انا احبك مابها زيف وخداع رغم الذي نخفيه والي نخافه

بارت ٧

هديل: احد يشوف اخوي الحنون الحلو وماتصير مشاعره جياشه.
وقبل يرد عليها بتال
كايد : ترانا زوجنا هديل.
بتال: لا تقول الا هديل لاتزوجونها.. من عطيتوها
كايد بمزحه: فيصل ولد سلطان.
هديل وهي تمشي كذبة كايد : اي الله يتمم لنا على خير
بتال : لا لا فيصل لا
كايد : وافقت وقضينا.
بتال: انا ماني موافق الرجال مريض.
هديل: ياحبيبي هو المرض مو عيب.
كايد سحبها باذنها: ياحبيبك مين.
هديل : انت انت .
بتال سحبها عنده بإبتسامه حب وهو حاط يده على كتوفها حركة بتال المعتاده مع خواته : فكها لاتوجعها هديل الغاليه ماحد يعرف لها غيري.
هديل: ايوالله ماحد يعرف لي غيرك هالجلف قطع اذوني.
بتال : اسمعيني زين .
هديل: سم.
بتال: ماتزوجين بدون علمي وفيصل انا اكلم جدي في موضوعه.
هديل ابتسمت: والله انك اجودي صدقت اني بتزوجه مايخسي الا هو .
بتال : وجع انت وياها والله اني صدقت .
كايد: تعال اقعد وانتي رحي زيني القهوه والشاهي ونادي البنات وتعالو.
بتال: دقيقه بدخل سيارتي وقضيت لكم اغراض من سوبر ماركت المدينه اشياء ماهي ببقالة القريه.
هديل تعلقت برقبته: ويلوموني بحبك من الحين اعلمك انت وياه ولدي انا وفيصل على اسمك .
كايد الي مايحب هالكلام طلع نعاله يرميه عليها وهي تدخل ورى بتال وهي تضحك وتركض للمطبخ تجهز القهوه والشاهي وبتال راح يدخل سيارته الحوش وكايد انسدح وحط يدينه تحت راسه وهو يتأمل العقود بابتسامه: والله وبتصيرين لي ياساره .
_____________
في بيت محسن كانو على العشاء البنات وامهم وهنا يدخل ثنيان : ميت جوع.
امه تناظر ديم: هذا الي بيتعشى برا ياكذابه
ديم: ولدك الي كذاب مو انا.
جلس ثنيان وضربته ديم على يده بس مدها لصحن : قوم غسل .
ثنيان قام وتوجه للمغاسل: ناشبه لي اكثر من امي عند يديني وغسيلها.
غسل ورجع : صبي عصير .
ديم: وين بتال.
ثنيان : سرى لديره.
شوق: والدوام.
ثنيان: عيى يقعد يقول بالي مشغول بكايد بررح اساعده وراح .
ديم: بروح الملكه .
ثنيان : صادقه؟
ديم: اي بروح تحت تهديد الوالده.
ثنيان يطالع امه : كفو ام ثنيان ربيها الي ماتربت.
ديم: اقول اصه بس لا اعلم عليك.
امه: وش تعلمين فيه على الاقل هو رجال.
ثنيان: لا يمه ماني معك بهاذي انا بعلمك وش العلم انا احب امل بنت خالي عدنان واكلمها.
امه رمته بالصحن الي ضرب بيد ثنيان وهو يتالم : ياقليل الادب مالقيت الا بنت اخوي تخرب تربيتها.
ديم: ياسلام يعني بنات الناس عادي بنت اخوك لو ماهي خربانه ماكلمته.
امها رمتها بالصحن الثاني وديم تشرد فوق وتلحقها شوق وثنيان بلش بامه الي ورته شغل الله .
___
في الديره بالحوش عند كايد جاء بتال وجلس وهو يطلع اغراض بنات عمه مشعل كالعاده وطلع سند الي انصدم : بتاااااال.
اول مالف بتال ينط سند فوقه وبتال يضحك وهو يشيله ويحضنه : تراك رجال ياسند كسرت ظهري.
سند جلس وهو يحضنه : متى جيت.
بتال : توي من شوي هاذي جلستي بس قم هاك .
سند: مافيه اقوم ياولد.
كايد: ودها لترف.
