انا احبك مابها زيف وخداع رغم الذي نخفيه والي نخافه

بارت ٢٥

شاهر الي ماقدر يرتاح من يده .
طلع من الحمام لاف المنشفه وكان قاصد يحرج شوق لانه : ممكن تساعديني اجفف جسمي.
ترفع عينها تبلع ريقها بتوتر : شرايك انادي لك شيخه.
ينطق باستغراب : شيخه تجفف جسمي!!
تنهدت بعجز : يوه ياشاهر طيب اجلس.
جلس وخذت المنشفه وصارت تجفف له شعره اول شي وفجاه شهقت بقوه : يوووووه هاذي الضربه مره قويه.
يطالعها : بس هاذي وحمه.
تنظارها : غريب لونها .
يهز راسه : يمكن .
تبعد عنه : قوم وقف تقدر تلبس ثوب.
يطالعها : لا مقدر امد يدي شفي لي شي نص كم .
تبتسم : عادي البسك على ذوقي.
يرد : مين بيشوفني ابوي واخواني واهلك.
تأشر له : دقيقه دقيقه.
وراحت فتحت دولابه : امم شرايك بذا ابيض وتيشرت وردي.
شاهر : من جدك انتي واقلط فيه الريجيل.
عضت شفتها السفليه : ايه صح جدي معقد من هالناحيه جنن ثنيان اخوي كل ماشافه لابس بنطلون مايناديه الا يالهندي.
ابتسم : عاد انا وجدك متفقين.
تناظره باستغراب : غريبه يعني .
يميل فمه : شفتي كيف.
خذت له ملابس داخليه سرواله وفانيله : بساعدك بالفانيله الثاني اسفه مقدر.
يطالعها : واجلس كذا .
تهز كتوفها : وش اسوي لك طيب.
يميل فمه : ماحد قال لك تكسرين يدي.
تنطق بانزعاج: اااخ بس عشان كذا متحملتك.
يبتسم بخفوت : طيب جيبي لي قميصي الاسود.
ترفعه توريه : ذا .
يهز راسه بالايجاب: ايه لبسيني اياه.
تقرب تلبسه،، ينطق :الحين نزلي المنشفه.
توسعت عيونها ناظرته : نعم !!
يبتسم : يابنت القميص واصل للارض.
تبعد عنه : فك المنشفه ترى المكسور وحده مو ثنتين.
ضحك : يالله هه هاتي الداخلي .
مدته له : هاك
جلس على السرير وصار يلبسه وهي تساعده على خفيف.
_____
عند ديم الي وصلت هي وهديل الغرفه وكانت مقفله.
هديل: افتحي
تطالعها بتوتر : المفتاح جوه .
تطالعها : كايد معه سبير بروح اجيبه.
تهز راسها بالنفي : هاذي المشكله انه عطاني اياه وانكسر جوه بعد.
تطالعها بصدمه : من جدك .
تهز راسها : ايً اخاف يهاوش
تبتسم : لا ليش يزعل تراك مكبره الموضوع.
تعض على اسنانها : هاذي ثاني مره انساه والمشكله صقر نايم جوه.
توسعت عيونها تنطق بصدمه : يابرودك يابنت صقر جوه وانتي ميته كذا .
ودخلن تركض تنادي كايد او اي احد يفتح الباب ديم اول ماشافت كايد جاي يركض مع هديل صاحت.
كايد: وين المفتاح الثاني.
تنطق بخوف : انكسر بالباب.
توسعت عيونه : صقر جوه.
تهز راسها بخوف : اي نايم بالسرير.
كايد لف ينادي سند الي جاء يركض : تعال تعال بنقزك مع المكيف تفتح الباب.
ينطق : بعيد
يأشر له : بجيب السياره .
وراح يركض يجيب السياره ونط سند بمساعدة كايد وبس نط شاف صقر صاحي وساكت راح وفتح الباب ودخلو كايد والبنات.
دخل كايد يضحك : مروق طويل العمر.
هديل شالته : بروح اوديه لامي .
وطلعت هي وسند.
لف كايد لديم : رحي جيبي مفك من عند هديل بطلع المفتاح الي انكسر
تناظره بتوتر : انت زعلان.
