انا احبك مابها زيف وخداع رغم الذي نخفيه والي نخافه

بارت ٢١

في بيت مخلد.
جهزت شيخه الفطور وكان البيت مليان ناس خواتها مضاوي وعيالها وهلا وعيالها وسلمى وعيالها واخوانها وعيالهم.
دخل شاهر الي كان مستحي لانه يعرف حركات خواته الي اول ماشافوه استلموه طقطقه : حي الله العريس ،اخيراً مابقيت تعرس،
ويغطرفون .
شاهر كان جاي من الاسطبل وجوه عيال خواته يحضنونه
مرام بنت اخته : اف ياخالي ريحتك يع.
هلا: في احد بكره  عرسه ويروح للخيول وقرفها.
شاهر نزل الخوذه وهو يشيل بسطار الاسبطل بديه: خلوني اتروش وابدل واجيكم .
مضاوي: بسرعه الحق الفطور .
شاهر توجه لغرفته وصاحت شيخه : لاااااااا .
شاهر لف : علامك.
شيخه : رح للحمام وانا اجيب ملابسك لاتدخل غرفتك وكلك روث وعبس الخيول.
شاهر توجه للحمام وهو يحط اغرضه بالسله جنب الحمام ودخل يتروش.
_____
عند ثنيان بسيارته
هو وشوق وديم وامه وهذال وابوه بسياره لحالهم.
ديم بدلع : ثنيان شغل لنا شيلات بدو.
شوق لفت لها : نعمممم مجنونه انتي .
ثنيان شغل شيله وقام يرقص هو وديم قدام وشوق ورى .
ثنيان : ارمن الغطاء الخط فاضي.
ديم تبي ترفع ضغط شوق : لا كايد يغار .
شوق سحبت الطرحه ومع السحبه شدتها بشعرها وديم تضحك وتلف تضربها: ياحيوانه شعري .
ثنيان قام يتراقص وديم معاه وشوق شبكت سماعتها ودخلت بعالمها الخاص..
______
في  بيت سعود عند جملا تحديدًا بغرفة البنات عنود تدهن يدين هديل بفكس عشان الحنا يغمق لونه .
هديل : احس الحنا ماله داعي .
عنود : ليش
هديل: عيال الديره بس يحبونه احس ثنيان ماتهمه هالاشياء.
عنود : انتي تحبين الحنا.
هديل: ايه احبه وانتي تعرفيني.
عنود: اجل خليه ينطق ابو اربعه عيونه اهم شي انتي مقتنعه وحابه الي تسوينه.
دخلو بتال وسند يرقصون وبتال يقلد رقص البنات وهو يلفح بشعره وهو اصلاً ماعنده شعر ويغني : جت جت جتكم تمطرخ.
البنات انهارو ضحكً.
هديل: تخطرف مو تمطرخ.
دخل ابوه وبصوت عالي : بتاااال .
لف بخرشه : سم يبه.
ابوه : امش جدك يبيك.
عنود : يبه تكفى وصه بغدا مابي الحنا يروح.
الاب: ابشري .
ومشى البنات انصدمو من حنية ابوهم.
شهد: ابوي طلع حنون بس جدي خربان.
نوره وهي داخله : الخربان منهو.
شهد بخوف : جدي مخلد.
هديل وعنود انهارو ضحكً ونوره تطالعهم فوق تحت وتروح.
___
في بيت مخلد طلع شاهر من الحمام حاط المنشفه على رقبته : يالله حيهم.
خواته يغطرفون ويهيصون هم وبناتهم وشاهر كان مبتسم وبس سلم وخلص شغلو السماعه وقامو يرقصون وهم يمسكونه بيدينه وهو يضحك.
هلا: مابغت  تصير ياشاهر .
شاهر : عاد صارت .
مضاوي : والله ياقلبي انه يرعد ويبرق من الوناسه.
مرام : خالي بكره بتروح الاسطبل.
