بارت ١٨

8.1K 226 39
                                        


عند ديم وهديل الي دخلو الغرفه وكانت شوق بروب الحمام
هديل: الووه هذا تلبسينه في بيتكم في غرفتس مو عندي هنه.
شوق ببرود: وش فيك انتي هدي شوي احنا بنات عادي يعني .
هديل: الحين صدق ورى ماتعرسين ونفتك منتس.
شوق: اولاً مابي العرس ثانياً لو بعرس لو ركزي على لو  بيكون  بشروط ماني ماخذ حيالله احد.
هديل: هاتي شروطتس يمكن نلاقي لتس من طعوس الديره واحد مناسب.
شوق: اول شرط يكون حلو .
هديل : فيه والله فيه حلوين  بس مغبرين شوي ماعليتس انقعه لتس بفلاش هاتي الشرط الثاني
شوق: طول بعرض .
هديل: هاذي بسيطه فيه نخل الله لا يضرهم الي بعده .
شوق: عرض المنكبين اهم شي.
هديل: ابد كتوفهم وش عرضها  وش وسعها من كثر مايشيلون الحب والبرسيم  والحلال غيره .
شوق: يكون رياضي.
هديل: كلهم رياضيين ماجبتي شي جديد كل يوم عند البل يتطارحون مع الحشو فسقانين ماعليتس .
شوق لفت لها وهي فيها ضحكه : بس ماعندهم سكس باق.
هديل: الا الا عندهم بس وش السكس باق ذا.
ديم: مانصحك تعرفين .
شوق لديم: من قو حضها ثنيان عنده سكس باق.
هديل: دامها عند ثنيان مهيب زينه اكيد .
ديم ابتسمت : ماودك تتروشين تراء المغرب قرب.
هديل : رحي انتي اول.
ديم خذت روبها وملابسها ودخلت تتروش.
وشوق الي النرجسيه عندها عاليه كانت تطالع  شكلها وهي تتبسم  وهي تبي. تستفز  هديل : ااااخ بس يارب اتزوج اشقر .
هديل: ماعندك الا شهبان ولهبان الديره يبي لتس واحد منهم يسرحتس مع الغنم.
شوق : انا بطلع من السعوديه كلها بخليها لكم واروح بعثه اتزوج بريطاني يعدل النسل شوي.
هديل توسعت عيونها : تخلين المسلمين وتاخذين كافر مايسوى التاليه من الغنم.
شوق بغمزه : ندخله الاسلام ماعليك.
هديل: اوووف منتس مقابلتس مرض بروح اشوف امي اذا تبي شي .
راحت هديل وشوق تمشط شعرها وهي تضحك من خبال هديل وهي تشوفها بنت ديره اقصى طموحها تعرس وتخلف.
_______
عند جملا الي ترضع ولدها وهديل جالسه عندها ماده رجولها تفركها : عجزو بي عيالتس يمه.
امها : بكره ياخذتس ثنيان وتنسين الشغل خدم وحشم.
هديل: بنتس تفشل يمه ماتحب الرفاله اخاف اخم البيت مع الخدم .
امها ضحكت من خبالها: عاونيهم لاتقصرين.
هديل وهي تقلد شوق : وتجيني ام سيلكون تقول ووووووع تفشلييين .
جملا: ام سيلكون منهي.
هديل: شوق  يمه لو نقربها من  النار ذاب وجهها كله بلاستك .
دخلت ام ثنيان وسكتت هديل وتسحب رجولها وتعدل جلستها.
___
صار المغرب والكل كشخ وجهزو البيت  وجو اهل جملا .
عند الرجال الي فارشين زل بالحوش جهة المجلس دخلو والجد كايد وعياله يرحبون كايد كان واقف على الباب يستقبلهم ويرحب فيهم  هو واخوانه قلط الريجيل ودخلو .
مخلد (ابو جملا) : مبروك البناخي الله يجعله من الصالحين البارين .
الكل : امين امين.
مخلد: حنا جيناكم وضيفتنا معنا لبنتنا وولدها .
سعود: الله يكثر خيركم والله ماكان لها داعي تكلف على نفسك
الجد: اقلط اقلط تعال وزاني يامخلد.
