انا احبك مابها زيف وخداع رغم الذي نخفيه والي نخافه

بارت ٢٢

دخلت شيخه : هلا والله بعريسنا هلا بشاهر الف الف مبروك ياحبيبي انت .
قام شاهر ويبوس شيخه ودخلو خواته وسلمو وطلعو وباقي بس شيخه ومضاوي.
مضاوي : حصتني نفسك ياشوق.
شوق تشمق : من اخوك ايه.
مضاوي : ايش
شاهر بضيق : ماقالت شي بس وين جملا ماشفتها.
دخلت جملا من باب وراه يدخل على هديل وديم : هلا والله يالله انك تبارك له وترزقه الذريه الصالحه.
شاهر : الله يبارك فيك ويخليك.
سلمو خواته وطلعو جلس شاهر شوي وكان بينهم بس نظرات انسحب شاهر وطلع للرجال.
________
عند هديل وديم
دخلت جملا وام ثنيان : هديل بنوديك عند شوق كايد بيجي.
هديل: طيب .
ديم حست بدوار بس سمعت اسمه وبنفسها : اثقلي اثقلي ياديم خذي خذي نفس اووووه .
قامت هديل معهم ودخلوها عند شوق الي جالسه على جوالها هالمره : جيتك.
تطالعها بنص عين : شعندهم امي وخالتي ينقلون فيكم .
جملا : شوي ننقلك عند ديم اذا جاء ثنيان .
هديل توترت وتضايقت ،، بلعت ريقها وسكتت .
اما عند ديم الي تروشت بالعطر وخصوصاً العطر الي يموت فيه كايد ومدحه كذا مره ،، دخل كايد بكل رزانه وثقل وبس شافها واقفه الي حرفيا ترجف ابتسم : مساء الخير ومساء ناعس هدبتس وطلة محياتس مساء قلبٍ يجره صبحً شوقه لمغرب عيونتس.
ديم بلعت ريقها طالع المصوره واشر لها تطلع انسحبت المصوره : خمس دقايق وراجعه.
تقدم يفتح بشته ويحضنها ويتنهد بكل ما اتاه الله من قوه وهو يشم عطرها وريحتها الي فجرت شرايين قلبه :
فتحت لتس صدري وقلبي وبيبانه
ايه ادخلي يانعبنو من رد غاليه
عزالله انتس خذيتي حس وجداني
صرت ابتسم لا لفى حستس وطاريه
يلي سكنتي فواد الشاعر الضاني
الي كتب لتس مواويل الهواويه.
رفعت عينها تطالعه وكان شايف الخوف بعيونها وهو يدري انها صغيره : خايفه؟
بلعت ريقها وهزت راسها بلا ابتسم كايد وحاوط راسها بيدينه وباس جبينها وهو يدري انها تعشقه وتموت فيه وحضر موقفها ليلة قال جده انه بيخطب له ساره : انا كايد ياديم انا حبيبتس يابنت عمي..
نزل خده عندها: بوسيني هالمره.
باسته بوسه شبه معدومه ابتسم ومسك يدينها : اجلسي اجلسي.
دخلت المصوره : لا لا تجلسين بنبدا تصوير.
ديم تقدمت وتعثرت ومسكها كايد وطاح عقاله شالته المصوره ومدته لكايد بدون ماتحس ديم سحبته من يدها وتوسعت عيونها وهي تناظرها بنظره حاده : عطيني اياه انا مو هو .
ابتسم ياخذ العقال من يدها : اهدي لاتطلعين حرتس بهالضعيفه.
طالعته وابتسمت ابتسامه خفيفه .
المصوره بنفسها ( ياربي وش هالعرايس الخبلات): اوقف وراها وافتح البشت و احضنها من ورى .
ديم ناظرتها وبتوتر : لازم .
ابتسم ابتسامة خبيثة وهو يغمز لديم : ايه لازم لازم .
