : لااا انت وياها حدكم العذارى عاد.
التفت لها : تبين سحبة اذن شكلتس.
قاطعهم صوت جده الي ينادي : الصلاه الصلاه.
لف لديم : ترى ماتحسب لتس معايده هاذي،، راجع لتس.
ضحكت تغمز له : انتظرك.
وطلع لجده يعايده ويعايد ابوه واخوانه حتى خلف ويعايد عمانه وعيال محسن .
تقدم سند يعايد جده الي صد عنه وعيى يسلم عليه لف سند لكايد: غصبتوني اعايده وقايل لكم بيعيي .
ابوه بحده : اصبح احسن لك.
سحب سند على الكل ماعايد احد وطلع لسياره وبعد مشادة كلاميه بينهم طلعو للصلاه كان محسن ينتقد تصرف ابوه والي سواه وان سند جاهل.