جلس مخلد الي يحب  الجد كايد ولايدري عن كرهه لجملا لانها ولا مره شكت منه عند اهلها.
شاهر : كايد.
كايد: سم ياخالي.
شاهر: تعال عاوني انت وخوانك جايبين شوية اغراض لجملا.
نزل كايد شماغه على المركى وشمر ثوبه يربطه وركب الحوض يساعد شاهر الي ماخلا ولا بقى شي ماجابه هو وابوه وخوانه.
سند: خالي شاهر ليش مقضين لامي امي ماهي جوعانه حنا مو مقصرين معها بشي.
شاهر : ماعليه وانا خالك ندري انكم مو مقصرين معها بشي بس هاذي  عادات وتقاليد عندنا .
سند: زين زين تبوني اعاونكم.
كايد: القهوه من يصبها.
بتال: ثنيان وخلف.
راحو العيال وهو يدخلون السياره للحوش بقسم الحريم وينزلون الاغراض وطولو وهم ينزلونها هديل: يووه ياجدي كل ذا ليش المطبخ ماعاد يشيل .
عنود: اتذكر بسند سواء نفس الشي.
ديم : تبون اعاونكم .
هديل: لا ارجعي خالي شاهر معهم.
شوق تلوي فمها بس سمعت اسمه بقرف.
ودخلو العيال الاغراض وراحو .
ديم : بنات بنات نبي نرقص.
هديل: اي السماعه مشحونه جاهزه تعالو تعالو .
دخلو البنات اولهم شوق ثم هديل ثم ديم والعنود ثم ترف وشهد ونجد.
سلمو وجلسو .
شيخه : كيفتس ياهديل شخبارتس طيبه.
هديل: الحمد انتي كيفتس ياخاله .
شيخه : زينه الحمد لله .
وهي تطالع بشوق: هاذي خطيبة كايد.
شوق بملامح حاده : لا مو انا .
هديل: هاذي ديم خطيبة كايد.
شيخه تطالع شوق بنص عين : وهاذي متزوجه.
شوق تنرفزت من كلمة هاذي: اسمي شوق.
شيخه : اي شوق اذكرتس وانتي صغيره تغيريتي.
هديل تمتمت: قصت خشمها.
شوق طالعتها بغضب وتشمق فيها.
شيخه : مضاوي (اختها)
مضاوي : سمي.
شيخه : وين هدية ابوي لجملا جبتيها.
مضاوي: لا والله نسيتها بالسياره ارسلي احد من الصغار يجيبها .
شيخه : لا مانقدر اخاف يلعبون فيها .
مضاوي: اجل كلمي شاهر يجيبها .
خذت شيخه جوالها واتصلت بشاهر .
شوق لمضاوي : انتي  متزوجه.
مضاوي : ايه عندي ٤ الله يحفظهم.
شوق: مو باين ماشاء الله عليك.
مضاوي : انا مو ساكنه هنا .
شوق: والله اني عارفه .
هديل: لاتسوين فاهمه ساكنه بديره ثانيه قريبه.
شوق طالعتها وسكتت
___
عند الرجال
شاهر : الا ياكايد متى العرس .
كايد بطقطقه وشاهر يعرف كيف جد كايد صارم والكلمه له : والله مدري انشد جدي.
شاهر  بضحكه : قل غيرها يارجال.
كايد: الصدق طلبت منه لين تولد امي وهاذي هي ولدت يعني شهر حولها جهز العانيه.
شهر: ابشر بها بس تراني بعرس معكم.
كايد :  اما منهي الي بتفطر عليها بعد ثلاثين سنه.
شاهر : بنت عمك.
كايد: لاتستهبل قل الصدق
شاهر: والله اني صادق بكلم ابوي يخطبها لي.
كايد: يارجال والله لتتعبك الله يقلعها ماتتعاشر صعبه بلحيل وانت بعد صعب .
شاهر : جوي الصعبين اروضهم مع خيولي .
بتال : من يقصد ترف.
سند لف : لاوالله اما ترف.
كايد : ماهيب ترف ياسنود لاتخاف.
شاهر: لايكون سند يحب ترف.
بتال: شفت قيس بن الملوح مايجي لهً مع سند.
شاهر: هي مو اكبر منه
كايد: الا بس ماعليك منه يكبر وينسى.
