انا احبك مابها زيف وخداع رغم الذي نخفيه والي نخافه

بارت ١٦

عند البنات الي يلعبون جيكارو
العنود وشوق وترف وشهد .
وديم منسدحه وهديل تروح لاخوانها عند العشاء شوي وترجع شوي عند ديم الي خملانه وفيها نوم.
هديل: شرايك نطلع نتمشى برا.
ديم: لا كفايه فضايح مع كايد.
هديل: ترا امتس وشوق هاوشوه يوم شافوتس مغمى عليتس امتس تقول له انت وش مسوي ببنتي وشوق بعد قليلة ادب رمت عليه كم كلمه وهو ماقال شي سكت عشانتس
ديم قامت جلست : شوق وش قالت الحيوانه .
هديل : تقول انته قتلت الخروف قدامها بالله سواه تسويها وتقول البدوي المختلف .
ديم قامت عند شوق : تعالي ابيك برا.
شوق قامت معها بخوف ولحقتها برا: تعبانه يوجعك شي .
ديم بعصبيه : كم مره قلت لك لاتتدخلين بحياتي وكم مره قلت لك لا اسمعك تقللين من خطيبي بي شكل من الاشكال كيف تفهمين انتي.
شوق: وش قلنا ماقلنا اعوذ بالله وهاذي هديل بخور الديره هي الي قايله لك صح.
ديم : همك الحين من الي قايل لي بس هذا همك .
شوق: خلاص اسكتي لاتفرحين ريم علينا.
ديم بعصبيه وبصوت مرتفع : ماتهمني لا ريم ولا غير ريم بعدي عن كايد فاهمه ولالا.
شوق: اوك اوك خلاص ببعد عنه .
ديم طلعت تمشي بعيد وهي تصيح وجات عندها هديل : بنت ليش الصياح الحين.
ديم : مقهوره من امي واختي كيف يخربون حياتي.
هديل: ماعليتس كايد مايسمع من احد ابد يعني ماراح يكرهتس عشان امتس ولا شوق .
ديم: مدري ليش كذا يقللون منه وهو مجبور مثله مثلي ماله ذنب انا احاول اتعايش وامشي الامور عشان بعد الزواج هه اكون متعوده لو شوي.
هديل: صدقيني بتتعودين وبتحبين كايد واذا حبيتيه بتصير الديره بعينتس جنه.
هنا جاء سند الي كان شايل مرق : تبون مرق.
هديل ابتسمت : اي نبي تعال تعال .
ديم رفعت راسها وهي تمسح دموعها.
سند: هذا لتس ياديم من عند كايد.
هديل مدت يدها تاخذ الثاني واردف سند: هذا لترف من عندي .
هديل: وانا بنت البطه السوداء.
سند: قمي وصليه لها تكفين.
هديل : والله لشربه هاته بس
ديم ابتسمت وهو تقوم : هات انا اوديه.
وخذته توديه وبس شاف ديم تدخل الخيمه يلف لهديل : تراه لتس من عند بتال .
هديل طلعت نعالها وهي تلحقه للعشاء وهي تطب بالارض طايحه بين خوانها وبألم : ااااه ياسند الكلب والله لربيك.
رفعت راسها وهي تشوف نفسها طايحه عند رجول ثنيان الي كان مبتسم.
وبدون ماتحس وماتدري ليش سوت كذا بس شافته مبتسم : السلام عليكم.
هنا انفجرو الشباب ضحك كايد وبتال وثنيان الي شرق بالمرق وصار يضحك ويكح هديل قامت وهي ودها تصيح من الفشله وراحت تركض عند ديم الي جالسه بعيد شوي تشرب مرق : يوووووه فشله فشله الله ياخذ اخوتس.
ديم تضربها بكتفها : لاتدعين وجع .
هديل ماسكه راسها من الفشيله: ياربي ليش انا خبله كذا ليش.
ديم : وش صاير.
هديل حكت لها كل شي وديم انهارت ضحك : يازين مواقفي مع موقفك .
هديل: الحين بيقول مزوجيني خبله.
ديم: عادي زي ماكايد يقول مزوجيني بزره.
هديل : المشكله يوم شفته يطالعني رفعت يدي وقلت السلام عليكم مدري كيف قلتها جيت برقع وعميتها.
ديم ماتت فطست ضحك : ياويلي والله انك خبله صدق وش ذا هديل يييع .
هديل تضربها : تكفين لاتزيدين عليه مو ناقصه فشيله بموت بموت..
ديم كانت تضحك وهديل تتحلطم.
____
عند البنات ترف كانت تشرب مرق : عاد اعشق طبخ العزبه.
العنود : طبخ كايد ياحبي لتس العزبه مالها يدين تطبخ العشاء.
ترف: يازين سنود الي ذكرني بمرق.
شهد: اسكتي. لايدري جدي يطبخكم مع الذبيحه.
