انا احبك مابها زيف وخداع رغم الذي نخفيه والي نخافه

بارت ١٢

عند هديل الي على دخلتها تشوف بس كايد وثنيان مو واضح لها وتدخل تستهبل : الحين جدي وش يبي ليش جايبني عندك.
وبس شافت ثنيان الي كان مشغول بجواله يرفع راسه يطالعها تديور تبي الباب بتشرد ويكون الجد واقف على الباب: علامتس.
هديل بتوتر : ليه ياجدي ليه .
الجد دخل ديم الي كان هي الثانيه شوي ويوقف قلبها وهي تشوف كايد يطالعها اما هديل دبست وجهها بالزاويه وتسمع صوت كايد : تعالن.
ديم راحت عند ثنيان وتدخل وراه وهديل لسى ناشبه بالزاويه.
يلتفت ثنيان لهديل : تعالي ماني ماكلك.
كايد كان ماسك ضحكته : بنت وش اقول انا .
لفت جهتهم وهي تحط شعرها بينها وبين ثنيان الي كانت الابتسامه من الاذن للاذن وهو يشوفها تروح تجلس جمب كايد الي عطاها شماغه وحطته على راسها لانه يعرف خواته خجولات مره ولا قد كشفو على رجال مو محرم .
سحبت طرف شماغ تغطي وجهها عن ثنيان الي قال: وش الفايده .
كايد : اركد لاتصير عليهن مع جدي.
وقام يفتح الدولاب وياخذ شماغه الثاني ويرميه على ثنيان : عطها .
ثنيان عطى ديم الشماغ وحطته على راسها وهي تطالع كايد الي كان صاد عنها عكس ثنيان الي كان وده يشيل الشماغ عن هديل ويتفحصها زين.
هديل: خلنا نروح.
كايد: طيب رحن .
وبس قامن وفتحن الباب الا الجد واقف وكل وحده نزلت الشماغ وترميه بخوف كايد صد وثنيان كان يطالع هديل الي شعرها الحرير يوصل لاسفل ظهرها وتفاصيل جسمها رغم انها لابسه جلابيه واسعه الا ان تفاصيل جسمها واضحه .
الجد: وين رايحات.
هديل: خلصنا .
كايد : انا قلت رحن .
الجد:  ايييه يالله رحن للحريم وتولمن بكره تروحن تحللن .
هديل هزت راسها بطيب وديم نفس الشي وطلعن ركض.
_______
دخلن يركضن لغرفة هديل ديم كانت منهاره ضحك عكس هديل الي وجهها اصفر وتبلع ريقها : اخوك قليل ادب اكلني ابو اربعه عيون.
ديم بضحكه : حرام عليك بعدين انتي زوجته وهاذي نظره شرعيه على قولة جدي لازم يتفحصك.
هديل: بضاعه انا يتفحصني.
ديم: كايد ماكان يناظر مو شايفني اصلا
هديل: اخوي احترمك لما شافك مستحيه صد عنك.
ديم: لو هي ساره بقق عيونه فيها.
هديل: على اساس اخوك ماعنده حبيبه الحين وميت ومتقطع على هديل.
ديم: على الاقل ناظرك ماسفهك.
هديل: هذا لان عيونه زايغه.
هنا دخلت العنود وشوق.
شوق : وين اخذكم.
هديل : اخذنا نشوف الحلال.
وهنا انهارت ديم ضحك وهديل نفس الشي .
العنود: خبلات والله خبلات مو صاحيات.
هديل وديم ميتات ضحك والعنود وشوق يطالعونهم باستغراب .
___
حللو وصار توافق والتحاليل تمام وصارو يجهزون للملكه الي باقي عليها يومين .
بالمقلط عند ثنيان وكايد الي يقيسون ثيابهم .
كايد: ثوبك ضيق بالحيل.
ثنيان: انت الي ثوبك واسع.
كايد: ماهيب هوشه هي اعلمك بمصلحتك.
ثنيان : انا احبه كذا .