يبتسم : لا ليش ازعل.
تبلع ريقها : عشان المفاتيح.
يفتح يدينه : تعالي تعالي يام دميعه تخيلي عاد ازعل عشان مفتاح .
حضنته تمسح دمعتها : اسفه ماكان قصدي والله .
باس راسها : مافيه داعي تتأسفين صقر طيب والمفتاح بنطلعه والثاني بنسخ عليه نسخ كثيره عشان اذا نسيتي وكسرتي.
تبتسمً : خفت يصحى صقر ويموت من الصياح.
يمسح على شعرها : روحي روحي اجهزي مابقى شي ونمشي.
ابتسمت وباست خده : احبك .
ابتسم : وكايد يموت فيك .
وراحت تجهز واقف يطلع المفتاح.
____
عند شوق الي خلصت وجهزت ولبست فستان احمر قصير وواقفه تحط اللمسات الاخيره دخلت عندها عذاري بدون اذن : وش ذاللبس عيب عيب.
يرتفع صوت شوق : اول شي اطلعي برا ثاني شي وش دخلك ان شاء الله امشي مفصخه مو شغلك.
تنطق عذاري بصوت مرتفع : صدق ماتستحين.
تتقدم شوق تأشر للباب : اطلعي برا حد النفس طيبه .
بدت تتعالى الاصوات
تنطق عذاري بثقه : انتي ليش تنافخين والله لخلي شاهر يربيك ياقليلة الادب.
دخلو شاهر وشيخه : وش العلم.
تأشر شوق عليها : اسال مرت اخوك المصون داخله عليه بنص غرفتي تهدد وتتوعد.
لف لعذاري: خير عذاري عسى ماشر.
تنطق عذاري بلطافة : والله ياخوي ياشاهر عشان قلت لها عيب بدلي ملابسك حنا مانلبس كذا قالت انتي وش دخلك.
يهز راسه بالايجاب : وهي صادقه وش دخلك انتي انا المسؤول عنها وعن لبسها هنا .
تطالعه شوق بحده : ماحد مسؤول عني .
لف يطالعها صفن فيها شوي يعطيها يشوف شكلها ولف لعذاري: ليش واقفه للحين.
طلعت عذاري وقفل الباب ولف لشوق الي قالت : وش قال لك الدكتور .
يرفع حاجبه فيها : ماهو شغلك.
توسعت عيونها : وش فيك مين قالب راسك عليه.
ينطق بصدمه : ماحد قلب راسي عليك الا لسانك ياشوق وش يعني ماحد مسؤول عني.
تنطق بثقه : طيب صح.
طلع وصفق الباب بقوه وهي جلست بالسرير تتذمر.
___
حضرو الكل الغدا عند مخلدً
بمجلس الرجالًً،، دخل شاهر يده معلقه برقبته واستلمه كايد طقطقه : افا ياخالي طلعت كرتون .
ضربه على كتفه وبغمزه : اي خالك خيخه.
يبتسم : لا الصدق علامك .
يتنهد : من الحصان
ينطق : عاد ماهو وقتها ،مكسوره.
يهز راسه بالايجاب : اي فيها كسر
يضحك وهو مايدري وش بين شاهر وشوق : الحين يصومونك شهرين.
يبتسم : نتعود على الصيام رمضان اقبل.
يبتسم يسأله : اخذتو اغراضكم من الفندق.
يهز راسه بالنفي : لا برسلها معك تاخذ اغراضها .
يبتسم بخفوف : دخيلك ياخالي فكني منها والله لتصافق انا وياها .
يرد بضحكه : خلاص بجي معكم افرعكم لاتصافقتو.
يربت على كتفه : خلاص ابشر دامك بتروح معنا الله يعيني عليها بس.
يبتسم : تراء ماهي سيئه لهدرجة .
توسعت عيون كايد : ياحليلك ياخالي .
يشد بتال على شفايفه : خلاص ياكايد نشبت لرجال عند مرته .
يطالعه شاهر : تعلم من اخوك الذرابه.
تكي كايد يسأله : قل لي كيف انكسر كتفك بالله.
