انا احبك مابها زيف وخداع رغم الذي نخفيه والي نخافه

بارت ٩

عند كايد وديم تحكي له الي صار كان يكلمها وهو صاد عنها .
كايد: تقدرين توصفينه لي عشان اعرف اذا من الديره ولا من برا .
ديم: كان متلثم .
كايد: طيب سوا لتس شي.
ديم : لا هو دخل يبي يسرق وبس شافني اصيح حاول يسكتني بس ماصار شي ثاني.
كايد: انتي ليش هنا ليش مارحتي معهم بيت سلطان.
ديم بنفسها ) ياليتني اقدر اقول لك اني مقدر احضر ملكتك ) وترد عليه : تعبانه شوي.
كايد : انا مضطر اروح .
ديم بخوف :وتخليني لحالي.
كايد: بكلم خوانتس يجون عندتس .
ديم : لاتطول لاني اخاف اجلس لحالي.
كايد: ماني مطول بكلم ثنيان يجيتس وانا بقفل شباك المطبخ عشان تطمنين.
وراح للمطبخ يقفل الشباك وتوجه للباب وديم حاسه انه اخذ قلبها وروحها ولا ودها انه يطلع ويتركها لحالها وهو طلع وبلغ ثنيان بلي صار وراح ثنيان عند ديم واول مادخل عندها حضنته وانهارت صياح وهو يسالها بخوف: سواء لتس شي .
ديم بعصبيه :  يعني ذا الي همكم لا ماسوى لي شي تطمنو
ثنيان: ليش مارحتي مع امي وشوق وش مجلسك هنا لحالك.
ديم: امي عيت تاخذني تقول فستانك مو تمام.
ثنيان : طيب تعالي بيت عمي سعود على الاقل ام خلف وبنتها هناك مانك لحالك.
ديم: طيب انتظرني بالصاله ببدل واجيك.
ثنيان: عجلي بالله بروح لكايد.
بدلت ديم فستانها ولبست عبايتها وطلعت لبيت سعود الين يرجعون من الملكه.
وثنيان رجع لبيت سلطان .
________
عند الحريم الي كانو منبهرين من طقم الشبكه والعربيه والهدايا لان كايد كان مثقل العيار شوي وامه كانت مبسوطين وهي تسمع الناس يباركون ويهنون ويمدحون كايد.
هديل: يمه اشوفتس مبسوطه.
امها : اي بالله مبسوطه وانا اشوف عين السيح بيعرس.
هديل :  يمه بدون غش عين السيح بتال ماهو كايد.
امها: كايد عين السيح وبتال سمح المحياء
هديل بدهشه : اخس يمه وش هالالقاب طيب وسند .
امها: هذاك السكر المعقود.
هديل: السكر المعقود. ببطنك.
امها تضايقت : وخري عني هنا.
هديل بضحكه: خلاص خلاص بسكت .
_________
عند ديم الي دخلت المطبخ ودخلت وراها ريم: نعم وش تبين.
ديم طالعتها : مابي شي عادي داخله اشرب مويه .
ريم: ليش بيت عمي مشعل مافيه ماء.
ديم عصبت . وش تبين انتي الحين بعدي عني مو فاضيه لك ياريم.
ريم:  وانا مابعدت وش بيصير.
ديم مسكتها بشعرها: انا مو هديل ولا العنود.
ومسكتها ضرب وريم تصيح ونوره ماتقدر تتحرك دخل كايد الي كان يبدل ثوبه الي امتلى تراب وغبار بعد مالحق الحرامي.
___

عند الرجال الي يقهوي والي يبخر والي يلعب سامري وكايد مختفي والكل مستغرب كيف يختفي والليله ليلته .
ثنيان : بتال وين كايد فضحنا.
بتال كان يدري ان كايد ماهو سعيد وعشان كذا مو مهتم : مدري تلقاه هنا ولا هناك.
خلف الي كان  جاي من برا وهو يدخل وينظم لصفوص ويلعب سامري وجده كان يطالعه بابتسامه.
