الكاتبه : اديان
#المَغّوار
_______________________
- فزيت من النوم عطشانه باوعت ماجايبه
كلاص مي ، اتأفأفت بـ ملل مابية حيل انزل
نزلت جوه شربت مي وجعت شو لفيت خبز
وجبن واكلتها .
صعدت فـوك اذكرت روجيان ماشفتها فتحت
باب غرفتها ع كيـف ، واشوفها تون اتقربت يمها
مصخنه نارررر وتون وعركانه خفت عليها
كعدتها كـوه ، ماتتحرك سويتلها كمادات ومافاد
طلع الفجر بـ 5 صارت وهي نفس الشي!
نزلت جوه شفت امي تصلي شافتني واستغربت
كملت صلاة وسألتني
امنه : ها ماما صباح الخير
حنين : صباح النور
امنه : شعجب كاعده؟
حنين : فزيت عطشانه وصعدت فوك اشوف
روجيان لكيتها مصخنه نار صايره وتون
وسويتلها كمادات من 3 وليهسه بـ 5 وهي
بعدها نفس الشي
امنه : ليش ماكعدتيني يايمه خل اروح اشوفها
سوده عليه .
صعدنه اني وامي شافتها امي وانصدمت
كالت خل ننتظر للـ 7 ونشوفلنه تكسي يودينه
هسه فجر ماكو.
خلت راسها بـ حضنها وتقره عليها وروجيان
نفس الشي ، صارت بـ 7 كمت لبست روجيان
بشت فوك تراكها واني هم لبست بشت فوك
تراكي وامي نزلت لبست عبايتها والشال
نزلنه وشافتنه بيبي أستغربت وشافت روجيان
كوه تمشي واني لازمتها .
ايمان : شبيها بنيتج؟
امنه : مصخنه كلش من الفجر ليهسه
ايمان : سوده عليه اخذنها يمه
امنه : لا يضل بالج إذا نتأخر واذا تردين
شي كعدي تقى خابري عليها مو تصعدين
ايمان : لا يمه شريد انتِ حظرتيلي الريوك
وصليت ماعندي شي بس شغليلي التلفزيون
اباوع مسلسل
شغلتلها امي البلازما ورحنه اني وامي وروجيان
اجرت امي تكسي وصلنه للمستشفى شافها
الدكتور .
- شلون ماجبتوها البنيه كلش مصخنه
لو مبقيها شويه جان مشموره من الصخونه
امنه : ماندري دكتور بعد
- راح اخليلها مغذي وهذني مغذيات كتبتلكم
تخلولها بليل وباجر الصبح وبليل
واذا بعدها خليلها مره ثانيه مغذي وهذني كبسول
اجت ممرضه خلتلها مغذي وكعدنه يمها
وهي مغمضه عيونها.
امنه : اني هسه اجي
