انا احبك مابها زيف وخداع رغم الذي نخفيه والي نخافه

بارت ٣١

بالرياض
في بيت محسن
هديل تبخر غرفتها وتتبخر بعد ماخذت دش منعش .
دخل ثنيان : يازين السنعين بس.
لفت وشافته متروش وهو جاي من عند امل : ليش جاي .
ينطق  : اسولف معتس .
طالعته  كيف  ينطق الكاف سين : معتس لاتكرهني بلهجتنا بعدين رح لمرتك انا بصلي وبنام .
قطب حواجبه : زعلانه مني ؟
تهز راسها بالنفي : لا الزعل والتشره على الناس الي نحبهم وانت ماحبك عشان ازعل وانتظرك تراضيني.
وخذت لانجري : الحين اطلع بلبس ملابسي.
يبتسم : البسي تراني زوجك.
تنطق بعصبيه : ثنيان لاتخليني احطك مع امك وامل بيننا اتفاق نمشي عليه مثل ماهو .
ينطق : خلاص خلاص بروح.
وقام وراح وقفلت هديل الباب بالمفتاح : ييع جاي يوريني انه متروش عندها تفوه عليك من بين الرجال مقرفين اقسم بالله .
راحت تمشط شعرها وتجففه وتنتظر الاذان
____
بالديره
في بيت مشعل
ترف جالسه تاخذ دواها وسمعو الاذان ولاول مره مايكون الجد.
نجد بصدمه : اف مين ذا الي جدي سمح له ياذن.
تتنهد بابتسامه : صوت سنود.
تنطق بحده : تراه رجال وش طوله وباقي تقولين سنود.
ترف : سنود الين اموت .
ترفع حاجبها : اشوفك صايره تحبين طاريه.
تنهدت وبقوه : اااااخ يوم وداني للمستشفى فتحت عيني وكان وجهه بوجهي ريحة النار وعطره وانفاسه سوت لي رعشه.
ضربتها برجلها : تراه بزر.
تنطق بحده : توك تقولين رجال لاعاد تقولين سنود بعدين تصدقين الي يشوفه يقول اكبر من بتال مشعر مو مثل بتال .
نجد: شدخل بتال الحين.
تناظره بابتسامه : اعلمك بس .
دخل مشعل : تبون شي بروح اصلي.
تقوم ترف : يبه مين الي اذن.
مشعل : سند .
تلف لنجد : شفتي قلت لتس.
يهز راسه بأسف : سند حاط راسه براس ابوي الله يكفيه شره .
تنطق : امين .
دفتها نجد ومشعل انتبه ابتسم وطلع.
___
في بيت سعودً
ديم : خلاص رح الصلاه ياويلك من جدي.
يبتسم : يعني مانتس زعلانه.
تهز راسها : لا ماني زعلانه رح انت الحين.
اخذ فروته وطلع يركض.
____
بالمسجد
الجد  بعصبيه : من قال لك تذن
ينطق : ماتقول تسابقو على الاجر .
ينطق بحده  : مالقيت تسابق الا انا عيالي وهم عيالي ماقد خليتهم يذنون تجي انت  يالورع تحط راسك براسي .
يرد بكل برود : بتقيم ولا اقيم انا .
دفه : انقلع من قدامي.
يقطب حواجبه : هذه بيت الله ماحد ينطرد منه
دخلو الناس للصلاه تقدم الجد واقام وصلو.
___
بالديره
في بيت سعود
صار العصر وبدو البنات بتجهيز الفطور .
شهد : وين كايد
ديم: راح مع عمي مشعل ليه.
ميلت فمها : يقول يبي كنافه ومافيه قشطه.
تجفف يدينها بالمنشفه : مين الي يبي كنافه كوكو.
شهد: ايه
تتقدم عندها : تكفين صحي بتال ولا سند لاتخلينها بخاطره.
تنطق العنود : عادي اذا مو اليوم بكره .
