انا احبك مابها زيف وخداع رغم الذي نخفيه والي نخافه

بارت ٢٦

في بيت محسن
ديم جالسه تذاكر يدق جوالها تبتسم ترد  : هلا بكوكو هلا بحبيبي شخبارك.
ينطق مبتسم : مشتاق لتس بالحيل.
ديم : غريبة صاحي هالوقت.
يتنهد : عجزت انام وانا افكر فيتس.
تبتسم بحب  : ياروحي انت حبيبي شرايك تجي.
قطب حواجبه  :اجي وين.
تنطق بحماس :  تجي بيت اهلي تنام بحضني.
توسعت عيونه : وعمي وامتس.
ديم : تعال تكفى ماعاد ابي اذاكر .
يبتسم : ليه
تنطق بدلع : تذكرت حضنك ابيه الحين.
يضحك : تقلينه صادقه.
تنطق بدلع : اذا تحبني تعال.
كايد: كم باقي على الفجر.
ديم: ٣ ساعات.
كايد: جايتس
  تنط بحماس  : قل والله.
يقوم من سريره : ايوالله بس باخذتس اوتيل واردتس.
تنطق بحماس  : يالله خلني اجهز وانت انتبه لطريق تكفى.
فتح الدولاب ياخذ منشفته   : ابشري ابشري ماعليتس.
وطلع شغل سيارته ودخل يجهز ويلبس ،، ومسك خط للرياض.
___
في بيت مخلد
شوق بالمطبخ فجاه طفت الكهرباء والكل نايم بلعت ريقها بخوف : شاهر شااااهر وينك.
طلعت من المطبخ  تتلمس الطريق وماتدري وين متوجهه وشاهر ماكان يرد لانه كان نايم : شااااهر وينك ظلام ماشوف.
زاد خوفها ودموعها تحجرت بمحاجرها  وبصوت يرجف : شااااهر .
فجاه تتصدم بشخص واول ماحست بصدره ارتطم بصدرها حضنته وانهارت بكي: ليش طولت ماجيت.
فتح نور الجوال : كنت نايم انا اسف ماسمعتك.
بلعت ريقها بخوف : اخاف من الظلام .
اخذها قدامه يتوجه للغرفه ويقفل الباب وبس لف رجعت شوق تحضنه بقوه شاهر قفل عيونه بمتعه ارتخى يبوس راسها : خلاص انا معك لاتخافين .
بعدت عنه ومسكها بيدها ياخذها لسرير ويحط لها الضوء عندها : انسدحي ارتاحي انا بروح اجيب لك شي تاكلينه.
مسكته بيده : لا لاتروح لاتخليني لحالي اساسا انسدت نفسي خلاص
ينطق : طيب خلاص ماني رايح بنسدح بفراشي انتي نامي.
شالت اللحاف : عادي تجي جنبي.
بلع ريقه : اذا تبيني جنبك جيت.
هزت راسها بالايجاب: ايه ابي.
ابتسم  وطلع السرير وانسدح يفتح لها يده ودخلت بحضنه وصار خشمها بصدره اخترقت ريحة صدره انفاسها الي خلت شوق تتوتر ولاول مره تتوتر من قرب شاهر لها بعدت عنه تبلع ريقها طالعها ينطق  : فيك شي
شوق بتوتر : لا مافيني.
سحبها عنده ورجعها لحضنه : نامي ماعليك انا معك .
قفلت عيونها تحاول تشغل نفسها عن ريحة صدره الي تعكس نظافته وفخامة ذوقه حتى بالعطر ،، قطع تفكيرها صوته: كيف عرفتيني بالظلام.
شوق بدون ماتحس : عرفت ريحتك.
ابتسم : ترا صدق كنت نايم ماسمعتك لايجي ببالك اني مطنش
تنطق  : ادري انت ماتسويها.
شاهر : بكره بنمشي الصباح للرياض .
تطالعه : يعني ماراح تخليني عند اهلي.
يتنهد : لا ابيك معي .
تضايقت  : بس انا .
هنا رجعت الكهرباء وكانت عين  شوق بصدره المكشوف بعدت شوق : خلاص رجعت الكهرباء
قام : بروح لفراشي.