رجع وراها وفعلا سوا الي انطلب منه وديم كل مايقرب منها تحس قلبها بيوقف وهي تشوف فرحته وكيف طاير وتتذكر كلام شوق وتتذكر حبه لساره وهو قبل ٧ شهور كان طاير بساره وميت عليها بلعت ريقها وهي تحس بحرارة جسمه ويدينه الي محاوطه خصرها قطع تفكيرها كايد الي ماقدر يقاوم كتفها المكشوف بعد الطرحه يبوسه رغم وقوف المصوره ديم كانت شوي ويوقف قلبها من تلخبط المشاعر داخل صدرها الي زاده توتر قرب كايد وملامسته لجسمها خلصت المصوره بعد ما خذت كم صوره وكل وضعيه تزيد ديم توتر وحب وخوف وتشم ريحة كايد الي حط وجهه بوجهها : تبينا نمشي.
ديم توسعت عيونها : لسى الزفه باقي.
كايد : انتي معي وهم بحريقه .
ديم : لا مابي اروح معك .
كايد ابتسم : افا .
ديم وهي تفرك اصابعها بتوتر : قصدي يعني مو الحين .
هنا دقت امه الباب ودخلت ابتسم ولف لها : ياهلا والله ببنت مخلد .
حضنته وهو حاوط كتوفها بيدينه يبوس راسها وجبينها : مبروك يابوي انت
كايد : الله يبارك فيتس ويخليتس لي.
امه: اطلع اطلع خلص وقتك.
يبتسم : خليني اخذها يمه والله مقدر اطلع واخليها .
ضحكت من كلامه وديم جلست على الكنبه تناظر الارض : اطلع اطلع وانا امك الله يرضى عليك.
كايد يطالع ديم: بطلع انا استودعتك الله .
وطلع هو وامه وديم خذت نفس قوي وكأن نفسها كان محبوس للحظات: اوووووه ياشوق الله ياخذك تكهربت وانا هنا كيف بالفندق.
دخلت شوق وام ثنيان وجملا يساعدونها .
شوق بدون ماتحس : الله عندك ريحة عطر رجالية خورافيه .
ابتسمت وهي ناسيه ام كايد: ريحة عطر حبيبي كوكو .
تناظرها شوق بحده : خليتك معاه خمس دقايق دخل كايد وطلع كوكو .
ديم بضيق : يووه ياشوق خلاص اطلعي من راسي.
جملا كانت تسمع وساكته وانسحبو وراحو يدخلون ثنيان عن هديل.
___
اما عند هديل دخل ثنيان واول شي لفت نظرها انه بدون نظاره خطفت هديل نظره له ونزلت عينها وطبعا اول مادخل لف للمصوره : ليش انتي وافقه اطلعي.
المصوره بضيق : الحمد لله والشكر .
وطلعت وخلت اغراضها وبس طلعت كانت عنود برا: وش فيهم ذولي منفسين.
عنود: منهم .
المصوره : شوق سبتني بعدها ديم بعدين هذا العريس الثاني مدري اش اسمه.
عنود: ثنيان .
المصوره : ايوه من اليوم يملطشو فيني مدري المشكله فيني ولا فيهم.
عنود بضحكه: فيهم فيهم ترا الثلاثه اخوان.
المصوره فتحت فهمها بصدمه : بالله عليك وانا اقول اشبهم طلعت المشكله فيهم مو فيني.
ابتسمت العنود من كلامها .
اما عند ثنيان الي كان جداً انيق وهو كاشخ وعطره الي يفوح سبقه لانفاس هديل مسك ثنيان ذقنها يرفع وجهها لوجه : اليوم لبسنا عدسات عشان ماتقولين ابو اربعه عيون .
هديل رفعت عينها فيه وانصدمت انه يدري باس جبينها بعمق : مبروك .
ماردت عليه من كثر ماهي خجلانه واردف وهو يمسك يدينها ويبوسها بالتناوب: ان شاء الله تحبيني ياهديل انا حبيتك بكل مافيني حبيت ملامحك الحاده حبيت نظرة الصقر من عيونك نظرتك سهام بقلبي حبيت حتى طولة لسانك وادري انك خايفه من عيشتك بالرياض بس صدقيني مافيه فرق وانا معك وراح اخليك تكملين دراستك وتدخلين الجامعه ادري ان جدي هو الي منعك وادري انك شاطره اعرف عنك كل شي تقريبا لايجي ببالك اني مابيك او بشوف نفسي كوني ولد مدينه وانتي بنت الديره لا ابد بالعكس انا ابي عيالي يكونون تربية بنت الديره مثل خوانك بتال وكايد وسند.