تنطق بترجي : لا لا اليوم تكفون بنات.
تتخصر شهد : من وين اجيب قشطه.
هزت كتوفها : مدري  دبروها.
شهد: بروح ادور عند ترف تعشق الكنافه .
ديم : تضبطها.
شهد: اي تجنن وكلنا نموت عليها من يدها.
ميلت فمها : وكوكو يحبها بعد.
تبتسم عنود:  ايه يموت عليها.
جلست ديم  بقهر  : ااااف ياربي لازم اتعلم الطبخ كذا ماينفع.
شهد : قومي قومي كسري شعيريه الكنافه على ماجيب القشطه.
وهي طالعه تصادف سند الي صحى يتوضى.
شهد : صح النوم سنود.
ينطق : كبرنا قلت لتس مليون مره اسمي سند .
شهد : ماعلينا بس اسمع لازم تروح البقاله.
ينطق بحده : قايلتس امس علميني وش تبون عشان بكره ماروح البقاله وانا صايم روحه ماني رايح
تبتسم بخبث : طيب خلاص لاتعصب  بقول لبنات عمي انك عييت.
لف لها : بنات عمي منهن.
تبتسم : نجد وترف .
سند : يبون القشطه.
تهز راسها : ايه .
يحك مؤخرة راسه : لالا خلاص بروح  حرام ماعندهم احد يقضي لهم.
شهد : والفلوس .
توجه للحمام : بسجلها بالبقاله على حساب كايد.
شهد: زين جب ٦ حبات.
سند : طيب ارسلي لي اسمها من جوال امي.
راح سند للبقاله بعد ماصلى وشهد راحت خذت من ترف قشطه لانها تدري سند بيوديها لهم من السياره للبيت.
وبدو بجهزون الفطور .
____
بالرياض
في بيت محسن
هديل لامه شعرها فوق وبالمطبخ تجهز الفطور مع الشغالات دخل عمها :  عالقوه عالقوه يابنيتي.
تبتسم : الله يقويك.
يلقي نظره : ماشاءالله عليك والله ان ريحة الشوربه واصلتني فوق.
تميل راسها : ياحبيبي ياعمي يازين الي يعزز لي.
عمها : ابد ماعزز لتس انتي بنتنٍ سنعه وست بيت مير انا بروح اتمشى بالممشى شوي تبيني اجيب لك شي معي.
تنطق : خذ ثنيان معك ولايجي الا وقت الاذان قروشني.
ضحك باتساع : ابشري ابشري الحين اخذه بالعصاء..
تنطق  تفرد العجين : الله يقويك.
طلع ثنيان من ورى هديل داخل من الباب الخلفي للمطبخ ولفت هديل بخوف: بسم الله عليه مهبول انت روعتني.
ابتسم  : مو مرسلتني اجيب نعناع من الحديقه عشان حشوة الفطاير.
تنطق : اي عطه الشغاله تغسله وتجففه لان الي جففته قبل قليل.
يطالعها  كيف جمالها مريح للعين وبدون ولا نقطه ميكب وشعرها الي مسويته كعكه وسايح وفيه خصل طالعه من كذا جهه شوي : وش فيك تناظرني كذا
باس خدها بسرعه ورمت بوجهه دقيق
___
بالديره
في بيت مخلد
شوق الي نفس وضع ديم مالها بالطبخ : شيخه تعالي شوفي بالله الباشمل تكتل.
جت تشوفه : يوه ياشوق مو قلت حركيه باستمرار وخفي يدتس.
تميل فمها : والله حركته بس مدري وش صار .
دخل شاهر على كلامهم : وش فيكم.
لفت شوق: كنت بساعدها وحست الدنيا.
تناظره شيخه: تعال شوف وش مسويه مرتك.
شاهر طل : عاد ماعطيتيها الا اصعب شي.
تبتسم شوق : انا الي قلت بحركه ماتوقعت كذا بيتكتل.
يبتسم : شرايك اخطفك للاسطبل.