هزت راسها بالايجاب : شكراً
ابتسم : العفو .
وقام راح ينسدح بفراشه وشوق انسدحت بالسرير وهي تفكر بريحة صدره الي ماتدري كيف ومتى حبتها وخلتها تضعف قدامه وعشان تشيل هالتفكير من راسها قامت جلست وبعصبيه : هي انت
فتح عيونه  يناظرها باستغراب : هي انت!!
يرتفع صوتها  : ليش ماتخليني اروح مع اهلي انا مابيك وابيك تطلقني مو غصب تخليني اعيش معك .
تأفأف  بصوت عالي : من شوي كنتي وش زينك .
تنطق بحده : شاهر
يزفر شهيقه : نعم
تنطق : بكره ودني لاهلي.
يهز راسه : نامي ويصير خير وترى الكهرباء بتطفي اي وقت اذا طفت تعالي عندي.
تشمق  : مايحتاج اجي عندك خلاص.
يتلحف : طيب قلت لك لانها لو طفت ماحتكون مره بتكون اكثر.
لفت لشباك بصدمه  تصرخ  بأعلى صوتها تشوف وزغ  وتركض جهة شاهر الي فز جالس : وش فيه .
تأشر بخوف : وزع وزغ.
قام وقف : طيب طيب اهدي اهدي.
الوزغ طاح بالارض وصار يركض شوق تعلقت برقبة شاهر الي شالها بيد وحده  يحاوط خصرها بيده وهو منهار ضحك  ،، حطها بالسرير واخذ النعال : خليك واقفه هنا.
دخل الوزغ تحت السرير نزلت شوق تركض تبي الباب .
لف يطالعها ميت ضحك  : وين رايحه اخواني بالبيت.
ركضت خذت عباتها وطلعت برا وتلبسها اخذ شاهر شنطتها الي مجهزتها للرياض ولحقها ولقيها واقفه داخل ولفت له : فيه صوت كلب برا .
يخفي ضحكته  : دقيقة بطلع اشوف لك الطريق.
تمسكه بتشيرته من ورى : وين بنروح .
يكمل طريقه  :  بنسري للرياض.
طلعو للسيارة وحركو للرياض.
____
بتركيا
هديل الي دخلت ثنيان السرير ونامت بالكنبه وصحت على انينه  وقامت عنده تتحسس جبينه : ياربي وش هالبلشه جابني هنا وطاح وانا اشيل فيه اووف بس .
فتح عينه يرجف وبصوت مبحوح ويالله ينسمع : هديل.
هديل  متعوده على هالكلمه مع خوانها وابوها : سم .
ينطق بنعب  : اطلبي شي لك تاكلينه.
تزفر شهيقها : مابي شي انت بس تحسن تكفى بعدين ناكل سواء
ابتسم : طيب فيه بشنطتي مسكن جيبيه.
راحت  تفتش باغراضه وجابت المسكن وجابت مويه : خذ.
قام يسند راسه على السرير يجلس حطت هديل الحبه بفمه وشربته مويه : انسدح لازم تعرق امي دايما تقوله اذا عرقت بعد الحبه تتعافى .
يرجع ينسدح : ابشري بس تعالي بالسرير الجو بارد بلا ماتمرضين .
هزت راسها بالايجاب وقامت لبست بيجامة نوم ودخلت بطرف السرير بعيد عن ثنيان الي لف جهتها  يطالعها وهي على جوالها وكانت تبتسم وهي تسولف مع بتال واتس وثنيان كان صافن بتفاصيل ملامحها يحب يتأملها وفجاه ضحكت بصوت عالي ولاول مره يشوفها تضحك كذا ابتسم بدون مايحس:  ياحظ بتال بحبك له .
تلاشت ابتسامتها تحط جوالها على جنب وتجمع شعرها كله على ترجعه للامام تظفره وتنسدح جهة ثنيان صار صمت وهم يناظرون بعض : ليه ماقلت لجدي انك متزوج بنت خالك.
تنهد تنهيده كادت تفجر صدره : حتى لو قلت له بيقول الشرع حلل اربعه .
