انا احبك مابها زيف وخداع رغم الذي نخفيه والي نخافه

بارت ٨

في بيت محسن
عند ديم الي تاكل وتتابع مسلسلها وهي تاكل وتصيح ودخلت عليها شوق: فيه احد ياكل ويصيح.
ديم: اخو البطله مات.
شوق: يووه ياديم ذبيحتينا بهالمسلسلات.
ديم وهي تمسح دموعها: قمي اطلعي برا.
شوق بعصبيه : بسولف معك اذا ممكن.
ديم: ماعندي سواليف مشاعر الحزن والصياح كلها حاضره بكمل مسلسلي .
شوق: الله يخلصني منك.
وقامت نزلت لاخوانها تحت.
وديم كملت مسلسلها وكملت الاكل والصياح.
__________
عند نجد الي انسدحت وهي تصحي ترف: ترف ترف قومي.
ترف: هاه وش عندك.
نجد: شفت بتال بالحوش.
ترف فتحت عيونها بصدمه: بتال هنا بعدين وش جابه لحوشنا.
نجد: مدري بس جاء.
ترف: مصحيتني عشان تقولين بتال جاء.
نجد: اي مدري حسيت اني لازم اصحيك.
ترف: نامي لا اقوم اهبدك كف الحين.
نجد تنقلب على ظهرها وهي تلعب بخصلة شعرها وهي تناظر السقف بابتسامه وعيون تلمع.
_____________
عند هديل الي صارت تفتش الاغراض الي ارسلتها ديم وطاح منها ورقه فتحها كايد وكان مكتوب : كيفك هديل شخبارك ادري انك شلتي همي بعد هذيك الليله والكل صار يفكر افكار مو تمام بس ترا الي صار ماله علاقه بكايد ابد عموما الله يوفقه ادري ان ساره ماتبيه بس حرام لاتقولين له شي خليه يتزوجها دامه يبيها المهم ماكنت بجي للملكه بس امي حلفت عليه الا اجي وبجي انا وشوق ارسلت لك اغراض يارب تعجبك بس تنقفطتي جدي لايدري انها من عندي تكفين.
كايد سحب الكيس من يدها: وش ارسلت لتس.
هديل: وش فيك بشويش طيب ليش معصب.
كايد كان يفتش ولقي اظرف قهوه وشوكلت وكوب وايباد.
هديل: يوووه ذاه ليش. مو جدي مانعنا من الجوالات.
كايد: هاذي تبيً تخربكن .
هديل: لا حرام ديم طيوبه.
كايد اخذ الايباد لسيارته وخباه: اياني واياتس تسوين شي من وراي.
هديل: طيب ابشر اصلا انا مقدر اخاطر واخذه والله ليذبحني جدي.
كايد من اول ماقراء كلام ديم انها ماتحبه عصب مايدري ليش : ماتحبين كايد اجل من قال اني ابي حب بنات المدن الصايعات.
بتال: انت تكلم نفسك.
كايد : لا لا.
_____________
مرت الايام وصار اليوم يوم الاربعاء وبكره الملكه وجو محسن واهله وهالمره نزلو البنات عند بيت مشعل عشان ياخذون راحتهم اكثر خصوصًا ان بيت مشعل مافيه عيال.
___
بارت ٦١
في بيت مشعل
ديم منسدحه : بنات تكفون اطلعو برا بنام.
ترف: سوينا قهوه.
ديم: مابيها بنام اذا صحيت تقهويت.
ترف: طيب اجل بنروح بيت عمي سعود نساعدهم .
ديم جلست : هاه خلاص ببروح معكم يعني اساعدهم وكذا.
شوق : ديم امي قالت ماتروحين الين تسمح لك.
ديم : وينها امي.
شوق: عندهم.
ديم: هيا اجل .
ترف: اصلا جدي مسوي غدا .
ديم: وش جابو للعروس.
شوق : وانتي وش دخلك.
ترف: وش فيك عادي تسال بس .
نجد: اي جابو لها شبكه وعربيه كلها عطورات واشياء حلوه.
شوقي : يبي لهم تحديث حقين الديره.