تعض على شفتها : عيب اروح واتركهم.
يطالع شيخه  : بعد اذنك ياشيخه.
شيخه : خذها خذها مااستفدت منها شي.
ضربتها شوق بخفه : الله يسامحك .
عذاري بحده : تسوي العصير الله لايهينها حنا مو خدم عندها.
لفت لها شوق  تمشي جهتها : انتي ماحد كلمك يالبطريق خليك بحالك لا احط راسك الحين بالزيت.
عذاري توجهت لها بالملاس الي بيدها: انتي ماتستحين.
دخل شاهر بينهم : خلاص ياشوق .
تنطق بحده  : لا مو خلاص مرت اخوك هاذي بنت ستين كلب.
شاهر شالها  يقفل فمها بيده ووشوق تتفلت : نزلني نزلني .
وبس طلعو برى نزلها : عذاري تصير بنت عمي.
برد وجهها و تتذكر انها سبت ابوها : يعني ابوها عمك .
ابتسم : ايه يعني لو ابوي سمعك بيزعل.
عضت شفتهاً : اسفه ماكنت ادري بس هي ناشبه بحلقي.
مسكها بكفها  : ادري انك ماتدرين بس لاتنعاد.
تهز راسها : لا خلاص توبه بس خلها بحالها لاتحتك فيني انت شفت قدامك كيف بدت بالغلط.
يهز راسه : خلاص انا اكلم سالم فيها بس تعالي معي للاسطبل.
وراحت معاه وهي باقي مابرد قلبها على عذاري
___
في بيت مشعل
اندق الباب راحت تفتحه : ميين
سند: سند.
تفتحه ومن ورى الباب: حيالله سنود.
يبتسم : ياقلب سنود انتي كيف يدتس اليوم.
تبلع ريقها : الحمدلله احسن .
مد يده : خذي هاذي القشطه الي وصيتي شهد عليها.
فهمت انها بدال الي خذوها مدت يدها وشافها بالحنا: متحنيه.
تنطق : ايه احب الحناء
يمسح على صدره يتنهد : يابخت الحنا بكفوفتس.
قاطعهم صوت امها تنادي : امي تنادي .
راح سند وهي قفلت الباب تبتسم وتروح للمطبخ
____
بالرياض
في بيت محسن
هديل جهزت كل شي : انا بطلع اتروش وانتم خلاص حطوه على السفره بالجلسه الارضيه .
الشغاله : تمام.
طلعت تركض لغرفتها تتروش وتبدل.
_____
بالديره
في بيت سعود
عند سند حط فطوره هو وخوانه لحالهم بالحوش
بتال: جدي طاردك بعد.
ينطق وهو مشغول يرتب السفره : لا ماقابلته بس مابى اقعد معه ياولد صايره شوفته تخنقني.
دخل كايد ومعاه السوبيا: بتفطرون هنه.
سند: ايه الي يبي جدي يروح له.
بتال يطالع كايد: لا لا معك معك.
كايد: خلونا نكسر الشر ونروح عنده.
يلتفت له سند : ماعندي ولا شر الشر عند جدك الي حاط دوبه ودوبي.
كايد : اجل خلاص بنفطر معك مع انها بتكبر.
سند: الي ذال منه يروح يرضيه.
بتال ضربه بكتفه: اقول اعقب بس ورح شف الفطور .
سند راح يجيب فطورهم من عند البنات وبتال يرتب سفرة جده وابوه وعمه مشعل وخلف بالمجلس.
دخل كايد عند ديم الي كانت تساعدهم بالتوزيع وكانت ساره معهم توزع مع ان يومها مع بنات نوره بس جات وقفت عند ديم الي مشغوله تحط الشوربه بالصحون.
كايد : سلم يدها يالله.
تبتسم تناظره : ترا ساعدتهم .
ابتسم : يعطيتس العافيه.