تنطق : تحبها كثير .
يبتسم  : كنت مفكر اني احبها .
تشتت نظره وترجع تناظره  : ليش خليتنا نسافر .
ميل فمه  : قلت تغيرين جو ويصير بيننا ذكريات حلوه .
ابتسمت بسخريه : ذكريات حلوه ! اول ذكرى هي دخلت زوجتك عليه بالفندق وانا بفستاني مستحيل انساه لو اكبر واعجز ويجيني زهايمر انسى كل شي الا هالموقف لو افقد ذاكرتي ماراح انساه.
يبتسم  : المهم انك الحين معي حتى لو ماتبيني.
تصد عنه  : ماني معك انا مع اهدافي واهدافي للاسف انت الوحيد الي تقدر تساعدني احققها.
ينطق : ابشري بسعدك يابنت عمي والله انها آمري وسمي واني لاعوضك عن كل شي .
تلحفت وغطت وجهها ونامت بعد شوي رفع ثنيان عنها اللحاف يشوفها نايمه قرب منها وهو يالله يسند نفسه بس سحبها  عندها يقرب لشعرها ويشم ريحتها بكل حب وعمق : اااخ ياهديل اااخ ماتدرين وش سويتي بقلب ثنيان.
انسدح بعد ماباسها بهدوء يتأمل ملامحها الي كل مره يحبها اكثر من قبل الين نام بدون مايحس.
____
بالرياض
وصل كايد بيت عمه محسن فتحت ديم الي تعلقت برقبته وتبوسه : اشتقت لك وحشتني.
كايد كان رايح وطي بس شافها كيف تعامله ومتعلقه فيه تناظره ديم : الحين تقول صغيره ماعندها عقل.
يضحك يحاوط خصرها : لاوالله الا صغير السن ماخلى فيني عقل.
جاء عمه محسن وبعد كايد ديم عنه وسلم على راس عمه وبدال ماعمه يرحب صار هو يرحب بعمه مع ان البيت بيته : يالله تحيي عمي اقلط اقلط.
عمه ابتسم : انا الي اقلط ولا انت .
ابتسم بإحراج : هاه كلها واحد بيتي هو بيتك.
يبتسم عمه يطالعهم : وراك جاي ساري .
ينطق كايد بتوتر : ديم نسيت مصروفها.
عمه بعدم تصديق : طيب هقلط اقلط الله يحييك.
كايد : لا بعد اذنك باخذ ديم.
يُصرعمه : لاوالله الا لتقلط وتنام عندنا.
مسكته ديم بيده : تكفى كوكو .
كايد بس سمع كوكو بلع ريقه يطالعها ويطالع ابوها الي ابتسم : يالله ياكوكو اطلعو غرفتكم فوق.
كان وده الارض تنشق وتبلعه ولا سمع عمه هالكلمه : طيب ابشر ابشر .
طلع محسن وديم نشبت بكايد : كوكو تكفى تعال معي ابيك تشوف غرفتي وتنام بسريري
كايد: ابشري ماني مخليها بخاطرتس يالله بس امتس بتسوي لي سالفه اعرفها.
تميل فمها بدلع : مااستاهل تتحمل عشاني.
يبتسم : الا والله.
تمسكه بيده : تعال تعال ،، اوووص عشان ماتسمع.
وطلعو لغرفة ديم الي ماتوقع بيوم كايد انه بيدخلها وكان طفوليه نفسها : شرايك حلوه.
حضنها بقوه : غرفتك تشبهك.
_____
بتركيا
صحى ثنيان بخير قام تروش ولبس وجاء عند هديل الي غاطه بنومه عميقه وجلس على الارض يسند يدينه على السرير يبوس خدها ويناظر ضفيرتها الي ملت يده من كثر ماهي عريضه يمسكها ويشمها ويبوسها  بهدوء فتحت هديل عيونها تشوفه يشم شعرها بس شافها تطالعه ابتسم
هديل : كيف صرت.
يبتسم  : صرت زين دامك اهتميتي فيني صباح الخير ياكل الخير ياصبحي وشمسي.