وقعد شاهر يشرح وكايد يسمع.
____
عند الحريم
شوق: ديم ابي اتوطى ببطن الباندا وابيك معي.
تبتسم : مين قصدك عذاري.
تزفر بضيق : اي رافعة ضغطي بنت الكلب.
تميل ديم راسها : ابد خذيها على جنب وبندعسها.
تقوم شوق : بروح افتح غرفتي وشفي كيف تروح.
قامت وفتحت غرفتها وردت الباب شوي ورجعت جلست شوي ودخت بنت عذاري غرفة شوق ولحقتها عذاري وقامت شوق وديم وراها .
شوق : وش تبين بغرفتي .
وديم قفلت الباب بالمفتاح : انتي كفو تهددين اختي .
توسعت عيون عذاري : بسم الله الرحمن الرحيم بعدن خلني اطلع .
فتحت ديم وطلعت بنت عذاري وقبل تطلع عذاري مسكتها شوق بشعرها وديم قفل الباب وضربوها وهي تصيح والحريم تجمعو على الباب ينادون ويحاولون يفتحون فتحت ديم الي كانت يالله تتنفس.
شوق لشيخه : هالسلقه ماهي كفو تسبني.
شيخه خذت عذاري لغرفتها ولطيفه دخلت عند بناتها وقفلت الباب: انتن كيف تضربنها في بيتها
تنطق شوق بثقه : هذا بعد بيتي.
دق جوال ديم تنطق بخوف : ياويلي كوكو اكيد درى .
تناظرها شوق : ماعليك منه ماله دخل بين الحريم.
ردت : هلا .
ينطق بحده : انتي ضاربه مرت خالي سالم انتي والسلقه اختس.
تبلع ريقها : هي الي بدت غلطت على شوق وانا فزعت لشوق.
كايد : تغديتي امشي.
تنطق : يالله جايه.
وخذت عبايتها : بروح كايد معصب.
تطالعها شوق فوق تحت : رحي طبطبي عليه لاينفجر.
وطلعت ديم لكايد الي كان صدق معصب.
__
في بيت مشعل ترف جالسه تمشط شعرها : الا نجد بسالك من اول عروسه زفوها.
تبتسم بإعجاب : شوق بعدين ديم ثم هديل اخر شي ساره.
تسال بفضول : ومن احلى وحده.
تلف لها نجد بكامل جسمها : اكيد شوق احلى بعدين ديم ثم هديل.
تميل ترف فمها بعدم فهم : مدري وش عاجبك في شوق .
تتنهد نجد : احبها
تضربها بخفه : تكفين لاتتاثرين فيها بس تراك ماتشبهينها ابد.
تقوم توقف : قومي غسلي يدينك من الزيت جانا غدا من بيت مخلد.
قامت ترف تغسل وراحو للمطبخ يتغدون
_____
في سيارة كايد طلعت ديم بصوت حاد : نعم.
يرفع حاجبه فيها : انتي الي نعم وش الي صار جوه من عيب
تقاطعه بحده : انت فزعت لخليف على عيال عبدالعزيز وهو مايحبك ولا انت تحبه والحين جاي تقول ليش فزعتي لشوق ولا حلال عليك وحرام عليه.
يزفر شهيقه : تضربين المره في بيتها.
تنزل عينها : مو بيتها بيت جدك مخلد.
ينطق بصوت حاد : ديم
ترد بصوت حاد برضه : نعم،، ليه معصب عليه مالك دخل بلي اسويه.
رفع حواجبه بصدمه : مالي دخل فيتس؟؟ماهو منتس من السلقه اختس الي توزتس عليه.
ناظرته ولفت عنه بزعل وهو نفس الشي
وتنطق بزعل : اصلا انت بس تبي اسمع الكلام لا اناقشك ولا شي امشي وراك بالصح والغلط كني بهيمه انت ماتحبي اصلاً تحب حبي لك وخوفي منك بس هذا الي عاجبك.