حطت صحن شوربه على جنب للعيال بالمقلط وسندت يدها فوق الدولاب وهي تكلم كايد دفت ساره الصحن على يد ديم كايد حط يده على يد ديم صدفه وانكبت الشوربه على يد كايد نفض يده وهو يتألم ديم مسكت يده تاخذه للمجلى وتحطها تحت المويه : ياروحي تحرقك توجعك الله ياخذني كله مني.
حضنهاً وقدام الكل بس شافها توترت كذا : خلاص اهدي مافيني شي زين انها جت بيدي عن يدتس.
جابت جملا العسل : هات هات يدك.
وصارت تدهن له.
ابتسم : وش فيكم الموضوع بسيط.
امه : هذه انت لو تموت قلت الموضوع بسيط.
بعد شوي جهز الفطور وصارو حوالين السفره.
جو جملا وبناتها وديم وانضمو للعيال بالحوش على العقود ونسمة الهواء البارده
_______
بالرياض
في بيت محسن
نزلت هديل بعد اطلق دش وعطور وميكب وكانت اخر شخص نزل: تقبل الله.
عمها وثنيان: منا ومنك.
تنطق : هذال ياكل لحاله؟
عمها: ايه عيى يجي.
هديل صارت تحط لعمها اكل وحطت لنفسها وجلست وهي تترك ثنيان وامه وزوجته:
قامت امل تحط لها ولثنيان ولعمتها وتجلس.
محسن : وش سويتي انتي ياامل من فطور.
ميلت فمها : ماسويت شي هديل مو معطيه احد فرصه.
لفت لها هديل : والله من الرباده الي عدنتس انا لو ماعمي ماطبخت وخليتس تاكين قراطيس.
ثنيان : تسلم يدك كل طبق الذ من الثاني.
تشمق فيه : اهم شي يعجب عمي غير عمي مو مهم.
امل ابتسمت وهي تشوف هديل وثنيان متهاوشين.
____
بالديره في بيت سعود
الجد شاف عيال جملا يفطرون لحالهم : من يوم كبر هالسند وهو مكبر راس خوانه عليه كايد وبتال عمرهم ماعصو لي امر مير والله ان دواه عندي.
وقام عندهم : وراكم منعزلين عنا.
جملا توترت مسك بتال يديها يشد عليها.
وقف سند : انعزلنا منك انت ماتبي الا نوره وعيالها انعزلنا كفيناكم خيرنا وشرنا خلاص كذا اريح لنا ولكم.
بكل حقد وكره ينطق : انت انت والله لبكيك بدل الدمع دم مير اصبر عليه.
يبتسم سند : بكره الفطور بنوره وبناتها خواتي مانهم لامسين شي ابد .
مشى جده ماعلق ولا قال شي.
مسكته امه بطرف ثوبه تسحبه يجلس: علامك ياسند تكلم جدك كذا.
يجلس بعصبيه : اكرهه يمه اكرهه اي شي يونسنا يحرمنا منه من يوم انا صغير وهو مايطيقني.
تضربه بخفه : قم قم صل الله يصلح قلبك بس
قامو لصلاه كايد لاخواته: سوو لنا شاهي على مانصلي.
ديم: انا بسويه.
كايد : تعرفين ؟
تهز راسها : اتعلم.
كايد ابتسم : طيب .
راحت ديم للمطبخ ولف سند لكايد: كنها تقول بتعلم.
بتال بضحكه : اي حنا فيران تجارب .
كايد: احمدو ربكم بيتذوقكم شاهيها.
سند يرفع يدينه : الله يعين بطونا بس الي ناقص من جدي تكمله ديم.
كايد: امشو امشو بس.
وراحو للمسجد.
___
بالرياض
في بيت محسن
طلعت هديل تصلي وتقراء قران .
دقت امل الباب وتفتحت الباب: نعم
تبتسم : اشوف علاقتك بثنيان مش ولا بد اقدر اتسلفه منك الليله مشتاقه له.