بعدت عنه وقامت وجلست : لاتقول لي كلام حلو ولا تتعب نفسك انا قلبي مات من يمك مستحيل ومن سابع المستحيلات اني احبك او اصير زوجتك بيوم ،،انا لي هدف بحققه وبعدها كل واحد بطريقه وانا ماهتميت فيك امس لاني احاول اغيرك او ابين لك شي لا ابداً انا مامعي بهالبلد الغريبه الا انت عشان كذا مجبوره اسندك لو طحت حتى انا اقدر ارجع السعوديه اشوفك ماتبي امل ولا تبي تكلمها ولا ترد على اتصالاتها حابه اقول لك ترا مردك لامل ولاتفكر اني بغار عليك منها لو كلمتها ابداً هديل مستحيل تكون لك .
قامت تغسل وثنيان حس وقتها ان كل الدنيا بثقلها وهمومها على صدره وكل الامل الي كان في قلبه تبخر وتلاشى فلت نفسه على الارض يالله يتنفس من قهره وغبنته وهو يدري ان معاها حق.
__
بشقة شاهر دخل هو وشوق شقتهم الي كانت تجنن من ديكورات واثاث شوق انبهرت ولفت له : يااي ماتوقعت ذوقك كذا خورافي.
ابتسم : زين عجبتك.
تبتسم : خلنا نعيش هنا تكفى.
يطالعها : مو على اساس تبين الطلاق
تجلس على الكنبه مقابل شاهر : شوف بقول لك شي انا انسانه احب الفلوس وانت متوسط الدخل غير بيئتك التعبانه غير ستايلك مايعجبني صح تحاول تثبت لي انك مو طعس بس الا طعس تدري انو خطبني دكتور ورفضته بس لان دوامه اختلاط اعرفني ماراح اتحمل بجن عليه من الغيره ورفضته وولد خالي عدنان ضابط كان مكلم امي فيني بس انت دخلت بالخط.
يطالعها : اممم مين خطبك بعد .
تجمع كفوفها : اامم كثير كثير اي واخو صديقتي طيار .
ضحك يمل راسه لورى : قومي قومي نامي وانتي تعطيني اياها كل وحده اكبر من الثانيه.
تشمق فيه وقام توجه للغرفه وهي راحت تلبس اكثر لانجري مفصخ بالحياه وجات عنده لابس بيجامه شورت وبس دخلت كانو لابس نفس اللون شوق ضحكت : اف ياه وش ذا .
طالعها ولف وسكت ماعلق ،، طلعت معاه السرير لف يطالع جسمها الي مفصخ وواضح من كل مكان ولفت له : خير .
يرفع حاجبه فيها : ليش لابسه كذا من تبين يشوفك.
تبتسم : انا اشوف نفسي مو لازم احد يشوفني . قامت قدامه وهي تاخذ اللوشن وتجلس قدامه وتعصره على فخذتها وتدهنه ،، لف يطالعها وكان يخفي توتره وهي تزودها بحركاتها وهي تدري انها صابته بوتره.
قام : بروح انام بغرفة الضيوف.
تضحك باستفزاز : وش فيك ضعفت قدام جمالي.
لف يطالعها ينطق ببرود : تدرين اني اقدر اخذ الي ابيه منك بالقوه بس ماهي اخلاق شاهر ابد.
شوق ضحكت بسخريه : على اساس بخليك لايغرك انك رجل تراك ضعيف لا ويدك الثانيه مكسوره بعد.
عصب منها بعد الي سمعه توجه لها يسحبها بيدها ويحشرها على الجدار وهو ماسك يدينها الثنين ورى ظهرها بيد وحده ويشدها على صدرها بصدره عشان ماتتحرك شوق كانت تناظره فوقها بحكم انه اطول منها كانت تطالعه بصمت قرب لفمها يستنشق انفاسها وبلع ريقه بتوتر باس خدها ونزل تحت اذنها يشم شعرها بعمق وباسها وبعد : ماتخلين حركاتك.
تناظره : لاتروح الغرفه الثانيه.
يبلع ريقه : ليه.