كايد يرن جواله ويكون بتال الي اخذ خواته وبنات عمانه لسوق وكايد ماكان متحمس هالمره نفس المره الاولى لانه لسى يحب ساره صح انه طلقها وبتصير ملكته هو وثنيان بعد يومين وخلف تأجلت عشان عدة الطلاق لازم تمر وبعد ماتخلص يخطبها لخلف ويملك ويعرسون سواء.
______
بالسوق عند البنات.
ديم وهديل عالم ثاني
هديل: شوفي شوفي ذا مره حلو.
ديم: مابيه منفوش مره ابيه هادي.
هديل: صح كلامك اجل تعالي شوفي ذا.
ديم: حتى ذا مو ذوقي
هديل: يوه ياويلك من كايد مايحب نطول بالسوق يخليك تاخذين من اول محل الدواره هاذي مايحبها .
ديم:  امشي امشي تراني مرعوبه لاتزيدين عليه .
هديل: اتذكر يوم ملكة كايد بساره يوم جابنا هالمحل.
وهنا تتذكر انها جالسه تكلم زوجته المستقبلية وتنقد على عمرها وتسكت.
ديم: في ملكته بساره جاي هو يشرف بنفسه بس ديم لا بقريح.
هديل: على اساس اخوتس الحين جايبني .
ديم جلست وتتأفأف  وتجيها لحظه ادراك : احنا ليش سكتنا لجدي ليش اتزوج شخص مايبيني انا مو كذا ياهديل .
هديل جلست جمبها : ولا انا ياديم ادري ان ثنيان نسونجي وعيونه زايغه بس انا سكتت عشان ماخرب على كايد جاني بتال يقول اذا ماتبينه انا بوقف بوجيهم بس قلت لا ابيه وانا الصدق مابيه بس لاننا تعودنا نلبي الاوامر بس .
وهنا يجي بتال  يشوفهن جالسات : ماشاء الله ماتبن قهوه.
ديم وقفت بسرعه وهي تزلق وتطيح وهنا تنهار بكي رغم انها ماتعورت.
بتال: وش فيتس تعورتي .
ديم  ماردت  بس كانت تصيح.
هديل مسكتها بيدها: قومي قومي فضحتينا الناس تطالع.
تقوم ديم  تتوجه لسياره عازه عليها نفسها كيف كايد بملكته بساره قايم فيها بنفسه والحين موكل بتال بكل شي.
بتال: وش فيها ياهديل.
هديل حكت له كلامها ،،بتال انقهر عليها : الله يهدي كايد بس هي خذت شي طيب .
هديل : لا ماخذت شي.
بتال راح على جنب  يكلم كايد ويحكي له الي صار.
كايد تنهد : ياليل البنات وغيرتهم خلاص خلها تعالو .
يرد بحده : تراك اخطيت.
كايد بحده برضه : هذا ثنيان ماحرك ساكن ولا تعنى لشي كل التجهيزات علينا.
بتال : انت قبل شهر ملكتك على ساره والكل شاف الفرق تكفى لاتخليها بخاطرها حرام.
تنهد كايد : طيب طيب باخذها ولا تقعد بخاطرها الله يسامح جدي بس الي انشبنا ولا ديم ماتصلح لي هاذي اولتها مقارنات ودلع بنات ماله سنع.
بتال : الله يهديك بس
كايد : قفل قفل خل عنك الحنيه الي مالها داعي.
___
عند البنات هديل الي منسدحه ديم على كتفها ومحاوطه راس ديم  بيدها يجي بتال يركب: وش تبون تاكلون.
هديل: خذنا مطعم.
بتال : كم عددكن .
هديل: ٨ كلنا .
بتال : كثير وحنا تاخرنا خلوني اجيب لكم فلافل .
العنود: ايه ايه هديل خبله ماتفكر
هديل: اجل جيبو الي تجيبونه.
بتال: ديم وش تبين اجيب لتس.
ديم : مابي شي
هديل : ماتدري ديم انك منقذ العايله ماعليك جيب لها زينا..