نزلت عينها بس سمعت طاري العيال ابتسم ثنيان : خلينا نعيش فرحتنا بكل تفاصيلها بكره نتعود على بعض ونقول ياليتنا سوينا ولا استحينا .
هديل ارتاحت شوي من كلامه يعني على الاقل عرفت نظرته لها وكلامه كان مريح وواضح انه فعلا حنون وطيب مثل ماقال بتال واكثر شي فرح هديل هو الجامعه الي بتدخلها ،، قطع تفكيرها وهو يمد يده : حطي يدك بيدي اذا موافقه تكونين زوجه لي ونعيش حياتنا بحلوها ومرها سواء
ترددت واردف ثنيان: ان شاء الله ماتندمين.
بعد تردد شبكت يدها بيده وهي من داخلها تموت الف موته وماتدري وش اخرتها معاه.
ابتسم : الحين اقدر ابوس زوجتي .
ماردت عليه وفهمها هو انها موافقه وبدل مايبوسها بخدها صدمها وهو يبوسها بثغرها هديل عرفت هنا انها خلاص استسلمت لثنيان بقلبها وجسدها قطع عليهم صوت الباب وكانت ام ثنيان : المصوره بتروح اخليها تجي.
ثنيان بعد ينطق بحده : خليها تدخل الله ياخذها.
دخلت المصوره وتم التصوير وكان حال هديل اهون شوي من ديم قل القلق والتوتر شوي بعد كلام ثنيان وقربه منها.
__
عند خلف الي دخل عند ساره الي بس شافته ابتسمت : سلام.
تبتسم : وعليكم السلام
جلس جمبها ومسك يدها: نمشي.
تناظره : الزفه باقي.
يرد بحده : وليش مناديني طيب .
طالعته بصدمه تشوفه شخص اخر عن الي كان يوعدها ويكلمها من ورى الباب: مدري من ناداك.
يلتفت للباب بعصبيه : ياليل ذالحريم وعقولهن الصغيره يمه يمه .
نوره فتحت الباب : انت علامك تنافخ.
يقوم يوقف : انا بروح اخوياي بيجون لاخلصت زفه كلميني اجي اخذها.
وطلع وساره مصدومه واول شي جاء ببالها كايد الي فضلت خلف عليه وكيف ممكن بيدخل لو هو مكان خصوصاً انها تدري انه يحبها من صغرهم وجاء ببالها بعد كيف بيعامل ديم وقلبه معي افكار كثيره جات براس ساره الي كفكفت دموعها وسكتت.
_____
عند شوق الي واقفه على الباب تستعد لزفتها وتهاوش ذا وتنافخ على ذا.
امها: اركدي يابنت فضحتينا.
وبس انفتح الباب هجدت شوق وتصنمت كأي عروسه دخل بخطوات ركيكه هاديه دخلت وهي تخطي اول خطواتها بحياة شاهر وربما لقلبه كملت زفتها بشكل طبيعي جدا رقصو حولها وكانت نظراتها لحقين الديره استنقاص كالعاده خذت وقتها المخصص لها ورجعت غرفتها بعدها العروسه ديم دخلت وهي خجلانه كثير كان واضح عليها صغر سنها فهي بنت ١٦ سنه انزفت بشكل طبيعي بس المختلف في زفتها عن زفة شوق هي كلمات بصوت كايد وهو يرحب فيها بحياته :
اهلاً هلابك توها تزين دنياي
في جيتك تو الليالي تزيني
يامرحبا ياغاية العين ومناي
يامرحبا ياديم عمري وسنيني
انا عليل بالهوا وانتي دواي
ياضحكتي يافرحتي يانور عيني
انتهت القصيده على هذا النمط للختام ديم بس سمعت هالكلام والقصيده نسفت كل كلام شوق ورى ظهرها وعرفت انه كايد خلاص صار لها ونسي الماضي او مو هامه .
_
اما عند ساره الي كانت بتصيح بعد دفاشة خلف خلتها كلمات كايد وقصيدته تنهار وماتقدر تمسك دموعها .