سند واقف بضحكه: اي ايوالله بوديها.
بتال يغمز لكايد: الموضوع يخص ترف.
سند اخذ الاغراض وانطلق يركض .
كايد: هذه بيفضحنا.
بتال فتح شبس وهو ياكل منه : ذق ذق هالبطاطس والله ياهو فنان.
كايد : مابيه عطني فصفص اذا معك.
بتال طلعه ورماه عليه: هاك وجبت لك حمضيات.
اخذها كايد وفتحها وصار يفصفص .
هنا جو العنود وشهد وفرحو ببتال : يااااي توها تحلى السهره والله.
وجو عنده يركضون وسلمو وجلسو.
العنود وهي تسحب الاكياس : وش جايب.
بتال: مالذ وطاب على قولة هديل.
هديل كانت داخله : وش فيها هديل هاه تحشون فيني.
بتال: ماحشينا فيتس بس امي وينها.
هديل: نايمه ياعمري صايره بتنام بعد الصلاه وحمها كله نوم.
بتال بصدمه: وحمها ليه امي حامل .
الكل انصدم انه مايدري.
هديل : اي حامل اما مادريت.
بتال: والله مادريت ماحد قال لي .
العنود: لانك مو فيه ماقلنا لك .
بتال: هيا اسمعو القرار ترى ماخذه من قبل.
كايد: وش علمك.
بتال: بداوم من الديره.
البنات فرحو.
هديل : ايه تكفى.
العنود: وناسه.
شهد : ياليت والله.
كايد : لحظه لحظه انتي وياها كيف بتداوم بشكل يومي .
بتال: ايه عادي ثاني شي ياخي ثنيان ماهو مضبوط.
كايد: علامه وش ناقده فيه.
بتال: ماخلى بنت مارقمها وانا معه طول الوقت لو احد اشتكى عليه بروح معه فيها.
كايد بقرف: الله يخسه وشلون يكلم بنات خلق الله والبنات كيف يخونن ثقة اهاليهن فيهن والله لو هي اختي لنحرها نحرة الشاه.
هديل مسكت رقبتها وكالعاده مفهيه : جعلني مايطيح بيدك.
كايد: جربي تغلطين بشي زي ذا وشفي ردة فعلي.
بتال: هدوء هدوء وصبي قهوه اعجلي.
هديل: طيب هاك .
كايد اخذ منها وهو يطالعها بنظره حاده: قايل لتس لسانتس يبي له قص .
بتال: خلاص ياكايد هي ماقصدها بس هاذي هديل ماحفظتها تقول كلامها بدون ماتوزنه.
كايد: هاذي المصيبه بكره مابيتحملها ولد الناس.
بتال: خلونا من هالكلام الحين وعلموني وش جهزتو للملكه.
وبدو يشرحون له.
___
عند ترف الي اندق الباب وفتحت وهي تحط شيلتها بينها وبين سند : مين.
سند بصوت رجولي: انا انا يابنت عمي.
ترف كانت تحب سند وخباله وسواليفه: هلا والله بولد عمي امر وش بغيت.
سند: نمتي ولا باقي .
ترف بضحكه : لا باقي فيه شي
سند مد لها الاغراض: هاذي من بتال وانا سرقت لك عصير هديل.
ترف بضحكه : ههههههههههه كفو .
مدت ترف يدها تاخذ الاغراض قال سند: المسي يدي كنه بالغلط.
هنا ترف انهارت ضحك : والله لعلم جدي.
سند حط الاغراض بالارض وشرد لبيتهم يركض وترف لسى تضحك : قليل ادب.
__________________
دخل سند يركض وجلس عند كايد وهو يتنفس بقوه : كايد.
كايد: هات العلم.
سند: سويت قصيده بترف وبقولها لها
بتال: اوووووه طلعت شاعر مثل كايد.
البنات : اوووووه
هديل: يازينه الشاعر ياناس
العنود: ياحظ ترف من قدها
كايد: اصبرو خلونا نسمع القصيده .
سند : اقولها.
كايد: قل .
سند وهو يعدل جلسته وبحماس : هاذي ترف بنت الترف بنت عمي مشعل.
كايد: بنت خالتي فاطمه ..عودت سواليف وانا اخوك.