وميلت راسها ونامت
__
بالديره عند كايد وثنيان طالعين من باب الحوش ويكون بتال موقف : لاتنزلن لين اقول لكن.
ديم : ليه من فيه
هديل ترفع راسها  تناظر : عرسان الغفله .
ديم ابتسمت : انتي ماعندك جديه بالحياه.
هديل: انزلي انزلي راحو .
ونزلو البنات ودخلو وبتال راح مع العيال وراح ثنيان على جنب يكلم امل.
كايد: كيفها .
بتال: منهي.
كايد : بنت عمي محسن الصغيره.
بتال ابتسم: ديم قصدك.
كايد: اي قالت شي غير الي قلته لي.
بتال : لا ماقالت شي.
كايد: والله شكلها بتتعبني معها انا ماحب مياعة البنات الي على غير سنع وش فيها لو خلصت امورها مع البنات الا لازم كايد يوديها بعدين انا ماوديت ساره .
ابتسم بتال : لانضحك على بعض بساره كنت طاير من الفرحه وديم كنهم يجرونك للمقبره.
تنهد كايد: وش تبيني اسوي كبرت وانا ابي ساره وديم تراها قاصر ورعه باقي وانا ماني حمل دلعها ومصاختها.
بتال: جاء ثنيان.
كايد: انت من تكلم .
ثنيان : حسين خوينا بالجامعه .
بتال: ايه تذكرته.
ثنيان : يقول يبي سياره جديده من عند ابوي ويبيني اكلم ابوي بالسعر.
كايد كان يفكر وهم يتناقشون.
___
باليوم الثاني باقي على الملكه  يوم  رجع كايد من عند البل  ينادي هديل الي جات عنده : سم.
كايد: خلصتي امورتس كلها.
هديل: اي انا خلصت.
كايد: وهي.
هديل: لا ماخذت شي.
كايد: هي وش اسمها .
هديل ضحكت : ديم اسمها ديم.
كايد : قلي لها تجهز باخذها السوق تاخذ اغراضها.
هديل: انت بنفسك.
كايد: اي انا وانتي بتجين معنا.
هديل : طيب بقول لديم دقايق بس نفطر.
كايد: لا لاتفطرن انا بفطرتسن .
هديل: طيب يالله.
وراحت تركض داخل كايد طلع قلم وكتب اسمها بوسط كفه(ديم).
وراح يتروش على  مايجهزون.
_______
عند ديم الي نايمه وتنط فوقها هديل: قومي قومي كايد يبيك.
ديم فتحت عينها بصدمه : نعم؟ يبيني انا
هديل: اي سالني اذا كملتي اغراضتس وقلت لا قال خليها تجهز بوديها بنفسي.
ديم: انهبل اخوك كيف يوديني .
هديل: انا محرم ماعليتس.
ديم : مالي نفس والله.
هديل: قومي قومي بكره الملكه .
قامت ديم بدون نفس  تغسل وتبدل .
__________
عند كايد الي ركب السياره  ينتظر البنات ويقلب بالاشرطه يشغل اغنيه ويجون ويركبون .
هديل : صباح الخير ياعريس الغفله.
كايد: صباح النور .
ديم طلعت بدون ماتقول شي واردف : وعليكم السلام يابنت عمي.
ديم بلعت ريقها بتوتروبالقوه نطقت : سسسلام .
كايد ابتسم ابتسامه جانبيه يشغل المسجل الي كان محمد عبده يغني وبدون قصد كانت الاغنيه ( لا لا تضايقون الترف لاتضايقونه).
هديل لفت تناظره : تراك واضح واضح .
طفى المسجل : يابنت اصبحي عني احسن لتس.
هديل: اي اصبحت خلاص .
فتح كفه يطالع اسم ديم  : هاه ياديم وش ناقصتس.
ديم توترت وهي تسمعه يوجه الكلام لها واختفى صوتها وهي تحاول ترد بس اسعفتها هديل:  اما عرفت اسمها اخيراً قلت ديم المهم ديم ماخذت ولا شي يبدو ان ذوقها صعب الله يعينك .