ترف انتبهت لنفسها وانه صح ممكن يوصل الخبر لجدها وسكتت
_____
جملا الي كانت تحس ببوادر ولاده وهي تتمغص بس صابره على نفسها عشان ماتنكد على عيالها وتبيهم يتعشون .
العنود شافتها تتلوى: يمه فيك شي.
امها : ظهري تعبني من الجلسه.
العنود جابت لها مخده وهي تحطها لامها الي حاولت تنسدح بس ماقدرت من المغص الي معها وهي تلف للعنود: العشاء كم بقي عليه.
العنود : مدري ليه جوعانه.
قامت جملا وهي تحس نفسها خلاص بتولد راحت بعيد ورى الوايت وهي يالله تمشي وكانت بعين كايد الي حس انه فيها شي قام يركض عندها وهو مايدري انها تولد : يمه فيتس شي اخذتس للمستشفى.
امه وهي تكتم المها ودموعها تصب وماتبيه يشوف شي : رح ياكايد رح .
كايد الي مو فاهم شي : وين اروح يمه انتي وش يوجعتس يابعد عيني انتي.
ردت بتعب : ناد لي خالتك فاطمه بسرعه .
هنا انفكت موية الراس وامتلت الارض كايد توسعت عيونه وهو كل مايقرب عند امه تطرده : يمه انتي تولدين .
امه: ناد خالتك فاطمه ( ام ترف)
راح يركض يم الخيمه ينادي بصوت واضح ان فيه شي : خالتي فاطمه خالتي فاطمه وينتس.
خالته طلعت: هاه يمه انت علامك.
كايد الي كان مرعوب وعرقه يصب : امي تعبانه تبيس ورى الوايت.
فاطمه : علامها .
كايد: مدري رحي بسرعه.
فاطمه راحت لها ركض وهي تسمعها تكتم صراخها اول ماوصلت عندها : انتي علامتس ياجملا وش بلاتس.
وهنا شافت المويه معبيه الارض ونطت كايد ياكايد.
كايد جاء : سمي .
فاطمه : جب شماغ ولا بطانيه بسرعه .
كايد راح سيارته وهو يجيب شماغه وفروته : هاتس.
بتال الي ينسى نفسه وقت يشوف وجع امه جاء ركض وهو بيدخل يشوف امه ويمسكه كايد: علامها امي علامها.
كايد: مافيها شي بتولد
جاء سند الي صاح اول ماسمع صراخ امه : امي ليش تصيح.
كايد: بتال خذه بعيد.
بتال : مافيها بس بتولد.
سند : ليش تصيح طيب .
بتال مسكه وجلسه على صخره وهو يهديه .
هديل الي جات تركض هي والعنود وشهد وصارو يبكون على صراخ امهم.
كايد مسك العنود الي كانت بتدخل عند امه الي كانت محرصه ماحد يدخل عندها الا فاطمه وبتال مسك شهد وجات هديل تركض بتدخل ومسكها ثنيان الي حاوط خصرها بيدينه وهي تضربه تحاول تفك يدينه : اتركي اتركي بروح عند امي.
ثنيان رغم الموقف الا انه كان يشم ريحة شعر هديل الي كانت تصيح وهي تسمع صراخ امها اما الباقين ماجو بقو بالخيمه احتراماً لخصوصيه جملا ديم كانت تقفل اذونها وهي تسمع صراخها.
امها: لاتقفلين اذونك هذا مستقبلك احفظي المكان عشان تولدين فيه.
ديم طالعها بقهر وخوف وهي تتخيل نفسها مكان جملا.
____
عند جملا الي واخيراً ولدت بعد معاناه وهي تفقد الوعي وبس سمع كايد صوت البيبي ترك العنود وبتال ترك شهد وثنيان نفس الشي ودخلو بناتها يركضون وبخوف .
العنود: ليش امي فاقده الوعي.
فاطمه وهي تلف البيبي بشماغ كايد : الحين تصحى.
كايد: اقدر اجي.
فاطمه بعد مادفنت كل شي ولبست جملا فروة كايد الي كانت ترجف من البرد دخل كايد وهو يشيل امه : لازم اخذها للمستشفى.
بتال وسند جو هم بعد والكل خايف ويتطمن عليها وفجاه يجي سعود: هي طيبه.
يقاطعهم صوت الجد الي قال هي وش جابت.
فاطمه : ولد
عيال جملا انقهرو من حركته وهديل شالت البيبي ولحقت كايد.
اما العنود منهاره صياح : ياعمري امي كانت طول الليل تتالم وتتلوى وجالسه لحالها وتسال عن العشاء فكرتها جوعانه طلعت تتولد.
ام ترف حضنتها: الصياح وش بيفيدتس فيه.
العنود وهي تمسح دموعها : مدري مابي امي تتألم امي ماتحب تشكي .
ديم : انا احب شخصيتها تجنن خالتي جملا.