شاهر ضحك : هههههههههه شايله هم ريحتي بكره ايوالله لازم اروح.
مرام: يع ياخالي تطلع ريحتك شينه.
يرفع بلوزته : راحت ريحتي الشينه خلاص شميني.
مرام قربت منه وهي تبوس خده : لا صارت حلوه ريحتك.
ابتسم ينطق : ايوه وش سويتو ماسويتو.
ترد شيخه بحماس  : ابد حجزنا ضيافه بسمك انت وشوق والدقاقه ب١٠ الاف خمسه علينا وخمسه عليهم.
شاهر : كايد لا ظروفه صعبه هالايام.
شيخه : هم حولو على حساب موضي ٥ الاف.
شاهر : لا ارجعي حوليها على حساب بتال يعطيها جملا.
مضاوي: اخاف كايد يزعل.
شاهر: يابنت الحلال كايد توه متوظف ماله الا سته شهور وجده بخيل وابوه رخمه رديها عليهم بس وإنا بعطيك  ٢٠٠٠ من عندي.
تبتسم شيخه : خلاص الليله انت عطها اياه اذا جو للعشاء.
شاهر قام : بروح اكمل اشغالي غرفتي لاحد يجيها ياشيخه.
عذاري: الله اكبر عاد وش نبي بغرفتك.
شاهر لف لها : اكلم خواتي الله يرضى عليك .
طلع وعذاري تفشلت والبنات قامو يجهزون البيت ويخصلون اشغالهم.
_____
عند كايد الي دق عليه ثنيان وبلغه ان سيارة الدبش غرست بالبر: يالله يالله جايك.
ابوه : وش العلم.
كايد: خالتي لطيفه جايبه سياره خاصه لعفوش بناتها وغرست بالوادي.
الجد كايد: لطيفه معها ربشه ولا وشو له السياره.
كايد: يبه باخذ شاصك أسحب السياره.
ابوه : هاك هذه المفتاح والعده كلها تلقاها فيه.
طلع كايد يتوجه للشاص.
_______
في سيارة ثنيان
شوق منهاره ضحك وهي تشوف السياره مغرسه وغبارها اطول منها وثنيان يحاول يطلعها: ياربييي هاذي اخرتي تغرس سيارة الدبش بالبر يالله حسن الخاتمه صدق احس اني باخر ايامي.
ديم شافت شاص عمها سعود وكايد ينزل منه ويشمر ثوبه ويربطه  على وسطه داخت ديم مثل العاده :  يووووه جاء عريس قلبي .
شوق  تطالع الا هي تشوفه : ياخفيفه هي لاتنسين الوعد الي بيننا.
ديم وهي تطالع كايد: اي وعد.
شوق هبدتها بقوه : اي وعد هاه شفتيه يالمخنزه وضاعت علومك.
لفت بضيق : اااح شوق وجع يدي كسرتيها.
كايد بما انه راعي بر وخبير بهالامور قدر يطلع السياره بسرعه .
ديم: شفتي طلعها ذيبان.
شوق: اخ ياربي بتذبحني بتذبحني هالخبله .
ديم تطالع الشاص الي اختفى وجاء كايد وركب ولحقهمً .
—-
وصلو محسن وعياله ودخلو البنات ديم دخلت تركض تحضن هديل: ياروحي عروستنا الحلوه.
هديل: وانتي بعد عروستنا.
ديم شافت النقش بيدين هديل: الله يجنن شوق شوفي كيف حلو.
شوق طالعت بنظره حاده وكملت طريقها للغرفه تنزل اغراضها.
هديل مسكت يدين ديم: وين حناك.
ديم : ماتحنيت.
هديل: ليه ياخبله كايد متجنن على حناك بالملكه وكل يوم يسالني ديم تحنت ديم تحنت.
ديم تحسفت بنفسها : ماعليه انا وشوق متفقين نحط تاتو.
هديل ترك يدينها : بيزعل كايد.