كايد: خليها هي ترد.
هديل: البنت بلعت لسانها لاتصير انت والزمن عليها.
كايد : الله اكبر وش مسوي انا.
هديل: لاتنسى تفطرنا.
كايد: وش تبين.
هديل : كبدة حاشي.
كايد: انتي متاكده انتس بنت.
هديل: اي هديل اخت كايد .
لف كايد يطالع الطريق وهو يفكر بالجاي.
__
بالديره عند الحريم.
شوق : جدي كيف يخلي ديم تروح مع كايد وهم لسى ماتزوجو.
العنود: على الاقل كايد ولد عمها مو مثل السواق الهندي الي تركبون معاه لاحسيب ولا رقيب.
شوق بحده : وش قصدك بلاحسيب ولا رقيب.
العنود: ماقصدي بس جدي يدري انك تروحين وتجين مع سواق هندي.
شوق: خليك بحالك ياعنود.
العنود: ماحد جاء يمك لاتقربين يم خواني وماحد بيقرب يمك.
وقامت  تشيل الفطور وتقوم معها ترف وشهد ونجد يساعدونها .
____
بالسوق عند كايد
دخلو ديم وهديل محل ودخل كايد معهم
هديل: اطلع برا لاتشوف فستان العروسه عشان يكون مفاجاه.
كايد: وليش جايبيني طيب.
هديل: اطلع الين نختار .
كايد: واخليكن مع العماميل لحالكن معصي بوقف هنه وماني مناظر عليتسن خذن راحتسن.
اختارو البنات الفستان وخبوه عن كايد الي دخل وحاسب وخلصو كل اغراضهم بعد يوم طويل وهم طالعين كان فيه  ثلاثه شباب
يتكلمون فجاه يسمعهم كايد يرمون كلام.
الشاب الاول: فيدت السنفوره انا.
الثاني : يقولون القصيرات مسامير الارض .
كايد يلف يطالعهم : ماتستحون انتم ماعندكم خوات.
الشاب وهو يوقف : اوه معليش مادريت ان هالسنفوره تخصك.
كايد لكمه على وجهه وبدات المضاربه وهديل وديم واقفين يطالعون ديم كانت مصدومه من كايد كيف قدر على ثلاثه لحاله وتذكرت كلام اهل الديره انه متوحش وماعنده رحمه ،، دخلو بينهم شباب وفرقوهم.
كايد وهويتحرك ويرمي شماغه على كتفه الحقيني انتي وياها. ويلف لديم : وانتي هاذي مو عبايه ياليت تلبسين اوسع.
ديم بدون ماتحس بخوف وبصوت يرجف : طيب ابشر.
كايد: قدامي يالله انتي وياها.
تقدم يسحب الاكياس من يدين البنات ويتقدم يفتح الباب: اطلعن يالله.
وبس بيجي يطلع يشوف الشباب جايبين اثنين غيرهم ويفتح بابه  يسحب العجرى( عصا عريضه ).
هديل: كايد لا تكفى لاتروح لهم كايد.
ديم : الله ياخذني كله مني .
هديل : اجل انتي وقفيه .
ديم: كيف اوقفه اخاف يضربني .
هديل: انزلي.
ديم بدون تفكير نزلت وهي توقف قدامه: لاتروح .
كايد : ارجعي لسياره.
ديم : برجع بس لاتروح.
كايد بغضب: قلت لتس ارجعي السياره.
ديم خافت منه  ورجعت لسياره وهي تصيح والشباب شافو الدوريه وانحاشو كايد ضل واقف شوي برى ورجع وهو يسمع صياح ديم قفل الباب وحرك
___
بالديره عند بتال وسند .
سند: صح جدي بيزوج ثنيان ترف .
بتال: اي بس هو عيى يقول مايبيها.
سند: احسن اصلاً ترف ماتبيه.
بتال: وانت وش عرفك.
