انا احبك مابها زيف وخداع رغم الذي نخفيه والي نخافه

بارت ١٠

في بيت سعود اندق الباب وكان سلطان وزوجته جايين
ام فيصل(ام ساره) : وينهن قليلات الادب الي ماتربن
ابو فيصل: وينه كايد وينه ابو سعود .
طلعو الرجال برا  الجد كايد وعياله مشعل وسعود ومحسن .
الجد كايد: العلم وشنهو .
اول ماشاف ابو فيصل اردف :انت لك وجه تدخل بيتي وحفيدي بين الاجهزه بسبب ولدك.
ابو فيصل: انت مرسل بنات عيالك يضربن بنتي.
الجد كايد بصدمه : بنات عيالي منهن .
ام فيصل: هديل بنت سعود وديم بنت محسن .
الجد على طول تذكر لما شافهن راجعات من برا : يضربنها علامهن علاها .
سند: جدي فيه شي انت ماتدري عنه الهوشه الي صارت كلها سبب خلف وساره.
الكل انصدم
سعود: ساره وخلف ؟
سند: اي يبه ساره تواعد خلف وكايد عرف بيوم الملكه كمل  الملكه عشانك ياسلطان بس انا وبتال يوم درينا خرباناها..
جو هديل وديم بحجاباتهم .
ديم : اي ياجدي ضربانهاوفلقنا راسها بعد يوم انها تبي خلف ليش توافق على كايد.
أبوها بصدمه وبعصبيه : وانتي وش مدخلك ياديم هاااه
ديم : كايد ولد عمي فزعت نفس ماثنيان وهذال فزعو معه .
عمها مشعل  اعجبه موقف ديم كان يطالعها بابتسامه
هديل: والله لو مافيها سجن وقصاص اني لاقص راسها قليلة الادب بنتكم مو احنا .
سلطان : تعقبن وتخسن بنتي ماتسويها.
هديل طلعت جوال بتال وهي توريهم الفيديو: مين ذا يبه من ذا ياجدي مو خلف واقف مع بنتهم .
وتمد الجوال لام فيصل: هاك كحلي عيونك بسواد وجه بنتك.
الكل انصدم.
الجد بعصبيه : وينه خلف السلوقي وينه ولدك يانوره .
سلطان: خلف يعرس على ساره قدام ينتشر الخبر.
ديم: يعني هذا حل يستر بنتك العايبه الحين .
جدها رمى عليها عصاته وهجت داخل البيت وهي تضحك وهديل تلحقها .
الجد كايد لسلطان: يقوم كايد ويصير خير
مر اسبوعين وكايد على وضعه وثنيان وبتال وهذال طلعو على الكفاله بالسياره وهم راجعين لديره.
بتال : يبه وينه كايد مازارني ولا جاني .
ابوه : بتال وانا ابوك تعبان .
بتال بصدمه: تعبان كيف عمي مشعل يوم كان يزورنا يقول جدك معيي يخليه يطلع من البيت .
ابوه : كايد مافتح عينه عقب هذيك الليله وهو بغيبوبه.
بتال اجهش بالبكاء : لا يبه تكفى قول غيرها .
ابوه : هذا الي صار وانا ابوك .
ثنيان يشد على كتف بتال : كايد قوي لاتخاف عليه.
بتال : خذني له يبه تكفى.
ابوه : مايدري عن احد نجيه ونروح مايحس فينا.
بتال : تكفى يبه ودني له بشوفه مشتاق له بالحيل
ابوه : طيب باخذك بس جدك لايدري.
بتال : حتى بهاذي يبه تاخذ رضى جدي فيها هذا اخوي اخوي .
ابوه : كلامي واضح يابتال.
ثنيان : ابشر ابشر ياعمي ماحد قايل بس ودنا له.
عمه : طيب طيب .
___
بالمستشفى نزلو العيال يزورون كايد .
دخل بتال اول واحد وهو يركض واول ماشاف كايد الي دايم يشوفه قوته وجبروته بهالحياه انهار بكي ثنيان بس شافه يصيح منع هذال ووقفو برى عشان ياخذ راحته مع اخوه وبتال حط راسه على صدر كايد وهو يصيح ويبكي : سامحني ياخوي والله اني افتعلت المشكله عشان اخلصك من ساره وسمعتها لاتلصق بسمعتك طول العمر ياليت يدي انكسرت قبل اسوي الي سويته ياليت الضربه جات براسي عن راسك ياكايد انا دوبني دريت انك بغيبوبه هاذي جيتي من السجن يقول الدكتور انك تسمعني  جدي مانع امي وخواتي يجونك لكن والله لجيبهم لك والي فيها والله ماخليها بخاطر جملا وانا ولد جملا ..
