في كل بيت حكاية

الخائن ج٢

_ جوزي بيخوني.

قالتها "منى" بصوت هادي كأنها بتتكلم عن حالة الطقس النهارده، صوت خلى "حسين" اخوها اللي بيسمعها يعتقد انه مجرد شك في جوزها، فسألها:

_ شاكه فيه يعني؟

هزت راسها بلا وقالت بنفس نبرة الصوت:

_ اتأكدت.. مش مجرد شك، شوفت الرسايل بينهم، وسمعته بيكلمها كذا مره في التليفون.. انا متأكده.

بصلها باستغراب وهو مش مستوعب هدوئها:

_ اومال انتِ هادية كده ليه؟ ده شكل واحده متأكده ان جوزها بيخونها؟ ده انتِ كأنك بتحكيلي عن واحده صاحبتك!

ابتسمت ابتسامة تخفي كتير:

_ اصل انا عملت كل اللي تتخيله في اليومين اللي فاتوا.. عياط وعيط، صريخ وصرخت، كنت بنام بدموعي واقوم بيها، يعني عملت كل اللي ممكن تعمله واحده عرفت بخيانة جوزها، بس وانا لوحدي من غير ما حد يحس بيا.. وكان خدمة ليا انه مسافر في شغل...

بصلها بسكوت كأنه مستنيها تكمل اللي بعد كده، وكأنه عارف ان كلامها له تكملة، وفعلا كملت بنظرة عين غريبة عليه:

_ ودلوقتي.. وقت الفوقة، وقت اني اعرف هعمل ايه وازاي، عشان كده كلمتك.

_ يعني ايه مش فاهم؟ عاوزه تطلقي؟ عوزاني اكلمه يعني؟

ضحكت فجأة وكأنه قالها نكتة، وتنهدت بعدها وهي بتقول بابتسامة فيها قسوة ومكر:

_ اطلق؟ لا انا مش من الستات الخايبة، عاصم ده انا اللي عملته، انا اللي وقفت جنبه خطوة بخطوة، كان حتة صنايعي ودلوقتي بقى عنده مصنع وصاحب شغل، مش بعد كل ده هاخلع واخد انا العضم واسيبله اللحمة يغوص فيها لوحده... انا ليا حق في كل جنية عنده، حق وقفتي جنبه وحق تعبي معاه كل السنين دي، مش في الآخر اطلق وتيجي هي على الجاهز تعيش في الهنا..

_ اومال هتعملي ايه؟

احتدت ملامحها وبصت قدمها بعيون كلها غضب وقالت بتوعد:

_ هاخد حقي منه، هخليه يندم على اليوم اللي خاني فيه، هخليه يلعن الوقت اللي فكر يغدر بيا فيه، هلففه حوالين نفسه وفي الاخر هطلع انا كسبانه وهو هيخبط راسه في الحيط.

بصلها بقلق على اللي ناوية تعمله واللي لسه مش واصله:

_  اهدي كده وفهميني عشان كلامك يقلق، يعني ايه هتلففيه حوالين نفسه؟ وانا لازمتي ايه في كل الحوار ده؟

بصتله وهي بتقول:

_ هعمل ايه مش مهم دلوقتي...اما انتَ مهمتك ايه، فانتَ اهم جزء في اللعبة.

_ لعبة؟

_ اه طبعا، دي لعبة على الشناكل، لعبة لازم نطلع منها فايزين، اعتبرها لعبة رد حق وكرامة.