انا احبك مابها زيف وخداع رغم الذي نخفيه والي نخافه

بارت ٢٤

عند كايد وديم فتح باب الغرفه ودخلو وهو يقلدها : ترارا.
ابتسمت : احسها تشبهك حنونه .
حضنها : ياقلب كايد قلباه وش اسوي فيتس والله ان ودي افتح قلبي واحتس فيه واقفله عليتس ماحد يشوفتس الا انا .
تطالعه بابتسامه : قول لي ياغشاش ليش جاي.
ينطق بعباطه : الصدق ولا ولد عمه.
تبتسم تميل راسها  : الصدق.
يبوس خدها : الصدق اني اشتقت لتس .
نزلت عينها : حتى انا.
يمد يده لذقنها يرفع راسها : ذكريني وش قلتي لي بالسياره .
ضحكت تهز كتوفها : ماقلت شي
حشرها على الباب : الا قلتي قلطتك بقلبي وكلام حلو.
ترفع راسها تنطق : الحين جاي ومخلي الرجال عشان هالكلمه.
يضحك باحراج : وش اسوي فيتس والله اني جالس معهم وبالي معتس.
ترفع راسها توقف على اطراف اصابعها تلحق وجهه : يالله بوسني وروح.
يبتسم : بس ابوستس.
تنطق بفضول  : اجل وش تبي.
يطالعها بحب : ابي ابوستس واخملتس خاطري اخمتس الين تدخل ضلوعي بضلوعتس.
تضحك بعبط : ونموت ويرتاحون.
يبتسم يقطب حواجبه : منهم.
تميل راسها : العذال.
يمسك كفها  :تعالي تعالي بوريتس شي.
دخلت  معاه الغرفه.
يبتسمً : وش رايتس نسحب عليهم.
تنطق بترجي : لا تكفى كايد خلني معهم هديل بتروح وشوق.
ينطق : ماحد رايح بكره غدا عن جدي مخلد.
توسعت عيونها : يعني ننام هنا.
يهز راسه بالايجاب : اي.
تبتسم باتساع : اجل اخلص من العشاء واقابلك هنا
يلمس خدها بلطف : لاتطولين عليه ياويلتس.
تهز راسها بالايجاب : ابد ١٠ تمام نتقابل هنا الي يتاخر يتعاقب.
ينطق : خلاص تم.
وطلعو وكل واحد راح
______
دخل كايد وفيه ابتسامه وهو عارف انه بيتهزئ : السلام عليكم.
الكل: وعليكم السلام.
جده بحده  : كان قعدت بعد وش جابك.
يبتسم : والله كان ودي ياجدي بس نشبتو لي.
يأشر بحده  : امش اقعد خل عنك هالكلام وانت ساري غرفتك تدور الدنفسه.
يجلس ينطق بابتسامه : مادورت  الدنفسه ياجدي ادور حضن مريوشة العين.
حذفه بفنجال القهوه وتصدى له كايد وهو يضحك 
والتفت لخاله شاهر الي نطق  : عطها فرصه تتنفس.
ينطق بابتسامه : منهي.
يغمز بضحكه : تدري منهي.
ينطق بابتسامه: خلك مني كيفك مع الجنيه حقتك.
ضحك  شاهر باتساع : والله انها جنيه.
يضحك ينطق :  قايل لك وش تبي بها بس ماتفهم .
يضربه بفخذته : ماعليه احب الصعبين انا .
يهز راسه بالنفي : والله لتبطي.
يضحك باتساع يطالع كايد .
___
عند الحريم دخلت شوق بكل شوفة نفس : مساء الخير.
الكل : مساء النور ، يالله حيها .
سلمت على الكل وجلست.
لفت عذاري لعفاف : شايفه كثر زينها مدري وش تالية رجالنا لايتهيضون للعرس.
تنطق عفاف بثقه : زيد مايشوف غيري عاد مدري عن سالم.
توسعت عيونها  : حبيبتي الريجيل عيونهم زايغه وهاذي بتتحجب وبتجلس معنا كنها بنتنا.
تتأفأف : يوه ياعذاري اسكتي قلبتي راسي.
سكتت عذاري وصارت تخز شوق  تتفحصها بنظراتها وماشالت عينها عنها ابد ،، اما شوق خذت صقر وصارت تبوسه وتقبصه جو باقي العرايس وسلمو وجلسو.