ترف : تخيلي جايب لها خلخال :
شوق: عشتو يعرف الخلخال.
ترف: اي هديل علمته.
ديم: قومي قومي خلينا نروح.
ولبسو عباياتهم وراحو لهم.
كان باب الحوش مفتوح ودخلو كانو العيال جالسين بالحوش ولما شافو البنات عيال سعود صدو.
ثنيان: ياحليلكم لابسات عبايتهم طيب ليش تصدون.
هذال: الادب عندهم مدبل.
طبعا المعروف عن العيال انهم يشربون ورى بعض اي عادي مايقرفون من بعض الا كايد مايطيق يشرب بعد احد عكس ثنيان الي عادي عنده يشرب حتى بعد امه وخواته.
كايد كان يشرب حمضيات وتلقف ثنيان وشرب ورجعه : بتال يقول حمضيات الديره اطعم.
كايد : خذه كله مابيه.
ثنيان: ليه لايكون قرفان مني.
بتال: ماهو منك لحالك حتى امي وابوي مايشرب بعدهم.
ثنيان : ليش طيب.
كايد بعصبيه: انا كذا ماحب اشرب بعد احد ماهو غصب .
ثنيان ابتسم: خلاص خلاص انا اسف وحقك علي وابشر بالعوض اهم شي معرسنا لازم يكون مروق ومزاجه عالي.
كايد : يعين الله.
______
عند البنات دخلت ديم وتستقبلها هديل وهي تحضنها: يامرحبا تردف مرحبا على قولة كايد مره مشتاقه لك.
ديم : وانا اكثر والله بس وين الايباد ابي اجهز فلم لسهره.
هديل: خذاه كايد طاح عليه وخذاه.
ديم: اما وعرف انه من عندي.
هديل : اي قراء رسالتك بعد.
ديم: يووووووه ياهديل الله يسامحك بس وش بيقول عني الحين.
شوق :يقول الي يقوله خير ياطير تراه كايد مو ولد الوزير.
هديل ماتحب شوق لانها دايم تشوفهم بدو متخلفين : اللهم طولك ياروح .
ديم: تكفين عشاني لاتردين عليها.
هديل سكتت : تبيني اكلمه يجيبه.
ديم : لا لا مافيه داعي .
هديل : براحتك.
وجلسو يشوفون تجهيزات الملكه من الشبكه والعربيه والهدايا والضيافه
____
ثنيان : ياعيال خلونا نرقد بالحوش.
بتال: قدام ماعندك مشكله .
ثنيان : متى العرس ياكايد.
كايد: مدري بكره نشوف .
سند: الين تولد امي.
ثنيان: اما خالتي جملا حامل ياحليلها .
كايد ماكان يبي سند يعلم خصوصًا ان ابوه باقي مادرى : الله يقومها بالسلامه.
وقامو بتال وهذال يجيبون الفرش بعد ماتعشو وفرشو بالحوش ونامو وبنات محسن راحو بيت مشعل .
___
بغرفة جملا الي ماتدري كيف تعلم سعود انها حامل: سعود.
سعود: سمي .
جملا: فيه علمٍ حصل ودي اعلمك به.
سعود: وش العلم عساه خير.
جملا وهي مدنقه. : والله اني متفشله منك لكن مدري كيف صارت.
سعود بخوف: العلم وشنهو خبصتي قلبي.
جملا: انا حامل ياسعود.
قام سعود الي كان منسدح وجلس وبابتسامه: ياماشاء الله تبارك الله تقلينه صدق.
جملا رفعت راسها باستغراب: يعني منت بزعلان.
سعود: ازعل من رزق الله الظاهر انك انخبلتي انتي ام العيال انتي الغاليه ياجملا ام كايد وسند وبتال.
جملا : الله يجعلك ذخر لي ولهم ياسعود مير ترا كايد يقول ان كانه ولد هو الي بيسميه.
سعود: ان شاء الله هو يجي بالسلامه وان كانه ولد اسمه على كايد.
جملا : على خير ان شاء الله .