العنود : ديم قولي لثنيان يحط العشاء لجدي وابوي وعماني.
ديم: مين له نفس ياكل.
العنود: الا قولي له بالله
شوق: ليش وين بتال.
العنود: بتال راح للبيت يجيب شنطة امي ويلحقهم للمستشفى.
ترف: احب اهتمام اخوانك بخالتي..الا سنود وينه.
العنود: راح مع بتال.
شوق قامت وهي لابسه كعبها ومو قادره تمشي فيه : بروح اقول لثنيان يحط العشاء.
ريم: الحمدللة والشكر فيه احد يلبس كعب بالبر ولا مفكره نفسها بمطار اسطنبول.
ديم لفت تطالع ريم هي وذبتها البيض: ييع مين قايل لك انهم يلبسون كعب في امطار إسطنبول خليك في ابو راسين.
ريم: اقول ابلعي لسانك كايد ماهو فيه تزبنين وراه لا اقوم جدي عليتس الحين..
ديم سكتت مو لانها خايفه من ريم بس تذكرت ان صح لو جدها جاء يضربها كايد ماهو فيه فسكتت.
نوره لريم: هي وش جابت.
ريم: ولد وش بتجيب يعني.
نوره: الله يهبيها ماتنطل الا عيال.
___
عند كايد الي وقف عند الطواري وهو يشيل امه الي قالت: نزلني يايمه نزلني كسرت ظهرك.
كايد وهو يبوس راسها: عساه الكسر ان ماشالتس.
امه بخوف: بسم الله عليك وعلى ظهرك.
كايد تنهد بقوه : اول مره اخاف يمه.
امه كانت تحب اهتمام عيالها فيها الي شايلينها شيل وعوضوها عن اهمال سعود لها وقساوته وخوفه من ابوه الي خلته حتى مشاعره يخفيها استلمو الدكاتره جملا من كايد الي وقف برا الغرفه وهو يشوف هديل جايه مع البيبي الي ابتسم واخذه من يدها: ياحليله حاسنا حوس.
هديل: هذا الي صدق انقطع سره بشبك الغنم صدق.
كايد: اذكرتس ان ماطلع ساطي لتس الي تبين.
جات الممرضه وهي تاخذه من يد كايد الي كان مبتسم وهو يشوف اخوه الجديد ويقطع تفكيره صوت هديل: وش بتسميه.
كايد: صقر بسميه صقر
هديل: مو كنه كبير الاسم
كايد: ماعليتس يكبر ويناسبه اسمه
هديل جلست بخوف : طاح قلبي على امي .
كايد يجلس جمبها : والله كلنا ياعزتي لها ليتني دريت اخذها للمستشفى .
وهنا يدخل بتال الي كان يلهث الي كان يمشي بالسياره بجنون : امي طيبه.
كايد: انت مسرعك تروح البيت وتجي مهبول انت ماتبي نفسك.
سند : بغينا نصدم ناقه.
كايد توسعت عيونه : سالتك بالله.
بتال: ماهوب ناقه حمار.
كايد: والله ماحمار الا انت .
بتال ابتسم وهو يجلس : جت سليمه يارجال.
كايد: امي لاتدري يضيق خاطرها وانت حسابي معك بعدين.
وجلس وهو قاطب حواجبه بزعل وضيق.
___
بالمستشفى عند ام كايد الي تطمنو عليها الاطباء هي والبيبي وكانو بخير دخلو عندها عيالها كايد الي يبوس رجولها وبتال الي يبوس راسها وسند الي ارتمى على صدرها وهديل الي غورقت عيونها دموع وهي تبوس يد امها.
سند: خفت عليتس يمه.
امه وهي تمسح على راسه : لاتخاف انا بخير يايمه.
بتال : عساتس طيبه طمنيني عنتس.
امه: لا ابشرك طيبه.
كايد: ليه ماعلمتيني انتس تعبانه .
امه: بغيتكم تتعشون.
كايد: الله لايعوده العشاء مرتن ثانيه لاتسوين كذا.
امه: مافيها مرتن ثانيه ان شاء الله .
وهنا دخلت الممرضه بالمولود لان مستشفى الديره مافيه حضانه.
كايد كان خاق عليه واخذه من يدها : يالبيه صدق.
بتال طل عليه وهو يضحك جفونه مثل جفونك شف شف كيف معصب.
سند: شكله كان يبى يتعشى وحنا جبانه للمستشفى.
الكل ضحك من كلمة سند الي شاف نفسه كبير: الحمدلله ماعاد انا بصغير لا حد يقول لي ياورع صرت رجال.
بتال :خلاص اجل بكره نزوجك ترف.
سند : لا لين اصير كبر كايد.
كايد يمسح على راسه : بتصير بتصير .
هديل تبوسه : يمه شكلتس متوحمه على كايد نفس قطبة الجفون.
كايد بابتسامه : حر حر الصقر مثل سميه
بتال يطالعه: اما سميته الصقر.