ديم كملت طريقها للغرفه بدون رد وهي مقرره فعلاً تحط حد حتى لقلب كايد وحبه لساره اذا فعلاً باقي يحبها اما برا عند ثنيان وكايد وبتال الي نزلو اغراض ديم بقسم كايد براء وقفل الباب واخذ المفتاح. صار العصر وتوجهو لبيت شاهر جملا ولطيفه ونوره والبنات بقيو بالبيت اما ديم وشوق دخلو ونامو نومه عميقه
______
في بيت مخلد دخلو الحريم على الزغاريط والغطاريف والاغاني ام ثنيان كانت مصدومه اول شي من قسم كايد الي بس غرفة وصاله وحمام والحين غرفة شاهر كانت تناظرهم بنظره دونيه دخلو داخل وشاهر وعيال خواته واخوانه دخلو الاغراض داخل غرفته تم العشاء وكل شي طبيعي ورجعو للبيت.
___________
في بيت سعود صحو ديم وشوق
شوق تتمغط  : ااااف اطنخ نومه والله.
ديم تمسك راسها بألم : انا صدعت.
هديل: تبون عشاء؟
ديم : لا مالي نفس
شوق: ولا انا.
ديم تناظرهم : اخر ليلة بالعزوبية.
شوق: عقبال ماصير ارمله
هديل تطالعها بحده : وجع ان شاء الله لاتدعين على خالي.
تشمق شوق: اسكتي لا اطلع حرة خالك فيك تلايطي بس،
ديم: ياحبكم للمناقر.
فجاه دق جوال شوق وقامت بس شافت رقم امل الي لها شهور ماتواصلت معها ردت  بعد ماطلبت منها امل خدمه : يابنت ليش وش بتسوين.
امل بحقد : ماعليك الي طلبته منك ارسلي لي ياه واتس وانسيني.
شوق : بشوف ثنيان اول.
امل بتوتر : لا لا الا ثنيان لايدري بيخرب كل شي .
شوق باستغراب : طيب طيب الحين ارسله لك بس باي لاحد يسمعني.
قفلت امل وارسلت شوق الشي الي طلبته وقفلت جوالها ورجعت للبنات.
بعد ليلة طويله مابين الي نام والي مانام الي مبسوط  والي قلقان الي خايف والي متوتر الي يفكر والي يهوجس افكار كثير فوق بعضها طلع الصباح.
_____
في بيت مخلد الكل قام يفطر ويتروش ويجهز وشاهر بسابع نومه ولا هامه شي.
مضاوي باستغراب: ياكبر قلبه انا اسبوع مانمت منخرشه.
شيخه : خليه ينام ويرتاح بلا مايصحى ويروح للاسطبل.
مضاوي : مستغربه مافتح اغراض زوجته يشوفها.
شيخه : وش دراك يمكن شافها:
مضاوي: لا جيته اصحيه الفجر كل شي زي ماهو .
شيخه بحماس : قومي قومي نفطر عفاف زينة الفطور ورانا شغل.
قامت مضاوي تفطر هي وشيخه مع البنات.
_______
في بيت سعود صحت هديل كالعاده ماهي متعوده تنام الصباح وطلعت من غرفتها تتوجه لامها الي تفطر بغرفتها: صباح الخير يمه.
امها: صباح النور ليش مانمتي شوي.
هديل تتأفأف : ماجاني نوم طول الليل اهوجس.
امها: ليه يمه عسى ماشر.
هديل بضيق : مدري احس قلبي قارصني بيصير شي.
امها توترت: بسم الله عليك ماصاير الا الزين ان شاء الله لاتفكرين وانا امك التفكير ماهو زين.
قامت هديل: بروح اتوضى واصلي ركعتين.
امها :روحي يمه روحي.
اما شهد صحت على جوال ديم ألي ازعجها: ديم ديمم قومي جوالك ازعجنا.
ديم فتحت عيونها: الميكب ارتست ايوه هلا دقيقه الحين ارسله لك.