يسكتون شوي ويلف شاهر لكايد وبتال
شاهر: ياعيال تهقون عمكم يزوجني بنته.
كايد: العلم عند جدي ماهو عند عمي
شاهر: والله جدك يخوف .
كايد: يمكن يقول عطني شنار مهر لشوق.
شاهر : يخسي يبي فلوس من الريال للميه اما خيولي لايقرب عليها مره .
بتال: لا ماهوب قايل ابي حصان وش يبي به.
كايد: الا ياخالي على قرب البيت ماعاد نشوفك.
شاهر :  يارجال دوام واذا رجعت ياتلقاني عند الحلال ولا عند الخيول .
هنا دق جوال شاهر : ارحبي ، وينها ، يالله طيب جايتس .
قام شاهر وهو يتوجه لسياره يدور هدية ابوه لجملا وينادي كايد : سم.
شاهر : سم الله عدوك خذ هالظرف وده لخالتك شيخه.
كايد: ابشر.
جاء كايد الي بيده ظرف خالته وبيده الثانيه فنجال شاهي يدق الباب وتفتح خالته شيخه الي رحب وهلا فيها : يالله حيها شخبارتس عساتس طيب.
شيخه : الحمدلله انت وشلونك عساك طيب.
كايد: الحمدلله طيب انتي وراتس ماعرستي للحين.
شيخه : ليه تخبر عريس.
كايد: ابدا ازوجتس جدي ثم ابركي فوقه.
شيخه : ياويلتس ياشيخه وش ابي بهالشايب العايب.
كايد كان صح مايقابل خالته الا وين وين بس يحب جوها وسواليفها الي تعطيه على جوه: ابيتس  تشدين صواميله.
شيخه: الا بفكها عشان يموت واورثه.
كايد كان يسولف ويضحك معها .
وهديل وديم كانو بطرف الحوش ياخذون نعناع وبس سمعو صوته تخبو لانه بيعصب لان الرجال جالسين بالحوش وكانت لمبة الحوش عاكسه ظلهم وشاف كايد الظل وهو يكلم خالته : يالله تبين شي .
شيخه سلامتك امي انت الله يستر عليك.
سكرت شيخه الباب وهديل وديم مسكتهم الضحكه الي تجي بالوقت الغلط جاء كايد وهو يصبرهم : وش عندستن هنه.
ديم كانت لابسه فستان اسود قصير .
طالعها كايد فوق تحت وهي تسحب فستانها تحت : لاتطالع كايد لاتطالع .
كايد بحده: ليش طالعه بهاللبس.
ديم  بخوف : معي طرحه.
كايد: ساتره راستس ومطلعه اا.
وسكت هديل انهارت ضحك ودفها : انتي الخراب كله وهاذي وراتس تدربي راسها.
ديم :احترم نفسك لاتكلمني كذا.
وكانت بتمشي ومسكها بيدها وفيه ابتسامه : هديل ادخلي.
ديم تسحب يدها فكني هديل لاتروحين.
هديل : اسفه ديم لو مارحت توطى ببطني.
راحت هديل وديم تجمعت دموعها بعيونها وهي تناظر الارض وتحاول تسحب يدها من يد كايد الي قال بابتسامه : انا بلادي في عيونتس ناظريني .
ديم رفعت عينها وهي تبلع ريقها : لاتعصب علي انا اخاف منك .
هنا نزلت دمعتها مد كايد يده يمسحها : ياويل قلبي منتس  انا ماقصدت اعصب عليتس بس الحوش كله رجال ليه تطلعين بهاللبس.
ديم : فكرتكم بالمجلس.
كايد: حتى لو ماتطلعين لابسه  كذا بعدين هذا حتى عند الحريم مايلبنس كيف تطلعين فيه برا والله زعلتيني.
ديم : يعني معصب مني.
كايد: شوي بس يعني زعلان منتس.
ديم: شلبس طيب.
كايد: البسي الي تبين بس يكون طويل .
ديم : بس انا قصيره .
كايد:
‏قالت قصيره قلت هذا بلا ابوك
‏محدن ذبح كايد غير القصيره
باب الغلا عندي لها غير مصكوك
‏ وليا أقبلت تدخل سمو الأميره
ديم ابتسمت وقلبها صار يرقع وخافت يجي العيد : خلني اروح هديل تبيني.