كان يطالعها بصمت وهو يدري انه مو كلامها ابدا ولاهي شخصية ديم وهذا كله تأثير شوق مد يده ليدها رفعها وباسها عاد ديم هنا تضيع علومها بس مسوية قويه سبحت يدها وشد عليها :
ياعشيري علامك ودك اتصير ضدي
وانته تعرف عشيرك مايخلي عشيره
لاتعجل علي بالحكم اركد وهدي
لاتصدق كلام اهل النفوس الفقيره
لفت تطالعه واردف: افا ياديم قلب كايد ياربيع صدره انا مابي ازعلتس.
تلف عنه للشباك : ايه مزعلني ياكوكو.
يبتسم : يخسى كوكو يزعلتس،
لفت له بابتسامه وقربت عنده وهي تمسك يده : سامحتك خلاص
يبوس يدها : انزلي انزلي بودعتس قبل تروحين مع اهلتس.
نزلو ودخلو البيت.
___
في بيت مخلد دخل شاهر عند شوق الي جالسه تشوف فلم واول مادخل
شوق: يوووه ياشاهر افف الفلم علق اكثر من عشر مرات .
جلس جنبها : وش الي صار بينك وبين عذاري.
لفت له بكل جسمها : الي صار ياطويل العمر اني جلدتها انا واختي.
قطب حواجبه : ليه طيب وش الشي الي سوته خلتك تمدين يدك عليها .
تبدا تحكي : اول شي تدخل فيني بشكل لايطاق ثاني شي تدخل بنتها غرفتي عشان تدخل وراها عشان تشوف عطوراتي عديمة الذوق.
يطالع التسريحه ويرجع يطالعها : الله والعطورات عاد.
يميل فمها بضيق : اقول تلايط بس والله انها جايبه راسك بس انا مو معطيتك وجه
رفع حاجبه فيها بصدمه : انتي ليش ماعندك احترام لاحد.
تحط رجل على رجل: ليه مو عاجبتك يعني .
يهز راسه بالنفي : لا مو عاجبتني ياشوق وكل شي له حدود .
تلف لها ترفع حاجبها فيه : طلقني اذا مو عاجبتك بعدين العصر بمشي مع اهلي للرياض.
يزفر بحده : طلاق ماني مطلق وروحة مع اهلك مافيه روحه.
تنطق بعصبيه : مو على كيفك بروح يعني بروح.
توسعت عيونه : عناد يعني .
تهز راسها بثقه : ايه عناد .
وتدق على ابوها قدامه وتحط سبيكر : الو يبه حبيبي مروني اذا جيتو تمشون للرياض عشان الدوام بعد بكره .
يصدمها ابوها لما قال : شاهر موافق ناخذك.
تطالع شاهر : شدخل شاهر يبه انت ابوي عادي اروح معك.
ينطق : حتى لو انتس بنتي رجلتس لازم يسمح لي اخذتس.
تناظر شاهر الي ابتسم بانتصار: يبه اي شاهر موافق.
ابوها : اجل خليه يكلمني يقول خذو شوق معكم.
قفلت ولفت لشاهر : اتوقع سمعت ابوي وش يقول.
يصد عنها : سمعت ماني بداق عليه.
قامت وقفت تحط يدها على خصرها : ليش ان شاء الله.
يقوم يوقف : لانك قليلة ادب وماعندك احترام لاحد.
تجلس بعصبيه : ااااف ياربي وش تبي انت الحين اخلص.
يرجع يجلس : تبين تروحين مع اهلك ؟
تهز راسها بالايجاب : اي .
يميل فمه : اطلبيها مني بادب.
تطالعه تنطق بتسليك : ممكن اروح مع اهلي.
يرفع حاجبه فيها : اطلبيها زي الناس.
تكتف يدينها : شاهر ممكن اروح مع اهلي.
يهز راسه : ماعجبتني اعتذري اول شي على قلة ادبك بعدين اطلبيني .
خذت نفس عميق وهي ودها تخنقه بس لازم تسايره عشان يخليها تروح: اااااه اسفه .
يطالعها : على ايش؟
تهز كتوفها : مدري انت تقول اعتذري.
ينطق بصوت حاد: شووق.
تناظر السقف: خلاص خلاص انا اسفه لاني ااا ما احترمك..
يطالعها : طالعيني وقوليها..