سعود كان طاير من الفرحه وجملا مصدومه انه فرح وبس شافته فرح راح نص الخوف والخجل الي كانت تحسه بس باقي عمها كايد ماتدري وش بتكون ردة فعله
______________
عند العيال الي نامو كلهم الا بتال كان يتقلب على فراشه عيى يجيه النوم وفجاه يشوف خلف يتسلل للباب وهو يتلفت بخوف وتوتر وطلع يدق باب بيت سلطان بشويش بتال بس شافه جن جنونه اخذ جواله ونط لحوش بيت عمه مشعل ونط برا وهو يطل على خلف وساره الي يتكلمون وكانت طالعه له بدون حجاب بتال انصعق : يابنت الكلب هاذي سواه تسوينها. ورجع لبتيهم وهو يصحي كايد : كايد كايد قم بسرعه .
كايد فز بسرعه خصوصًا انه توه نام : هاه علامك فيه شي .
بتال: تعال بوريك شي بسرعه بس اص لاحد يسمعنا انقز معي حوش عمي مشعل.
كايد : انت مهبول .
بتال: انقز بسرعه مافيه وقت.
نقزو بتال وكايد وخذاه برى الحوش : تعال تعال شف كايد وهو يشوف خلف واقف مع ساره وهو يلمس شعرها كايد توسعت عيونه وكان بيروح وسد فمه بتال : اص اص اهدى انا ماجبتك عشان تسوي مجزره جبتك تشوف وصاختها قدام تكون على ذمتك.
كايد فلت جسمه بالارض بقهر وبتال خذا جواله وصور خلف لانه يدري ان جده ماراح يصدق بدون دليل ويمكن يجبر كايد يتزوجها
اما كايد انصدم صدمة عمره وهو يقول: ليه ليه ياساره وش سويت فيك عشان تسوين فيني كذا.
__
بعد شوي رجعو للبيت قدام خلف يرجع ويشوفهم وكايد من القهر والغبنه يالله قدر ينقز وطلع الصبح وهو مانام واول ما اذن الفجر صار استنفار والكل صحى ويجهز للملكه ومبسوط الا كايد الي طفت فرحته قبل تبدا دخل للبيت وهو وجهه حزين وعابس وعاقد حواجبه انطفى ورجع كايد الي مايكلم احد ولا يحتك باحد ابد
هديل: صباح الخير ياعريس والله اطلق عريس بالدنيا بس عندي امانه وصلتها لي ترف من ساره الي تقول انها اقنعت ابوها انك تشوفها بس تقول لازم يكتب لي قصيده وتقولها لها الليله اذا دخلت تشوفها تقول ترف مره كانت مستحيه وهي تقول لي
تعرف خجل البنات عاد ساره مره تستحي حتى من ظلها لاتفكر اني اكرها بس مره قالت كلام وكرهتها بعده .
كايد طالع هديل بدون اي رياكشن: تبى قصيده.
هديل: اي بس انت وش فيك زعلان.
كايد مشى بدون اي كلام
هديل: ياعمري اخوي صكوه عين ولا تلبسه جني بالحوش ولا ذاه وجه واحد ملكته الليله
والله انه فيه .
وهنا يدخل بتال بخوف: وين كايد.
هديل: علامكم مخبوصين كذا فيه شي.
بتال: لا لا مافيه شي بس هو وينه .
هديل: علمني انت ماتعودت تخبي عليه شي.
كايد كان محرص على بتال مايجيب طاري لاحد ابد: مافيه يابنت الحلال بس زيني الفطور عيال عمي محسن شوي ويقومون.
هديل : ربع ساعه ويجهز .
ودخلت للمطبخ وهي متاكده ان خوانها فيهم شي بس ماتدري وش.
عند كايد الي جالس بالمقلط وهو مقهور وحزين وحاس بالغدره اذا هي تبي خلف ليش توافق عليه واذا هي مغصوبه ليش تمثل انها راضيه وتبي قصيده عاد كايد من النوع الي يكتم بصدره حتى دموعه ماتنزل بس يكتم بصدره وينعزل ويصير جثه متحركه يتنفس وياكل ويشرب بس دخل عنده بتال وكان كايد يكتب قصيده لساره زي ماطلبت : انت وش تسوي.
كايد: خلني لحالي.