هديل طالعتها فوق تحت : انتي هضمي اول بعدين فكري بالعلوم ذيك يم كشه.
تحرك شعرها : هذا كيرلي ذبحتينا كشه كشه.
تنطق بضحكه : هو كشه بالاخير.
ترجع شعرها على ورى : ماعلينا من كشتي اخذ ثنيان.
تهز راسها : لا ماتاخذينه خذو روحتس انقلعي غرفتس لا احذفتس من الشباك الحين.
تطالعها فوق تحت : الحمد لله والشكر لا طيب ينفع معها ولا ردى.
وراحت غرفتها
___
بالديره
بحوش مخلد
جالسين يكملون الفطور بعد الصلاه.
شوق رجعت من غرفتها بعد الصلاه وكانت عذاري جالسه جنب شاهر.
طالعت شاهر وجلست جنب شيخه شاهر اخذ فنجاله وقام وجلس عندها : ليش ماجيتي عندي.
تناظره : عذروه مسويه حاجز بيني وبينك.
ابتسم : تبين شاهي.
شوق: هات شاهي.
تطالعها شيخه : شوق تبين قهوه وحلا.
تهز راسه : لا بعد التراويح الحين ابي شاهي زي شاهر
ينطق : جعله عافيه.
تبتسم : على قلبك.
يلتفت مخلد : الا ياشاهر مافيه شي بالطريق.
شوق بس سمعته شرقت بالشاهي وصارت تكح وشاهر انهار ضحك يربت على ظهرها : صحه صحه .
قامت تغسل ولحقها شاهر وهو ميت ضحك : وش فيك بغى يوقف قلبك.
تجفف وجهها : الحين عادي يسالون هالسوال احس عيب.
ينطق بضحكه : هم كذا الشيبان ماعندهم فرامل .
صارت تهوي وجهها بيدينها : صدمني احرجني .
يبتسم : مو حرام عليتس مخلد يبي حفيد ولا نجيب له.
ضربته على صدره : ترى بخليك تنام عند مخلد الليله عشان تحكي له عن مأساتك
يضحك : خلاص خلاص امزح بس تعالي نجلس معهم.
تنطق : والله ماروح رح انت.
يطالعها ماسك ضحكته : ليه بس.
تتوجه لغرفتها : مالي وجه اجلس عند خوانك.
شاهر : وش بتسوين طيب.
تفتح الباب : بقراء قران انت رح عندهم .
شاهر: طيب ارسل لك شاهي.
تهز راسها : لا خلاص مابي
شاهر : يالله اجل عن اذنك.
وطلع لابوه وشوق وجهها احمر من كثر مافشلها مخلد بالسؤال الي تشوف انه خاص فيها هي وشاهر
____
في بيت سعود
بالحوش
جو العيال من الصلاه.
وجلسو وجابت ديم الشاهي : زينت لكم الشاهي.
سند : صبي صبي الله يعينا عليتس.
تنطق : حاصل لك الشاهي الي اسويه .
سند: صبي خلينا نذوقه.
ديم صبت وكان اسوووود مثل الليل.
اول ماشافه كايد صد ولا كأنه شافه.
رفع سند الفنجال يطالع الشاهي: هاك ياكايد.
كايد يتصدد ونادته ديم: كايد الشاهي.
خذاه وكان سند ينتظره ينتقدها بس صدمه لما نطق : تسلم يدتس.
توسعت عيونه : على ايش تسلم يدها ديم انتي ذقتيه قبل تجيبينه.
ديم : لا ماذقته.
يمد لها الفنجال : ذقيه الله يرضى عليتس مثل الليل ماينذاق قمي قمي ياشهد سوي لنا شاهي
ديم قامت تتوجهه لغرفتها : لو ترف مسويته لذيذ ويجنن.
ينطق بتذمر: ياليل البنات صدق .
قام كايد يلحقها واردف سند: خذو شاهيكم اشربوه مانبيه.
