انا احبك مابها زيف وخداع رغم الذي نخفيه والي نخافه

بارت ١٣

وهنا تدخل ام ثنيان بوجه شين : سلام.
وقف كايد يتوجه لها : وعليكم السلام يالله حيها.
تتقدم عنده وبدون نفس : مبروك .
كايد : يبارك فيتس
ام ثنيان : بنتي صغيره ياكايد.
وقبل تكمل يقاطعها: ادري والله وبنتس بعيوني وماجايها الا مايجي عيوني ..
تناظره وتناظر بنتها : ديم بنت مدينة مدري كيف بتعيش بالديره.
طالعها كايد بحده وعشان امه وديم سكت مارد عليها
وراحت عند بنتها تبارك لها و تحضنها : مبروك يايمه والله يعينك .
كان يسمعها وساكت ،، ام كايد جات تسلم على ديم : مبروك ياحبيبتي وياحظ كايد فيتس والله انتس صرتي رابعة بناتي.
ديم كانت ترد بالابتسامه حتى لو كانت بتتكلم شفايفها تتحرك بدون صوت.
وطلعو الامهات كايد كان معصب من كلام امها وكان واضح عليه الغضب وديم خافت يطلع الحره فيها .
طالعها يخرج زفيره بضيق : انا اطلع احسن.
رفعت عينها تطالعه متوجه للباب وكان داخلها شعور غريب بالنسبه لها صح خايفه منه بس برضه تحس بالامان معاه وما كانت تبيه يطلع وقف بصدمه لما سمع صوتها الي يالله ينسمع : خليك .
قفل عيونه بقهر وهو يتنفس بغضب ويحاول يخفي ملامح الغضب من وجهه ويلف يطالعها وهي بس قالت كلمتها نزلت عينها للارض ابتسم كايد ورجع جلس جمبها.
_____
عند ثنيان الي دخل مبتسم والي يشوفه مايقول ذا مايبيها : سلام ياعروسه.
رفعت عينها تطالعه بصوت واطي : وعليكم السلام.
وعلى طول نزل لخدها وباسها : مبروك .
ردت بخجل : الله يبارك فيك.
كان يطالع جمالها وملامحها الي ما تشبه امل ابد : ملامحك ماتشبه شخصيتك ابد.
طالعته باستغراب واردف : اقصد ان ملامحك ثقيله ورزينه والي اعرفه عنك انك خبله ومطفوقه.
تغيرت ملامحها لصدمه ودقت شوق كتفه : هاذي عروستك مو خويك اهدى من كذا ياحلو.
ابتسم يطالع هديل :لايكون زعلتي مني ترا احاول اكسر الصمت بيني وبينك.
هديل بمخها ( اي صمت وانت ماسكت من اول مادخلت)
امل كانت تتصل ويطلع ثنيان جواله ويحطه صامت جبت لك هديه .
ويطلع عقد على شكل حمامه : مو انتي هديل وهديل صوت الحمام.
وقام : خليني البسك إياه.
ويقوم يلبسها وشوق تساعده وهديل مستغربه من شخصيته الغريبه
___
عند كايد الي رجع وجلس وهالمره قدام ديم يمسك يدينها بيدينه الثنينن ويطالع النقش بابتسامه اعجاب : ‏
ياناقش الحنا على ناعم الكف
‏نقشت في القلب المولع صوابه..
ابتسمت : ماحب الحنا بس قالت لي هديل انك تحبه
طالعها بابتسامه: يعني متنقشه عشاني .
اختفى صوتها فجاه وهزت راسها بإيه.
رفع راسها بيده وهو يطالع ملامح وجهها بدقه عيونها انفها خدودها شفايفها مد يده لطرف فمها وطرى عليه بيتين شعر بس استحى يقولها هنا انفتح الباب وفز
يشوف مين ويلف يطالع وكانت شوق الي لابسه حجابها : راح ثنيان .
طالع ديم : هاذي اختس .
وقبل ترد قالت شوق : اي شوق.
قام : من رخصتس ديم.
وطلع وشوق جات جلست : هذا لصق مايبغى يطلع لو انتس ساره وش بيسوي.
ديم قامت بغضب من كلام اختها الي ماهو وقته ابد.
كايد راح عند هديل يبارك لها ويطقطق عليها عكس ثنيان الي مافكر يروح لديم.
كايد وباس راس هديل : الله الله وش هالزين طلعتي حلوه وانا مدري.
هديل : ههه بسكت عشان ماتخرب كشختي.
كايد: اجل اكشخي على طول عشات نسلم من لسانتس.
هديل : ههههههههههههه شفت ديم.
كايد: شفتها.
هديل: هاه عساها عجبتك.