تنطق بتوتر : اخاف تطفي الكهرباء.
يبعد عنها : لاتخافين ماتطفي هنا.
وبس لف بيطلع : شاهر دقيقه.
وقف ولف لها : هاه شوق.
تنطق : خلاص روح.
طلع شاهر وهي جلست تكمل ترطيب لجسمها وهي دايخه بعد قرب شاهر منها بس كل ماتتذكر انها بتسكن الديره وانه من عيالها تكرهه وترفضه اما هو كان خاطره يبوسها بثغرها مو بخدها بس حس انها بتاخذ عنه فكره انها جابت راسه واضطر ينسحب.
____
بتركيا
عند هديل لبست وطلعت : صرت جاهزه
ثنيان الي كان مقهور ومكسور من كلامها وحاس ان قلبه انطحن بعد كلامها قام وقف : نزلي عباتك .
توسعت عيونها : ليه
ينطق : الاتراك مايحبون العرب ولو شافوك بعباية ممكن يأذونك.
توسعت عيونها ونظرتها الحاده الي يحبها ثنيان : ودامهم مايحبونا ليش جايبني عندهم.
ينطق : انتي البسي بالطو طويل وكمام ولفي شيلتك وخلاص.
تميل فمها : مامعي بالطو طيب.
يبتسم : انا معي بعطيك حقي الين نشتري لك تمام.
تهز كتوفها : طيب
نزلت عباتها ولفت شيلتها وجاب لها البالطو حقهً قرب يبي يلبسها : دخلي يدك.
سحبته من يده : هات اعرف البسه.
ولبسته كان كبير عليها شوي وطلعو.
هديل كانت منبهره من الي تشوفه وبس شافت الناس تناظرهم شبكت يدها بذراع ثنيان الي لف يطالعها : لاتخافين.
تبتسم : ياحلو السعوديه امان مو نفس هنا.
يطالعها: جعل حياتك كلها امان.
تغير الموضوع : وين بتوديني.
يبتسم : بوديك اماكن مره حلوه راح تعجبك .
شالت يدها وسحبها ثنيان : خليها عشان ماضيعك.
تركت يدها بيده ماتدري ان الهدف هو قربها منه حتى بموضوع العبايه وهي تشوف كثيير لابسين بعبايتهم وماحد تعرض لهم
___
بشقة شاهر
جات شوق عنده : شاهر انا جوعانه.
ينطق : اطلبي اكل بسيطه يعني.
تجلس قدامه : مامعي فلوس نسيتها ببيت اهلك.
يرفع يده فتح عيونه : طيب بعطيك فلوس .
تناظره : بكره ودني اخذ كتبي واغراض الدوام
يهز راسه : طيب .
تنطق : اسمع تبي اكل معي.
يهز راسه بالنفي : لا مابي شي خليني انام .
قامت شوق راحت للغرفه وتممت الطلب وبس جاء المندوب راحت عند شاهر : شاهر شاهر.
رفع يده : هاه ياشوق قلبتي مخي..
تنطق : شسوي جاء المندوب
قام وراح يستلم الطلبً ورجع لها : هاك .
خذته من يده وجلست تاكل : خذ طلبت لك معي .
يجلس : مابي اكل .
تمد له : قوم اكل معي حرام ينرمي الاكل.
ينسدح : خذي الاكل ورحي للمطبخ مابي اكل انا .
قربت البرجر لفمه : ذوق بالله طعم مره.
طالعها وتعمد يحرجها : تبيني اكل بعدك؟
توسعت عيونها : ليه يعني ماني زوجتك.
يناظرها بصدمه : انتي خبله؟
تنطق : ايه خبله ذوق بسرعه يالله .
شاهر خذاه من يدها واكل من الجهه الثانيه ماكل بعدها : معروف هالمطعم .
توسعت عيونها : انت قرفان تاكل مكاني؟؟ .
يطالعها : وليش مستغربه يعني مابيني وبينك اي مشاعر عشان اتقبل اني اكل بعدك.
حطت الاكل بدون ماتكمله وقامت للغرفه بعد شوي وصل شاهر رسالة وفتح جواله وكان تحويل بنكي من شوق : هالخبله راده عليه فلوس العشاء.