بتال : تراك زودتها البنت ماتعرف شي والله يكثر خيرها الي يدها بيد خواتك وتحاول ترضينا .
سند : ماقلت شي انا قلت ماينذاق الشاهي اشربه غصب.
تنطق جملا : انت زعلان من جدك وطلعت الحره بديم.
شهد: تراها صادقه لو ترسل لك ترف جمر اكلته وانت تضحك.
سند : شدخل ترف الحين.
شوي وجاء كايد ومعه ديم الي جلست معهم بعد ماحلف عليها كايد.
سند: ديم انا اسف ماقصدي ازعلتس والله .
تنطق : ماعليه انا ماني زعلانه وادري ان جدي ضاغطك هاليومين بس ابشر مره ثانيه اضبط لكم الشاهي.
سند : لا لا تكفين مانبي مره ثانيه.
انهارت ديم ضحك وضحكو على ضحكتها: انت الخسران.
___
بالرياض
في بيت محسن
هديل بغرفتها تقراء قران دخل ثنيان : سلام.
تنطق : صدق الله العظيم ، وعليكم السلام.
يسألها : ليش مانزلتي للقهوه تحت.
تتأفأف : مدبوله كبدي من امل.
توسعت عيونه : ليه وش مسويه.
تنطق بحده : وقحه وقحه كل دقيقه والثانيه جايتني تتحكك وترمي كلام.
قام وقف : دواها عندي
تنطق : لحظه لحظه انا ماقلت لك عشان تقوم تتفاهم معها انا مو عجزانه ادوس ببطنها قلت لك بس كذا سواليف.
قام وجلس جنبها ينسدح على فخذها
هديل دفته : قوم قوم ماسمحت لك.
رفع عينه يناظرها : همزي راسي تكفين.
تنطق : قوم بعد عني
يمسك كفها يحطه على راسه : مو حنا اصدقاء.
هديل : الا .
ثنيان: همزي صديقك.
ابتسمت وبدت تهمزه وتشده بشعره بقوه وهو يتألم ويقاوم بابتسامه ولف لها بكامل جسمه يطالع وجهها : بيجي يوم تحبيني ياهديل.
تصد عنه : لا.
يبتسم : تدرين اني اشوفك باحلامي كثير .
تنزل عينها تطالعه: وش تشوف.
يضحك : اشياء خاصه .
شدته بشعره بقوه تبعده عن حضنها وهو يضحك بصوت عالي : خلاص خلاص .
قامت : الشرهه عليه الي سمحت لك تقرب مني.
امل كانت تسمع ضحك ثنيان من غرفة هديل ومقهوره بغرفتها : هين ياثنيان هين انا اوريك.
_____
بالديره
في بيت مشعل
ترف ونجد بحوشهم يسولفون ويضحكون وضحكهم واصل لحوش سعود.
بتال: شكلهن مايدرن انا بالحوش .
سند اخذ حجر ورماه عليهم وضرب براس نجد الي صاحت وترف تضحك ودخلو ركض للبيت
بتال بضحكه : انت مهبول.
يطالعه : مابي احد يسمع ضحكتها غيري.
كايد بابتسامه : اوووخس ياورع وش ذنب الضعيفه الي فقشت راسها.
ينطق بحقد : خلها تستاهل نجد سوسه.
بتال: ليه وش مسويه.
يطالعه : وش ماسوت منافقه مثل شوق على كايد.
ويلتفت لديم يبتسم : معليش نسيتس تحمليني الليله.
تنطق: عادي عادي خذ راحتك.
قام كايد : ديم تعالي ابيتس شوي.
سند يدق بالكلام : هاه تونا باول الليل يمديك تشيك على الحلال الليل بأوله.
تناظره ديم : اي حلال يوووه من جدكً بتروح للحلال.
ضحك كايد : ياعزتي لتس طحتي بسند التسلب.
تناظره : وسند صادق وش يوديك الحلال خلنا سهرانين معهم.