قفلت : اوف تبي اللوكيشن شهد قومي لكايد يطلع لها على الخط اخاف تغرس.
شهد: رقمه معك كلميه.
ديم بتوتر: مابي اكلمه رحي قولي له.
شهد قامت تغسل وجهها وتروح تدق باب قسم الرجال ويجي سند: هاه.
شهد: كايد وينه .
سند: ليش
شهد: ناده ابيه.
كايد سمع صوتها وجاء : سمي.
شهد : ديم تقول يروح يجيب الكوفيره من الخط تخاف تغرس.
كايد ابتسم : طيب خليها تكلمني.
ترد شهد : عيت يمكن مستحيه خلاص رح انت .
كايد باستغراب: كيف اروح وانا مدري وش سيارتها.
شهد : رح وانا بكلمك من جوال ديم.
كايد : يالله.
راحت شهد لديم الي ارسلت لكايد رقم الميكب ارتست يتواصل مع سواقها وصارت تصحي البنات يجهزون الساعه ١١.
___
في بيت مخلد جات الكوافيره والقروب الي معها لان عايلتهم كبيره  وبدت معاهم بالتساريح والميكب.
شيخه : مضاوي شاهر صحى .
مضاوي: اي رحت اصحيه مالقيته شكله طلع للاسطبل.
مرام : وش فيه خالي يحب خيله اكثر من زوجته.
هلا : خالك مايعرف زوجته عشان يحبها بس روحي فطري خوانك صحو.
عذاري: انا بكون اخر وحدة عشان مايخف المكياج.
عفاف: يابنت الحلال صفي نيتك ويزين وجهك.
عذاري : نيتي مافيه اصفى منها انا صريحه وقلبي طيب .
عفاف : زين زين رحي شفي سالم صوته ينادي.
سلمى : بناتي وينهم مايمسكن اخوهن عني  دوري بعد هلا .
مضاوي شالته : هاتيه هاتيه بوديه عندهم بالمطبخ.
شالته موضي وراحت للمطبخ والبنات باقي حوستهم ذي تتروش وذي تجفف شعرها وذي تجهز فستانها وذي تخبره
______
ننتقل عند بيت سعود والحال عندهم نفسه في بيت مخلد.
هديل طالعه من حمام بعد دش مرتب وديم تجفف شعرها وشوق منسدحه لسى ببجامتها.
ديم تلف لشوق: طلعت هديل قومي تروشي .
شوق: قربت تخلص الحلقه استني.
ديم سحبت الايباد وهي تقفله : يابرودك يامسلمه قومي خلي عنك العبط.
شوق سحبت الايباد وحطته بالشنطه : ياشين اللقافه.
ديم تطالع يدين هديل واخواتها : مو نفسها الي نقشتنا بالملكه صح.
هديل: لا هاذي من طرف خالتي مضاوي سودانيه.
ديم: اي ذا احلى بمراحل.
عنود: ليتك تنقشتني الحنا بيدك يجنن.
ديم : عاد ماتنقشت المهم مين الي بعد غزل.
شهد: ريم .
ديم :  زين انا بروح اكل شي مره ميته جوع.
عنود: روحي تلاقين بدولاب المطبخ الي جمب الثلاجه عصاير وفطاير جايبها بتال .
ديم : زين زين اجيب لك ياهديل.
هديل: لا كبدي تقلب مابي شي.
ديم : كل ذا خرشه من ثنيان.
هديل : لا بس لاني مو نايمه البارح .
ديم : والله انا جاتني اطلق نومه .
عنود: عاد كايد مانام ليلة كله يحوس بالحوش.
ديم تلاشت ابتسامتها وهي ماتدري وش مصيرها معاه والحال نفسه عند هديل.