نرجع عند ديم الي جلست وهي خلااااص كل تفكيرها بكايد كانت مبسوطه وهالشي انعكس على وجهها خذت ديم وقتها بالزفه والتهاني والتبريكات ورجعت غرفتها .
هنا صار دور هديل بالزفه الي قل توترها كثير عنها قبل تشوف ثنيان الي تطمت وارتاحت له وحطت براسها اول شي تسويه تكمل دراستها لو من ورى جدها إذًا ثنيان اكد لها انه بيدعمها دخلت وهي مبتسمه وجهها بشو وصلت مكانها وجلست باركو ورقصو
جات هديل وعلى خُطى شوق وديم ولكن باغنيه غير واستقبال غير فالفرق بينهم ان هديل بنت الديره والكل يعرفها والكل يحبها وهي بعد انبسطت فيهم وفرحت كثير رقصو وباركو واهدو وخذت وقتها المخصص لها ورجعت الغرفه.
_
انزفت ساره بعد مابلعت غصتها ورتبت شكلها بس كان واضح انها مو بخير وانتهت الزفه وكلاً اخذ عروسته
___
في. سيارة شاهر الي بس ركب شوق وهي يدري انها ماراح تعدي هالليلة على خير وبس ساعدها تركب توجه لبابه ينزل بشته ويرميه ورى وينطلق للفندق بدون اي كلام ساعه ونص للرياض بدون ولا حرف.
____
عند كايد الي طائر وماهو موقع ركبت ديم وركب هو وقفل الباب : برد برا
ويلف لها : سمعيني صوتس ياديم قلب كايد ( معنى اسمها وهوالمطر)
ديم ابتسمت واردف وهو يمسك يدها والجو كان بارد : دافيه
ديم فهمت هالمره قصده و سحبت يدها بسرعه ضحك يرجع يسحب يدها ويشبك اصابعه باصابعها: من عذاب البرد جيت ابغى دفاك .
ديم هنا تمنت ان الارض تنشق وتبلعها ولا سمعت هالكلام.
________
عند ثنيان الي ركب : هلابك في قلب ثنيان يابنت عمي.
ماردت هديل واردف : تعشيتي.
هديل هزا راسها بالايجاب بدون كلام واردف: بس امي تقول ماتعشت .
هديل ساكته برضه واردف : قولي شي ليش ساكته.
هديل تنهدت : شقول.
ثنيان ابتسم وهو يسمع صوتها: قولي احبك مثلاً.
هديل سكتت واردف: شرايك ناخذ قهوه دام السهره صباحي.
هديل : ماحب قهوه.( وهي الي تبلع ترمس لحالها).
ثنيان : تدرين اني اعرف القهوه اذا انتي مسويتها او لا.
هديل ساكته وثنيان كان يحاول يكسر الحواجز بينهم وهو يسولف معها ويسالها وتجاوب.
___
اما عند خلف الي اخذ ساره واستاجر شقه مفروشه بالديره.
__
وصل شاهر الي نزل وهو مطنش شوق تركها تشيل فستانها لحالها وتوجه لباب الفندق ونادته : هي انت تعال ساعدني.
وقف ولف يناظرها : هي في عينك لي اسم.
شوق بحده : طيب ساعدني.
مسكها بيدها سحبها ونزلت بقوه على الارض وتعورت : هي انت رجلي بشويش .
تركها وكان بيمشي واردفت: خلاص خلاص شاهر ممكن تساعدني.
ابتسم وهو لاف عنها واخفى ابتسامه ولف لها قاطب حواجبه : هاتي يدك.
شوق مدت يدها وشال معها الفستان يتوجهون للباب.
______
اما كايد وديم دخلو جناحهم هي كان حرفياً مرعوبه : تعالي تعالي .
دخلت وقفل الباب نزل بشته وشماغه : تعالي لاتخافين هاتي يدتس.
عطته يدها ودخلها جوه: بدلي بعد شوي بيجي العشاء وبعد العشاء فيه كلام بقوله لتس ونسكر بابه للابد.
هزت راسها بطيب وهي تقريباً تدري وش الموضوع .
يبتسم : تبين اساعدك ولا مستحيه مني.
لفت عشان يفتح سحابها : ساعدني.
تقدم يفتح سحابها وانسحب : بروح بدلي وتعالي نصلي ركعتين سواء.