شيخه : ماشاء الله كل وحده احلى من الثانيه.
تنطق ساره : لا ياعمري انا ماحد يجي له معي.
ديم طالعتها باستحقار وسكتت وهديل نفس الشي بس شوق لانها ماتعرف تسكت لازم ترد : اذا انتي ماحد يجي له معك انا ايش بالضبط.
طالعتها  ساره ولفت  لشيخه : الا شيخه شاهر كم عمره .
شوق توسعت عيونها : وش دخلك انتي كم عمره .
تلوي فمها  :  عاد يقولون اكبر منك ب ٦ سنوات.
تنطق بحده :  ان شاء الله ب١٠ العمر مو مهم .
تشمق : الا مهم حبيبتي مثلي انا وخلف بيننا سته شهور.
تبتسم شوق بخبث : ان شاء الله بيننا ١٠٠ سنه راضيه ولا يكون قدي ويناديني بصباحيتي ياحرمه.
تنطق بحده  :  انتي قليلة ادب.
يرتفع صوت شوق  : والله مدري مين قليلة الادب بكل بجاحه تسالين كم عمر زوجي.
تنطق شيخه : خلاص ياشوق ماعليك منها .
تبتسم شوق : اكيد ماعليه منها بس لاتقرب على شاهر .
ساره شمقت فيها ولفت تخز ديم الي  مصنمه على الجوال وتضحك وتكهكه.
___
تعشو الكل
فتحت ديم الباب تشوف كايد الي كان واقف ينتظرها وكان باقي دقيقه وتصير عشره تمام جات تركض وقفت عند : جيت.
ابتسم : لاتركضين يمكن فيك نونو ويطيح.
استحت : والله لرجع عند امي.
يطالعها : متاخره دقيقه.
تهز راسها بالنفي : لا والله جيت على الوقت.
مسكها بيدها وباسها ودخلو الغرفه وقفلو الباب.
__
اما اهل شاهر راحو كلهم وهو باقي مامشى وهديل الي قررت تنام مع اخواتها وثنيان نام بالمقلط مع بتال وسند ،، وخلف مع ساره بغرفتهم  قام شاهر : يالله عن اذنكم باخذ اهلي .
محسن لهذال: رح ناد شوق.
شاهر تذكر ان رقمها ماهو معاه وحتى لو طلبه ماراح تعطيه راح هذال لاخته
هذال : شوق شاهر يقول مشينا.
تطالعه بحده : قل له شوق بتنام هنا.
جاء هذال : شوق تقول بنام هنا.
الجد بعصبيه : قل لها جدي يقول تسري لا اسري عليها.
راح هذال وقاله لها ومشت خوفاً من جدها  طلعت شوق  السياره تقفل الباب بقوه وبحده : الا لازم يمشي كلامك كنت تقول لجدي خلها تنام.
يطالعها : الا لازم تطلعين حرتك بباب سيارتي مليون مره قلت لك بشويش.
تتأفأف : وين بنروح.
يحرك السياره : بيت ابوي لنا غرفه هناك ولا ناسيه.
تطالعه : خلنا نروح الفندق لاحقين على الديره وبيت ابوك.
يكمل بدون مايطالعها : هنا والفندق كله واحد .
تنطق بحده : اغراضي هناك ياجني.
ابتسم : بكره عند ابوي غدا بنحضره بعدها نروح نجيب اغراضك خلاص وش يقعدنا بالفندق وانتي مو معتبرتني زوج.
لفت عنه وسكتت.
__
عند ثنيان الي يفكر بهديل وارسل لها : الو
بس هديل كانت وقتها غاطه بنومه عميقه بعد يوم كان متعب.
___
وديم وكايد الي منسدحين بالسرير و حكت له ديم كل شي صار داخل.
ينطق : ماعليتس لامن شوق ولا من ساره خليتس سماء واتركي لهم القاع.
عدلت راسها وهي تبوس صدره : انت احلى شي جبرني عليه جدي.
ضحك باتساع : ايوالله الحسنه الوحيده بحياته.
كانو يطقطقون على جدهم ويضحكون.
___
في بيت مخلد نزلو شاهر وشوق الي صارت تناظر الكل بنظره دونيه:  اااف ياربي.