خذت ديم مرطب الجسم  وراحت  للغرفه الثانيه ترطب جسمها وبعدها تروح تاكل  وهديل تجفف شعرها والبيت كل وحده تحوس بشغله
__
صار العصر في بيت سلطان تحديدا في المجلس كتب كتاب خلف وساره  رجع سلطان بعد ماخذ موافقه ساره وتم عقد القران طبعاً عيال جملا ماحضرو لانهم للحين ماتسامحو مع عيال سلطان بعد ضربهم لكايد غدر  تم عقد القران وطلعو الرجال وكلاً راح يجهز للعرس الليله.
____
في بيت مخلد شاهر راجع من الاسطبل وطبعا لازم يسمع كلام من خواته دخل يتروش ويجهز للعرس اما عند كايد الي كان مبسوط بس يغلبه التوتر كحال اي عريس  اما ثنيان كان اكثر شخص متحمس للعرس وطاير طير.
بالمقلط عند كايد الي يلبس ثوبه وشماغه وبشته .
يجيه بتال : اطلق معرس انا اشهد .
كايد ابتسم وهو يحضن بتال : عقبالك ياضلع اخوك .
بتال باس راس : والله لو اوزع فرحتي فيك  على السعوديه بكبرها لتغطيها وتزود.
قاطعهم سند الي يحوس : وين مجندي يابتال.
بتال: انت متى تكبر عمرك ١٧ سنه وباقي ورع .
سند يطالع كايد : فكني منه ياكايد احسن له.
كايد ابتسم هو يغمز لبتال: اقعد عنه يابتال  الا سند عاد.
بتال : هاك هذه مجندك .
سندي : لبسني اياه ياكايد.
كايد ارتخى يلبسه وطاح العقال ويمسكه سند قبل يطيح بالارض وهو يقول : اسلم.
كايد ابتسم : سلمت .
بتال : المقلط صار حوسه .
كايد : دخلها بالدولاب بكره برتبونها البنات.
بتال :  كلمت خوالي عشان موكب هديل للقصر انت اسبقنا ياعريس
كايد عاد يموت بهديل :  والله اني معكم ومجهز الرشاش .
سند : ابي مسدس.
كايد: لااااا الا هاذي.
بتال : يالله بطلع اشوف امي تقول اذا لبس كايد نادوني اشوفه.
كايد رجع للمرايه يعدل شكله وبتال ينادي امه وثنيان بالمجلس يكشخ هو وهذال اخوه.
_____
عند البنات
هديل : عنود وين سوارتي .
عنود : اغراضك كلها هنا شوفيها حطيتها لحالها حتى مايصير حوسه مع اغراضي انا وشهد.
شهد الي لبست وخلصت : بروح اشوف كايد مع امي .
عنود الي برضه مخلصه: انا بعد بشوفه.
طبعا العرايس لسى ماخلصو ولازم قبل المغرب بنص ساعه تكون هديل مخلصه عشان الموكب بس بيكونون ديم وشوق معاها بسياره وحده
__
في بيت مخلد طلع شاهر واخيراً جهز : العريس صار جاهز.
البنات الي تقريباً صارو جاهزين كلهم. باركو له وطقطقو شوي
مضاوي: متى بمنشي بنلحق موكب هديل.
دخل سالم: يالله يالله على السيارات يالله بسرعه الليل امسى.
صارو البنات يراكضون يمين ويسار هذا وين وهذاك وين
_______
في بيت سعود
دخلت جملا عند كايد وبس شافته بالبشت صاحت حضنها كايد وهو يبوس راسها .
بتال: لاتصيحين تخرب زينتس يايمه.
امه صارت تكفكف دموعها حتى مايسيح الميكب.
كايد: وش هالزين يمه والله انتس عروس عاد امس مخلصه الاربعين.
امه ضربته بكتفه  بضحكه : انت ماتستحي من امك..
بتال: والله معرسه امي.
امهم تناظرهم وهم يطقطقون عليها وهي مبتسمه .
كايد : يمه كم عمر ديم بالضبط.
امه : قدام شهرين مخلصه ال١٦ داخله ١٧
كايد بدون مايحس : والله صغيره .
بتال : وش طاري عليك تنام جمبها.