كايد: مانتس زعلانه.
ديم: اذا مانك زعلان انا ماني زعلانه.
كايد: ابد ماني زعلان بس لاعاد تزعليني.
ديم : ابشر.
كايد: ابتسمي بعدين رحي.
ديم ابتسمت وكانت بتروح مسكها كايد: دقيقه اشوف لتس الدرب.
ديم كانت تتوتر اذا مسكها او قرب منها وهو يحس بهالشي عشان كذا مايضغط عليها : تعالي مافيه احد.
ديم راحت وكايد يطالع سيقانها وفخوذها وظهرها  الي طالعه : ااااخ منتس ياشبر ونص .
دخلت ديم وقفلت الباب وهو راح لقسم الرجال.
هديل لديم : وش صار
ديم بزعل : ماصار شي تمنيته يبوسني
هديل : اما تبينه يبوسك انا اقرف من ثنيان مدري ليه.
ديم أبتسمت: تعالي تعالي نرقص .
هديل تناظرها: وش سوا فيتس كايد وش هالنشاط.
دخلت ديم وهديل الي شغلو السماعه وبدو
رقص وضحك واستهبال وكايد الي كانت صورة ديم وهي رايحه للبيت عيت تروح من باله.
__
عند البنات إلي يرقصون ويتمايلون.
وجات شيخه : هالظرف فيه هديه من ابوي واخواني ١٠ الاف ريال لجملا وولدها صقر.
البنات يصرخون باستهبال .
شيخه : شغلي الشيله ياهديل.
هديل : ابشري
وشغلتها وقامت شيخه ومضاوي يرقصون وحريم خوانهم وصار زحمه والكل يرقص وفرحان وطلعت شوق الي ماتشوف نفسها بهالمهزله : اووووف وش هالفوضى بعدو بعدو عن طريقي.
وتطلع من الغرفه .
العنود وشهد كانت معهم المباخر الي يرقصون بها وريحة العود بكل مكان .
_______
كايد جاء وجلس وهو سارح ولا هو معهم.
شاهر يكلمه ولا معه .
شاهر  يضربه على فخذه: ولد .
كايد لف: سم .
شاهر : جدك يناديك.
كايد التفت لجده وهو يوقف ويروح له : سم.
جده: نبي ماء .
كايد: ابشر الحين اجيب الماء.
وقام راح لقسم الحريم وهو يشوف ديم واقفه مع هديل عند الباب داخل شوي بس الباب مفتوح  ويترقصون على الاغنيه باستهبال وقف كايد يطالعها بابتسامه: اثاريك ماحبيت ساره ياكايد وش سويتي بقلبي يابنت عمي .
هنا جات شوق وصد كايد الي صار ينادي : ياولد.
جات  هديل عنده : سم.
كايد: ليش الباب مفتوح .
هديل: نرقص فيها شي ذي بعد.
كايد: ارقصي داخل مو على الباب.
هديل: جوه الحريم على بعضهم .
كايد : هاتي ماء بسرعه جيبي الزير وطوس.
هديل: ثقيل مقدر اشيله.
كايد: وانا مقدر ادخل اشيله شفي لي لتس احد يساعدتس.
هديل: طيب دقيقه بقول لديم تساعدني بس اسمع اذا جت بوسها.
كايد توسعت عيونه:  اييييش ياقليلة الادب .
هديل: هي تقول اتمنى يبوسني.
كايد طخ :  تقلينه صادقه.
هديل: اي مرتين تقابلك تجي تقول لي ياليته باسني
كايد:  ناديها .
وراحت :  ديم ديم تعالي ساعديني كايد يبي الزير.
ديم راحت معها وشالو الزير الي كان ثقيل وجابوه عند كايد الي قال : سلم يدهم يالله.
ديم : مره ثقيل.
كايد: يعطيتس العافيه.
هديل انسحبت بدون ماتحس ديم  بعد ماحطو الزير بالارض
كايد مسك ديم بيد وبيده الثانيه سكر الباب.
ديم : وش تبي.
كايد: ابيتس.
ديم توترت وخافت يعصب من الفستان : هديل قالت تعالي ساعديني.