هزت راسها بالايجاب وهي تحاول تفك طرحتها شافها مو قادره وتقدم ويساعدها فاحت ريحة شعرها الي يعشقها كايد باس راسها بسرعه وبعد : خلاص .
ديم بكل براءه تساله : اشيل الميكب.
ابتسم : اذا تبين تشيلينه شيليه مو مشكله انت بكل الحالتين مضيعه علومي.
طالعته بكل حب تتأمله ومو مصدقه انه خلاص صار لها صار لحظه صمت. ابتسم يبلع ريقه : لاتطالعيني كذا عشان ما افقد شعوري .
نزلت عينها وراحت لشنطتها وكانت هي وشوق متفقين يلبسون بجايم بيت عاديه عشان يقهرونهم بس ديم خذت لانجري ابيض حرير وتوجهت للغرفه تمسح الميكب الثقيل وتحط ميكب بسيط يناسب ملامحها الناعمه ولبست ورتبت شعرها وطلعت تلبس عباتها وتتقدم جنب كايد الي فرش السجاده يبتسم : مايصير توقفين جنبي اوقفي وراي.
رجعت خطوتين وراه وبدو صلاه.
_____
اما ثنيان وهديل الي دخلو الفندق وكان التوتر والخوف مسيطر على هديل.
مسكها ثنيان بيدينها وكانت ترجف : لاتخافين مني تكفين انا ابيك ترتاحين معي .
هزت راسها بطيب وباس خدها : بدلي عشان نتعشى .
هديل شالت فستانها ودخلت تبدل.
وثنيان جلس على إشعارات رسايل من امل وقبل يفتحها نادته هديل: ثنيان ممكن تجي.
حط جواله وقام عندها : لبيه.
ميلت فمها : شنطتي بقت بالسياره .
ابتسم : حلو اسمي من فمك .
نزلت عينها واردف: بنزل اجيب الشنطه ماني مطول.
نزل ثنيان وفجاه يندق الباب على هديل الي استغربت مايمدي ثنيان يرجع وقامت تتوجه للباب.
___
اما شاهر الي دخل الفندق نزل بشته وشماغه وثوبه ويفتح ويلبس بجامه مرتبه شوق انصدمت فالمعروف عن عيال الديره مايلبسون بجايم نوم جلس على الطاوله شمر اكمامه وبدا ياكل شوق واقفه تناظره بصمت تحاول تفتح فستانها ومو قادره تمسك السحاب وشاهر كان يطالعه بصمت و ياكل وطولت وهي تحاول بس عنادها وغرورها كان يمنعها تطلب منه يساعدها واخيراً بعد ماتعبت يدها لف له : ليش ماتساعدني وانت تناظر.
قام بدون كلام وجاء فتح لها السحاب ورجع يكمل اكله وهي دخلت تبدل وشالت الميكب وعدلت نفسها وشعرها شويات وطلعت لابسه بيجامه عاديه وساتره جات جلست براس الطاوله وبدت تاكل بدون كلام
شاهر اول ماجلست قام للمغسله يغسل وراح للسرير وانسدح ولا كأنها موجوده
شوق : وين بنام انا .
رفع راسه يسند جسمه على يده : وين يعني مو شايفه السرير.
تنطق بحده : حلوه هاذي تبيني انام جنبك.
ينطق و يرجع ينسدح : اجل نامي بالارض.
تنطق بغضب : انت الي نام بالارض مو انا .
يعتدل بسدحته : انا ماعندي مشكله معك انتي الي عندك مشكله معي لذلك نامي انتي بالارض.
تقوم توقف : ماهو رجوله تسوي كذا.
ببتسم بسخريه : ماني رجال ،خليني انام لاتكثرين هرج.
جلست تكمل اكلها وشاهر غط بنومه عميقه
______
هديل فتحت الباب ودخلت بنت : ماشاء الله هديل صح.
تنطق : اي نعم مين انتي.
تناظرها فوق تحت : انا ضرتك امل .
هديل انصعقت توسعت عيونها بصدمه : ايش انتي زوجة ثنيان .
وعلى هالكلام دخل ثنيان الي انصدم وهو يشوف امل واقفه مع هديل ينطق بحده : انتي وش جايبك الله ياخذك .