ضحكت ضحكه مسموعه خلت شاهر يضيع بملامحها يردف : ليش تضحكين.
تحرك كتوفها بضحكه : مدري.
يطالعها : انتي تكرهيني.
تميل فمها : لا بس ماحبك.
شاهر : عندي شقه بالرياض وقت الداوم بنكون هناك ماتحتاجين السكن عند اهلك.
توسعت عيونها : الحين عندك شقه بالرياض ودوامك بالرياض ليش نسكن هنا طيب.
شاهر : ابي اهلي وخواني الي عشت بعيد عنهم طول عمري .
تناظره : ديم بترجع مع اهلي خلني اروح معاهم .
يهز راسه بالنفي : لا بتروحين معي انا .
تزفر بغضب : بس انا مابي اروح معاك مو غصب.
ينطق بحده : رجعنا لقلة الادب.
تنطق بجديه وملامح جامده : اخر كلام بتخليني اروح ولالا.
يهز راسه بالنفي : لا بكره نروح الرياض لشقتنا.
قامت وطفت الايباد وشالت اغراضها : ودخلت بالسرير .
يطالعها : بتنامين هالوقت ؟العصر قرب.
تنطق : مو شغلك.
شاهر : اوك .
وطلع وقفل الباب وهي نامت وهي متضايقه تبي تروح مع اهلها.
____
عند ثنيان
طلعت هديل السياره وقفلت الباب .
ثنيان : ياهلا والله .
ماردت : تقدر تحرك.
مد يده ليدها الي سحبتها: لو سمحت خلني بحالي.
ينطق : خلاص ابشري انا اسف.
لفت لشباك تناظر الطريق وهو كمل سواقته بدون كلام.
______
اما كايد الي يودع ديم الي بتروح مع اهلها للرياض اسبوعين: كيف تبيني اصبر عنتس
تبتسم : اصبر ليش ماتصبر.
يطالعها : خليني اداوم بك منه .
تهز راسها بالنفي : مستحيل خليك تمسك الخطوط رايح جاي.
باسها تحت اذنها يشم ريحتها الي يموت فيها : اااخ بس وش يصبرني عن هالريحه الي تخدر كايد ياديم.
سبلت بعيونها بدلع وخجل: كوووووكوووو.
يبتسم : ياروح كوكو انتي.
تناظره بحماس : عندي فكره .
كايد : وشنهي
تمد يدها : هاك فستاني ذا ريحتي فيه خله معاك الين ارجع.
اخذه يشم ريحته : ناويه تعذبيني انتي هاه.
قاطعهم صوت ابوها الي يضرب بوري.
باست خده : يالله باي.
مسكها بيدها ياشر لها : بوسيني هنا.
قربت منه وباسته : خلني اروح ابوي ينتظر.
تركها كايد وبس وصلت الباب رجعت حضنته.
_____
المغرب عند شوق بعد ماعرف ان خوات عذاري بيجون دخل شاهر وهو يصحيها : شوق قومي معي.
شوق فتحت عيونها : وش فيك.
ينطق : صليتي.
تطالعه بكسل : مو شغلك.
يشيل اللحاف : قومي بنطلع مشوار .
تسحبه من بده : مابي اروح خلني انام .
يجلس بطرف السرير : خوات عذاري بيجون يمكن يصير مشكله.
تقفل عيونها بنعس : وش بيسوون يعني فيهم خير يمدون يدهم.
حاول شاهر فيها بس راسها يابس وعيت تروح معاه نادى عذاري وهو يحذرها اذا قربو خواتها على شوق وطلع.
___
عند ترف ونجد جالسين يلعبون كيرم .
جاء مشعل الي صايره معاملته مع بناته الطف بكثير واحن من قبل جلس عندهن : تبوني العب معكم .
تبتسم ترف : تعرف يبه.
يبتسم : اي بالله اعرف له هاتي هاتي المضرب خليني اوريستن اللعب.
ابتسمت ترف تمده له : سم يبه .
صار ابوها يلعب وكان فعلاً مبدع بالكيرم .
تطالعه نجد بإعجاب : يبه تكفى علمني كيف العبها دايم تفوز عليه شهد .