سند: اعرف اعرف انا كل شي.
بتال ضحك :  ياحليلك انزل انزل بس خلنا  ناخذ الغداء من عند امي .
سند: مدري ليش جدي يبينا نتغداء بالعزبه والغدا ينطبخ بالبيت.
بتال: يعني ماتعرف جدك عليه  تصانيف تجيب المرض يمكن بكره يقوم الصبح يقول بزوج سند ترف .
سند: يااارب يابتال يارب
بتال يضربه بظهره : اقول انزل لا تخليني اطلع حرت جدي فيك.
سند يضحك  : طيب طيب نزلنا .
__
عند كايد بالسياره الي يسمع ديم تبكي وهديل ساكته لانها تعرفه اذا عصب مجنون كايد يتنحنح : احم ترا ماكان  قصدي اصيح بوجهتس بس اذا عصبت لاتوقفين قدامي.
هديل: من تكلم انت .
كايد وهو يطالع اسمها بيده : ديم اقصد ديم.
هديل: وانا نفر مسكين ترا
كايد احتد صوته وارتفع : انتي ماحد جاتس ياهديل ولو انتي الي نزلتي عندي فركت وجهتس بالارض .
وتذكر ديم ونزل صوته : هي رفعت صوتي عليها بدون قصد يعني انا اسف
هديل:  ياسلاااااام انا اسف بعمرك ماتعذرت مني كل كثر مالعبت نعالك على ظهري الحين عشان هي ام دميعه بكايه انا اسف.
كايد بحده :  هديل اطلعي من راسي احسن لتس
هديل بخوف : خلاص خلاص.
ديم وهي تشاهق بدون كلام وكايد كان يحاول يلطف الجو ومتحسف وعارف انها بنت المدينه مو نفس خواته يهاوش فيهم ويسب ويشد شعورهم بمزح وهم يضحكون.
هديل: شرايك تشتري لنا غدا.
ينطق : ابشرن  وش تبن  غدا .
هديل لديم: وش تبين .
ديم : انتي مايرضيك  بالحياه  الا الاكل ماعندك شي غيره.
هديل: وش تبين انتي وش يراضيك يابنت الوليد.
لفت لشباك :مابي شي خلوني بحالي.
كايد سند يده على المرتبه من ورى راس هديل وكانت يده عند ديم الي لفت تطالعها وهي مصدومه من حجم اليد وتبعد عنها هديل انتبهت لها وسحبت يده : نزل يدك .
تذكر كايد ديم و سحب يده بدون كلام.
وشغل المسجل وكانت اغنية محمد عبده ( سولفي لناس عني قولي اني ماعرفت اختار من قلبي يحبه ) كايد طفى على طول وهديل انهارت ضحك  وهو صد يخبي ابتسامته .
___
بالعزبه عند ثنيان الي يكلم امل : هلا بخلي وملي والله اني مشتاق لك حيل.
امل: تاركني عند اهلي ورايح مع اهلك وانا لسى عروسه ياخي حس على دمك شوي.
ثنيان: والله اني ميت من الشوق بس انتي عارفه البير وغطاه لازم اجي الديره مع اهلي لايشك  جدي بشي بس اسمعي هالخبر الحلو.
امل : وش الخبر ياروحي.
ثنيان: ابوي درى وسمح لي اجيبك عندنا بالبيت بس حالياً ماحد يدري الا اهلي .
امل بدلع ماسخ: ياااي اخيرا ثنيان اخيرا مرا مبسوطا.
ثنيان : اشتقتي لي.
امل: ايوا مرا مرا واحشني .
ثنيان : بعد الملكه راجعين المدينه.
امل : ملكة مين لايكون لك ياويلك اذبحك .
ثنيان بتوتر :   لالا ملكة ديم اختي وولد عمي ولا انا  مابي غيرك انتي ملكتي القلب خلاص.
وهنا يجي بتال : الغدا ياولد.