هديل خذت دموعها مجراها على خدودها : صح هاذي زوجتك ياثنيان.
يبلع ريقه بتوتر : هديل خليني اشرح لك .
تقفل عيونها وتشد عليها بعصبيه وبصراخ : سالتك سوال واحد هاذي زوجتك ولالا.
بعد تردد هز راسه بالايجاب وضربته هديل كف بقوه : اتفوووه ياحيوان الله ياخذك ياكلب .
وصارت تدفه وتضربه وهو يحاول يتجاوز ضرباتها دفت امل وهي منهاره : اطلعي برا برا براا
طلعت امل وثنيان كان يحاول يهديها بس هديل كنت تسدد له ضربات روى بعض : اطلع برا اطلع برا روح لها مابيك مابيك.
طلع وقفلت الباب وصارت تبكي وتصيح وهي مقهوره على نفسها كل الي صار وكل الي قاله طلع لعبه او كذبه جلست بفستانها تنسد ظهرها على الباب تبكي بحرقه والم وقهر.
ثنيان لف لامل وبعصبيه : انتي كيف تسوين كذا .
ترد بدلع : اجل ساحب على امولتك .
يرد بعصبيه : مالقيتي الا الحين تجين .
وهي تقرب منه : ماشتقت لاموله حبيبك .
سدد لها كف بقوه ومسكها بشعرها : والله ان ما انقلعتي لا ارمي عليك يمين الطلاق.
راحت بس شافته صامل وثنيان يدق الباب وهو يحاول هديل تفتح هو قادر يفتح بس ماكان يبي يدخل بدون ماهي تفتح له اما هديل مافيه بالعالم كله احد يقدر يوقف دموعها غير بتال الي خذت جوالها ودقت عليه بدون اي تفكير.
__
اما كايد وديم الي صلو وتعشو قام كايد ومسك ديم بيدها واخذها للكنب وجلسو وهو لسى ماسك يدها : ليش ماتنقشتي.
تميل فمها بإسف : شوق قالت لا.
ابتسم : طيب ماعلينا من الحنا بس بقول لتس شي حطيه حلقه باذنتس شوق لو مشيتي وراها راح تخرب حياتنا ادري انها تحن وتزن عليتس سوي ذا واثقلي وطنشيه .
هزت راسها : صح.
يبتسم بحب : شوفي ياعين كايد موضوع خطبتي الاولى ماضي وانتهى والبنت صارت مرت اخوي يعني لو تنطبق السماء على الارض مافكر كايد بساره كايد يبيتس انتي وبس ،، لذلك الله يرضى عليتس ماعاد ابي الموضوع ينتفح ابداً لابخير ولا بشر ولا لتس علاقه فيها ابد ولا كأنها موجوده .
تهز راسها : ابشر.
يرفع يدها يبوسها : اي احد يضايقتس بشي قولي لي لاتخلينها بصدرتس لو حتى جدي ولا ابوي فاهمه.
تنطق بخجل : طيب .
يطالعها : عندتس شي تبين تقولينه قبل نقفل الموضوع لانه خلاص ماعاد نبيه ينفتح.
تهز راسها بالنفي : لا ماعندي.
فتح يدينه : هيا تعالي بحضن كايد الي صار لتس .
قربت ديم منه تحضنه وهالحضن الي تمنته من زمان وكانت اكثر من مره ودها تحضنه بفترة الخطوبه بس يمنعها الحياء والخجل باس راسها .
______
عند هديل الي ردت العنود عليها وهي تصيح : وينه بتال عطيني بتال.
عنود انخرشت : بسم الله وش فيتس بتال نام تعبان ونام بس انتي ليش تصيحين.
تنطق بقهر والم وحسره : طلع متزوج متزوج ياعنود متزوج.
انصدمت تتوسع عيونهاً : ثنيان متزوج؟.
هديل كانت تصيح وهي تكلم عنود وثنيان كان يسمع ومقهور عليها : تخيلي جاتني الفندق تقول انا زوجة ثنيان واجهته وقال ايه مرتي.
تنطق بقهر على اختها : طيب وش تبين بتال يسوي اصحيه .
تتنهد بقهر : لا لا لاتصحينه بس بكره اذا صحى خليه يكلمني .