البنات انهارو ضحك الا بتال: ماعليك منهم كمل انا اسمعك
سند يطالع بتال وابتسم : احبها وتحبني والحب ماهو حرام.
كايد: قم قم شخ وارقد .
هنا البنات ماتو من الضحك.
وسند قام بزعل وراح داخل.
بتال: تعال ياسند .
سند كمل طريقه بزعل ونط بتال يلحقه.
هديل : تكفى كايد سو له قصيده خله يقولها لها.
كايد : اتغزل بترف شينه بحقي.
العنود: لاتتغزل امدحها وكذا.
شهد : بنوصفها لك وانت شعر فيها.
العنود قرصتها: انتي صاحيه.
كايد: اعرفها مايحتاج توصفونها لكن مايصلح.
رجع بتال وهو شايل سند الي مسوي زعلان ويحاول يتفلت من بتال: اقعد ياورع.
سند: ماني ورع .
كايد: خلاص انا الورع بس قل لي تبي قصيده.
سند: اي بتساعدني.
كايد: اي بعاونك تعال جمبي.
سند قام وقعد جمبه : هي شعرها طويل وخدودها حمرا وفمها صغير.
بتال: افا يالرخمه توصف حبيبتك لاخوك.
سند : لا كايد مثل اخوها.
كايد يغمز لبتال: علامك انت انا مثل اخوها بس سند ماهو مثل اخوها.
سند: كاايد ركز معي.
كايد : معك معك بس خلني افصفص عشان القصيده تجي.
سند قام وجلس: انا بفصفص عشان اصيرشاعر مثلك.
وصار يفصفص مع كايد
___
في بيت محسن ثنيان الي بغت تكسر امه يده كان يتألم : اااخ ياهذال بغت امي تكسر يدي.
هذال: ليش وش انت مسوي.
ثنيان: كله من الخبله ديم الله لايسامحها.
وهنا كانت ديم جايه: هذال المندوب برا روح جيب الطلب.
هذال: وش طالبه
ديم : اكل
هذال: ياحظك على كثر ماتبلعين مايبان عليك.
ديم: انت ليلك طويل بروح انا اخذ الطلب.
وطلعت وهي توقف ورى الباب بدون مايشوفها المندوب وتاخذ اغراضها.
____________
بالديره تحديدا بحوش سعود.
كايد: قم قم معي ياسند.
سند: ليه.
كايد: نزرق للعزبه نجيب تيوس نشويه .
بتال: ذالحزه بتشوي.
كايد: ايه وش ورانا.
هديل: وراك السوق بكره.
كايد: ناجله بعد بكره اهم شي اضيف اخوي.
بتال ابتسم : اخوك انا.
كايد بسخريه: لا خليف حبيب قلبي.
بتال ابتسم : يارجال مايحتاج تضيفني حنا خوان وانا مارحت الى يوم الخميس.
كايد : مضيفك مضيفك الله لايعوقك بشر.
العنود : طيب خلها بكره بالليل الحين الساعه ١١ تاخر الوقت.
كايد: سند بتخاويني ولالا.
سند: اذا بتسوي لي قصيده لترف خاويتك.
كايد بسخريه : اي اي بسوي لك عصيده .اقصد قصيده.
سند يضربه كالعاده بقوس على صدره وبطنه : انت كلب.
وهم يتوجهون للبوابه
كايد: ماعندك ادب انت.
سند: الا عندي ادب.
كايد: هيا اركب اركب.
هديل: وين الموهيتو الي وصيتك عليه.
بتال وهو يدور بالاكياس الي باقي فيها اغراض اشكال والوان ونكهات مختلفه: جبته والله .
هديل: ماهو فيه .
بتال كان متاكد انه جايبه : يابنت والله جبته انا متاكد.
العنود: يمكن راح مع اغراض بنات عمي مشعل.
بتال: لالا انا حطيت اغراضهم بنفسي ماهي معه ابد.
هديل: خلاص خله بس اسمع شبوك الشوي بحوش عمي مشعل وهم اكيد نامو الله يعينك تنقز تجيب الشبوك لانهم يقفلون باب الحوش بالليل.
بتال قام وهو يشمر ثوبه ويربطه : بسم الله.