كايد : اه ياقليل الادب
قاطعهم صوت البواري وصوت اطلاق النار برا.
بتال وهو يركض للباب: خوالي جو .
كايد ياخذ الرشاش ويطلع لهم ويطلق كم رصاصه بالجو رداً عليهم .
جملا دخلت عند البنات والحريم : يالله يالله اهلي جو البسن واطلعن .
هنا يكونون بنات مشعل وامهم موجودات .
ترف : تعالي ياعنود نلبس هديل عبايتها وانتي ياشهد وغزل لبسو ديم.
شوق كانت واقفه على المرايه تناظر شكلها النهائي: حرام هالجمال اخرتها اخذ طعس.
امها : البسي عباتك ياشوق خلي عنك الحلطمه .
بدو البنات يلبسون ويطلعون وكايد وثنيان خلصو وطلعو وكلاً ركب سيارته وماسك معاه سلاح اول شي ركبو هديل قدام طبعا السواق بتال بعدين ورى شوق وديم وانطلق الموكب على صوت البواري والرمي والاعلام وكلاً معلق راية قبيلته بجنب العلم  الي معلق بالسيارات الكل كان مبسوط ومستانس بصوت الاغاني والرمي والغطاريف طبعا العرايس بسيارة كايد مستاجره وكايد وثنيان بسياره وحده كايد يرمي وثنيان مشغل البوري والفلاشات وانطلق الموكب للقصر وكان تقريبا ١٠ سيارات واكثر .
__
وصلو القاعه وقف بتال عند الباب : لاتنزلن دقيقه خل يجون الحريم.
شوق  بقوه :  اوف .
ديم تضربها تبيها تسكت وسكت شوق .
بتال يلف لهديل : مامداني اشوفتس بالشرعه بس بجي اشوفتس لازم.
ويمد يده يمسك يدها : انتي ليش مثلجه .
هديل يالله ينسمع صوتها بتال قرب منها وهو يحاوطها بيده ويرخي صوته عشان مايسمعون : تبيني اطخ ثنيان وترتاحين منه .
هديل : وطخ جدي معه .
ضحك بتال : ابد عز الطلب .
يعدل بتال مرايته ويعدل شماغه ويدق جواله : هلا خالي وينكم ابطيتو ترا والله لهج بحريمكم واخليكم .
شوق تمتمت :  ياليت
ضحك شاهر : لا جيناك جيناك حافظ على الامانه.
بعد شوي وصلت السيارات وحده ورى الثانيه .
نزل بتال وهو يروح قسم الرجال ونزلو البنات وهم ياخذون العرايس على صوت الزغاريط الاغاني دخلو البنات كل وحده بغرفه وبعد شويه جات ساره وماكان فيه غرفه لها .
ام ساره لام ثنيان : فضو لنا غرفه .
ام ثنيان : وين اودي بناتي اطلعن وادخل بنتك يعني.
جملا: حطي ديم من شوق يم ثنيان .
دخلت شهد عند شوق : امك وام ساره تهاوشو .
شوق عصبت : ليه وش فيها امي.
شهد: اجلسي وين بتروحين.
شوق: كلبه كيف تكلم امي اصلا يع.
شوي ودخلت ام ثنيان : شوق بنجيب ساره معك .
ساره : تخسي مابقي الا هي جيبي ديم عندي وخليها تنقلع بغرفه لحالها .
جملا: تعالي يالطيفه الله يهديك البنت تنتظر برا..
طلعو جابو ديم جلست : وش صار كيف بيجي كايد وانا معك.
شوق: انطمي لا افقش راسك بالكعب الحين .
ديم ابتسمت وسكتت.
________
عند العيال العرسان الاربعه واقفين جنب بعض يستقبلون الضيوف شاهر بعده كايد بعده خلف ثم ثنيان  بعد توافد الضيوف من كل مكان وصار المكان مزحوم المهنين والمباركين .
كايد: نبي رفيحي يابتال .