___
بتركيا
عند هديل وثنيان الي جلسو بكوفي على مطل يطلبون قهوه هديل صح مجروحه من ثنيان بس كان جمال المكان عاكس عليها وهي تصور لاخواتها وتتأمل المكان ،، يطالعها : مبسوطه ؟
تطالعه : انت ليش قلت نزلي عبايتك والاتراك مايحبونا انا قاعده اشوف اغلب السياح عرب وبعباياتهم.
يبتسم : بس بالله شايفه ان شكلهم مقبول بالعبايات.
تنطق بحده : ياسلام يعني المشكلة فيك انت مو فيهم .
يمد يده لكفها الي سحبتها : اهدي خلينا نستمتع بالمكان وبالقهوه الي بتوصل الحين.
تنطق : وش طلبت لي .
يبتسم : جربيها. اول وبعلمك وش اسمها .
هنا دق جوال ثنيان وقام يكلم : خليك هنا ماني مطول .
قام يكلم وهديل شبه متاكده انه يكلم امل وماكان هامها ابداً طول وهو يكلم وقامت هديل تشوف الاطلاله تتمشى بالمكان وبعدت بدون ماتحس وضيعت ثنيان الي رجع ولا لقاها وطبعا هديل انهارت خصوصا انها نسيت جوالها على الطاوله .
جات عندها بنت : انتي عربيه .
رفعت راسها وكانت خايفه تقول ايه ووتوهق اردفت البنت : انا هم عربيه وياچ مريم من الكويت.
تطمنت هديل : انا ضيعت زوجي .
مريم مسكتها بكفوفها الي صارت مثل الثلج : قعدي ارتاحي انتي خل اطلب لچ شي يدفيچ .
تنطق بتوتر : لا لا مابي شي ابي زوجي .
تبتسم : هذا اخوي سعود.
ابتسمت هديل من تحت الكمام تتذكر ابوها وهنا تسمع ثنيان الي قال بخوف ولهفه : هديل .
لفت هديل تحضنه بقوه : وين رحت وخليتني.
ثنيان مايدري يواسيها ولا يسكت ويستمتع بهالحضن على الي يمكن يكون اول واخر حضن من هديل حاوطها بيدينه يشدها لصدره ويبوس راسها : لاتخافين انا معك .
بعدت عنه وهي تحس بنبضات قلبه الي تسارعت وتوترت مسكها بيدها وشكر سعود واخته ورجعو لطاولتهم الي ماكانت بعيده بس هديل متوتره والمكان جديد عليها واتصال امل عفسهم.
__
بشقة شاهر
جات شوق وهي ترمي بطاقة شاهر البنكيه : هاك رديت لك فلوسك.
يطالعها : ليه.
تنطق بحده : مابي لك شي .
شاهر : بس انا ماطلبت منك تردينها .
تشمق فيه : طلبتها من صديقتي وبس يصحى ابوي احول لها فلوسها.
خذت الاكل تروح للمطبخ وكانت مره زعلانه منه ومجروحه وكأنه كسر كبريائها وغرورها بس حسسها انه قرفان منها ،، شاهر قام لحقها وسحب الكرسي وجلس على الطاوله : شوق.
تنطق بدون تطالعه : شتبي.
يبتسم : انا اسف بس .
تنطق بحده : وش الي انا اسف يعني فيه شاب محترم ممكن يجرح بنت بهالكلام.
يطالعها : قربك وبعدك عني وقت ماتبين هو الي خلاني اتصرف كذا انا جاي اسالك الحين تبينا زوجين حقيقين ولالا
شوق لفت له بصدمه : لاااااا طبعا مابي.
قام وقف يبلع ريقه بقهر : طيب نازل اصلي .
تكمل اكلها : خذ المفتاح معاك لاني بصلي وانام .
طلع وهي كملت اكلها و تفكر بكلامه .
___
في بيت محسن
عند ديم الي نزلت وجهزت افخم فطور لكايد نزلت امها الي وباستغراب : ديييييم تجهز الفطور بنفسها .