يلتفت ابوها لترف: جايتس عريس.
توسعت عيونها وبلعت ريقها : لا يبه ليه تزوجني انا صغيره.
يطالعها بشفقه : الشيخ قال ان علاجتس الزواج.
تهز راسها بالنفي : لا دخيلك مابي .
نجد : من العريس.
يلف لها : الشيخ الي يقراء عليها خطبها مني
تلف لترف: شاف وجهتس.
ترف باحراج: اي
تنطق نجد بغضب : معناته خق الكلب.
يطالعها ابوها : عيب يانجد وانا ابوتس هذه شيخ .
تهز راسها بترجي : يبه لاتجبرها تتزوج .
يطالع ترف بابتسامه : ماني جابرها ماني جابرها الله يهديتس.
تطالعه ترف بخوف : يبه جدي لايدري تكفى يبه .
ابوها شافها توترت وخاف يصير شي : خلاص خلاص فكري بالموضوع بعدها نتفاهم.
هزت راسها بالايجاب وقام مشعل وطلع.
___
عند شوق الي صحت على دق باب الغرفه .
وبس فتحت كانو عذاري وخواتها .
توسعت عيونها وهي للحين مو مستوعبه : وش فيه
عذاري : ابد لك واجب عند خواتي بيعطونك اياه .
بلعت ريقها بخوف تشوفهم ٣ غير عذاري وكل وحده اكبر من الثانيه وكلهم بعباياتهم مسكتها وحده من خوات عذاري بشعرها وسحبتها عندها شوق قفلت عيونها بالم : وين اختس الحين هذاتس بقيتي لحالتس .
شوق بنفسها وهي مقفله عيونها بألم : يارب يجي شاهر .
قطع تفكيرها فعلاً صوت شاهر الي دخل يهاوش يشوف عذاري وخواتها بعد مانادته شيخه الي ماحبت تدخل : عذاري وش قايل لك انا.
شوق الي اول ماشافته سحبت نفسها وهي تروح عنده ركض .
عذاري : مرتك واختها ضربني .
اول مره يعصب شاهر على عذاري وهو دايم يحزن عليها ويمشي لها شطحاتها الا هالمره ماقدر يمسك نفسه : جايبه خواتك كلهن عشان تضربين شوق .
تنطق : شاهر انت مثل اخوي وانت تعرف اني احبك وا.
قاطعها : اي حب واي خرابيط وانتي وياها يالله على بيوتكن وعيني لاتشوفكم هنا .
تناظره شيخه: شاهر عيب تطردهن هم يبون اختهم.
تنطق عذاري بغضب : اذا خواتي لاتشوفهن هنا ديم لاشوفها انا بعد.
اخذ جواله يتصل بعمه ابوعذاري: انتي مايربيك الا ابوك وانتي عارفه .
خافت هي واخواتها يوصل الي صار لابوهم لانه مره شين بالتعامل
وفعلاً كلمه وارسل واحد من عياله ياخذونهم .
عذاري بخوف : دخيلك ياشاهر يادخيلك سامحنا ابوي مايرحم.
شوق شبكت يدها بذراع شاهر : لا طبعاً شاهر ماراح يسامحك لانك وقحه .
طالع يدها الي شبكتها بذارعه وطالع وجهها باستغراب وغمزت له شوق واردفت : مافيه رجال بيرضى على زوجته وانتي لو تحبين شاهر مثل اخوك ماكان سويتي كذا.
يطالعها : خلاص ياشوق .
تناظره تبي تقهرعذاري وخواتها وتبوس خد شاهر الي انصدم وهو عارف وش هدفها وبدلع : حبيبي خلك منهم تعال غرفتنا اشتقت لك مرررررا.
ورغم انه يدري انها كذابه بس كان عاجبه الوضع ومن داخله احساس حلو وهو يشوف تعاملها معاه بلطف حتى لو كذب ، خذته شوق بيده بعد ماطفى غضبه وهو يسمعها تكلمه بلطف دخل معها الغرفه وبس قفلت الباب تركت يده شاهر يطالعها : شفتي كيف بغيتي تجيبين لنفسك مصيبه.