بتال : ابشر الحين اقول للفرقه يشغلون رفيحي.
شوي واشتغلت وبدو الشباب يصفطون صفين قام كايد  الي نزل بشته ونسف شماغه يمينه ويساره وقام معاه ثنيان يلعبون رفيحي ومعاهم هذال وبتال وسند اما خلف كان جالس لحاله كالعاده وشاهر مايعرف يلعبها فوقف مع الصفوف وهو يتمايل ويصفق ويحيي عيال اخته  بدو احفاد كايد اللعب على نغمات الاغنيه عدا خلف بس الصدمه لما تقدم الجد كايد كان بالبشت وتقدم مع احفاده وصار يلعب صحيح انه بشكل اخف ومهاره اقل بسبب تقدمه بالعمر ولكنه بدع ، تقدم له كايد الي بهاللحظه نسي كل قساوة جده وتقليله منه بشكل شبه يومي وغطى هالشعور فرحته بليلته كعريس  وبدا اللعب مع جده وهو مبتسم وجده يبادله الابتسامه صارو يلعبون والكل يشجع ويحييون كايد الجد وكايد الحفيد.
__
عند الحريم تحديداً حفيدات كايد
ترف : بنات اغنية قفلو باب المشاريه قومو نرقص.
نجد : روحي انتي لحالك.
عنود : انا رجولي بتتكسر توي جلست .
قامت ترف لحالها بكل ثقل والعيون عليها والكل يحكي بجمالها كانت تلبس اللون الاحمر ولامه شعرها واحد كانت ترف ترقص وتتباهى بجمالها وبكل دلع وغنق وثقل وثقه
قامت معها شيخه بنت مخلد .
عنود: زين خالتي قامت معها .
غزل: ماشاء الله عليها ترف مو هامه احد .
فجاه بدون سابق انذار تطيح ترف عليهم وتفقد الوعي بدون اي سبب  ويفزون البنات وشيخه تجلس تسمي عليها لكن الي صدمها انها تحولت لشخص ثاني بصوت شخص غريب وهي تسب وتلعن وشيخه باقي تسمي  عليها وتقراء عليها المعوذات الحريم الي تجمعو حواليها بعدو عنها بخوف  وبداء الكلام الي ينقال : بسم الله ملبوسه ، يوم معها مس ليش خلوها ترقص ،
جات امها والعنود وشيخه ومضاوي وشالوها داخل وهي باقي تهاوش وتسب عنود كانت مرعوبه بس لازم تساعدهم ويدخلونها داخل ومثل النار بالهشيم انتشر الخبر بين المعازيم( بنت مشعل ولد كايد الكبيره معها مس).
_________
عند العيال الي جوهم عال العال  وهم يلعبون مره رفيحي وهالمره سامري الي كان لعبة شاهر الي مايعرف لرفيحي خذا السيف  وهو يتوسطهم بالبشت ويلعب بالسيف طلع معاه كايد الي ماكان يعرف للسامري كثير بس لعيون خاله تقدم .
_____
عند ترف الي دخلوها عند هديل  الي انفجعت بس شافت ترف فزت بخوف : وش فيها ترف بسم الله عليها.
العنود مسكت هديل وعشان ماتخاف هديل ماقالت لها الي صار : مافيها شي بس طاحت شكلها مو ماكله شي.
جلست امها عندها وهي تحضنها وترف رجعت لوعيها بس بوجه اصفر وجسم مرهق وبس شافت وجه امها الي تصيح صاحت مضاوي عطتها مويه : خذي خذي اشرب مويه.
هدى الوضع شوي واتصلت ام ترف على مشعل الي جاء واخذ بنته ومرته وطلع ونجد بقت بالقوه مع العنود : بيودونها المستشفى ويجون ..
نجد: راحو خلاص.
العنود: ايه انا قلت خلو نجد معنا.
مضاوي لشيخه : ياعزتي لها حقين الديره ميتين على العلوم والله مايجلس بيت مايعرف بلي صار .