شاهر دخل وتوجه لغرفته وهي تلحقه : وين بتنامين بالسرير ولا بالارض عشان ماتقولين خليك جنتلمان.
تنطق : بالسرير طبعاً.
يهز راسه بالايجاب  : تمام اغراضك شوفيها بذالدرج.
فتحته  تلف له : مين رتب اغراضي.
يقفل عيونه لتأكيد  : ماحد لمسها غيري.
خذت لانجري عرائسي ولبسته بالحمام وطلعت شاهر كان لاف يلبس بجامته يقفل ازاريره وهو يكلمها : لو بغيتي شي لو جعتي صحيني.
تنطق : مابي شي تعيشيت عند اهلي .
لف شاهر : يالله انا.
هنا شافها بلانجري توتر وهو يشوف اغلب جسمها مكشوف وصار يحاول يشتت نظراته عنها بس غصب عنه عيونه تناظرها : ليه لابسه كذا .
تنطق باستغراب : مو هاذي غرفة نومي وهاذي حدودي الخاصه البس فيها الي ابي .
انسحب  يفرش فراشه بالارض وينسدح وشوق تقريبا فهمت وش فيه وليش توتر خذت اكثر عطر فواح وفخم عندها وتروشت فيه ودخلت السرير : تصبح على خير.
مارد لانه ماكان معها ابد فجاه بدون سابق انذار طفت الكهرباء وفزت شوق جالسه وبخوف :  شاهر وش فيه.
ينطق : الكهرباء بالديره تطفي كل فتره عادي.
تبلع ريقها بخوف : لا مو عادي كيف انام بالظلام .
فتح لها كشاف الجوال : يالله نامي.
شوق كانت خايفه بس ماتبي تقرب منه وفجآه تسمع صوت الكلاب تحت الشباك صوتها الي مسبب لها رعب تنطق بخوف : شاهر
شاهر كان خلاص قد هو تخدر يبي النوم : هاه.
تنطق بخوف : لاتنام.
مارد واردفت : شاهر انا خايفه.
ينطق بنعس  : وش تبين شاهر يسوي .
زاد صوت الكلاب والشباك مفتوح شوق نزلت من السرير ركض وجلست عنده : افتح عيونك لاتنام انا مرعوبه.
رفع يده  يفتح حضنه لها : تعالي
تهز راسها بالنفي  : لا
تنهد بعجز : وش اسوي لك طيب .
تلحف شاهر وشوق جالسه عنده : لاتنام افتح عيونك .
شال اللحاف بانزعاج : يابنت الناس صرعتيني ارحميني شوي يانامي ياخليني انام.
تناظر جهة الشباك : قوم هاوش الكلاب خلها تروح .
نطق  قاصد يخوفها : الكلاب ماتنبح الا شايفه جن
بلعت ريقها : وش قلت لي قبل شوي .
ينطق  باستغراب: وش قلت مافهمت.
تنحنح : وش عرضت عليه.
قطب حواجبه : وش عرضت عليك، اها تجين بحضني.
هزت راسها إيه.
ينطق : بس انا سحبت العرض .
وعناد فيه رفعت يده الي هو كان يقدر يمنعها ترفعها بس هو متشقق من الوناسه وكان يخفي ابتسامته الي اصلاً ماتشوفها من الظلام انسدحت شوق بحضنه بس بدون ماتلصق فيه مد شاهر يده يسحبها عنده ويدفن وجهه بشعرها شوق كانت ساكته لانها حست بالامان  ينطق : لازم بكره احط للكلاب اكل تحت الشباك.
تضربه على يده الي محاوط بها خصرها وهو شادها : اهجدي خلاص.
تبعد يده : شيل يدك.
ينطق بصوت متخدر  : مرتاح كذا.
لفت جهته وصار وجهها بوجهه بس الدنيا ظلام والنور بس ضوء الكشاف.
—-
عند ديم وكايد
ديم : متى بتشتغل الكهرباء
يشد على يدها : ليه خايفه.
تبتسم  : لا دامني معك ماني خايفه بس ابي اشوف وجهك.
سحبها عنده يبوس عيونها : كيف هديل ماشفتها اليوم.
تبتسم : بخير بس احسها ساكته طول اليوم مدري مستحيه ولا وش.