قفلت تنهار صياح وهي جوفها يرجف مثل الطفل من كثر ماصاحت اما عنود طلعت الحوش وانفجرت هي الثانيه صياح وقهر على هديل حبيبة الكل وضحكة هالبيت كيف كذا يصير فيها .
____
اما شوق بعد ماغلبها النعاس نامت على الكرسي وهي سانده راسها على الطاوله كل ذا عشان ماتنام بالسرير جنب شاهر.
______
بعد ليلة طويل مرت بشكل طبيعي على خلف وساره،،
بكل حب على كايد وديم بعد مارمت ديم كل كلام شوق ورى ظهرها واستسلمت لكايد وهي طايره طير وفرحانه فيه اما شوق بسبب عنادها نامت على الكرسي وهديل الي غفت بدون ماتحس على الاريكه وهي جالسيه على الارض وسادنه يدينها وراسها عليها دخل ثنيان الي كان حرفياً مقهور عندها فهو يعرف هديل من صغرهم انسانه تحب الحياه والضحك والوناسه كان يتمنى بس لو عدت ليلته معها بشكل طبيعي بعدها الي يصير يصير شاف هديل الي طايحه ونايمه بالميكب والفستان والتسريحه و ولا يقدر يقرب منها اخذ اللحاف ولحفها عن المكيف الي بوجهها وانسدح بالسرير ونام.
__
الصباح
بالديره تحديدًا في بيت مشعل الصباح
فاطمه ومشعل جالسين يفطرون .
فاطمه : ترف ماعاد احد بيخطبها ولا بتتزوج يامشعل.
رمى لقمته بغضب: وبس هذه الي هامتس يافاطمه ماهيب معرسه انا خايف عليها يافاطمه التحاليل تقول ان مافيها شي والدكتور يقول هذه شي نفسي وانتي تقلين عرس وخطبه.
فاطمه الي كانت حزينه على بنتها هي بعد : بنتنا ملبوسه يارجال انا شفت الشي ذاه بعيني هرج على لسانها البارح بالعرس الحريم خافن يوم شافنها.
مشعل: ماعلي لامن حريم ولا من غيره قومي خليها تلبس بناخذها عند شيخ يقراء عليها.
تنطق : ونجد وين تقعد تراه خايفه هي بعد مرتاعه.
مشعل: ارسليها لبيت عمها سعود لين نجي.
تقوم تشيل الفطور : يالله بقوم اعلمهن.
_____
صحى شاهر قام جلس وشاف شوق كيف نايمه على الكرسي: راسها يابس كل ذا عشان ماتنام جنبي بالسرير.
قام غسل وجاء عندها : شوق قومي نامي بالسرير .
رفعت راسها وهي ناسيه لثواني الي صار توسعت عيونها بس تذكرت وبعدت عنه: لاتلمسني.
ينطق : مالمستك بس قومي نامي بالسرير .
قامت و جسمها متشنج من النومه الغلط راحت لسرير تفرك رقبتها بالم: بعد ماشبع نوم جاي يسوي فيها رجال.
دخلت بالسرير ونامت اما شاهر توضى وصلى وبدل ونزل اللوبي تحت يفطر ويتصل بزيد.
زيد: ياهلا بالعريس يالله صباح خير شايفني بنومك.
ابتسم بحسره : ابد بس قلت اكلمك اشوفك رحت للاسطبل ولالا.
زيد: لا سالم بيروح.
ينطق بترجي : لا تكفى سالم دفش فكني منه رح انت شنار امس تعبان ابيك تطلعه تمشيه وترجعه .
ينطق : دامه تعبان خله لين يطيب .
يتأفأف : يابن الحلال سو الي اقوله لك.
يرد زيد: طيب طيب ابشر .
يودعه: يالله سلام بكمل فطوري.
زيد: الله معك .
حط شاهر جواله على جنب وجلس يكمل فطوره.
____
عند ساره الي صحاها خلف تفطر : قمي قمي نفطر .
تطالعه : كم الساعه
ينطق :٧
ساره : ابي اكلم امي .
يرد بحده : تكلمينها من جوالي ماعندنا حريم معهن جوالات.
تطالعه بصدمه : بس انا احتاج الجوال.