شيخه : معها مس  بس شكلهم مايدرون شفتي كيف طاحت وتحولت لشخص ثاني والله اني خفت بس ماقدرت اخليها  لحالها.
مضاوي : زين سويتي تعالي تعالي نرقص اشوف الناس انخرشت .
طلعو مضاوي وشيخه المنصه وهم يرقصون شوي شوي رجع الوضع طبيعي الا عند نجد الي قلبها مع امها واختها والي صار.
__
عند شوق وديم .
ديم تستفز شوق وهي تسمع الاغاني والدق واصل عندهم وواقفه وتتمايل وتغني مع الدقاقه : ‏ياخلي الغايب انا قلبي عليك اكبر من هموم البشر..تدري  اذا شفتك  من الفرحه والله بطير بطير،، ودي معاك اقضي كل العمر همس وحنين،،
‏انته حياة الروح واغلى البشر والله .
شوق الي تكمل المسلسل: بتهجدين ولا اهبدك بالايباد الحين.
ديم  باستغراب : الحين من جدك تشوفين المسلسل
شوق: ايوالله الليله تنزل الحلقه الثانيه وانا ماخلصت هالحلقه.
ديم : الله يعين شاهر بس.
شوق: الله يعيني انا اوف احس يبي لها بجامه وفشار .
وهنا تدخل جملا وام ثنيان : ديم تعالي بنوديك عند هديل شاهر بيجي.
شوق توسعت عيونها وبصوت عالي : مو على كيفه يجي انا مابيه يجي.
امها طالعت جملا الي يبدو  ان شوق ناسيه انها اخت شاهر : تعالي تعالي ياجملا ساعديني نودي ديم .
شوق : ااااف كيف انكش شعري الحين الله ياخذك ياشاهر بس .
دخلت العنود لانها تعرف خبال شوق وصارت ترتب المكان وتسحب الايباد من تحتها وتدخله بالشنطه .
شوق : جيبي لي عطر .
عنود: ذا
شوق : لا ذا حق ديم اقلعيه لها.
عنود حطته على جنب وعطت شوق عطرها تعطرت شوق  بعطر مره مميز وفواح دخلت المصوره وبعدها دخل شاهر الي كان ياخذ العقل بالبشت والغتره البيضاء ولفت شوق انه لابسة جزمة سوداء مو زبيريه مثل حقين الديره دخل وهو مبتسم شوق اول ماجت عينه بعينها شمقت فيه ولفت عينها للجهه الثانيه بكل برود : مساء الخير .
شوق عدلت جلستها وبكل نرجسيه وشوفة نفس تحط على رجل رغم ثقل الفستان وحوسته.
جلس شاهر قدامها وهي صاده ولا تناظره ابد.
المصوره : مطلوين كذا وراي عروستين غيركم ياليت ننجز بسرعه .
شوق لفت لها : وليش تنافخين ترا انا الي جايبتك بعدين مو هامني اتصور  روحي للعروستين .
المصوره تفشلت وبلعت ريقها بتوتر : اعتذر منك ادري بفجعة الزواج وتوتره انا اسفه حقك علي.
شاهر : تقدرين تبدين .
المصوره : قومو وقفو طيب .
شوق : انا صدق مابي اتصور تبين حقك بعطيك اياه بس طسي عند ديم وهديل.
المصوره تناظر شاهر الي قال : خلاص تقدرين تروحين مو لازم نتصور.
شالت المصوره اغراضها وطلعت.
شاهر : انتي ليش تنافخين
شوق: اسمعني زين ياشاهر  انا ماراح اكون لك زوجه لو تموت ماخليتك تلمس ظفر رجلي.
شاهر : يابنت الحلال ماني ميت عليك استرخي بس فضحتي نفسك .
هنا دخلت شيخه وسكت شاهر ولفت شوق للجهه الثانيه.

🎀🎀
نلقاكم البارت القادم♥️