في كل بيت حكاية

الخائن ج٣

بصتله بصدمة وخضة في نفس الوقت، وهي مش لاقيه إجابة لسؤاله لأنها متوقعتش انه يسمعها وهي بتكلم "حسين"، عاد السؤال تاني وهو بيقرب منها ووشه باين عليه الفضول والاستغراب، وهنا جه على بالها إجابة فقالت ل "حسين" تنهي معاه المكالمة:

_ هكلمك بعدين يا حسين، روح كمل نومك.

قفلت معاه وبصت ل "عاصم" تسأله بابتسامة صفراء:

_ صحيت امتى؟

_ لسه يدوب، بصيت جنبي ملقتكيش.

_ أصل واحده صاحبتي صحتني على تليفونها كانت عماله تعيط ولقيتها بتقولي اسألي اخوكي لو يعرف محامي كويس، بما إنه خريج حقوق وكده فأكيد يعرف محاميين زمايله..

_ وهي صاحبتك عاوزه محامي ليه؟ وصاحبتك مين اصلا؟

كملت كدبتها وهي بتجاوبه:

_ ريهام.. اللي ابوها مات من اسبوعين، حصل مشكلة كبيره بينها وبين اخواتها بسبب الورث فهي عاوزه تعرف حقها القانوني.

_ هم لحقوا! ده لسه ميت! اومال فين حزنهم على ابوهم؟ هي فايقين يوزعوا ورث وهو لسه مكملش شهر حتى!

بصتله في عينه وهي بتقول كأنها بتوجهله هو الكلام:

_ الناس بقت وحشة اوي، ومحدش بقى صادق في حبه، لو كنت شوفت حبهم لابوهم ده مكنتش هتتخيل انهم يفكروا في ورث ولو بعد سنه، بس الناس بتعرف تتلون كويس، مبقاش يتآمن لحد في الزمن ده.

بصلها متعجب وقال:

_ انتي اللي بتقولي كده؟! ده انتِ اكتر حاجه بتضايقك التعميم، دلوقتي بتقولي الناس بقت وحشة! خليني اقولك بقى ان مش كلهم ومينفعش تعممي.

قال جملته الأخيرة بضحك وهو بيتولى دورها المرادي وبيقول الكلام اللي دايما بتقوله في اي نقاش بينهم، ابتسمت ابتسامة بسيطة وقالت بألم ساكن كل خلاياها:

_ الانسان لازم يغير معتقداته، الزمن بيتغير ولو فضلنا ثابتين نبقى اغبيه، انا اكتشفت ان محدش كويس.. محدش طيب.. انا اللي كنت هبلة.

قرب منها ومسك ايدها يقعدها على الكرسي اللي جنبها وقعد قصادها يسألها باستغراب:

_ كلامك غريب، هو في حاجه حصلت انا معرفهاش؟

هزت راسها بلا، وقالت وهي بتبصله بتمعن:

_ اصل امبارح شوفت فيديو عن واحده جوزها خانها، رغم انها مقصرتش معاه ولا مره، وكبر بيها ومعاها، عشان في الآخر تكتشف انه يعرف عليها واحده.

اتنهد وهو بيقول بضحك:

_ يا شيخه خضتيني، بحسب في حاجه حصلت من حد نعرفه، بعدين هو حد بيصدق كلام الفيديوهات بردو! النت كله فيك وحاجات مزيفة.

_ بس معظمها بيحصل في الواقع، عاوز تفهمني انك عمرك ما سمعت عن راجل خان زوجته؟

_ اكيد سمعت، بس يعني دي مواضيع بتحصل كتير، مش معنى كده اننا نشوف كل الرجالة خاينين! ما عندك انا واخوكي اهو وابوكي وابويا.. كل دول حد فيهم خان ولا بص لواحده غير مراته؟