يميل فمه باستغراب : غريبه هديل تسكت .
تهز كتوفها : خلاص صارت مره لازم تسكت شوي.
يضحك  : وانتي.
تنطق بفهاوه : انا ايش.
كايد ابتسم بخبث : احبك.
  تتنهد : ادري ابي كلام ما انقال من قبل.
كايد: اممم
‏أنا العاشق اللي في بحور الهوى سباح
‏ياسهلّي وياصعبي وياكثر تعقّيدي
‏كلامك ماهو واضح ويحتاج منك إيضّاح
‏ولوّ منت في حاجة لـ نفّيي وتاكيدي
‏أحبك تعيد الحكي بس أكره إلالحّاح
‏تفضل علي وعيّد ماقلت ياسيدي
‏مخّارج حروفك تسحر ومبسمك ذبّاح
‏وبحر عينك أعمق من بحور الفرّاهيدي
تبتسم ذايبه فيه  : صح لسانك .
يلمها لصدره بقوه : صح بدنتس
___
عند شوق الي لفت ولشاهر وكان وجهها بوجهه وكان الصمت حاضر واصوات انفاسهم هي المسموعه فقط.
تنهد بقوه : ليش راسك يابس .
تنطق : لاني شوق ماحد ياخذ شي مني غصب عني.
ينطق  : نرجسيه.
تبلل شفايفها : يحق لي.
سأل وهو يقصد وضعهم وعلاقتهم الزوجيه : وبعدين.
تسأل : بوش مافهمت .
قرب لجبينها وباسه .
تنطق بحده : لاتخليني اندم اني جيت عندك والله اروح عند شيخه .
يبتسم  : ماراح اخليك تروحين عندها .
اشتغل الكهرباء وبعدت شوق  على طول وكان هو ميت قهر ان النور رجع : خليك.
تهز راسها بالنفي : لا ولا عاد تقرب مني عشان مايصير شي مايعجبك .
اعتدل على ظهره  يشوفها تتوجهه لسرير  وهو يالله يتنفس من المشاعر الي مو قادر يتحملها اكثر : كنتي خليك جنبي .
تنطق بنرجسيه : ماني بحاجتك ليش اجلس جنبك.
وبس وصلت السرير طفت الكهرباء وبدت الكلاب تنابح وفجاه الا الي هبد فوق شاهر شوق وهي راجعه تحتمي فيه : ااخ وش فيك .
تنطق بخوف : بنام عندك.
يتنهد بقهر : بس مابي هالمره صدق مابي ارجعي مكانك بعدي عني.
تعاند تتوجه للباب بتطلع لشيخه مع  ان المكان ظلام لحقها شاهر ركض : انتي صاحيه تطلعين كذا اخواني وعيالهم بالبيت.
شوق بدون اي كلام  من الخوف حضنته تصنم مكانه وهو يحس انه خلاااااص استسلم مع انه كان زعلان منها ومن غرورها وكيف تقرب وتبعد بمزاجها بس تظل بنت بالاخير حاوطها بيده : خلاص لاتخافين انا معك.
تنطق  : يعني مانك زعلان.
يبتسم  : على اساس تفرق معك اذا زعلان ولالا.
تنطق : انا صح ماحبك بس لازم تساعدني.
ابتسم بس سمع كلمة ماحبك : تعالي تعالي  نامي.
جات شوق  تنسدح معاه بالارض ولحفها كانت شوي بعيد عنه وبس سمعت صوت الكلب قربت منه شاهر انسدح على ظهره وفتح لها يده  بعد ماقالت ماحبك احس انه يبعد شوي  وطفت كل المشاعر الي بداخله : تعالي ماراح اقرب منك.
تنطق : وعد رجال.
ينطق بثقه : وعد رجال بس نامي صرعتيني.
انسدحت على يده ونامو نومممه عميقه .
____
طلع الصباح هديل جالسه بالحوش تفطر هي  وسند و بتال كان ياخذ حجر ويرميه على باب غرفة كايد وشباكه .
هديل : خلهم ينامون ياخي.
فجاه يسمعون صوت ديم وهي تناديه : كوكو في احد يدق الباب.
بتال بضحكه : اخو العيال كوكو لايكون كايد.
تضحك هديل : للاسف اي كايد  الي الرجال تتراعد ان جاب اسمه بطوله وعرضه صار كوكو .
