انا احبك مابها زيف وخداع رغم الذي نخفيه والي نخافه

بارت ١٩

جاء كايد وهو يسحب شهد الين دخلها البيت : هذا هو الجني.
هديل مسكتها وهي تضرب فيها وشهد تضحك.
كايد وهو يدورها بعيونه : وينها .
هديل :مين
كايد :ديم
هديل: دخلت بتنام جوه تعرفها خوافه بس ماعليه انا اخليها تطلع معي غصب، ياديييييم.
ديم جات ركض وهي ماتدري عن كايد : لعنه الكل نايم لاتصيحين.
وبس شافت كايد توترت : انت هنا..
كايد شم ريحة عطرها اول ماوقفت وهو يتذكر كلام خاله .
ابتسم : اي بروح البقاله تبين شي.
تهز راسها : لا مشكور
تناظرهم هديل: انا ابي .
ديم شافت شهد بالعبايه : انتي خوفتينا.
تضحك شهد: اي انا .
كايد: اطلعي مع البنات مافيه شي يخوف.
تبتسم : لا خلاص بنام بالبيت.
هديل : اسالني وش اغراضي طيب.
يطالعها : مايحتاج انشدتس حفظتها.
شهد دخلت تجيب فراشها وهديل راحت وهي تسمع صقر يصيح وبقيو كايد وديم وعم الصمت وهو يناظرها وهي تناظر الارض
ديم: كيف كليتك.
كايد: طيبه بس باقي لتس عندي شي لازم اعطيتس اياه.
ديم باستغراب: وش ذالشي مافهمت.
ابتسم : شي طلبتيه مني بالمقلط وجاء جدي قبل اعطيتس اياه.
ديم بفهاوه : وش الي طلبته
سحبها بيدها عنده يبعد شعرها عن خدها ويبوسها برقبتها ويضيييع بريحة شعرها وعطرها الي مو بس هو يعرف جماله طول وهو يشم ريحتها ينطق بهمس في اذنها :
‏جت تخطى عطرها يسبق خطاويها الثقيله
‏كنها النسمه ليا من هلت الغيمه مطرها
‏جادلٍ شيخة حسن ، شيخة ترف ، شيخة قبيله
‏من حلاها كل من مرت على دربه نظرها
‏واهني من ذاق من خمر السوالف سلسبيه
‏وهو يدينه وحده بيدها ووحده في شعرها
استحت منه وبعدت شوي واردف : كنت احب اثنين وصارو ثلاثه كنت احب المطر والقهوه وصار عطرتس ثالثهم.
ديم ذاااابت بين يدينه وهي تسمع هالكلمات منه : شهد جت .
بعد كايد يروح : يالله استاذن انا.
ديم كانت بعالم ثاني سانده نفسها على الجدار وجهها احمر ونفسها يالله تدخله وتخرجه
جات هديل: بنت وش فيتس.
تبتسم : مافيني شي .
تناظرها هديل بابتسامه : باستس صح.
ديم ضربتها بكفتها: امشي امشي خلينا نطلع الحوش.
تغمز هديل : توك ماتبين.
تبتسم تتنهد : غيرت رايي خلاص.
تضحك : ايه عطاتس جرعة دفعتس للامام.
ضحكت ديم وهي باقي دايخه من بوسة كايد وكلامه ،، اما عند كايد الي خلاص ماعاد وده يشم شي بالدنيا بعد ريحة شعرها وعطرها يطالع بتال ويتنهد وهو يضرب قبله بيده: ااااه يابتال اخ.
يضحك بتال: الحب قطع قلبك
ينطق كايد: الحب قطع قلوب البعارين حتى الحمير السود يلعن جدفها.
ابتسم : وانت حمار ولا بعير.
ضحك كايد : انت الحمار وانت البعير .
بتال يضحك وحرك السياره وكايد سرحان .
___
في بيت مشعل.
ترف : شفتي عذاري هاذي ماتجيب عيال.
نجد: معها بنت .
ترف: اي معها بنت وحده بعدها ماعاد تولد
نجد: مو حلوه متينه مره لو تنحف شوي.
ترف: حرام عندها غده.
نجد: استغفرالله الله يشفيها.
____
عند شاهر الي منسدح بالحوش جمب ابوه
وهو يفكر ببنات محسن كيف مختلفات عن بنات الديره حتى بعطوراتهن : انا افكر بشوق الي يقولون ماتنتعاشر بس ياولد حلوه خل اقوم اخذ العلوم من شيخه ومضاوي.
____
عند شيخه ومضاوي وعذاري.
تنحنح شاهر قبل يدخل تحجبت عذاري.
شاهر جلس بين مضاوي وشيخه : هاه عسى العشاء كفاكم.
شيخه : ايوالله كفى وزاد.
مضاوي : والله شي يشرح الصدر الله يكثر خير ابوي.
شاهر : ماقدرت اشوف جملا وولدها من زحمة الناس بس بكره بمرها.
مضاوي: يجنن ولدها بس صغير كنه ابو سبعه شهور.
شاهر وهو يعدل جلسته: من جاكم مين ماجاكم .
مضاوي: جونا حريم عيال كايد وبناتهم وحريم عيال مقبل وبناتهم وحرمة سعيد وحرمة ولدها بس.
شاهر : اي ماجتكم حرمة سلطان وبنتها.
مضاوي: لا مانهم ضاربين كايد ومطلق بنتهم.
شاهر كان يدري مو ناسي بس يبي يوصل لمبتغاه حبه حبه : ايه صح بس زوجه جده بنت عمه محسن الكبيره.
عذاري: لا الكبيره اعوذ بالله منها شيطان يمشي على الارض .
مضاوي : والله ياشاهر ان البنت مثل القمر وجامعيه وفاهمه صح شوي ماتكثو سواليف بس ماغلطت على احد .
شيخه: الصغيره حرمة كايد .
شاهر : كيف يزوج الصغيره ويخلي الكبيره.
مضاوي: هديل تقول كايد هو الي عيى عنها يقول جنية حتى اختها تتهاوش معها.
شاهر مسح على شنبه بابتسامه: بكلم ابوي يخطبها لي.
الكل توسعت عيونه وبصدمه عذاري: دخيلك ياشاهر فكني منها لاتدخلها عليه.
شاهر ابتسم: وش الي لاتدخلها عليه الي بيتزوجها انا ولا انتي.
مضاوي تطالعه بابتسامه : والله انها تناسبك.
شيخه : لا لا يامضاوي البنت عسره وشاهر عصبي.
شاهر : جاكن العلم ان وافقو بتصوم معكن رمضان.
قام وهو يتوجه للحوش وعذاري الي يسمعها يقول انه زوجها. الي بيتزوج شوق مو سلفها شاهر.
___