كايد ابتسم : ماعلينا من هديل بنشدتس عن شي.
ديم: وش .
كايد: انتي تبيني ابوستس.
ديم هزت راسها بلا .
كايد ابتسم : اجل روحي .
ولف بيمشي ويصدم بالزير الي طاح وتكسر وانكب الماء كله بالارض كايد الي زلق وهو يمد يده يبي يتمسك ومكان قريب منه الا ديم الي مسكها وطاح وطاحت فوقه .
وهنا انفجر ضحك وهي لاول مره تشوفه هالضحكه وكيف كانت ضحكته حلوه
وضاعت بتفاصيل ضحكته وهي تشوف اسنانه بصفه وحده مثل الولو وبياضها الناصع وعود الاسنان كالعاده بفمه .
ديم قامت وهي تسمع صوت جدها الي قال : انا ابن ابوي صدق .
وكايد قام وهو ياخذ شماغه من الارض.
خاف على ديم من جده و فتح الباب بسرعه : ادخلي ادخلي.
دخلت ديم وقفلت الباب.
جده : يوم انك تبي العرس ياقليل الادب وراك تقول اجله لين تلد امي.
كايد: جدي الي شفته مو زي مافهمت .
جده : وين الزير الي ارسلتك تجيبه.
كايد يأشر على الارض : انكسر .
جده: ايه دايخ ماتدري وش تاطى عليه .
كايد: بالغلط ياجدي.
جده : الغلط والله تربيتك يالمروح امش امش قدامي ياقليل الادب.
كايد: تراها مرتي
الجد: داري انها مرتك مير وش الي شفته متسدحين على الباب والعرب رايحين جايين .
كايد: زلقنا بالماء ياجدي.
جده : امش امش قدامي انقلع جب زير عمك مشعل.
كايد كان يمشي قدامه وهو مبلل بالماء ومبتسم وهو يتذكر طيحة ديم فوقه وريحتة عطرها الي تدوخه وتنسيه كل شي حوله .
جده دفه بالعصاء : انت تسمع ولالا.
كايد الي ماكان : اي اي اسمع.
جده : ها وش قلت.
كايد بضحكه :  والله اني مدري .
جده : والله انك خربان انقلع جب الزير اعجل.
كايد انطلق لعمه مشعل وهو ياخذ مفتاح البيت وراح يجيب الزير. الي كان شايله واول مادخل رثع بعتبه الباب ويطيح الزير ويتكسر ويطالع جده قبل يقول شي: رثعت رثعت ياجدي.
جده الي حذفه بحجر كبير وكايد منحاش وتضربه بقوه بكليته ويطيح على وجهه ويفقد الوعي.
نطو شاهر وبتال وثنيان وهو يرفعونه وكان وجهه اسود وفمه كله تراب .
رفعوه شاهر: كايد كايد رد علي.
سعود : ليه  يبه  ليه .
شاهر شاله وهو يركض لسياره .
وركب معه بتال وانطلقو للمستشفى.
___
بنص الطريق فتح كايد عينه وهو يتالم : وش الي صار.
بتال الي كان يصيح : جدي ضربك بحصاه على كليتك.
كايد: ردوني ردوني للبيت مايحتاج مستشفى.
شاهر : انت فقدت الوعي.
كايد: ياخالي ردني للبيت وجب عشاك عش ضيوفك.
شاهر : خواني بيجيبونه بس خلني اتطمن عليك.
كايد: لا لا طيب بس ردني للبيت .
بتال: وجهك اسود خلنا نوديك ياكايد.
كايد: لا مايحتاج ردوني للبيت.
شاهر : براحتك .
كايد: خذني لسوق .
شاهر باستغراب : ليه
كايد : خذني واعلمك.
شاهر لف وهو يتوجه لسوق .
عند ديم مرعوبه من جدها : ياويلي ياهديل لو شفتي كيف ينافخ ويهاوش وكايد يعمري همه بس يدخلني مو مهم وش يسوي فيه.
هديل: موقفكم يفشل.
هنا يندق الباب ويكون سند: هديل هديل جدي ضرب كايد واغمى عليه.
ديم توسعت عيونها : كيف ضربه.
سند: اص امي لاتدري .
هديل : الله يكسر يدينه .