مسك يده وهو يحط فمه عليها ودموعه مغرقه وجهه : تكفى ياكايد لاتخليني وتروح لاتطول بنومتك ياكايد اعرفك ذيب والذيب مايطول بالنوم اااااااخ ياكايد ياليتني مت ولا شفتك بهالحاله..
هنا دخل ابوه الي طول  عمره كان بعيد عن عياله بسبب جدهم نزلت دموع سعود الي ماعمر احد شافها بعينها وهى يحط يده على كتف بتال : كايد قوي وان شاء الله بيقوم منها .
بتال كان منهار لدرجة انه مو قادر يتكلم يسحبه ابوه وقام وقف وهو يغطي وجهه بيدينه مثل الطفل ويصيح ابوه سحبه لحضنه ولاول مره يحضن بتال ويكون قريب منه كذا بتال هنا انهار زود لدرجة انه صار يشاهق وجوفه يرجف : ييببه للو صار للكايد ششي ررحت ووراه .
ابوه وهو يربت على ظهره : كايد بيعيش امك شافته بمنامها يوصيها ماتبكي وانه راجع لها.
بتال رفع راسه : ليه حارمين امي تجي تشوف ولدها يبه .
سعود : جدك معيي.
بتال : يبه حرام عليكم يبه وش بيصير لو جات وشافته .
ابوه : لاتجادل يابتال كلام جدك يمشي علينا كلنا .
بتال بس سمع هالكلام بعد عن حضنه وهو يمسح دموعه ويقرب لجبين كايد : انت الي طول عمرك واقف بوجه الكل عشان بتال ياكايد انت ابوي ياكايد.
ابوه بصوت عالي وبعصبيه : بتال.
بتال توجه للباب وهو يتلطم ومارد عليه ولحقه سعود وثنيان وهذال دخلو يشوفون كايد الي مايدري عن احد.
_______
في بيت محسن الي كلم سعود يقلط هو وولده بس بتال رفض كان مشتاق لحضن امه الي ماتجف دمعتها عند كايد نزلو هذال وثنيان ومسكو خط الديره.
بتال ركب : انا بسوق.
سكت ابوه وخلاه يسوق بتال كان طاير لدرجة ابوه يهاوشه وهو مدبس عيونه بالخط ولا يرد عليه.
ابوه هزه بكتفه : بتال هد ذبحتنا.
بتال التفت له : اسف يبه سرحت .
ابوه: انزل انزل انا بسوق.
بتال : لا لا خلني انا .
ابوه: اخوك طيب .
بتال انصدم: طيب وشلون طيب وهو بغيبوبه.
وبدا يزيد السرعه
ابوه بصوت عالي : وقف السياره وقف.
بتال وقف ونزل سعود وركب مكانه وكمل طريقه
——
بالديره وصلو سعود وبتال الي فتح باب السياره وهي لسى تمشي ودخل يركض وهو ينادي : يمه يم كايد .
امه فتحت الباب وحضنها وهي تصيح : طولت يمه طولت يابتال.
بتال كان يخبي دموعه وهو يبوسه عيونها : جيتك ياجنة بتال جيتك وكايد بعد جايك .
امه : شفت اخوك.
بتال : اي يمه شفته والدكتور يقول احسن انتي بس ادعي له.
امه : والله اني ادعي يابتال مير قلبي انفطر يبي شوفته وجدك مانعني .
هنا نزلت دمعته وهو يمسحها بسرعه :  والله ماخليك يايمه بس وينه جدي.
جو البنات الي حضنوه وهم يبكون كان يبوس روسهم مع انه اكبر منهم ويطمنهم .
هديل: كايد كيفه.
بتال  كان باله مشغول مع امه الي رايح نص وزنها خلال هالاسبوعين : طيب ان شاء الله
بس جدي وينه .
هديل :  معزومين عن عايض بيصلحون بينكم .
بتال : جيبي عباة امي.
هديل: ليش
بتال : بنروح نتمشى براء
هديل: بجي معكم .
بتال : لا هديل بس امي تكفين.
هديل : خلاص ابشر .
وجابت العباه واخذها بتال وحرك بسرعه قبل يشوفه جده ومسك خط للمستشفى.
امه بصدمه : انت وين ماخذني.