ابتسمت : اشرفت عليهم بس ولا تعرفيني ماعرف اطبخ .
انميل فمها باستغراب : وش المناسبه بعدين وش ذا كله .
تبوس خدها : بعد شوي تعرفين ليش. .
وطلعت لغرفتها ركض تصحي كايد و دخلت شايله ملابسه بعد ما انغسلت وانكوت وحطتها على جنب ونطت معاه بالسرير تلمس خشمه باصبعها بلطف : كوكو قوم طلع الصباح والفطور صار جاهز .
فتح عيونه يبتسم من قربها له و قبلته بثغره : صباح الخير.
بادلها القبله: كلمة صباح الخير من شفتك غير ،، النور صبح الناس وانتي صباحي .
رجعت قبلته : قوم ينتظرونا على الفطور .
يجلس يلتفت : ملابسي!
تبتسم : عطيتها الشغاله غسيل وكوي مستعجل وهاذي هي جاهزه.
شد راسها لحضنه يبوس خدها : امتس وين .
ديم : تحت وابوي موجود وهذال ماعليك منها ماراح تضايقك اكيد.
كايد قام يتوجه للحمام يتروش.
تلحقه : دقيقه هاك منشفة شعري.
اخذها من يدها وارسل لها بوسة بالهواء وبس قفل الحمام دخلت امها: انتي وش عندك من الصباح .
ديم : كوكو نام عندي.
امها باستغراب: كوكو.
ديم : كايد يمه .
تنطق بحده : لاحقنا لا هنا .
توترت ديم وبصوت خافت : يمه كايد بالحمام لاتزعلينه تكفين يمه .
اشرت لها امها بصوت خافت: والله لربيك ياديم.
طلعت وكايد سمع كل الي دار بينهم بس بلعها وسكت عشان ديم طلع وهو لاف منشفتها على خصره وكانت ورديه ضحكت ديم وهي تشوفه : الوردي ماخذ منك حته .
حضنها بيد وحده : هاتي ملابسي تاخرت على عمي .
جابت ملابسه ولبس ونزلو للفطور.
___
بالديره
ببيت مشعل جات ترف وجلست عند ابوها : صباح الخير يبه.
ابوها : يامرحبا بترف حبيبة ابوها .
تفرك كفوفها : يبه انا فكرت بلي قلته مابي يبه الشيخ مابي اتزوجه .
يبتسم : تراه صغير وانا ابوك عمر ب٣٠ سنه .
تهز راسها بالنفي : ان شاء الله ٢٥ مابيه يبه تكفى.
يهز راسه بالايجاب : طيب طيب مثل ماتبين.
جات نجد ومعها القهوه : يبه تعرف تلعب جيكارو.
يبتسم : هاتيها وتعالي نلعب.
قامت تجيبه وترف خذت القهوه تصب لابوها الي قال : امتس وين.
تنطق : عند خالتي جملا صقر تعبان وراحت امي تشوفه.
ابوها : زين زين وانا ابوتس لاتسوون غدا بروح اصل لي رجال واجيب معي غدا.
تنطق بابتسامه : طيب يبه ابشر .
جات نجد تجلس قدام ابوها الي ابتسم يبدا يلعب معها.
___
في بيت محسن
نزل كايد للفطور وكان عمه وهذال وام ثنيان جالسين.
سلم على راس عمه : صباح الخير .
وسحبت له ديم الكرسي: اجلس جنبي.
ابتسم وجلس وبدت ديم تحط الاكل بصحنه : تبي حليب ولا شاهي.
كايد : الي يجي منتس.
صبت له شاهي : اعرفك ماتشرب الا حليب الابل واحنا ماعندنا الا المعلب.
ابتسم رغم انه ماقد قال لها انه مايشرب الحليب العادي: اجلسي افطري .
ديم كانت تحاول تفتح المربى الي مره مو راضي ورغم ان كايد كان يسولف مع عمه الا انه مد يده ياخذه ويفتحه لها ويرجعه مكانه ديم ذابت داخت من الحركه كيف باله معها وهو يسولف مع ابوها.
هذال : يبه كلمتو ثنيان .