كايد: ايه صقر ولد سعود.
امه : الا على طاري سعود ماجاء .
كايد بزعل : ماسمح له جدي عشان يجي.
بتال: ماعليتس منه يمه ابوي طول عمره ماعنده شخصيه.
امه: لاتقول عن ابوك كذا مهما كان هذا ابوك.
كايد وهو يطالع صقر الي كان نقطه بحضنه: يمه تكفين خليني اعضه .
امه الي ماتوقعت انه صادق : عضه .
كايد هنا عضه وبكى صقر والكل انصدم وكايد انحرج : والله انها عضه صغيره
هديل وهي تاخذه من حضن كايد وتسكته : انت جلف حتى بحبك.
بتال : الله يعين ديم عليك بتاكل وجهها .
كايد الي مالقى مخرج الا انه يقول : اسكت لا اعلم عليك ،
مع انها مو شخصية كايد ابد.
امه : ليه وش مسوي.
سند عاد ماصدق : بغى يصدم حمار وحنا جايين.
امه بخوف: ياويلي يابتال يقوله صادق.
بتال: يمه والله انه بعيد بس سند خبل خواف.
سند : كذاب حتى مراية السياره طارت.
بتال سحب سند وهو يجلسه: انت ماتخلي العلوم ياورع .
سند بعصبيه: ماني ورع.
كايد شاف امه ساكته وصافنه وهي تفكر بسعود.
كايد: امي حبيبتي تبينا نطلع ونخليتس ترتاحين.
امه وهي تمد يدينها لهم وهو يجون يجلسون معها بالسرير: راحتي يوم انكم حولي.
وهنا دق جوال كايد الي شافه رقم غريب و رد عليه وكانت العنود : هلا عنود.
العنود الي واضح الخوف بصوتها : طمني عن امي.
كايد: طيبه طيبه وراتس مرتاعه.
العنود وهي تصيح: خفت عليها ياكايد.
كايد الي مايحب دموع البنات يضعف قدامها ابتسم ابتسامه صفراء: خذي خذي كلميها بنفستس تطمني عليها.
امه : هلا ياعنود.
هنا العنود انهارت زود وماقدرت تتكلم : يمه.
امها : انا طيبه طيبه والله اني طيبه.
ديم خذت الجوال وكان سبيكر وديم ماتدري : الو خالتي انا ديم كيفك ان شاء الله بخير ومبروك البيبي والحمدلله على سلامتك.
كايد بس سمع اسمها ابتسم وكان يطالع امه وردت جملا: الحمدلله الله يسلمتس ويبارك فيتس.
ديم: النونو كيفه.
ام كايد : طيب الحمد لله نسخة كايد.
ديم تنهدت والكل يسمع وهي ماتدري : يابختكم اذا نسخة كايد.
بتال كان يطالع كايد بضحكة نجاسة وكايد بس سمع التنهيده توسعت عيونه.
قفلت جملا بعد ماكلمت شهد .
بتال : لااااا لازم تزوجوني شمعنى كايد ينقال له هالكلام وانا لا.
كايد : خل يزوجوني اول وانت حاسدني على ايش بس.
هديل : يمه ماتوقعتك خفيف يابتال.
بتال يقفل عيونه وهو يشرح : لو عندي مره كانت الحين تقول ياحظكم اذا طلع حنون نفس بتال.
هديل: هههههههه قلنا له انت حنون وابلشنا.
سند : لا لا ترف بتقول مثل سند.
كايد يضحك على اخوانه : والله انكم مهبل.
______
بالعزبه عند البنات الي توهم حطو عشاهم بعد ماتطمنو على امهم .
ديم: تبون شاي ولا ببسي.
ريم: ببسي.
ديم : معك يدين ولالا.
ريم: ديموه بتنضبطين ولالا.
ديم طالعتها وهي تشوف جدها جاي يمهم وتصد عنها بخوف وتسكت.
شوق : مره جوعانه .
العنود يادوب اكلت كم لقمه وقامت .
ودق جوال ديم وكان رقم كايد وردت بدلع يجيب راسه : كايد.
كايد : لبيه.
ديم الي تلخبطت وهو اول مره احد يقول لها لبيه : الحمدلله على سلامة خالتي ومبروك النونو.
كايد: الله يسلمتس ويبارك فيتس.
ديم وهي تخاف من تفكير كايد بحكم انه ساكن بالديره : ذا رقمي طلبتني عنود جوالي عشان تكلمك بعدين احذفه .
كايد: ليش احذفه انتي مرتي .
هنا سمع تنهيدتها الي اخترقت الطلبه وهو يبتسم : عطيني العنود قبل تطلع روحتس.
ديم عطت العنود الجوال : كايد.
عنود: هلا كايد.
كايد: جهزو لامي اكل بجيتس اخذه.
عنود: تم
كايد: كل شي تلقينه بمطبخ العزبه.