ثنيان :  يالله حسين اكلمك بعدين ينادون للغداء
ويقفل ويروح للغداء
_____
عند كايد الي نزل يفتح الباب لديم لانه مايفتح من داخل بس ديم لانها زعلانه قررت تنزل مع بابه الي نزله منه  بس لانه فتح  لها الباب
وهنا قفل الباب بقوه وكان على اصبع هديل الي انهارت صياح و يرجع يفتح الباب: الله يعيني عليتسن انزلي.
هديل نزلت: الله ينصرني عليكم بس.
كايد يطالع ديم تدخل البيت وتترك اغراضها يعني مو هامتها ويروح يجمعها ويعطيها هديل: هاتس خذيها لها.
هديل: اصبعي مكسور وانتم تتغلون على بعض على حسابي.
كايد يسحبها من يدها : ياليل وش يسكت هديل الحين .
ويروح يحط الاغراض على الباب ويرجع وهديل تعرج ويطالعها: الحين فيه احط يعرج من اصبع يده.
هديل: وخر عني لا افصل عليك.
كايد : وش الي انشبني  كانت عندي هديل الحين انتي وياها .
ويطلع يركب سيارته ويحرك للعزبه.
وهديل دخلت تعرج وتستقبلها العنود وشهد: وش فيك تعرجين.
هديل: كايد الزفت قفل على اصبعي البااب.
شهد: اصبع رجلك.
هديل : لا يدي.
العنود : وليش تعرجين طيب .
هديل : والله عاد كيفي روحي تعبانه قررت تعرج.
البنات انهارو ضحك وهديل راحت عند ديم الي منهاره صياح وصارت تخاف من كايد اكثر من قبل .
هديل: تراتس مزودتها طول الخط يحاول يراضيتس وتعذر منتس وهو مايتعذر الا من امي.
ديم بسخريه : مره يعتبر انجاز كايد اعتذر مني.
هديل : على الاقل عبرك ووداك لسوق بنفسه ولا اخوتس مايدري عن هواء داري ولا رحت ولا جيت بس والله لربيه ابو اربعه عيون..
وهنا دخلو البنات: ورونا وش جبتو.
هديل وهي تفتح الاكياس لقت خلخال بكيس ديم : وش ذا.
ديم: مدري.
هديل تذكرت يوم كايد شرى لساره خلخال.
___
بالعزبه دخل كايد : سلام.
الكل: وعليك السلام.
جده: هاه قضيت لمرتك.
كايد: الله الله قضيت لها.
سند: ليش كايد يروح يقضي لها وثنيان مطنش.
ثنيان : ماحد قال لي ودها ولا كنت وديتها.
كايد: مايحتاج لاتتعب نفسك خلك على جوالك لايفوتك شي .
ثنيان : لاتطلع حرتك فيه تراني مروق.
كايد قام : زين القهوه يابتال راسي بينشق من هالبنت ومساختها.
بتال: ليه وش صار .
كايد: يارجال كنها نونو لو اقول لها كلمه قامت تصيح لا وتسوي ردة فعل .
بتال يضحك وهو يشوف كايد يغلي من حركاتها بس مجبور يبلع غضبه ويسكت
____
عند البنات
هديل: الله هذا اكيد كايد يبي يراضيتس.
شوق : عاد اشوف ذوقه الحين جايب اردى شي.
العنود: انتي  بتسكتين ولالا .
شوق: ماقلت شي طيب.
هديل: تدرين ان جدي اختارتس لكايد بس هو عيى يقول عوبا مابيها.
شوق: فضل عليه والله لان لو اخذت اخوكم بنحره لكم .
العنود: هذا اذا  مانحرتس هو .
هديل: ماقدروه رجال باشناب بتقدرينه انتي .
ديم : خلاص عاد لاتزودونها كل يوم مناقر انا  باخذ كايد وانتي تدرين ياشوق اني احبه اسكتي تراني مو ناقصتك .
شوق انصدمت من ديم ولفت فمها بانزعاج وطلعت من الغرفه.
هديل: خلينا نشوف الخلخال.