تعكر جو هديل وديم الي يحاولون يخبون عن الكل راحت ديم للغرفه وهي تنزل فستانها وتلبس بجامه وتقفل باب الغرفه وهي تصيح اما هديل راحت للمطبخ وهي تخفي قهرها وحزنها على كايد.
_____
بعد شوي رجعو شاهر وكايد.
نزل كايد الي ماسك جنبه وهو يشيل بيده الثانيه زير جديد ويجي عند جده : هاك ياجدي الي بغيت تاخذ روحي عشانه.
جده : الله يقلعك ياشيطان.
سعود: انت طيب ياكايد.
كايد راح للبيت وهو يدخل ويتوجه  للمغاسل ويغسل وجهه ويمتضمض لانه بفمه تراب وهو يناظر وجهه  بالمرايه : والله ان ذالجد عود عقوبه ..
توجه للمقلط ويقفل الباب ويحط فراشه وينسدح وكان يتألم.
____
عند هديل الي علمها سند بلي صار وراحت عند ديم الي كانت تصيح تطمنها.
ديم : تكفين خذيني له.
هديل: اخاف يعصب.
ديم: ماعليه خذيني له تكفين الريجيل يتعشون.
هديل:  تعالي يالله.
ودخلت عند كايد الي كان منسدح ومقفل عيونه وغفى بدون مايحس وهديل واقفه تنتظرها برا المقلط
ديم الي جلست عند وجهه : كايد.
كايد فتح عيونه وهو يفز  ويجلس : ديم فيتس شي .
ديم حضنته  ودموعها تصب وهي تبوسه وبهاللحضه نسي كايد كل الالم وهو يقفل عيونه وساند نفسه على يدينه بدون مايقاوم او يعطي ردة فعل وهي تبوسه بخده: جدي ضربك.
كايد فتح عيونه بابتسامه : والله اني صرت بخير الحين .
ديم : خفت عليك.
كايد: جعله يضربني كل يوم اذا بتخميني تسذا.
ديم كانت بتبعد ومسكها : خليتس شوي عشان مايوجعني جمبي.
ديم ابتسمت : ايه ابيك تبوسني .
كايد سحبها وهو يقرب بيبوسها يسمع صوت جده يسال هديل عنه ويقوم يدخل ديم الدولاب ويقفل عليها .
___
عند الحريم الي جالسين يتعشون.
اكلت شوق شوي وقامت.
مضاوي : تعشي.
شوق: شبعت
مضاوي: عوافي.
شوق : الله يعافيك.
وراحت تغسل
شيخه: من جدها تاكل بملعقه.
مضاوي: شايفه شطول اظافرها.
عذاري(زوجة اخوهم سالم): سبحان الله ماحبيت هالبنت ياثقل طينتها.
مضاوي: بالعكس حبيتها احسها مختفله عن الباقين.
عذاري: يعني اني مدرسه ومثقفه.
مضاوي: ماله دخل بس صدق البنت مختلفه.
شيخه: قومو قومو فضحتونا الكل قام.
عذاري : ترا حنا الي جايبين العشاء.
مضاوي: اجل خليك منسدحه فوق الصحن..
قامو مضاوي وشيخه ولحقتهم عذاري وهم يضحكون.
وصادفو شوق الي على المرايه تعدل شكلها وتحط روج وتتعطر وتعدل شعرها وهي تقلبه من يمين ومره يسار.
شيخه : شوي اذا ممكن
شوق بعدت وهي تجمع اغراضها : اكيد اكيد انا خلصت اساسا.
وطلعت لفت عذاري لهم: ياووووك يابنات ياحلو ريحة عطرها.
مضاوي: عطرها راتب سالم مايجيب منه ٣٠ مل.
شيخه : لاعاد مو لهدرجه.
مضاوي بضحكه : امزح امزح بس الصدق غالي.
عذاري: تعرفين اسمه ودي اخذ مثله.
مضاوي : ماراح يطلع عليتس مثل ماهو عليها
______
عند هديل الي داهمها جدها وبغضب: وش تسوين هنه.
هديل: جيت اشوف كايد.
جدها دفها وهو يدخل ومعاه ولده مشعل وشاهر وثنيان .
ثنيان مد يده لذقنها وهو يقلد لهجتهم : شخبارتس.