عنود: ابشر الحين اسوي
كايد يسمع ديم : بعاونك.
العنود : تعالي
قفل كايد وهو يفكر كيف ديم ماتشبه امها واختها كيف تشبه خواته بطيبتهم وحبها للخير وانها تحاول ترضيه حتى لو بمساعدة خواته.
___
عند كايد الي رجع للعزبه ومعاه هديل وهو ينزل ياخذ الاكل من عنود : سلم يدها يالله.
العنود بخوف: كيف امي.
كايد قرب يبوس راسها مع انه اكبر منها : اعرفتس مانتس مرتاحه لين تشوفينها.
عنود: يعني؟
كايد: اركبي اخذتس لها ونادي شهد.
عنود بحماس : ياعمري اخوي حبيبي.
كايد وهو مستحيي : نادي ديم.
عنود باستغراب: عشان؟
كايد: نعقم رجلها معنا.
عنود بعدم تصديق: اهاااا
كايد يقلدها : اهاااا اعجلن بسرعه.
نادت عنود البنات وركبو وتوجهو للبيت.
عند البيت كايد الي واقف ينتظر البنات يبدلون جاه ابوه : وش لونها امك.
كايد قطب حواجبه : من الله بخير.
ابوه : علامك تهرجني تسذا.
كايد : ماسمح لك ابوك تزور مرتك.
ابوه: ولد وش ذالاسلوب.
كايد : مرتك يبه ولدت بالوادي وكان ممكن تموت ولدك ماتدري هو طيب ولا مريض وانت ولا تدري عنهم ولا همك خالتي فاطمهً ولدتها وهديل شالت ولدك للمستشفى انا شلت مرتك بتال بغى يموت الليله بسببك انت وينك من ذا كله يبه عمرك ٥٠ سنه وتنتظر ابوك يسمح لك تشوف مرتك انت وينك عنا يبه
ابوه بغضب :كايد تنافخ على ابوه بالرخمه.
كايد الي خلاص وصلت معاه لشيطان الرجيم: اذا انا رخمه فهذه لاني ولدك.
هنا الجمه ابوه بكف جرح فمه وكان على عين البنات الي كانو طالعين يبون السياره.
كايد ابتسم بسخريه ودموعه متعلقه وعيونه حمرا وكان بتناقض من الغضب : كل شي سوه كل شي الا دمعة جملا والله لحرق الارض من تحتكم .
ابوه دفه بقوه وهو يفتح الباب ويركب وابوه راح للمجلس كايد لف للبنات وهو يتنفس بعمق مايبي يخوفهم : امشن اركبن.
ديم بلعت ريقها بخوف : خلاص مابي اروح.
كايد طالعها وماكان ناقصها ابد : الي بتروح تركب .
جو خواته وهم يركبون وديم خافت وعيت تروح معاه ورجعت للبيت حرك كايد ولا اهتم لها وهي دخلت وهي مصدومه من الي شافته.
______
عند جملا الي كانت ترضع ولدها وهي تغني له: دوهه يا دوهه والكعبة بنوها.. وزمزم شربوها.. صقر سافر مكة.. جب لي زنبيل كعكعة...
وهنا ينفتح الباب وكانت عنود وشهد وكايد الي واضح عليه الزعل.
عنود حضنت امها وتتحمد لها بالسلامه وشهد نفس الشي بس جملا كان بالها مع كايد الي طلع من عندها بوجه وطلع بوجه ثاني: كايد.
كايد رفع راسه: سمي.
امه : علامك.
كايد ابتسم ابتسامه مصطنعه: ابد يمه مافييني شي.
امه: تعلمني فيك حافظتك مثل كفي علمني ان ا امك.
عنود الي ترقع : الصدق يمه تهاوشت انا وياه وزعل مني.
امها الي هو هي هديل صدقت انها مهاوشه كايد بس عنود عاقله ماتسويها : انتي مزعله كايد.
كايد: لا يمه هاوشت ابوي وضربني.
امه عطت عنود صقر : تعال يمه تعال.
كايد جاها وجلس معها بالسرير و شبك يدينه في يدين امه وهي تشوف شفته مجروحه : ابوك ضاربك.
كايد : صدمت بباب السياره.
امه وهي تدري انه ضاربه : وش صار وش الي خلا ابوك يضربك.
كايد حكى لها كل شي وهي انصدمت : ليه يايمه ليه تخرب علاقتك ببوك عشاني.
كايد انقهر من كلمة عشاني: وش الي عشاني انت جنتي يايمه انتي حبيبة كايد الاولى.
امه : الله يسامح جدك بس.
كايد وكانت على دخلة ابوه وهو مايدري انه وراه: الله لايسامح ذالجد الي قهرني بعمري.
ابوه وكان متفشل من جملا: سلام عليكم.
كايد لف يشوفه : سمح لك ابوك.