بتال: ادري الموضوع صعب خصوصاً ان الليله ملكتك بس احمد ربك انها ماصارت على ذمتك ياكايد وخلف لا تقربه ولا تضربه هي لو ماهي عايبه ماعطته مجال صدقني.
كايد كان ساكت ويكتب القصيده بدون كلام.
بتال كان يحاول يواسيه ويخفف عليه بس ماش كايد كان مندمر ولا كل مؤاساة العالم تخفف عليه لو شوي. تجهزو الكل وصار العصر كشخ كايد وكل شي ونادى هديل: تعالي بعد شوي بيجي المملك عطي ساره هالورقة حطيها بيدها .
هديل: الحين .
كايد: ايه.
هديل: بس هي تقول الليله اذا جيت .
وقبل تكمل يقاطعها كايد: قلت لك الحين .
طبعا ساره كانت كاشخه واهلها وبنات عمانها حواليها ومبسوطين جات هديل وهي تدق الباب وكايد كان ينتظرها برا وعطت ساره الورقه: مساء الخير ياعروسه الف مبروك ياروحي معي امانه العريس قال احطها بيدك.
ساره ابتسمت وخذتها وفتحت الورقه بعد ماطلعت هديل وكانو بنات عمانها يقرون معها
__
بارت ٦٤
عند هديل الي طلعت من عند ساره وهي تقول لكايد الي ينتظرها برا : عطيتها اياها ياعيني صرت مرسل عشاق.
كايد: امشي امشي .
ودخلو بيتهم وقفل كايد الي ووقف على الباب وهو يسند ظهره عليه بقهر وحزن ويقطع صوته جده الي يناديه: كايد وينه .
تحرك كايد تجاه البيت بخطوات سريعه : سم ياجدي.
جده : على المسجد بنصلي ونروح نملك مانبى نتاخر على الريجيل.
كايد : ابشر ابشر.
____________
في بيت مشعل كانو البنات يلبسون وتنصدم ام ثنيان بفستان ديم الي كان تحت ردفها وهي تعرف عادات وتقاليد الديره وان هالشي عيب وفضيحه هاللبس.
امها مسكتها بعضدتها وسحبتها بقوه: انتي مالقيتي الا ذا تلبسينه.
ديم: يمه هاذي انا وهاذي شخصيتي وهذا لبسي.
امها : تنزلينه تلبسين غيره.
ديم: ماجبت الا هو .
امها : اجل تنثبرين ببيت عمك مشعل ماتروحين معنا.
ديم: احسن ميته على الروحه الحين.
ودفتها امها وهي تطلع من الغرفه وتتوجه لام ترف .
______________
عند ساره الي فتحت رسالة كايد وهي مبتسمه خصوصاً انا بنات عمامها وافقين معها وكانت تهايط بكايد انه شاعر وتلاشت ابتسامتها اول ماقرت اول بيت وهي تضم الورقه لصدرها تخبيها عن بنات عمامها الي انسحبو اول ماقرو البيت الاول رجعت ساره تقراء رسالته ودموعها تنزل وكان كايد كاتب لها : دريت عن حاجة وكني مادريت دريت عن حاجة ولا ودي بها
الجادل الي قلبها فندق وبيت
مالي بفندقها وهي مالي بها
ياقلبي انا جزت منها وانتهيت
ماني بعاشقها ولاني بحبيها ...
راح اجي مع ابوي وجدي واكمل الملكه عادي لاني مابي افضحك عشان سلطان ابوك الي سمعته ماتشرف تكونين بنته
لكن انتي عيي لاتممين الملكه وقلي فيني الي تقولين ماتفرق معي ..
انهارت صياح وجات امها وهدتها وهي على بالها توتر وخوف : ليه ياساره وانا امتس ليه تبكين كايد ولدنا وبيته ورى الجدار متى مابغيتيني البسي عباتك وتعالي
_______
بالمجلس عند كايد الي ماكان مبسوط ابد كان حزين وحالته حاله ويفكر ويسهى احيانا ينادوينه ولايرد الا لما ينبهه الي جمبه كمل موضوع الملكه عاد ووقع وكانو الشهود بتال الي كان منصدم ليش كايد ماوقف الملكه وكان يطالعه بنظرات فيها مية سؤال وسؤال
والشاهد الثاني ثنيان راح فيصل عند ساره ياخذ موافقها واول مادخل عندها : شوف وش ارسل لي كايد.