هديل طنشته وهجت لقسم الحريم
دخل الجد : هاه طيب.
كايد الي كان منسدح: طيب ان شاء الله.
شاهر : خفنا عليك ياولد.
كايد كان متوتر من وجود ديم بالدولاب.
جده: وراك مشغل المكيف والدنيا برد
قم قم ياثنيان جب له بطانيه من الدولاب.
قام ثنيان وهنا صرخ كايد عشان ماتنكشف ديم : ااااااخ يارجال جمبي جمبي شيلوني برا شيلوني براا ااااخ شكل كليتني انعطبت بموووت ياخالي بموت
شاهر يطالعه بعدم تصديق وغمز له كايد وكمل شاهر معاه : قم قم ياثنيان عاوني .
قام وهو يرفع صوته : انا بطلع بطلع للحوش .
شاهر كان حاس ان فيه شي بس كمل معه الحركه .
الجد: شلوه شلوه هاتوه.
شالوه وطلعوه وفتحت ديم الباب وهي تتنفس بسرعه لانها انكتمت داخل وبسرعه ركضت داخل وهي تدخل الا الحريم جالسين بالصاله وهي داخله عليهم ببجامتها وشعرها منكوش وعم الصمت والكل يناظرها باستغراب .
ديم : يمه رحت اشوف هذال تعبان .
امها باستغراب: هذال تعبان!.
ديم: اي يمه مسخن وعطيته كمادات ومسكن.
امها : زين زين ادخلي.
ريم: وين عباتس البيت كله رجال ولا عمياء ماتشوفين.
شوق : ريم عضي على شحمة.
ديم دخلت بدون ماترد وراحت غرفة هديل وهي تقفل الباب : ياخبله ليش خليتيني هناك صدق ان مالك صاحب.
هديل: شسوي جاء معهم ثنيان اكلني بنظراته ونحشت.
ديم: طاح قلبي .
هديل: وش صار شافوك.
ديم : لا ماشافوني صرفهم كايد.
هديل: حكي لي وشلون.
ديم اقعدي اقعدي جلست هديل وصارت ديم تشرح لها الي صار.
______
عند كايد الي جلس وجاه بتال:تبي عشاء.
كايد: لا لا مالي نفس.
بتال جلس عند رجول كايد وهو يحضنه فجاه بخوف ورعب : والله لو صار لك شي اني اموت ياكايد.
كايد ابتسم: ماني مايت مو انا سمي جدك ابد بعمر واغثكم.
بتال : اي عمر راضين غثنا وسو الي تبي .
شاهر جاء وجلس وقام بتال يجمع الاكل والفواكه بعد العشاء.
شاهر : كانت في الدولاب صح.
كايد لف بصدمه: منهي.
شاهر: مدري عنك انا الي بنشدك منهي.
كايد: مرتي مرتي ياخالي لايروح بالك بعيد بس  كيف عرفت.
شاهر : واضح عليك يوم قام ثنيان بيفتح الدولاب بغى يوقف قلب بعدين يوم دخلنا عندك ريحة المقلط تفوح فوح بعطرها.
كايد مات غيره وهو يسمع خاله يقولها له بصريح العباره انه شم ريحة ديم عنده : يوه ياخالي يوه لاترميها بوجهي تسذا.
خاله : علامك انا اعلمك بالصدق.
كايد: اصلاً العطر عطر هديل .
شاهر : ماصدقت ماهيب ريحة هديل .
كايد : لو منت بخالي تفاهمت معك بطريقه ثانيه.
شاهر ابتسم وصد عنه وهو يشوف كايد يغلي من غيرته.
وكايد يفكر بغضب بكلام خاله وهو يشوف الاعجاب بنظراته بس ماقال .
________
عند البنات
يتقهوون شاهي وديم بالغرفه لانها لابسه بجامه ومو حابه ترجع تلبس مره ثانيه.
شيخه : الا ياعنود وين خالتس نوره.
عنود : بغرفتها تغلي.
شيخه : قلعتها الله لايبلانا.
شوق لمضاوي: انتي وش تخصصك.
موضي: رياضيات.
شوق: ماحب الرياضيات صعبه .
مضاوي : ماهي صعبه للي يحبها ، انتي وش تدرسين.