______
عند كايد الي دخل القسم بسروال وفانيله وهو ماكان يدري ان ديم فيه كان متوقع انه يلاقي خواته متضاربين جاء كايد وهو يشوف ديم منتفه شعر ريم الي تصيح ريم كانت طويله وديم قصير وكانت منزله وجه ريم عند ركبها وكانت ديم بحجابها دخل كايد يركض يمسك يدين ديم عن ريم كان وجهها كله دم من اظافر ديم  وغرستها بوجه ريم ديم طلعت حرت ملكة كايد وفوقها الحرامي الي نط عليها كلها بريم كايد رفعها عن ريم وهو مصدوم كيف ديم كذا متوحشه واول مارفعها كانت رافضه تتركك شعرها وهو يهز يدينها : بنت فكيها خلاص.
ديم سحبت يدها من يد كايد الي كان مرخيها وتجرح خده بدون قصد ماحست الا لما قال وهو يبعد وجهه : اخو سند .
ديم انصدمت وهي تشوف دمه يسيل من خده : خلاص يابنت .
ديم سحبت يدينها منه وبعدت : علم اختك هالسلقه اني مو هديل ولا العنود انا ديم بنت محسن.
كايد : ليه وش فيهم هديل والعنود.
ديم انتبهت لكلامها : مافيهم شي .
كايد : وش هالسكاكين الي قطعتي وجيهنا فيها قطو مو بنت .
ديم انسحبت وهي يالله تتنفس وتلف : ماني رايحه بيت عمي مشعل بجلس هنا وفيك خير تعالي لي .
وتطالع بكايد: وانت ليش واقف رح حبيبة القلب تنتظرك اول مره اشوف عريس منحاش.
وهي تكمل طريقها للغرفه
حك كايد راسه ابتسامه مخفيها وهو يطالع ريم: لعبت بوجهك لعب.
ريم طلعت بعصبيه  راحت للمغاسل تغسل وجهها وهي تصيح وتتالم وكايد راح للمقلط يشوف جرحه الي نقط دمه على فانيلته. وديم راحت لغرفة هديل رهي ترمي حجابها : اووووه بردت حرتي وحرتك ياهديل عمى بعينها الطويله الهبيله عبالها بتقدر فيني .
وهي تطالع اظافرها الي كلها دم وتجلس تنزلها: يع الله يقرفك.
___
واخيراً رجع كايد لبيت سلطان ورجع للواقع وهو يدف نفسه دف استقبله ثنيان : وين اختفيت يارجال .
كايد :موجود
ثنيان : تعال الناس تسال عنك
كايد راح وجلس بين ابوه وجده وكان على يمين جده سلطان ابو ساره الي قال: تبي تشوف عروستك يا كايد .
كايد رد بسرعه : لا مابي اشوفها.
الكل استغرب جده وابوه وسلطان.
والتفت ابوه : ليه ياكايد.
كايد: ماشوفه شي ضروري يبه.
سلطان استحى .
جاء بتال وجلس جمب كايد بعد ماقام جدهم يلعب سامري مع خلف: وش العلم ليس خليت الملكه تمشي.
كايد حكى له كل شي بتال عصب : وش بتسوي.
كايد :  والله مدري يابتال احس اني طحت ولا قدر اوقف.
بتال  بنفسه : والله ماخليها تصبح على ذمتك وانا بتال .
قام بدون مايعطي الموضوع اهتمام ونادى سند وحكى له كل شي لانه يعامله دايم معامله خاصه وكانه رجال كبير
سند انصدم وعصب : وش بنسوي.
بتال: بنقلب الملكه مجزره ابيك تشبها بينا وبين عيال سلطان بدون ماتجيب طاري بنتهم وانا بدخل معك وراح يصير مضاربه وكايد من دون شي شايل عليهم فبيمد يده معنا وكلمه منا وكلمه منهم بقول له يطلقها .
سند : قدام بروح  لفيصل اعير بيده المشلوله.
بتال ضحك : يارب سامحنا بس عارف كل شي .. قدام حيلك فيه .
وراح سند وهو يتوجه لفيصل وبتال جلس حولهم وسواء نفسه مشغول بجواله وباله مع سند الي اقدم مثل الذيب بدون اي تردد وخوف وهو يجلس جمب فيصل ويطالع ببتال وهو يغمز له.