يضحك سند: شفت حتى هي ماتبيك تروح للحلال.
كايد طلع نعاله يحذف سند الي انحاش ورى امه : قليل الادب.
تناظرهم ديم : وش فيكم .
مسكها كايد بيدها : تعالي تعالي يالدبجه ماتدرين الله وين حاطتس.
وراحو غرفتهم وديم للحين مو فاهمه شي.
____
مشت الايام وصار اليوم ١٤ رمضان
بالرياض
هديل ميته شوق لديره تجهز شنطتها دخل عندها ثنيان : هاه
جاهزه .
هديل لفت بابتسامه ولهفه: اي متى بنمشي.
ثنيان: الحين لو تبين .
تنطق : وعمي وامك.
ثنيان : بيلحقونا العصر.
تشمق فيه : ام كشه بتجلس بالبيت.
ابتسم: لا لا راحت لاهلها مع السواق.
تبتسم : اجل يالله مشينا.
خذت عباتها تتوجه للباب: بسرعه بسرعه تكفى.
شال الشنطه يلحقها : ياحظ الديره الي تحبينها هالكثر..
سمعته وكملت طريقها بدون رد .
______
العصر في بيت سعود
البنات يجهزون الفطور حتى ترف ونجد انضمو لهم لانهم معزومين على الفطور كانو حايسين بالمطبخ والعيال عندهم استنفار هذا رايح وهذا جاي يجهزون ويشيلون ويحطون نجد تلف السمبوسه وشهد تجهز الحلا وعنود تجهز الايدام وترف تسوي اصناف جانبيه هي وغزل وساره تجهز الصحون والملاعق والفناجيل على جنب
ديم تجهز العصاير الشي الوحيد الي تعرف له
شهد: عنود الشوربه باقي
تنطق : هديل تقول خليها لي.
نجد: بتجي تعبانه مالها مزاج.
شهد: لا دامها قالت خلوها لي بتسويها.
فتحت ترف الثلاجه : عنود مافيه زبده.
شهد: يوووه نسيت اوصي العيال الحين وش يسكتهم وهم من امس يصيحون وش نجيب وش نجيب
ترف : عندنا زبده بروح اجيبها واجي.
راحت ركض تفتح الباب وتصدم بسند الي جايب الذبيحه للمقلقل كانت خدوها حمرا من حرارة الطبخ بالمطبخ رفعت وجهها تناظره كانت مستحيه وبصوت خافت : سند.
رد عليها سند بصوت تغلبه المشاعر من حب وشوق واعجاب : يا مرحبا باللي مر حبه واحياني ياواحدٍ ماكانه الا ضلع من ضلوع صدري ..
ابتسمت بخجل وغطت وجهها بطرحتها وراحت بيتهم تركض اما سند تلخبط وتوتر وصار يبلع ريقه الي ناشف من الصيام وزادته شوفة ترف : احمر الخدين ماتغيرت مثل ماهي سبحان من خلق وجهتس ياترف سبحان من عطاتس هالجمال .
قطع تفكيره صوت امه : سند امي وراك واقف عندك.
رفع عينه : هلا يمه ابد جبت الذبيحه وين احطها.
تأشر له : ادخل ادخل حطها عند باب المطبخ.
دخل سند وحط الذبيحه وطلع وهو باقي فاهي في ملامح ترف الي مابقي من طفولته الا هي كان يمشي وماهو شايف قدامه يفاجئه حضن هديل : سسنووود.
رفع راسه وهو لسى منلخم وبابتسامه حضنها : هديييييل يالله حيها شخبارتس عساتس طيبه.
ابتسمت : الحمدلله انت وشلونك.
سند: زين زين الحمدلله.
تنطق : سنود بتال وكايد زعلانين مني ومن ثنيان ابيك تهدي الوضع شوي تكفى.
يبتسم : ابشري ابشري وينه ثنيان.
هديل: برى .
ينطق : خلاص ادخلي وانا بروح اقلطه.