تنطق امه : اي كلمته اغلب وقته مايرد مبتلش مع هديل ماتعرف هناك شي وثنيان رجال يحب الحياه ويحب يستكشف .
رفع كايد عينه فيها بحده : وهو رايح يمشي زوجته ولا يستكشف.
تنطق بكبر : هو كذا معنا بكل سفره .
بلل شفايفه : هذاتس قلتيها معتس بس مع زوجته ماراح ينشغل عنها .
ديم توترت و تقطع النقاش الي عارفه انه بيصير حرب بعد شوي : كايد ذوق هالجبن يشبه جبن الديره الي خالتي جملا تسويه من حليب الابل.
ابتسم: حليب الغنم مو حليب الابل.
قربت منه : تكفى افطر لاتزعل من امي.
يبتسم : ماعليتس ماني زعلان والله ياعشانتس لاتحمل الي ماحد يتحمله.
كان خاطرها تبوسه بس استحت من ابوها وعطته شريحة خيار كايد استحى ياكلها واستحى يخليها فأخذها بيده واكلها وغمز لها بابتسامه وهي ابتسمت وفهمت عليه وكملو فطورهم.
___
بالديره
عند سند الي جالس بالحوش ويفكر بكلام الشيخ وقام كتب رساله لترف وراح يدق الباب وفتحت نجد : نادي لي ترف.
نجد: ليش
سند: ابي اعطيها رساله.
مدت يدها: جيبها انا اوديها .
مدها : عطيها لاحد يشوفها.
تهز راسها : طيب .
راح سند ونجد قفلت الباب وخبتها مع الرساله الاولى بدون ماتعطيها ترف
ترف جات عندها : مين كان على الباب.
نجد: سند .
ترف ابتسمت : ياحليله سند مستغربه ماسال عني من يوم مرضت.
تهز كتوفها : سند باقي صغير يعني لاتاخذين منه شي.
تبتسم : تعودت عليه احب اهتمامه لي ماحد عبرني غيره.
تصدمها : تزوجي الشيخ يهتم فيك.
دفتها ترف : بعدي من قدامي.
وطلعت برا وجلست تفكر بلي صار معها فجاه تشوف سند الي كان فوق البيت يعدل صحن الدش كان كابر شوي عن اخر مره شافته .
خذت حجر وترميه عليه لف سند يطالعها وغطت وجهها بطرحتها وبس شافها ابتسم : ترف انتي طيبه .
تناظره : اي ليش ماجيت تسال عني.
ينطق باستغراب : جيت ياترف جيت مرتين اسال عنتس بس نجد تقول انتس تعبانه و نايمه عطيتها لتس رسالتين ماعطتس اياها؟
تقطب حواجبهاً : لا ماعطتني اشوفها.
هنا شافت بتال طالع ودخلت ركض وراحت لنجد : وين رسايل سند.
توترت نجذ : اي رسايل مافهمت.
تنطق بحده : نجد بلا جنان هاتي رسايل سنود بسرعه .
تصدمها نجد : وش تبين فيها تراه بزر بزر.
يرتفع صوت ترف : وش دخلك انتي هاتيها وبس.
فتحت نجد دولابها وطلعت لها كيس فيه مقاضي من سند ورسالة قبل امس واليوم : هاك ابني احلامك على بزر.
خذتها ترف وراحت للغرفة الثانية تقراء رسايل سند الي انصدمت من نضج عقله وكلامه الي اكبر منه وكان كاتب لها بيتين شعر ترف ابتسمت: يوووه ياسند كبرت وكبر كلامك وصاير تكتب شعر.
___
عند بتال : من كنت تكلم لك ساعه فوق.
ابتسم : اكلم ترف.
توسعت عيون بتال : ترف بنت عمي مشعل وين شفتها.
ينطق : اي كانت بالحوش حذفتني بحصاه تقول ليش ماتنشد عني يوم مرضت.
سند قام بيوقف وتعثر وكان بيطيح ومسكه بتال : سند انتبه .
سند ابتسم : انزل انزل عمي مشعل طالع.
نزلو يركضون ويضحكون .
#تعليقاتكم_مهمه💐