__________
عند الحريم زفو ساره والكل يرقص حولها ومبسوط وكعادات الديره الي ترقص لازم يكون معها مبلغ مالي وتعطيه ام العروسه وترجع تجلس.
ام كايد خذت ٥٠٠ ومسكتها هديل : يمه من جدك بتهدين كفايه التكاليف الي تكلفناها ماتستاهلها ام السعف والليف.
امها : وش تبين انتي بتحطين دوبتس ودوب مرت اخوتس من الحين وخري عني هنا يالله ابهدي عليها .
هديل جلست : براحتس.
العنود: ياعمري امي خليها تسوي الي تبيه.
____________
عند سند الي حاول يستفز فيصل : انت مشلول .
فيصل ابتسم وهو يمسح على راسه : ايه
سند: يعني مانك برجال.
فيصل: عيب ياسند تقول هالكلام .
سند: ليش زعلت انا صادق .
فيصل: حتى لو انك صادق عيب تقوله.
سند: يعني مانك متزوج الريجيل مانهم مزوجين الي مثلك .
هنا فيصل انفجر وقام ينافخ ويهاوش وسند صار يمد يده وهو يدري ان خوانه بظهره
__
عند كايد الي طلع جواله وهو يكتب ابيات طرت عليه فجاه : ‏✍🏻
‏تمشي بغنج وهي ولا همّها شي
‏والناس حطّتهم تحت مستواها
‏من زينها الفارق تقول الحلا لي!
‏دلوعةٍ والله مكمل حلاها
‏ومن الدلع لاوقفت توقف شوي
‏تلفح شعرها لين يضفي وراها
‏ضامر خصر، والعود وافي ومبري
‏وربي مزين وجهها مع قفاها
‏تقبل وتقفي ثم تقبل وتقفي..
‏وتمايلت والأرض مالت معاها..!
رفع راسه على الاصوات واسم سند وسند وبدون تردد كعادته كايد دخل يركض بين الاشتباكات وهو يشوف بتال وسند وثنيان وهذال يتضاربون مع عيال سلطان وبدون تفكير لا لنسب ولا حسب دخل كايد وصار بصف خوانه وعيال عمه وبعد حوسه طالت شوي قدرو اخيرا الرجال يفرقونهم فيه مجموعه شباب ماسكين احفاد كايد ومجموعه ماسكين عيال سلطان .
محمد: هذا هذا الصغير هو السوسه وساس البلا وبتال بدال مايتعذر قام يتفلت علينا .
ثنيان : انتم لو رجال ماحطيتو عقلكم بعقل هالصغير الي تقول ،
كايد الي كان شايل الكثير بصدره وماصدق يلقى فرصه : سند رجال ويتحذى من خدك انت وخوانك الرخوم.
تعالت الاصوات وصارو يتلفضون على بعض كلام مو اوكيه وكايد ماكان حاسب حساب احد ابد واحد من الشيبان شاف كايد شاد حيله  بالمعاير  والتقليل منهم وقال: كايد مو كذا لاتخرب على نفسك انت نسيبهم ولا نسيت.
محمد : مايشرفنا يكون نسيبنا هلي ماحترمنا والي هذا اوله ينعاف تاليه.
كايد: ماني ميت عليكم وعلى نسبكم انتم الي تشرفون بنسبي ياعيال سلطان وانتم تعرفون من حنا ومن انتم .
سلطان : لا عاد ياكايد لاهنه وبس انت تبي من يربيك
كايد : انت رب عيالك بعدين تعال ربني .
الجد تقدم عند كايد وهو يضربه كف بقوه كايد شد على اسنانه بقووووه وهو لو الي ضربه غير جده يمكن يطلع بروحه ويقول جده : تعذر من سلطان ياقليل المروءة.
كايد فلت يدينه من الشباب الي ماسكينه وهو يعدل ياقته : العذر لنفسي اني ناسبتك وقبلت في بنتك العايبه حاولت استرها لكنها تبي الفضيحه بنتك حرام عليه حرم الدم تراها طالق بالثلاث وزوجها للي تواعده على البيبان .