شوق قربت منه تحط وجهها بوجهه : الحمدلله انك جيت.
حاوط خصرها بيده يسحبها لصدره ويبوس خدها : لاتحسبين انك رخيصه عندي .
بعدت عنه : بروح اصلي ماصليت.
ابتسم : طيب انا بروح المستشفى عندي اشاعه.
تناظره : يدك صح مكسوره.
ينطق : اي بس ماعليه فداك.
تلف تهز كتفها : انا شدخلني ماحد قال لك ترمي نفسك قدامي.
شاهر انحرج من دفاشتها : طيب انا طالع .
طلع وشوق قفلت الباب قفلين حتى ماحد يدخل عندها
___
اليوم الثاني بتركيا
هديل نايمه بالسرير وثنيان نايم بالكنبه .
صحت هديل وهي تسمع أنين ثنيان .
جات تلمس جبينه الي كان مثل النار جلست تهزه بكتفه : ثنيان ثنيان .
فتح عيونه بتوتر وخوف : فيك شي .
تناظره : حرارتك مرتفعه قوم تروش .
ابتسمً رغم تعبهً : ماعليك انا كذا اذا تغير عليه الجو اتعب اليومين الاولى بعدين تسلك الامور.
قامت للحمام فاله شعرها الطويل الي يوصل اسفل ظهرها لابسه بيجامه حرير بنفسجي وثنيان يطالعها بحسره وقهر بعد شوي رجعت تجلس عنده وتحط له كمادات على جبينه تلاقت عيونهم وصار لحظه صمت ثنيان مسك يدها وباسها : يا طيبة قلبك .
سحبت يدها بتقوم وتعثرت تجلس على شعرها الي انشد بشكل مؤلم.
قام ثنيان وساعدها توقف يمسح على راسها هديل الي توترت من قربه نزلت يده : اجلس انت تعبان.
ابتسم : ابشري.
وجلس وهي هربت عنه للحمام بعد الي صار.
—-
عند كايد الي شاب نار هو واخوانه وخواته بالحوش ولابسين فريهم والبنات جاكيتات.
بتال للعنود : كيفها ترف.
تنطق : احسن يعني الحمدلله.
يطالعهم كايد : والله ان موضوعها صعب ويبي له سنين عشان تطيب.
يبتسم سند: ترف بتطيب انا متاكد.
عنود: الشيخ يقول زوجوها وتطيب.
سند توسعت عيونه : الشيخ ذا كلب.
كايد بضحكه : عيب تقول كذا.
يطالعه بتال : الله يهديك بس.
تبتسم عنود : خلونا من ترف شرايكم نسوي عشانا جمريه .
كايد : تم .
هنا جات غزل : عادي اجلس معكم .
التفت كايد يبعد لها : افا عليتس تعالي ياعين اخوتس.
استحت من كلمته وجات وجلست وبدت تندمج معهم بالسواليف ،، جات ساره وجلست مقابل كايد الي كان مشغول بالجوال ومانتبه لوجودها.
عنود وهي تبي تغيض ساره : وش عندك لاصق بالجوال ماهو عوايدك ولا تسولف معك الحب .
كايد رفع راسه للعنود: ‏
تسولف و تنبت في صدري نواوير
وأقطف غلاها من العمر ما حَيينا
‏ياكثر ما يفرق حضورها عن الغير
‏مثل المطر مهما هطل ما أكتفينا
ساره بغيض: ياعيني .
رفع راسه يطالعها بصدمه وهو جاهل وجودها وبس شافها قام وراح غرفته واول ما قام كايد قام بتال وبعده سند وراحو للمقلط
شهد بحده : ساره ادخلي نبي جلستنا خاصه .
تناظرها بحده : ليه يعني انا مو من اهل البيت.
ترد العنودً : الا بس مع عيال نوره مو معنا احنا بس نبي غزل غير غزل مانبي.
قامت ساره بزعل وشهد راحت تنادي خوانها
___
اخر الليل عند شوق الي صحت على دق الباب فتحت وكان شاهر الي راجع من برا.
شوق: من وين جاي.