شوق: اخر سنه جامعه .
مضاوي : وش تخصصتس.
شوق: تربية خاصه.
شيخه : نفس شاهر اخوي .
مضاوي : لالا شاهر تربية بدنية وش فيتس انتي .
شوق بفضول: يدرس هو
شيخه: لا وين مدرس له ٥ سنوات
شوق : اها
عذاري كانت مره مو حابه شوق وغيرانه منها.
خلص العشاء والكل راح بيته خذو البنات فرشهم وراحو ينامون بالحوش بقسم الحريم .
شوق: انا لو تموتون مانمت بالحوش.
هديل: ماحد ميت عليتس المهم ديم معنا.
ديم: والله اني خايفه الصدق.
هديل: الليله البدر كامل احب انا وعنود ننسدح بالحوش نشوفه ونام تحته.
ديم: اجل بالنص هديل يمين وانتي ياعنود يساري.
عنود: ابد تم بس تعالي.
وشالو فرشهم وطلعو يفرشونها بالحوش.
هديب وهي تنزل ربطة شعرها: يووووه احتاج تهميز يابنات .
شوق: وش التهميز.
عنود وهي تلوي فمها تقلد شوق:  مساج يعني .
شوق : المساج صار اسمه تهميز.
هديل: الا العكس التهميز سميتوه مساج تقلدون هالكفار بكل شي.
شوق: اخمدي اخمدي.
هديل: انتي وش جايبتس همانتس تقولين بنام داخل ليش لاحقتنا .
ديم : هديل وش فيك ترا شوق اختي بعد مارضى عليها.
شوق : زيييين عرفتي ان عندك اخت اخيراً.
ديم : تعالي تعالي جمبي والله اختي وحبيبتي بس لاتسبين عيال الديره عشان مازاعلتس.
شوق: ازاعلتس اجل تقلدين لهجته بعد اخ بس مسيطر الطعس.
هديل: ديم خليها تسكت لا اقوم ادفنها بالحوش.
شوق : رايحه رايحه انام داخل ماعرف انام بالتراب.
هديل بطقطقه: يااااااي سو كيوت .
دخلت شوق ورفعت هديل يدينها لسماء: يارب يارب تاخذ لها طعس من الديره يصبحها بكف ويمسيها بكفين.
ديم : لا ان شاء الله تاخذ الي تبيه.
عنود توسعت عيونها : يعني شوق عندها حبيب.
ديم : لا ياخبله اقصد يكون على ذوقها هي.
هديل انسدحي انسدحي.
شهد شافتهم منسدحين ويتأملون السماء وطرت عليها فكره انها تخوفهم .
_______
عند العيال كايد منسدح في المقلط.
بتال : جوعان اجيب لك شي تاكله.
كايد لف يطالعه وابتسم : طلعت تحبني وانا مدري.
بتال: حرام عليك والله انك تسوى عيوني الثنتين واني احبك اكثر من ابوي الي مو داري عننا.
كايد تنهد ورجع ينسدح على ظهره : خله اولى يوم ضربني جدي وطحت قدام الريجيل والله اني كنت مستحي ومنحرج اكثر من الالم وماحسيت على نفسي الا الدنيا سوداء ومدري بعدها وين رحت .
بتال : مادريت ان جدي متعافي ذالكثر.
كايد: قم قم نروح للبقاله.
بتال: يالله .
قامو وهم طالعين يسمعون صراخ البنات .
شهد كانت لابسه عبايه راس  ومغطيه كل شي والحوش شوي ظلام وجاتهم تركض .
صرخت ديم وهديل والعنود منهاره ضحك .
جاهم كايد ركض وبتال بس رده كايد وهو يشوف ديم معهم : خير انتي وياها وش هالصياح.
هديل: جني جني.
شهد انحاشت للحوش الثاني وكايد لحقها يركض مسكها وهي ميته ضحك: خبله انتي تروعينهن تسذا.
شهد مو قادره تتكلم من الضحك.
هديل وديم  هجو للبيت والعنود جالسه بفراشها تضحك.
🎀نلقاكم_البارت_الي_بعده👌🏻

انا احبك مابها زيف وخداع رغم الذي نخفيه والي نخافهحيث تعيش القصص. اكتشف الآن