وقبل يكمل كايد كلامه يضربه محمد على راسه من ورى بكرسي يهجمون عليه ثنيان وبتال وكايد الي طاح على وجهه من قوة الضربه حضرت الشرطه والاسعاف الي شالت كايد للمستشفى وبتال وثنيان  وهذال وعيال سلطان للمخفر كايد كانت اصابته قويه.
____
عند سند الي جالس لحاله على عتبة باب بيتهم  ويبكي وتجي عنده ديم : سند وش فيك تصيح.
سند: كايد خذاه الاسعاف.
ديم توسعت عيونها : اوف ليه خذوه.
سند :ضربه محمد ولد سلطان على راسه بكرسي.
ديم حطت يدها على فمها بصدمه : ياويلي ليش يضربه.
سند وهو ييمنع دموعه : انا السبب انا الي سويت المشكله.
ديم حزنت عليه وهو يصيح: كايد قوي وانت تعرف اخوك اكثر مني.
سند: كان دمه كثير كثير بالحيل.
ديم :  ادع ربي يشفيه ويكون بخير بدال هالصياح .
هنا دخلو الحريم بعد ماسمعو ان صار مشكله بين عيالهم وعيال سلطان انسحبو من السهره وجوً
هديل جت هي وامها عند سند الي قام وحضن امه وقال لها كل الي صار وهنا انهارت جملا الي سندوها سلايفها ودخلو للبيت وديم تواسي هديل وترف تهدي العنود وشوق حضنت شهد وهم يهدونهم لانهم كانو يصيحون بحرقه وقهر .
___________
بالمدينه بعد ماحولو كايد  للمستشفى هناك بسبب حالته الخطيره  بعد كم ساعه مرت طلع الدكتور بوجه عابس
قام سعود الي كان مرعوب عند ولده وهو يالله يقدر يمشي من حزنه وقهره : هااه يادكتور ولدي طيب.
الدكتور: والله ولدك تلقى ضربه قويه بمكان حساس بالراس  وهو الان بالعنايه المشدده احنا سوينا الي علينا والباقي على الله ادعو له ..
مشعل: عنده نزيف ولالا
الدكتور: لا ماعنده لكن اذا مر ٢٤ ساعه ماصحى راح يدخل بغيبوبه
طاح سعود على ركبه وهو يجهش بالبكاء سعود الي ماكان قريب من كايد ولا من باقي عياله بسبب قساوة ابوه انهار سعود وهو يقول: يارب لاتكسر ظهري بكايد يارب يارب لاتكسر ظهري بكري خذ من عمري وعطه يالله.
محسن ومشعل سندوه وبالقوه قام معهم وهم يجلسونه على الكرسي.
الجد: لاتقعد تنوح مثل الحريم ادع له احسن.
سعود طالعه بصدمه وكيف حتى دموعه مايبيها تنزل على ولده : لاحول ولا قوة الا بالله.
____
بالتوقيف عند ثنيان وهذال وبتال  الي كان يحوص رايح جاي : ياريجيل انا من يطمني على كايد قلبي ياكلني عليه .
ثنيان : ان شاء الله انه طيب انت بس اقعد يارجال القلق ماهوب جايب نتيجه.
بتال بنبرة حاده : كيف تبيني اقعد واهدى وانا شايف اخوي غرقان بدمه ..
سكت ثنيان وهو يطالع بتال
بتال صار يصرخ وينادي احد يطمنه على اخوه بس ماكان في استجابه.
_____
بالديره عند ام كايد الي بس تصيح وسلايفها يهدونها.
ام ثنيان : ادعي له ياجملا وانا اختك ذبحتني نفسك بالصياح والله مايفيدك بشي .
ام ترف : كايد مايستاهل الله يرحم حاله ويقومه بالسلامة والله ولدي من هو صغير مافارقنا لين كبر.
ديم : مو وقته هالكلام ياخاله .
هديل كانت جالسه على العتبه وهي تناظر باب الحوش الي يجون معاه  بتال وكايد على طول ذا طالع وذا داخل ويجي سند ويجلس جمبها وهو يسند راسه على عضدتها وترفع يدها وتحضنه : وش الي صار ياسند .