يطالعها بحده : انتي وش تبين بالضبط انا مو على كيفك ياشوق متى ماتبين تهاوشين ومتى ماتبين تسولفين.
وصد بزعل وكانت برقبته بقعه حمراء
جات عنده ولف يطالعها بصدمه: خير.
لفت رقبته تناظره : منهي.
قطب حواجبه : منهي الي منهي مافهمت.
تشد على اسنانها : وش الي برقبتك.
قام للمرايه وهو يشوف وش في رقبته ابتسم بس حس بغيرتها : اااها قصدك العلامه هاذي .
كتفت يدينها ترفع حاجبها بوجهه : وين كنت طول الليل.
يبتسم: وش دخلك وين كنت .
وتوجه لسرير ووقفت قدامه : انت تخوني صح.
ضحك بقوه : حبيت تخوني على اساس انتي زوجه الحين.
تنطق بحده : يعني تخوني.
قطب حواجبه: وانتي من عقلك اني بخونك مع بنات الديره صاحيه انتي مريضه.
ارتاحت بس سمعته : اجل وش فيها رقبتك.
ينطق : مدري ماتذكر وش ممكن يكون السبب.
قربت منه: اجلس.
جلس على السرير وجابت مرهم مدت يدها تلف راسه بقوه وهو مستغرب وصارت تحط له مرهم : هاك ثلاث مرات وتختفي البقعه.
مسكها بيدها : وانتي وش دخلك عساها ماراحت .
نزلت يده : لان لو احد شافها بيفكرها من شوق ولا انا ماتهمني.
ابتسم : ااااها ماهمك.
رمت المرهم عليه : هاك عساها ماراحت .
ضحك بقوه : والله انك مريضه.
تناظره : جوعانة.
ينسدح : روحي للمطبخ.
شوق لبست حجابها وطلعت وهو تلحف
___
عند ثنيان الي عيت حرارته تنزل وهديل كانت خايفه يصير له شي وتبقى لحالها ببلد ماتعرفه : ثنيان قوم تروش حرارتك عيت تنزل.
ثنيان كان مره تعبان قام واختل توازنه ومسكته هديل : استند عليه.
حط يده على رقبتها وبالقوه يصلب طوله وخذته للحمام وهي مجهزه البانيو مويه وجلسته فيه وجلست على طرف البانيو وتغسل وجهه بيدها ثنيان رغم تعبته الا انه شاكر لها موقفها معه وكبرت بعينه .
مدت يدها تنزل تيشيرته وبقي بس بالشورت
قامت بتطلع : بطلع وانت خذ راحتك
ثنيان هز راسه بالايجاب.
طلعت وهو بقى بالشورت شوي ودقت هديل الباب : ثنيان
تنهد بس سمع اسمه من فمها بنفسه: ياروح ثنيان.
تنطق : ثنيان تسمعني جبت لك الروب اقدر ادخل.
ثنيان : اي تعالي .
هديل دخلت ووقفت قدامه بالروب وهي تفتحه له وتقفل عيونها : تقدر توقف لحالك.
ثنيان وقف وقرب منها وهو يبوس خدها فتحت عيونها بصدمه وهي تشوفه بالشورت تقفل عيونها بتوتر وخجل وتلف بتطلع ويختل توازنها بسبب المويه مسكها ثنيان الي طاح هو الثاني بالبانيو وطاحت هديل ويطشرها الماء بكل مكان هديل قامت وهي تستند على يدينها وشعرها منتثر حواليها ووجها بوجه ثنيان ضاااع ثنيان بملامحها وريحتها الي اخترقت انفاسه وهو يحس انها تحرق قلبه وروحه ،، قامت تتنافض توتر واحراج : ليش مسكتني كنت خليتني اطيح.
تنهد وهو يطالع تفاصيل جسمها بس تبللت البيجامه الحرير التصقت بجسدها: لو طحتي بتتوجعين .
تنطق وهي باقي صاده عنه : مافيه شي بيوجعني اكثر من الي صار بالفندق.
وطلعت وثنيان فهم قصدها وتذكر الي صار والي سوته امل.
#تفاااعلو_ولا_نغيب-لبعد_العيد 🎀