دخلت هديل وسند راح لثنيان الي ينزل اغراضها عند الباب.
دخلت هديل على البنات : انا جييت.
البنات بس شافوها صاحوه بفرح..
ديم راحت تركض تحضنتها وبعدها العنود وشهد ونجد وترف : شخبارك هدوله، يوووه اشتقنا لتس ، اخيرا مابغيتي تجين،
بعد ماسلمت وتطمنت عليهم : وين امي.
عنود: عند صقر تنيمه.
تنطق : بروح وبرجع اجهز الشوربه اغلي المويه وقطعي البصل والثوم.
شهد: اوخس تقول مويه بالعاده ماء.
هديل بضحكه : يالله اغلي الماء ياشهيد.
وراحت عند امها الي تنيم صقر : جملا بنت مخلد لي مكان بحضنتس ولا راح علينا.
فتحت يدينها : لاوالله مكانتس محفوظ تعالي تعالي ياعين ابوي انتي.
حضنتها وصارت تبوسها : اشتقت لتس يمه .
تمسكها امها بيدها : تعالي تعالي صقر راقد.
هديل تشوفه كبران نزلت باسته بشويش وطلعت مع امها هنا سمعت صوت بتال الي ينادي عنود وطلت عليه : عادي تجي هديل ولا لازم العنود.
بتال بس شافها كنه كان ميت ورجع للحياه ركض عندها يضمها : ياحبيبة اخوتس انتي ياشين البيت من دونتس.
باست راسه: مانك زعلان مني .
يبتسم : وانا اقدر ازعل منتس انتي قلب بتال الي ينبض بين ضلوعه.
ابتسمت :ياحبيبي ياخوي الله يخلي لي هالقلب الين اموت.
بتال: عسى عمرتس طويل.
ميلت فمها : ثنيان بالمجلس تكفى مش الموضوع .
بتال: ابد ابشري من هالعين وهالعين الحين اروح اسلم واهلي وارحب.
هديل: تتريق؟
ينطق : انا ادري عنتس سواته ماتتسوى وتبيني امشيها له لاوالله ماني بمشيها مانتس رخيصه عندي عشان اسكت له.
هديل: خلاص ضربتوه وكسرتو خشمه ماقال لعمي وحرص على امه وزوجته انهم مايقلون لعمي انكم ضاربينه مايبي الشر.
يهز راسه : مقدر ياهديل مقدر الرجال غدر فينا وتقلين مشو الموضوع.
دخل كايد الي ابتسم بدون نفس وواضح لسى بخاطره شي: يالله حيها.
هديل سلمت عليه : الله حي القاطع .
ينطق : قرصة اذن كنتي بحاجتها.
يطالعه بتال : تقول رحو سامحو ثنيان .
توسعت عيونه : نسامحه كيف ؟ بمجلسنا بنكرمه غيرها لا يدور عندنا شي.
هديل: كذا ماينفع.
كايد بحده : بتعلمينا وش الي ينفع والي ماينفع خلاص حنا رجال نعرف وش نسوي رحي ساعدي خواتس.
راحت هديل وخاطرها مكسور لف بتال لكايد: ليه تقسى عليها هي مالها ذنب.
كايد: اجل لاتجيني تقول سامحه .
وراحو للمجلس .
____
عند البنات دخلت هديل بعد ما لمت شعرها كعكه وبدت تجهز الشوربه الي الكل مشتاق لها : وش سويتو فطور.
شهد: كل شي يخطر على بالك ايدام حلا صواني بالفرن وجلي وتطلي وامي زينت لقيمات
ديم : انا سويت العصير .
ضحكو البنات واردفت ديم: كلاً وقدرته انا قدرتي العصير بس والله اعرف كايد يمدحها.
تبتسم هديل : دام كوكو شهد لتس كدينا خير.
كملو البنات الفطور وهم يضحكون ويسولفون.
🎀نلقاكم_البارت_القادم