سند : ساره تواعد خلف وتقابله.
هديل توسعت عيونها  فيه بصدمه : انت وش تقول ساره وخلف.
سند : ايه حتى بتال مصورهم فيديو وشافه كايد.
هديل: يعني سوير ساس المشكله كلها.
سند : اي.
ديم كانت واقفه وراهم وتسمع وقامت هديل تدخل بتاخذ عباتها ومسكتها ديم: وين رايحه .
هديل: بروح اتوطى ببطنها .
ديم : تكفين خذيني معك ببرد حرتي فيها
هديل: تعالي بس لاحد يدري .
ديم : لا محد بيدري .
ولبسو عباياتهم وراحو لبيت سلطان الي ماكان فيه الا ساره وامها.
بالديره عند هديل وديم الي راحو بيت سلطان ودقو الباب وفتحت ام ساره.
هديل بكل هدوء: بغيت ساره اقدر اشوفها .
ام ساره:  تفضلي ساره بغرفتها.
هديل دخلت ووراها ديم دخلو عند ساره الي  تفاجأت: هديل وش عندك جايه فيه شي.
هديل : بغيتك بموضوع اقدر اكلمك لحالنا.
ساره: اي اكيد
وطلعت ام ساره ونطت ديم وهي تقفل الباب وتوترت ساره: خير ديم قفلتي الباب.
ديم جات وهي نطالع هديل الي قالت : انتي تحبين خلف.
ساره توترت : هاه من قال.
هديل: لا تخافين احنا بنات ونفهم بعض.
ساره ارتاحت بس طمنتها هديل : اي نحب بعض.
هنا ديم مسكتها بشعرها وهي تضرب فيها: دامك تحبين خليف ليش دبستي كايد .
هديل قامت مع ديم وصارو يضربونها ويسبونها وام ساره تدق الباب وتهاوش : افتحن الباب ياقليلات الادب والله لنتفكن تنتيف .
هديل : خلاص ديم تعالي ننط مع الشباك بسرعه.
ديم وهو باقي تضربها: تكفين مابردت حرتي فيها.
هديل: خلاص يابنت فكيها.
هنا هديل صارت تفرع بعد ماكانت بصف ديم الي عيت تترك ساره وبالقوه تركتها .
هديل: تعالي ننط مع الشباك.
ديم : لا بعيد.
هديل : انا بنط ونطي فوقي بمسكك.
ديم : لا مقدر اخاف .
هديل ركبت الشباك وتنط وديم الي علقت بالشباك وخايفه تنط كان ودها بس متردده وبعد وقت طويل وهديل تحاول فيها قدرت آم ساره الباب ومن الخوف نطت ديم فوق هديل الي تعورو الثنتين وقامو رهبو وهم يضحكون ويتألمون بنفس الوقت.
هديل : اياني وياك احد يدري اننا رحنا .
ديم : ابد ماراح احد يدري.
وبس دخلو كانت ديم تعرج من الطيحه وبس شافت جدهم موجود وابو ديم محسن انخرشو وعدلت ديم وقفتها  والجد بعصبيه: من وين جايات.
ديم: من بيت سلطان كنا  نساعدهم شوي.
الجد: تساعدونهم وكايد في غيبوبة بسبب ولدهم.
هديل بصدمه وهي تصيح : ياويلي غيبوبه
محسن: اص اص امه لاتدري.
الجد : الا علموها خل تدري
ديم:  لا لا ياجدي خالتي جملا حامل
الجد بصدمه : حامل حامل
ديم : اي حامل
الجد بعصبيه : حامل ذاكبرها.
ديم: الكبر لا عيب ولا حرام .
جدها عصب من اسلوبها الي ماهو متعود عليه: محسن ورى بنتك السلقه  ماتحترم جدها.
ديم: انا ماقلت شي ولا قليت ادبي عشان تقول سلقه ياجدي.
محسن : ديم انقلعي عند امك لا اقوم اتوطى ببطنك.
راحت ديم وجدها معصب ويسب فيها وهديل كانت تصيح ولاهي حول احد.