بتال: باخذتس لكايد.
امه : بس جدك بيضربك.
بتال بعصبيه وهو يضرب الدركسون: ان شاء الله ينحرني ويريحني ..
امه : لا يايمه لاتزيد على قلبي.
بتال مسك يدها: خليه يضربني ان رجال والله ماشوف دموعتس واخليتس بدون ماتشوفين ولدتس وانا ولد جملا.
امه سحبت يده بتبوسها وسحبها بتال : استغفر الله عساني فداء رجولتس .
امه كانت تبكي بحرقه كيف لو شافت كايد.
_____________
في بيت محسن متجمعين الكل حول ثنيان وهذال.
ديم: اول شي تسويه تروح تخفف عوارضك .
ثنيان : تراها اسبوعين مو سنتين.
شوق : ماعليك منها كذابه.
امه : كايد ماصحى.
ثنيان: جيته على حاله.
ديم : مسكينه خالتي جملا جدي مانعها تشوفه.
هذال: والله جدي ذا قليل ادب.
شوق : اص لايسمعك ابوي يجر لسانك.
ثنيان : انتي ياديم مازرتيه.
ديم: سلامات ازوره بصفتي مين.
ثنيان بغمزه : علينا.
ديم: يارجال تلايط بس اوك مابي يصير له شي بس ماحبه هذيك الليله كانت هرمونات مو اكثر.
شوق: ياكذابه الهرمونات بريئة منك ومن فعايلك.
ديم: اص بس انا وكايد مو مناسبين لبعض .
ثنيان : الله يقومه بالسلامه بس انا بقوم اتروش وانتم جهزو لي شي اكله.
شوق: تم ابشر.
وقام معاه هذال لغرفته يتروش ويبدل
__
بالمستشفى
دخل بتال وهو ماسك يد امه : تعالي عساني فداء رجولتس .
ودخلها عند كايد الي كان بين الاجهزه وانهارت امه بكي وبتال يسندها : ياويل حالي عنك ياولدي الله يجعل من بكاني عليك  تبكي امه عليه وهو بالكفن ياكايد كانه غدر فيك ياعين امك ..
وتجي عنده وهي تصيح وتبوس وجهه عيونه وجبينه وخدوده وبتال يحاول يكون قوي وهو يشوف انهيار امه وهو يسمعها تكلم كايد: يمه كايد انا جيتك يا زهر قلبي ياكايد انا اشتقت لك يايمه ..
طولت امه وهي تصيح وبتال يواسيها واخيراً يجي الدكتور وهو يطلب منهم المغادره..
امه تنزل تبوس جبينه : سامحني يايمه ماقدر ازورك فتح عيونك وتعال لي يايمه .
بتال : متى مابغيته انا اجيبتس عنده لو على ظهري.
امه حطت يدها على جبينه وتبدا تقراء عليه وتحصنه وتدعي .
بتال لدكتور : خلها معاه شوي يادكتور.
الدكتور هز راسه بطيب وطلع وبتال طلع عن امه الي خذت نص ساعه وهي على هالحال وجاتها الممرضه : ياخاله خلصت الزياره من زمان.
جملا  بكت : يابنيتي انا من الديره ورجلي وابوه مانعيني ازوره  والله اني جيت بالدس خليني معه شوي .
الممرضه حضنتها : ياروحي انتي ياليتني اقدر اخليك معاه بس والله مقدر بس بعطيك رقمي واطمنك عليه اي وقت تبين اتصلي ابد لاتترددين
هنا دخل بتال وقالت امه : انا مامعي جوال عادي ياخذه بتال ولدي.
الممرضه : اي عادي .
وتلف لبتال : سجل رقمي عندك.
بتال اخذ رقمها وشكرها هو وامه وطلعو وامه باقي تبكي.
_____
بالديره عند الجد الي رجع : وينه بتال.
هديل: راح يمشي هو وامي برا.
الجد يتمتم : اييه عيال جملا مايدانون عليها مانهم مثل خلف الله يخلفه على نوره مسيكينه.
هديل طالعته بحقد وراحت لخواتها : ياربي من جدي اعوذبالله ضرة امي هو مب نوره .
العنود: خليك من جدي مو كنهم تاخرو امي وبتال.
هديل: بتال معها لاتخافين المهم كيف اتواصل مع ديم ابيها بموضوع
شهد : الايباد الي بسيارة كايد.
هديل: اي صح .
العنود: وش تبين فيها.
هديل: بعدين تعرفين.
ونطت تجيبه