فتح كايد الباب وهو عاقد حواجبه : من المزعج الي ادوخنا.
بتال بضحكه : حيالله كوكو .
يضحك سند : صرت دجاجه ياكوكو
طلع نعاله وصار يحذف فيهم وهم يضحكون وهديل مو يمهم ابد تفكر وصافنه.
وكايد الي استلموه اخوانه طقطقه جاء عند هديل الي سرحانه : ارمي همومتس على  صدري وانا اخوتس.
هديل قامت وبدون كلام حضنته وهي فعلاً ودها ترمي همها عليه بس تعرف انه مجنون وممكن يسوي شي يخليها تندم انها قالت له حاوطها كايد بيدينه يبوس راسها : فيتس شي.
تبتسم : العصر مسافره تركيا مع ثنيان خايفه مدري اول مره اسافر.
مسك يدها:  اجلسي اجلسي.
جلسو ولف كايد لسند : صب قهوه .
ينطق سند: ابشر ياكوكو.
كايد كان باله هديل ولا كان صفقه : اسمعيني وانا اخوتس كل شي بالحياه يبدا بتجربة اولى السفر الزواج والوظيفه يعني عشان تكونين متعوده على السفر لازم يبدا بتجربه اولى بعدين زوجتس معتس وثنيان مو اول مره يسافر ليش خايفه.
تنطق : شي جديد عليه.
يبتسم : انسي كل شي واستانسي لاحقه على جدي وغثاه.
ابتسمت : افطر افطر سويت لكم عريكه اعرفكم ماتحبونها الا من يدي .
مد يده يسمي  : بسم الله  ايوالله مانحبها الا من يدتس.
فتحت  ديم الباب بحاجبها : كايد .
بتال بصوت خافت : قبل شوي كوكو .
يطالعه كايد بحده  :  افطر واعقب
ولف لديم: عيونه.
تنطق : بروح للبنات .
يأشر لها بيده : تعالي عندي .
تنطق  : من جدك.
يهز راسه : ايه ماعليتس تعالي افطري معي ماعندي الا هالوراعين لايهمونتس.
جات وقفلت الباب ونسيت المفتاح دخل: صباح الخير.
تنطق هديل: صباح النور .
يبتسم كايد: هلا وغلا تعالي جنبي.
بتال يطالع سند: مانعرفه مانعرفه .
ضحك سند  : من يوم صار كوكو تغير.
لف كايد لهم بابتسامه : وش تقول انت وياه.
بتال : ابد سلامتك.
ديم تناظر بالعريكه: كوكو اقصد كايد ماحبها.
كايد: افا ، وش تبين اجيب لتس بس
بتال : جبنا فطور انا وابوي داخل.
قامت ديم : بروح اشوفه تبي اجيب لك شي معي.
يمسك يدها وهي واقفه ويبوسها :  ابد سلامتس.
راحت بعد ماسحبت يدها بإحراج من اخوانه.
بتال بحده : لاعاد تبوسها قدامنا استح على وجهك.
يبتسم كايد: هااااه شكلك تهيضت .
ويلف لهديل وهو قاطب حواجبه : الا صدق  ترف علامها.
ميلت فمها : مدري يقولون معها مس.
قطب حواجبه ينطق  بجديه : اعوذ بالله.
بتال : الشيخ يقول لعمي تعطيل زواج.
يبتسم سند: احسن لين اكبر شوي
كايد بخوف : لا لا ياسند مو كذا الله يصلحك .
اما بتال انهار ضحك وهديل تناظرهم
____
صحت  شوق ومالقت شاهر قامت رتبت المكان وبدلت لبست عبايتها وطلعت من الغرفه وراحت عند شيخه للمطبخ: صباح الخير .
تنطق شيخه : ياهلا صباح النور .
شوق تناظر عفاف وعذاري : بغيتك شوي .
شيخه نفضت يدينها : تعالي .
راحت معها للغرفه
شوق بخجل  : بقول لك شي بس لاتقولين لاحد.
تهز راسها تنصت لها : ابشري قولي وش بغيتي .
تبلل شفايفها : شاهر وينه صحيت مالقيته.
ابتسمت  : راح للخيول
تسال : بعيد الخيول .
شيخه : لا تبين تروحين عنده.