امه : كايد يمه عيب الي تسويه.
كايد طلع برا وابوه سكت عشان جملا جاء عندها : الحمد لله على سلامتس ياجملا.
عنود عطت امها صقر وهجت برا هي وشهد كايد كان عند الباب يسمع وش يقولون.
جملا: الله يسلمك ياسعود اقعد اقعد ليش واقف.
سعود جلس وهو يتنهد ويطالع بصقر ويبتسم : بسم الله عليك يابوي انت .
وينزل يبوسه : باقي اذن باذنه واسميه.
جملا: كايد اذن باذنه وسماه.
ابوه قطب حواجبه : وش سماه.
جملا: صقر .
هز سعود راسه : ماله ابو عشان ياذن باذنه ويسميه.
جملا: انت الخير والبركه مير كايد من يوم حملت وهو يقول انا بسميه.
كايد كان ورى الباب ويسمع .
طلع سعود من جيبه ٥٠٠ وعطاها : الحمدلله سلامتس والله يحيي صقر بين خوانه وتراتس غاليه عندي ياجملا مانتس برخيصة
جملا: الله يسلمك ويخليك فوق روسهم.
بعد كايد الي راح البنات ودخلو عند امهم بعد ماطلع ابوهم شوي ورجع كايد : مشينا.
امه : ايوالله رحو كايد وراه داوم.
كايد: ماعليتس اخذت اذن من الضابط بكره بجي اطلعتس بنفسي مانتس بحاجة لاسعود ولا غيره.
جملا بحده: كايد يايمه تراه ابوك بكره يجونك عيال يسوون فيك الي تسويه بابوك.
كايد : اذا بسوي مثله خل يرموني للكلاب.
جلست امه تتكلم معاه تقنعه انه يعتذر من ابوه وهو لانه مايرفض لامه طلب وافق.
طلعو كايد واخواته من عند امهم وتوجهو للبيت وامهم نامت بعيد ليلة متعبه.
___
بالبيت عند هديل الي سمعت صوت سيارة كايد وكانت صلاة الفجر : هلا هلا
كايد الي ينسى همه بس يطقطق على هديل : وراتس واعيه للحين مثل الجنيه .
هديل: مو بس انا حتى الجنيه حقتك مانامت سهرانه معي .
كايد : ناديها.
هديل: لابسه بجامتها .
كايد : قلت ناديها.
هديل : طيب لا تدف .
وراحت عند ديم : ديم ديم
ديم بخوف: هاه وش فيك.
هديل: كايد يبيتس.
ديم : يبيني انا .
هديل : لا يبي امتس ايه يبيتس انتي.
ديم: مابي اروح.
هديل: قومي قومي خلي عنك الدلع .
ديم: ماني كاشخه يابنت كيف اروح.
هديل: البسي حجابتس وروحي.
ديم : اروح لحالي.
وهنا سمعت صوت كايد الي ينادي وقامت لبست عباتها ونقابها وطلعت له كايد ابتسم وهو يشوفها بالنقاب : تعالي .
ديم جات بخطوات خطوه قدام وعشره ورى .
كايد شال نقابها : اول شي ذا شيليه انا رجلتس.
ديم توتر وهي تناظر الارض .
كايد : تعالي اجلسي على المرتبه.
ديم: ليش .
كايد: انتي بس اجلسي.
ديم جلست بحيث ان رجولها بالارض جلس كايد على الارض وهو يسحب رجلها وديم كانت ودها الارض تنشق وتبلعها.
كايد فك شماغه الي كان حاطه على رجلها وطلع مرهم ومعقم جايبه من المستشفى وشاش واغراض التعقيم كامله وجلس يعقم رجلها اول شي بعدها المرهم ثم لف لها الشاش.
ديم كانت تناظره وخاطرها تخمه بس تشوفها صعبه قبل الزواج تتقرب منه .
كايد قام وقف : خلصنا خذي هاتس بعد بكره تغيرين عليها وتسوين لها نفس ماسويت الحين.
ديم ماتدري كيف قالت هالشي بس قالته : وليش مااجي عندك تسويها لي.
كايد: ابد ماطلبتي شي عيوني لتس.
ديم داخت من كلمة عيوني لتس : امزح انا بسويها.
كايد : على راحتس الي يناسبتس سويه.
ديم : شكراً لانك مانسيت جرحي رغم كل الي صار.
كايد مد يده لذقن ديم وهو يرفع وجهها تناظره:
والله انك زين مبسّم وطبع وزين جاه
‏جعل عين الناس منتس تسج وتلتهي
‏واحدٍ مافيييه مثله وربي قد عطاه
‏الحسن والذوق والعز والوجه البهي
‏اطلب اللي كلنا له و دايم في رجاه
‏يجعل العيشه معتس لين عمري ينتهي.
ديم اختصبت وصارت ضلوع صدر تطلع وتنزل بتوتر بعد ماقال لها هالبيتين كايد قرب وهو يبوس خدها : روحي نامي.