ينطق بغضب : حنا بنسكن مع اهلي وبيت اهلتس الجدار بالجدار مايحتاج ولا جوال ابد ولا علميني من بتكلمين من وراي ياسوير .
تناظره بحسره : انت ليش كذا تغيرت
يرتفع صوته : هذه انا خلف الي على خبرتس ماتغيرت ولاشي بس انا حريص على اهل بيتي
تناظره : طيب عطني جوالك بكلم اهلي
دق على ابوها بنفسه وعطاها تكلمه .
___
اما كايد الي صاحي على جواله ينتظر ديم تفتح عيونها يسمعها وهي تقول بصوت حنون : صباح الخير.
حط جواله ولف جهتها بكل جسمه : ‏
ياصباح الخير يا منتهى السحر المباح
‏يا نعيمٍ في حياتي قطوفه دانيه
‏تصبح الدنيا وأهلها على شمس الصباح
‏وأنت شوفك صبح ثاني وشمسٍ ثانيه.
ديم بخجل : الحين كل يوم بتصبحني كذا.
نزل يبوس خشمها : وبقول لتس بعد ‏"صباح الخير يا ضحكة العمر عقب النكايد يا سلوة الخاطر اللي مبطيٍ ما صفى جوه".
ابتسمت وتنزل عينها بخجل : وش ناوي تفطرني لاني مره جوعانه .
ابتسم يأشر على الطاوله: الفطور ينتظرس تصحين.
قامت جلست : صليت الفجر .
يهز راسه : اي نزلت صليت تحت .
تميل فمها : وليش ماصحيتني اصلي.
يبتسم : شفتس تعبانه ماحبيت اصحيتس.
تشيل اللحاف : اجل بقوم اخذ دش واصلي بعدها نفطر.
يبتسم : ابد الي يريحتس بس فيه شي.
تناظره : وش .
ياشر على خده: بوسيني قدام تروحين.
تبتسم تقرب تبوس خده بخجل واردف: لا ابي بوسه كبيره هالمره.
ضحكت وقربت منه تبوسه بقوه وقامت وهو مبتسم : ياربي وش الرضاء.
دخلت ديم تتسبح وهو انسدح بالسرير ينتظرها تطلع ويفطرون سواء.
___
صحت هديل تشوفه نايم تتذكر كل شي صار شافت جوالها على الصامت وفيه مكالمات من بتال خذته واتصلت عليه ورد وهو مبسوط : ياحي هالصوت انا اشهد ياهديل ياشين البيت من دونتس ياعين اخوتس طمنيني عاستس طيبه اتصلتي عليه البارح والله اني قد نمت رجعت تعبان ونمت على طول .
تكتم قهرها بس سمعت صوته الحنون : ابد بس حسيت اني مشتاقه لك وقلت اسمع صوتك .
يسأل بشكوك : اكيييد مافيه شي غيرها .
تنطق : لا مافيه شي ليش عنود قايله لك شي.
يرد : لاوالله تقول هديل تبيك ضروري .
تحاول تكلمه عادي : لاياعين اختك مافيه شي.
يتنهد : اجل يالله اخليتس وان بغيتي شي دقي علي اي وقت لايردتس شي.
تبتسم بقهر : طيب عطني العنود شوي.
بتال عطى العنود الجوال وبلغتها هديل انها ماتقول لاحد شي لانها بتفكر بالقرار الي بتاخذه بدون تهور صحى ثنيان على صوتها قام جلس يشوفها تحاول تفتح فستانها جاء عندها ومد يده : خليني اساعدك.
دفت يده : شيل يدك الوصخه عني .
يبلع ريقه ينطق بترجي : ممكن نتكلم .
تنطق وهي ماو قادره تناظر بوجهه حتى : ماعندي كلام معك.
شالت فستانها وهي تتوجه للحمام تبدل ولانها ماقدرت تفتحه شقت الفستان بس اهم شي مايلمسها ثنيان و يقرب منها فتحت باب الحمام وهي ترمي الفستان برا صحت هديل شخص ثاني تماما وقررت هالمره هي الي بترسم حياتها بدون ضعف ولا ضغط من احد.
🎀
نلقاكم_البارت_القادم_ادعمونا_بكلمه.
نكمل_ولا_لا😎