تبتسم  : اي اذا ممكن.
تبتسم :  ابشري ،، دقيقه برسلك مع مخلد ولد اختي .
تهز راسها : طيب.
تنادي شيخه  : تعالي ، مخللللد يامخلد.
جاء مخلد: هلا خالتي .
شيخه : خذ شوق عندك خالك شاهر .
مخلد مد يده لشوق الي ترددت تمسك يده لانه جاي من برا وبيده تراب ولان شيخه واقفه اضطرت تمشيها ومسكت يد مخلد.
وطلعو عند شاهر.
_____
عند كايد واخوانه بالحوش رجعت ديم شايله صقر التفت لها كايد وهي جايه وحاضنته بقوه وجلست .
كايد: هاتيه هاتيه .
تمده له : هاك بوسه وجيبه .
اخذه وباسه : واضح تحبينه.
ابتسمت تاخذه من يد كايد وتشم ريحته: اوووووخ ريحته تخدرني.
ابتسم: ماشاء الله تخدرك اجل.
تنطقً : ايه ودي اكله احب هالكائنات.
ينطق بخبث : اجل شدي حيلك جيبي لك واحد من هالكائنات.
حطت صقر بحضنه وهي تقوم : هاك اخوك مابيه خله لك.
مسك يدها : اجلسي اجلسي وين رايحه .
ديم سحبت يدها : مزاعلتك بروح غرفتي.
كايد : ياليل الدلع .
ديم ضربته على راسه بخفه : ياويلك تلحقني ولا تكلمي ابد ولو كلمتك لاترد عليه فاهم.
كايد: ماني بلاحقتس حتى  انا مزاعلتس.
راحت ديم للغرفه بتدخل وتتذكر انها قفلت على المفتاح.
___
عند شاهر الي كان لابس لبس الخيل وواقف يمسح على راس شيهانه جاء مخلد الي ماسك يد شوق: خالي شاهر جبت عروستك
لف وتلاقت عيونه بعيون شوق الي من كل قلبها عجبها شكل شاهر بهاللبس: اووه بنت المدينه المتغطرسه زايرتنا بالاسطبل.
تناظره : ليش رحت وتركتني .
تقدم  ينزل الخوذه ويرتب شعره : ليش اجلس معك نطالع بعض .
تناظره من فوق لتحت: حلو شكلك .
شاهر تنهد يناظرها وتذكر كلامها البارح: ليش لاحقتني.
تطالع الخيول : جيت اشوف خيولك من كثر حبك لها جاني فضول اشوفهم .
ابتسم : امم طيب خليني اعرفك عليهم ، هاذي كحيله، وهاذي سحاب بنتها ، هذا شنار فحل هو الي صدمك هذاك اليوم .
تنطق بضيق. : اي الله لايعود هذيك الساعه .
يكمل  : وهاذي شيهانه عروسه شنار الجديده.
تنطق تقلده :  الجديده على اساس كحيله قديمه من الاول ياحبكم يالذكور بهالحركات حتى شنار متزوج ثنتين بالاخير ذكر  غريزته نفسكم
تنهد بانزعاج : ماتسمى متزوج لان الحيوانات لها موسم تزاوج يكون الفحل واحد والاناث مجموعه فهمتي يامثقفه.
تناظره : وشنار مين يحب اكثر شيهانه ولا كحيله يامربي الاجيال فرحان جايب له عروسه
انزعج منها :  انتي تدورين شي تناقريني عليه اساليه هذا  هو قدامك.
شوق تقدمت عند شنار.
ينطق  بحده : لاتروحين عنده هايج ولا يعرفك .
تلف له : بس هذولي ٤
يهز راسه  : اي شوي شوي اوسع الاسطبل وازيد العدد خليك مكانك بروح اجيب لها شعير من داخل لاتجين عندها ماتعرفك
تهز راسها بالايجاب : طيب
دخل شاهر جوه وشوق العنيده الي ماحد يملي عليها وش تسوي قررت تتقدم عند شنار
—-
عند ديم الي وقفت تناظر الباب ولفت لكايد جالس لحاله والكل دخل وكان يناظرها وبس شافها جايه صد عنها وسوا نفسه مشغول مع صقر.
تقدمت عنده : كايد.
كايد رفع راسه يطالعها ولا رد
تنطق : اكلمك طيب.