كايد : حلوه البنت.
هديل: اخوها خبل.
كايد: ليه زعلتس بشي.
هديل: لا بس احسه معاه ربشه.
كايد: هذا هو ثنيان من يومه كذا.
وهنا يدخل بتال ووراه سند.
بتال : ياحبيبة اخوتس انتي والله لا ديم ولا غيرها تجي معتس.
كايد مافهم تبال يبي يستفزه : اي بالله هاذي شيخة البنات حبيبة خوانها.
سند: ترف جتكم.
الكل : اوووه
بتال: لا ماجتهم .
هديل: الا جت وخطبها حريم وبتعرس بعد اسبوع.
سند: لا ماراح تعرس ترف لي انا وبس.
كايد: اكبر بسرعه طيب لاتروح عليك.
سند: والله اني احاول ياكايد بس ماش.
هنا انهارو ضحك .
دخلت العنود: انت وياها تعوضوني على الكرف الي جاني.
بتال: ايه مره وحده بس انكرفي بدون هديل.
العنود: الله يعيني اذا تزوجت.
دخلت شهد : ديم وشوق تهاوشو.
كايد: اكيد شوق السلقه مخطيه.
شهد: اسمع اسم ساره وساره .
كايد : كيفهم عاد اهم شي بعيد عني.
سند: المفروض تفزع لمرتك.
كايد: افزع على اختها لا مايصير
___
خلصت الملكه ورجعو العيال للمقلط.
ثنيان كان منسدح يفكر كيف بتكون حياته مع حريمه وكيف بيجمعهم في بيت واحد وكيف بيقول لهم انه متزوج لان حتى امل ماتدري.
: لازم اقول لامل من الحين حتى تخف عليها الصدمه شوي شوي توافق وهديل بعد العرس اقول لها .
دخل بتال : مع مين تسولف.
ثنيان: اسولف من نفسي افكر بالحياه بعد الزواج.
بتال: لاتفكر يارجال خلها تجي كيف ماتجي .
هذال بسره : ليتك تدري وش مخبي ماكان طالعت بوجهي يابتال.
بتال: قم نلعب ورقه بحوش عمي مشعل.
ثنيان : رح وانا بلحقك ودق على امل الي قرر يصارحها بكل شي لانه يخاف عليها من الصدمه .
———
عند هديل وديم الي جالسين على عتبة الباب.
هديل: كيف كان لقاء الاحبه.
ديم : يحاول مايزعلني ادري انه مايحبني بس برضه ماحاول يزعلني وقال لي شعر بالنقش .
هديل: ثنيان هداني هالعقد ماحس بمشاعر تجاهه احسه غامض اخوتس صح انه يضحك ويسولف بس مدري احس وراه بلا.
ديم : ياترى بنندم بيوم اننا تزوجناهم .
هديل : على اساس اخذناهم برضانا .
ديم تتنهد : في خاطري كلام كثييير كان ودي اقوله لكايد بس ماقدرت .
هديل: قوليه لي وانا اوصله له.
ديم: ماينفع لازم انا اقوله له بنفسي.
هديل: يخص مين هالكلام.
ديم : يخص ساره.
هديل: يابنت انسي كايد نساها.
ديم: مستحيل ينساها بهالسهوله وانا مابيه وقلبه معاها.
هديل: كيف ماتبينه وقلبه معاها.
ديم : بعدين افهمه هو وش قصدي.
هديل : الا بسالك ثنيان حب من قبل.
ديم: مدري.
هديل: لاتكذبين عليه قولي لي.
ديم : قلت لك مدري .
وقامت ديم ومسكتها هديل: اجلسي ليش بتنحاشين.
ديم: بردت .
هديل ابتسمت : تبين فروة كايد.
ديم : لا لا بقوم اجيب جاكيتي.
هديل : شرايك نطلع نتمشى برى شوي.
ديم: اخاف يشوفنا احد.
هديل: قومي قومي ماحد حولنا الكل نام .
قامو ولبسو عباياتهم وطلعو يتمشون برا ويشكون لبعض.
ديم : احس بصدري ضيق احس العالم كله على صدري.
هديل: عاد انا المبسوطه الحين الله يسامح جدي بس الي يكتب قصة حياتنا بيده .
ديم: الله ياخذه ويريحنا.
هديل: حرام تدعين عليه.
ديم فجاه وقفت : بنت في ظل هنا.
هديل : لامافيه شي ياخوافه.
ديم : الا شوفيه.
هديل شافت الا ظل صح : لاتلتفتين كملي طريقتس.
ديم خوافه من هالناحيه وهديل بعد خايفه بس اهون من ديم الي صار وجهها اصفر وصارت ترجف بخوف وفجاه.