وركب السلم ونط بحوش عمه اول مانط كانت نجد بالحوش ولفت تشوف هالحرامي الي نط عليهم وصرخت : يبه حرامي
بتال توتر وهو يشوفها كاشفه وتصرخ وخايف يجي عمه وينفهمون غلط خصوصا انه كان متطلم : بسم الله عليتس هذا انا انا بتال ..
نجد كانت تصيح وماعطته فرصه يتكلم.
بتال قفل فمها بيده : اسكتي فضحتينا .
وهو يفك اللطمه : انا بتال ولد عمتس سعود.
وبس شافت وجهه سكت وهي تناظر عيونه بصمت : بتال.
وهنا يجي ابوها فازع ويتخبى بتال ورى الخزان: انتي علامتس وراتس تصيحين.
نجد بتوتر : هاه طير طير غراب مدري خفاش جاء قرب مني وخفت.
بتال كان متخبي ومبتسم وهو يسمعها .
ابوها : ادخلي ادخلي الله يهديتس بس.
نجد: يبه طيب جايه.
وراحت تدخل وقفلت الباب وبتال اخذ الشبوك ورماها بحوشهم ونط وراها
نط بتال لحوشهم
هديل: مين الي تصيح.
بتال : مدري وحده من بنات عمي مشعل.
العنود: اما ماتعرف اشالكهم.
بتال: عيونها وساع وفيها حور.
هديل نجدوه.
بتال بدون مايحس وهو يشد على الكلمه : حلوه حلوه .
هديل: تدري عاد احسها مناسبه لك.
بتال ابتسم وهو يعدل شواربه : تعالي تعالي نشب النار.
شبو النار بالجزه وشوي وجو سند وكايد والتيس معهم حي الي انفلت من يد كايد وانحاش بالحوش الي كان كبير ودايري على البيت .
بتال: سكتوه فضحنا لايقوم جدي علينا.
كايد شمر ثوبه وبتال وسند وصارو يلحقونه وجاء التيس وهو يطيح بالنار وتصرخ هديل ويهبدها كايد وبتال الي يسحب التيس الي صارت ريحته شياط هديل: ياحرام حرقتوه حي.
كايد : هو الي نقز بالنار مايفكر مثلتس.
بتال سدحه وهو يذكيه بسرعه لانه حرام محترق.
كايد : طاش ماطاش انا وهالتيس وهالخبل سند.
العنود: وهديل معكم .
كايد : قمي هاتي بصل وفلفل رومي وطماطم وفلفل قرون يالله .
العنود : ابشر .
كايد لهديل: انتي قمي هاتي صحن كبير وكيس زباله يالله .
هديل من الحين : الكرش على شهد.
كايد: الكرش ماتعرف الا انتي .
هديل: والله مالي دخل شوفو غيري.
وقامت تجيب الاغراض .
وبدو يشوون اللحم الي يبونه والباقي قطعوه وحطوه بالثلاجه وهم يشوون.
سند: هديل عصيرك وينه.
هديل : انت ماخذه ياكلب وبتال قلب عليه الدنيا.
سند: عطيته ترف .
طلعت هديل نعالها وهي تلحقه وهو يشرد.
بتال وهو يبي يشغلها : هديل تعالي صبي بغسل يدي.
هديل جات: شخبار ديم ماتدري عنها.
بتال: على طاري ديم ارسلت لك معي اغراض بالسياره .
هديل حطت الابريق وراحت تركض لسياره.
بتال: ياليل هديل تعال صب. ياكايد.
جاء كايد وهو يصب عليه يغسل.
بتال: كايد وش تقول بالعيون الحور.
كايد ابتسم: وين شفتها.
بتال: وش تقول واعلمك وين شفتها
كايد اخذ الابريق وهو يصب عليه: اقول.
تغطرسي يـ ام العيون الحور
‏وخليني اعبر عن احساسي
‏انا لو اني شاعر ومغرور
‏لا شفت زينك طحت متواسي.
بتال: انا اشهد اني طحت متواسي.
كايد: منهي قلي.
بتال : بنت عمي مشعل الصغيره.
كايد: نجد.
بتال: اسكت لاتخليني اضحك من سند يوم وصف لك ترف واروح اوصف لك نجد.
كايد سكت وراح يقلب اللحم على الجزه وهو مبتسم.
___