ينطق مبتسم : مو تقولين لاترد عليه هذاني مارد ياديم.
دجلست قدام وجهه : طالعني بكلمك.
كايد رفع راسه : والزعل وينه.
تنطق : سامحتك خلاص.
يمثل الزعل : بس انا ماسامحتك لازم تراضيني.
تناظره  : كيف ارضيك.
يبتسم : تعرفين وش ابي.
تمد لسانها بعبط :  انننً المفتاح جوه يامسكين
يقلدهاً : اننن معي غيره يامسكينه.
ابتسمت وباست خده : وصقر .
حط صقر على الفرشه وقام معها : نايم تعالي.
توسعت عيونها بصدمه : كايد لا بيصحى.
مسكها بيدهاً : امشي بس بيجون ياخذونه .
راحت معاه وبالها مع صقر الي بقى لحاله.
جاء بتال الي توه دخل وانصدم وهو يشوف صقر لحاله : ياكايد الكلب مخليه لحاله والله انك كوكو صدق .
وشاله ودخل فيه جوه .
____
عند ترف جتها هديل  الي حضنتها : ياروحي انتي اشتقت لتس قالو تعبانه وجيت اشوفتس.
تبتسم بفرح : ياعمري انتي طول عمرتس راعية واجب.
تنطق : طمنيني عنتس  ان شاء الله احسن.
تهز راسها : الحمد لله احسن رحت لشيخ اليوم وامس وقال لازم جلسات مكثقه كل يوم .
تشد على يدها : فتره وتعدي وانتي قويه اعرفك.
ترف فرحت كثير بجية هديل الي مانستها حتى بعز فرحتها مانستها.
___
عند شوق الي عنادها خلاها تتحدى شاهر وتروح عند شنار الي كان منزعج من وجودها جاب شاهر الشعير وهو طالع شاف شوق بصدر شنار الي هاج ومعطيه شاهر ظهرها  واول ماقربت من شنار الي وقف على رجوله ويدينه بالسماء وصار يصهل شاهر الي اساسا كان قريب جاء يركض يبعد شوق ويحميها بجسمه ويدخل بينها وبين شنار الي ضربه ضربه قويه على كتفه طاح شاهر وشنار هرب وشوق واقفه متصنمه مكانها مرعوبه : اسفه اسفه
شاهر قام  يركض  بدون مايرد عليها  ويلحق شنار  الي هاج وشرد وممكن يسبب له كارثه للناس برا وشوق واقفه متفشله من نفسها ومن شاهر الي كان يتألم بس ضروري يمسك شنار الي صادف وجود زيد وسالم قريب واول ماشافو شاهر يلحقه رفعو ثيابهم وانطلقو وراه شاهر غير طريقه بس شاف خوانه يلحقونه وقطع على شنار الطريق يوقف بوجهه ويمسكه باللجام مع انه يده مو حاس فيها من كثر ماهو متعور وكان يتكلم مع  شنار الي هدى اول ماسمع صوت شاهر وعرف صاحبه  جو سالم وزيد .
زيد: العلم وشنهو .
شاهر : ماعرف زوجتي وهاج .
سالم : هي وينها زوجتك .
شاهر تذكر انه تركها لحالها وهي مفجوعه مد لزيد اللجام : امسك  امسك.
وراح يركض للاسطبل واول مادخل كانت شوق وافقه تبكي شاهر جاء عندها وحضنها بقوه  يحاوط راسها بيدينه : تعورتي فيك شي.
تنطق من بين الدموع: لا .
يطالعها  :  خلاص  اهدي اهدي عدت.
تناظره متفشله : انت تعورت.
ابتسم :  مو مهم انا المهم انتي ماجاك شي.
تبلع ريقها  : انا اسفه ما توقعته بيعصب.
يهز راسه : طيب مو مشكله .
هنا جو سالم وزيد بالحصان. وضرب زيد شاهر على كتفه :  يالله تبي شي.
شاهر قفل عيونه بالم :  كتفي كتفي شيل يدك يازيد .
ينطق زيد بصدمه : علامك .
يخفي المه :  مافيني شي  بس رحو للبيت خلاص انا جاي بعد شوي.
وبس طلعو لف شاهر لشوق: نمشي.
شوق صدمته وهي تحضنه : اسفه .