ديم شردت وهي تركض وكايد قفل باب السياره وهو باقي دايخ من ريحة ديم الي ضاع فيها وديم اول مادخلت قفلت الباب وهي يالله تتنفس بتوتر (مو هذا الي تبينه ياديم ياربي وش ينيمني الحين)
وبس هدت دخلت وهي باقي تحس بشاربه على خدها وصوته المبحوح باذنها وهو يقول روحي نامي.
____
اليوم الثاني رجع كايد من العزبه وهو يتروش ويلبس وبيروح يجيب امه جات عنود تركض : كايد كايد. بروح معك اجيب امي
كايد: اركبي.
عنود: الدنيا مطر يازين صقوري احس وجهه خير .
كايد وهو يقفل ازارير ثوبه: امشي امشي قبل يشتد علينا المطر.
عنود: كايد امي نفاس.
كايد : وش يعني .
عنود: يعني امي بتبرد لازم ناخذ لها شي .
كايد: وين فروتها الي شريتها لها بالبرد.
عنود: رافعتها بالدولاب معيه تلبسها .
كايد: رحي جبيها ولا اقول لتس باخذ فروتي الجديده.
وفتح الدولاب وهو ياخذها : مشينا.
العنود راحت ركض وهي تقهر هديل الي تجهز اكل نفاس لامها: بروح اجيب امي مع كايد.
ديم: الدنيا مطر ياليتني اقدر اروح معكم احب المطر.
عنود : تعالي.
ديم وهي تتذكر دعثتهم البارح : لا روحي انتي .
عنود: براحتس.
وخذت لصقر لحاف دافي وطلعت تركض واول ماركبت : ديم تقول خاطري اروح معكم .
كايد طلع جواله واتصل فيها .
عند ديم الي اول ماشافت رقمه توترت : ياربي منك ياعنود كيف بركب معاه ذا الحين .
وترد بصوت يالله ينسمع ابتسم كايد بس سمع صوتها شوي ويختفي: ابيتس تخاويني.
ديم وهي تسوي ماتدري : وين.
كايد: نجيب امي وصقر.
ديم: لازم.
كايد وهو يدري انها ميته على الروحه وتبيه يضغط عليها : لازم .
ديم : طيب بقول لامي واجيك.
كايد تضايق بس سمع طاري امها وشوي ماطولت ديم وهي تجي ومعها مظله كايد وهو يتمتم : ههههههه هاذي تحسب انها بالرياض ..
وتركب ورى مع عنود ورى كايد التفت : وحده تجي معي قدام.
ديم كانت مستحيه : لا انا مرتاحه مكاني.
كايد ماوده يضغط عليها لانه يدري انها فعلاً مستحيه: تعالي ياعنود .
عنود نزلت وطلعت معاه قدام وحركو للمستشفى..
كايد : بردانات تبون شي دافي .
ديم بعفويه : لا انا على طول دافيه.
كايد ابتسم : زين .
عنود فهمت نجاسة كايد وعفوية ديم الي جابت العيد بدون ماتدري.
عنود: نبي. قهوه .
كايد: فيه مقهى هنه عنده كرك ينومس.
ديم مدت يدها بتفتح الشباك وكان كايد مقفله من عنده بس كانت بعينه وفتح لها .
ديم تنهدت اول ما شمت ريحة المطر وهي ماتدري ان الهواء سحب عطرها لخشم كايد الي كان شوي يناظرها وشوي يناظر الطريق.
عند ترف ونجد ال جالسات بحوش بيتهم
ترف: تقهرني شوق مسوية نفسها الفاهمه واحنا بنات الديره الجاهلات.
نجد ابتسمت : انا احبها تعجبني صح شايفه نفسها بس يحق لها ياخي.
ترف : تلايطي بس الي تجنن ديم بكل شي اخلاق وجمال ادب طيوبه وحنونه تشبه بنات عمي سعود كنها متربيه معهم.
نجد وهي تتذكر انهم رايحين يجيبون صقر : تخيلي امي تحمل.
ترف: امي يالله جابتني انا وياك.
نجد: الغريب ان جدي مازوج ابوي على امي.
ترف: لان المشكله من ابوي امي مالها دخل.
نجد: خلاص اسكتي لاحد يسمعنا
______
عند كايد الي عم الهدوء بالسياره وعنود نامت بدون ماتحس وديم تناظر برا وشوي وتطالع بكايد الي طالعها بالمرايه : غيرتي على رجلتس.
ديم توترت على طول : لا الليله .
لفت كايد ان عنود تشخر ولف : عنود .
عنود كانت تشخر بشكل واضح كايد هبدها على راسها وهي تشيل الغطاء : هاه ياكايد ياثقل دمك.
كايد: الشرهه مو عليتس على الي ماخذ هديل تخاويه.
ويوقف : بنزل اجيب كرك وارجع.