نجد : مو ذا  الي شراه لساره.
ديم رفعت راسها تناظرها : حق ساره.
هديل:  لا والله مو حقها.
ديم رجعت الخلخال : قولي له انا ديم مب ساره .
هديل : ديم والله ماهو لساره .
ديم انسدحت بفراشها وتلحفت وصارت تصيح وطلعو البنات وهي صاحت لين نامت.
_____
صار الليل وجات النقاشه تحني العرايس والامهات .
ديم : انا مابي حنا ماحبه.
هديل : بس كايد يموت بالحنا.
ديم : خلي ساره تنقش له يدينها.
هديل: تكفين عشان خاطري خليتس معي.
ديم : مالي نفس والله.
هديل: انتي لازم تنسينه ساره صدقيني بينسى طوايفها بس خليتس ذكيه شوي.
ديم بعد محاولات وافقت تنقش يدينها صارت ريحة البيت حنا والكل متحمس ويجهز نفسه وصار اخر الليل وتجمعو عيال جملا بالحوش وجات هديل توري اخوانها نقشها بتال : والله مابنت ابوها تقدر على زينتس .
هديل: يازينك انت وحنيتك.
كايد: ديم تنقشت.
هديل: عيت .
كايد: اما عيت.
هديل: بس جبرناها وتنقشت.
كايد: زين
هديل: ليش حطيت لها خلخال ساره مع اغراضها.
كايد ضرب راسه بيده : ياليل وش هالغلطه عساها بس  ما درت انه لها.
هديل: اي درت وزعلت
كايد شال هم فوق همه يوم عرف انها عرفت بخلخال ساره.
__
طلع الصباح وصار الكل يجهز للملكه صحى كايد الي اول شي جاء بباله ديم وخلخال ساره وتذكر ان ساره طلبت منه بيتين شعر وقت يجي يشوفها وهو يعرف ان البنات يجيب راسهم الشعر وجاء بباله انه يكتب لديم منها يراضيها ومنها تنقهر ساره .
قام غسل وراح لجده وعمانه بالمجلس : صباح الخير.
الكل :هلا ، يالله حيه ، صباح النور.
ابوه : خليناك ترقد وراك قمت.
كايد: تبوني ارقد والليله ملكتي.
جده: هذاه ثنيان راقد.
كايد: هذاك ثنيان وانا كايد.
ابوه ضحك من كلمته : افطرت .
كايد: لا كلمتهم يجهزون الفطور.
________
عند البنات هديل وديم يطالعون بنقشهم الي كان ياخذ العقل.
شوق: الشي الوحيد الحلو بالديره هو الحنا.
هديل: ماحد طلب رايتس فالديره .
ديم تطالع النقش : ماتوقعته كذا حلو.
هديل باعجاب : يدينتس مره حلو بدون حنا والحين صار الزين زينين.
ابتسمت ديم برضاء : انتي بعد يدينك حلوه.
تتنهد ديم وتردف جدي وشوله يقول لازم يشوفونا ماله داعي كان يخليها للعرس.
هديل : احمدي ربتس لو ماساره كان العرس الليله يمه لا .
ديم بخوف : ياويلي مره لاااا.
_____
صار المغرب والكل جهز وشغلو العقود وصوت السماعه يرج بالمكان الملكه كانت بحوش سعود والرجال بحوش مشعل كايد وثنيان كانو كاشخين وجالسين  وبتال وسند وهذال قايمين بالقهوه وكم شاب معهم من الديره .
كايد كان يراجع ابيات الشعر الي بيقولها لديم بمخه وثنيان شوي معاهم وشوي على جواله يسولف مع امل.
___
عند البنات صار وقت الزفه قبل يدخلون صاب ديم وهديل هستيريا ضحك والبنات يسكتون فيهم وهم مو قادرين.
وتجي العنود : اخلصن بيجون كايد وثنيان.
هنا تلاشت الضحكه واختفت وتغيرت ملامحهم لخوف ورعب .