ابتسم  رغم الالم الا انه كان مستمتع بحضنها الي يمكن مايتكرر: حصل خير تعالي خلينا نروح البيت
بعدت عنه وشبكت يدها بيده رفعها  يبوسها ومشو للبيت .
____
عند ثنيان الي اتصل بهديل : نعم وش تبي.
ثنيان كان يدور سالفه عشان يكلمها : الساعه وحده لازم نمشي عشان نلحق نمر الفندق ونطلع المطار.
تنطق بحده : طيب .
يبلع ريقه  : افطرتي ولا.
وقبل يكمل قاطعته هديل : مو شغلك.
ابتسم باحراج : طيب مع السلامه.
وقفلت بوجهه وبس لفت كانت ديم وراها.: ديم متى جيتي.
ديم باستغراب: فيكم شي متهاوشين.
تهز راسها بالنفي : لا بس يعني تغلي مو اكثر.
ابتسمت : يووووه عاد لعبتي التغلي.
تبتسم : امشي امشي خلينا نجهز ١١ بنمشي لبيت جدي.
تنطق : بجهز معك هنا.
تقطب حواجبها : باستغراب ليه مو بغرفتك اغراضها كلها هناك
تنطق بتوتر : هاه لاتسالين ليش تكفين.
تطالعها باستغراب: كايد وينه .
تناظرها  : عند جدي
هديل مستغربه من خبصتها : طيب تعالي معي بس جبتي لبستك.
تهز راسها : لا
تأشر : طيب روحي جيبها.
تنطق : تعالي معي.
هديل بفضول : ليش.
تبلع ربقها  : ييوه تعالي وبس.
هديل جات معها : هيا عجلي بسرعه مابي كايد يجي يلاقيني هنا.
_____
عند شاهر الي دخل هو وشوق البيت وكانت يده مره توجعه .
ارتخى بينزل البسطار
شوق: خليني اساعدك .
شاهر : لا خليه انا انزله.
شوق بعدت وهو نزله بيد وحده ودخل وحطه بالسله يتنظف .
دخلو الغرفه .
وجات عنده وهي مستحيه ومتفشله ولا ودها تقرب منه بس لانه رمى نفسه بينها وبين الحصان استحت على وجهها : اساعدك تبدل.
هز راسه : لا اقدر ابدل بس نادي لي شيخه .
تنطق  : طيب
وطلعت تنادي شيخه وجات.
يطالعها : شيخه فيني اصابه بكتفي من الحصان جيبي لي ثلج .
تتوجه للباب : ابشر ابشر الحين اجيبه.
تطالعه : كنت طلبت مني اجيبه.
يطالعها : لسى ماتعرفين البيت .
جات عنده وهو يحاول ينزل التيشيرت بيد وحده خلني اساعدك لاتعاند.
يطالعها : ليه رحتي عند شنار وانا قايل لاتروحين.
تناظره : انت ليش رميت نفسك له.
يرفع عينه فيها  : تجاوبين على سؤالي بسؤال.
تطالع عيونه : ماعندك اجابه صح ، حتى انا ماعندي.
هز راسه : طيب .
تطالعه : وش اجيب لك وش بتلبس.
جات شيخه الي حطت الثلجه وساعدته ينزل التيشرت وبعدت شوق عنه تاخذ روبها وتروح تتروش.
شيخه : كيف طحت.
ياخذ نفس بعمق : هاج يوم شاف شوق وطلع حرته فيني.
تميل فمها : الله يهديك بعه وارتاح منه ياكثر مشاكله.
يهز راسه بالنفي : لاتكفين الا شنار احبه واحب مشاكله.
جلست تحط له الثلج على كتفه.
شاهر شافها بنص ميكب والناس جايين : خلاص رحي انا بحط الثلج.
طلعت شيخه وحاول شاهر يحط الثلج بس كان كتفه من ورى بعيد عنه شوي.
قام بالقوه قدر ينزل بنطلون وكان بالبوكسر طلعت شوق الي صدت عنه وهو شايل المنشفه :  تقدر تدخل تتروش خلصت.
كمل طريقه للحمام بدون كلام وهي جلست على المرايه وتجفف شعرها وتسشور.
#نلقاكم_بارت_جديد🎀
#تحفيزكم_جرعه_للامام💐