فيصل يطالع امه وعماته: خلونا لحالنا شوي.
وبس طلع الكل : وقعي.
ساره بصدمه: بس
وقبل تكمل : قلت لك وقعي لو بيفضحك فضحك الحين وقعي.
وقعت ساره بعد ضغط من فيصل وهي تصيح رجع فيصل بعد ماخلى ساره توقع بالقوه دخل وبكل وساعة وجه يطالع بكايد: مبروك يابو سعود.
كايد بصدمه : مبروك على ايش.
هذال دفه واستوعب كايد انه انغدر للمره الثانيه وان ساره وقعت وصارت زوجته فك ازازير ثوبه وهو يحس بثقل على صدره والكل حوله يبارك له وكان يرد عليهم بدون نفس وابتسامه مزيفه صار المغرب وكل اهل الديره في بيت سلطان وقرر كايد ينسحب وراح بيتهم وكان شوي وينفجر من القهر والغبنه كيف كذا عطاها فرصه تبعد بدون شوشره وتغدر فيه وتمشي كلامها دخل بيتهم وهو يجلس على عتبة الباب وهو يمسك راسه بين يدينه ونفسه يطلع وينزل : كيف اخارج نفسي الحين منها الله ياخذك يارخيصه ..
________
عند ديم الي انطردت ماتحضر الملكه وجالسه ببيت عمها مشعل لحالها كانت مشغله اغاني كوريه ولابسه سماعات وترقص وفجاه تشوف ظل وراها وتلف بصدمه وهي تصرخ .
_________
في بيت سلطان البنات الي يرقصون شوي ويضيفون شوي والكل مبسوط الا ساره الي. ماتدري كيف بتكون حياتها مع كايد وهو يشوفها مقرفه وقذره ورخيصه.
هديل : عنود وين امي.
عنود: عند ساره بالغرفه هي وشهد.
هديل: ياعمري امي مبسوطه بكايد.
عنود : بس كايد ماهو مبسوط
هديل: اي شفته نام مبسوط واصبح حزين مدري وش فيه.
هديل: عين خليف وامه لازم نقراء عليه ونشربه موية زمزم
العنود تضحك من خبال هديل.
ترف تمسك هديل بيدها: قومي ارقصي معي.
هديل : مالي نفس .
ترف: قومي تكفين شوق نفسيه والعنود الدوره معها .
هديل: شدخل الدوره.
العنود: بطني يوجعني .
هديل قامت معها بدون نفس
___
عند كايد الي لف جهة بيت عمه وهو يسمع صراخ بنت في بيت عمه مشعل قام يركض نط الحوش ونزل للبيت وكان الباب مفتوح دخل كايد يركض وتقابله ديم الي ارتمت بحضنه وهي واضح انها متعاركه مع احد يطالعها وقبل يتكلم يشوف شاب طالع من الغرفه يركض تجاه شباك المطبخ ويلحقه كايد الشاب يركض وكايد يركض وراه وديم قفلت الباب وهي تصيح بخوف لحقه كايد وبعد مطارده طويله ضيعه كايد الي رجع لبيت عمه مشعل وهو يدخل مع شباك المطبخ واول ماشافته ديم فزت ويرد عليها :بسم الله عليتس لاتخافين هذا انا كايد.
ديم جات عنده ركض وهي تحضنه كايد تشنج جسمه ووقف شعر جسمه وتوتر وصد وهو يحس براسها على صدره وهو يبلع ريقه وبصوت متوتر وهو ينسى اسمها على طول لانه يشوفه صعب : انتي بنت عمي محسن الصغيره.
ديم تذكرت انها بحضنه وبعدت عنه : ديم .
كايد شاف جلال ام ترف على جنب جابه وغطى ديم : وش الي صار .
ديم : انا مو صايعه حضنتك بدون ماحس اسفه.
كايد ابتسم على كلامها : حكي لي وش صار .
وبدت ديم تحكي له الي صار .