ديم بتوتر : يارب ماقدر ماقدر اشوفه.
هديل تاخذ نفس وتخرجه  تحاول تسيطر على خوفها : اووووه شهيق زفير.
العنود: تعالو يالله.
انزفو البنات وهم خايفين خصوصاً ديم كانت ترجف دخلو وجلسو ورقصو الحريم وباركو وصارت لحظه دخول كايد وثنيان  دخلو العرايس البنات لان العرسان جايين كانت ديم بالمجلس وهديل بالمقلط دخل كايد عند ديم الي كانت ترجف حرفياً كانت تتنافض وكانت العنود موجوده.
كايد اول مادخل : سلام.
ديم كانت تناظر الارض واول ماسمعت صوته بلعت ريقها ويطالع كايد بالعنود  يأشر لها تطلع وهي متوجهه للباب : قفلي الباب.
ديم رفعت راسها بخوف: لا .
كايد يطالعها بابتسامه: قفلي الباب ياعنود.
طلعت العنود وقفلت الباب وجلس كايد جمب ديم الي كانت شوي وتصيح مد يده  يمسك كفوفها الي كانت تفركها بخوف لفت ديم ان يده غطت كفوفها الاثنين من كثر مايدينها صغيره مع يده شد كايد على يدها : انتي خايفه مني .
ديم ماكانت تناظره مد يده ورفع ذقنها  ورجعت تصد عنه ابتسم كايد وهو يتذكر اسمها : ديم صح.
ديم طالعته وبلعت ريقها كايد بس شافها تطالعه اول ماقال اسمها : مادريت انتس حلوه هالكثر..
ديم سحبت يدينها من يده بس مسكها وشد عليها اكثر : ابيتس تعرفين اني مستحيل اظلمتس معي وكل الي سمعتيه عني مو صح.
ديم كانت ساكته واردف: ماودتس تسمعيني صوتس...طيب انا جهزت لتس كم بيت شعر ان شاء الله تعجبتس وماودتس تسمعينها..
ديم ابتسمت ابتسامه خفيفه وعرف انه جاء على الوتر : ✍️مرحبا في وسط صدري  ياريح ديم  يالمختلف طبعٍ  وزين  وقدر ومقام
ارحبي ياقبلة الزين وعلاج الهموم
اشرقي فيني مثل شمسٍ تستفز الظلام✍️
اسمتس حلو ومعناه احلى ..
ديم هدت شوي بس لسى خايفه ومتوتره وزاد توترها وهي تحس بشنبه  وهو يبوس جبينها : اوعدتس ماراح تندمين انتس حبيتي كايد.
ديم كانت تناظره ثواني وتنزل عينها و ريقها طول الوقت ناشف وتبلعه .
كايد: ناظريني.
كانت تطالع كل شي الا كايد مو قادره تحط عينها في عينه.
مسك يدها ورفعها وهو يبوسها : ادري انتس صغيره وخايفه مني بس والله اني لاحطتس بين جفني وعيني .
ديم كانت صح تحب كايد وتمنته زوج لها بس كانت تخاف حتى من طاريه وزاد الخوف الحين وهي معاه بغرفة لحالهم كان يخوف بالنسبه لها وهي تطالع يده الي يدينها الثنتين ماتجي بربع كفه قطع تفكيرها صوته : ماودتس تسمعيني صوتس قدام اروح.
ديم كانت تحاول تتكلم بس من كثر ماهو هيبه ويخوف بالنسبه لها ماقدرت تتكلم اردف كايد : الظاهر من كثر مابلعتي ريقتس بلعتي صوتس معه.
ابتسمت من كلمته ،، اندق الباب ودخلت امه الي بس شافها استبشر وجهه ويقوم يحضنها  ويبوس راسها ويدينها: هلا والله ببنت مخلد.
امه : مبروك ياحبيب قلب امك انت.
كايد : الله يبارك فيتس ويخليتس لي.
وهنا تدخل ام ثنيان بخاطر شين .
#نلقاكم_وقت_اخر