نزل كايد وديم صارت تصحي عنود: قومي يع صدق ليتنا اخذنا هديل.
ماطول كايد وجاء وهو يعدي على ديم كوبها: سمي .
ديم مدت يدها وكان كايد مدبل لها الاكواب حتى مايحرقها: حار انتبهي .
ديم : ماعليك مسكته.
كايد ترك الكوب بيدها وهو يمسك كفها الي كان فعلاً دافي والدنيا مطر وبرد: والله دافيه.
ديم سحبت الكوب بتوتر وانكب شوي على يدها: ااح .
كايد: اسلمي حرقتس.
ديم: لا لا عادي
خذت الكوب وهي على نيتها وكايد نذل بس هي مو فاهمه قاطعتهم العنود : هات كوبي .
ولفت العنود انه مدبل الاكواب وهي لا: ياسلام مدبل لها الاكواب وانا لا ليش ان شاء الله.
كايد: يابنت الحلال خلصت الاكواب .
العنود : الله من الكذب طيب عطني انا الي مدبل وهي الثاني.
كايد: خلاص اسكتي لا انزلتس بالسيل الحين واخليه ياخذتس .
العنود سكتت وهي تشرب الكرك: حلو مره
كايدي بالعافيه.
وكملو طريقهم للمستشفى واشتد عليهم المطر.
__
عند كايد الي شاف حادث كان مره قوي وماكان فيه احد حول الحادث
العنود: حادث حادث.
وقف كايد وهو يفتح حزام الامان: عيال سلطان صادمين ناقه خليكن هنا .
العنود : معاهم حرمه
ديم بدون ماتحس بقهر : بتنزل .
كايد كان ناسي ان ديم ممكن تغار من اهل ساره : اجل اخليهم .
ونزل يركض
ديم تنهدت بقهر العنود تذكرت ان ديم غيرانه وهي تشوف كايد نزل ركض وبالها راح بعيد طلت وهي تشوف كايد الي صار يطلعهم من السياره بعضهم متكسر وبعضهم مافيه شي العنود انصدمت وهي تشوف ساره طالعه من السياره تعرج وكانت متكشفه كايد نزل شماغه وهو يغطيها كايد نسي المشكله وهو يشوف عيال جارهم الي مثل خوانه بسياره ممكن تنفجر بي وقت ولا ماهو يم ساره ولا طق لها خبر تجمعو الناس والاسعاف جاء وانسحب كايد ورجع لسياره وديم كانت بتنفجر من الغيره: ابطيت عليستن.
العنود: ماعليك المهم سلمو .
كايد: اي اي اصابات بسيطه مع ان الي يشوف حادثهم يقول ماسلمو .
العنود: مين الي معهم.
كايد من كثر ماهو باغضها: اختهم .
ديم بدون ماتحس : اي اختهم طبعا تعرفها انت ماشاء الله.
كايد تذكر هنا ديم وساره والتفت لها : علامتس.
ديم الي واضح انها متوتره وهي تهز رجولها بغضب : مدري عنك
كايد هو باقي ملتفت لها وبابتسامه قال لها هالبيتين.
‏غديرٍ عليه الناس صادر و ورّادي
‏أعيفه لو إنه من زلال المطر يسقى
‏أنا غايتي ومُناي ودواي ومرادي
‏مذاقٍ على غيري صعيبٍ ولا يلقى.
العنود ابتسمت وهي فاهمه انه يسب ساره وسمعتها وبعدها يمدح ديم وسمعتها.
ديم : وش يعني .
كايدلف قدام : ولا شي.
العنود شرحت لها وش قصده وديم الي اكتفت بالسكوت ولا علقت وفجاه بعد سكوت طال فجاه تقول : الحين شماغك مع بنت ابليس.
العنود: يوه ياديم البنت منخرشه الحين ماهي حول شي.
ديم وهي الي تتأفاف: ريحتك بشماغك.
كايد خق على غيرتها : والله لو دريت مانزل عشانتس.
ديم ابتسمت وهي باقي تغلي ومقهوره كيف يلبس ساره شماغه ويبقى معها.
وكايد كان مروق وزاد روقانه وهو يشوف هالنتفه غيرانه عليه .
وهنا وصلو للمستشفى وكان المطر غزير .
العنود : كيف ننزل .
ديم : معي مضله .
كايد ابتسم : زين استفدنا منتس .
ديم وهي تنزل بغضب: كان المفروض اعطيها ساره لا يغرقها المطر .
كان هنا انهار ضحك وهو يشوفها ميته غيره. دخلو العنود وديم الي عيت تعطي كايد المضله: خليه يغرق
كايد كان خاطره يعضها وهو ياشر لها تجيب له المضله وهي مطنشه.
بعد شوي اخذ الفروه وهو يحطها على راسه ويدخل.
#اعذرونا_على_التاخير_الروايه كامله بالانستقرام 🎀