انا احبك مابها زيف وخداع رغم الذي نخفيه والي نخافه

بارت ٥

وصلو ثنيان وامه وخواته للبيت ديم الي فتحت الباب وهي تنطلق للبيت متوجهه لغرفتها وهي تقفل الباب وترمي نفسها بالسرير و تصيح.
شوق دخلت تتسحب: غبيه مالقت الا كايد تحبه قلو الشباب الله لهدرجة طايحه من عين نفسها تاخذ لها طعس بدوي مايعرف شي غير حلاله والوايت .
ام ثنيان الي مسكت ثنيان بعد مادخلت: انت وشلون تشجع اخذتك على هالخرابيط كيف عادي عندك انها تحب كايد اختك مراهقه ياثنيان بدال ماتنصحها تطبطب عليها.
ثنيان : الحب مو بيدها يمه وش تسوي حبته بلاها الله وحبته وانا ابيها تفضفض لي تكون قريبه مني لو عصبت وضربتها راح تبعد عني ماراح تحكي لي شي بعدين هي اصلاً ماقالت انها تحبه بس كل شي واضح انا مو ولد .
امه : وشلون نروح لديره عاد.
ثنيان: اذا ماتبي تروح انا بقعد معها مره انها ومره هذال وشوق من غير ماتحب الديره بالقوه كانت تروح معنا بس ملكة كايد لازم احضرها يمه بعدها ابشرو بعقد معها.
امه وهي تقوم : يصير خير يصير خير .
_________
عند ديم الي منسدحه بوسط سريرها وهي بعباتها وتصيح الين غفت بدون ماتحس.
_____________
عند كايد الي مو مصدق يطلع الصباح عشان يروحون يخطبون حب الطفوله كان يتقلب على فراشه : ليش هديل قالت لي هالكلام بس لانها واقفه بصف ديم تسمعني هالكلام ااااخ بس مدري وش يبوني اسوي ليش انا الي لازم اضحي بحب حياتي عشان اعطي بنت عمي حبها بكره يجيك الي ينسيك كايد.
نام كايد بعد ليلة غريبه من كلام هديل لانهيار ديم لخبطته لساره.
______________
طلع الصباح اخيرا قام كايد الي تروش وكشخ وتعطر وتبخر وهو يروح لجده وعمانه وابوه الي ينتظرونه وهو شاق الابتسامه: صرت جاهز.
جده وهو يقوم : على بركة الله .
وطلعو كلهم مشي لبيت سلطان الي بينه وبين بيت ابو كايد بس جدار .
____________
عند ديم الي صحت وراسها مصدع وعيونها حمراء وقامت جلست : ااااه وش فيني انهرت كذا يووووه ياديم حتى ثنيان قالها لي بصريح العباره انا خبله خبله .
وتتنهد وهي تناظر الساعه: الحين قد خطبوها وكايد طاير من الفرحه مايدري انها ماتبيه حرام مايستاهل ينكسر قلبه .
قامت وهي تشم بجامتها الي عالقه فيها بقايا عطر كايد ممزوجة بريحة نار وهي تبتسم: طلعت ريحة عمي سعود هي ريحتك ياكايد.
وتنزل بلوزتها وهي ترميها في سلة الغسيل وتتوجهه للحمام تتسبح.
_______________
عند هديل الي جالسه تنتظر كايد يرجع وتشوف وش صار : يارب انا قلت له عشان ماينصدم قلت له عشان يكون جاهز للرفض: يارب استودعتك قلب اخوي حبيبي.
وهنا تسمعهم يدخلون وتجي عند كايد الي دخل عند امه : هاه وش صار .
كايد كان زعلان منها ويتصدد عنها .
__
ديم بروب الحمام وهي تحط كريم لجسمها : انا وش سويت كيف بقابل امي وثنيان بعد الي صار ااااف .
وهنا يندق الباب وتروح تفتحه ويطلع ثنيان : جاي اطلعك نفطر برا.
ديم : لاتسالني شيى تكفى ماعندي اجابه لشي.
ثنيان ابتسم: ماراح اسالك بس البسي وانزلي تحت.
ديم قفلت الباب : ياويلي اول مره ثنيان يهتم فيني كذا الله ياخذني وش سويت انا وش هببت البارح يع يع صدق مراهقه.
وراحت تلبس ملابسها.
___________
عند كايد الي نزل وسلم على راس امه : كيفتس طمنيني عنتس.
امه وهي توقف: انتم خطبتو.
كايد وهو يطالع هديل بزعل : اي يمه خطبنا وعطونا.
امه حضنته : يابعد قلبي قلبك والله كبرت وبتعرس ياكايد .
كايد: باس راسها الله يطول بعمرتس يمه.
هديل : مستحيل توافق.
كايد لف لها بزعل : اطلعي من راسي احسن لتس.
هديل : البنت امس تقول لايحبني ولا احبه خلوني بحالي.
كايد : لو ماتبيني ماوافقت.
امه: يمكن مغصوبه.
كايد : لا يمه هو قال ان وافقت تراني عطيتك كان الله عطاك شاورها ووافقت.
امه: بس يايمه انا حامل وشلون بقوم بعرسك.
كايد: ابد مايصير العرس الا بعد ماتولدين وتقومين لي بالسلامه.
امه: ايوالله يمه دخيلك.
كايد: افا عليتس بس الي تبينه يصير.
هديل راحت للبنات بصدمه: عنود تخيلي ساره وافقت.
عنود بعدم تصديق: هه هه ههاي سخيفه تراء
هديل: والله انها موافقه.
العنود : بروح اساله بنفسي.
وقامت عند كايد الي كان واقف بالمطبخ يجهز شاهيه بنفسه.
العنود: خطبتو .
كايد: ادري ان هديل مرسلتس قلي لها كايد يقول عيب الي قلتيه ولاني مبسوط اليوم وانتي اختي واحبتس مسامحتس وماني بواقف عليها
العنود: بس كلام هديل صدق .
كايد: يمكن احرجتنها قامت صرفتكن عنها المهم الحين وافقت وبتصير حلالي.
العنود: مبروك يابعد الدنيا الله يجعلها مثل ماتبيها واحسن.
كايد : امين يارب .
عنود: شفتها طيب.
كايد : لا بس بشوفها بعد اسبوع الملكه وبطلب اشوفها لان قليبي متشفق لشوفة حبيبة الروح.
العنود : صارررووووخ بتعجبك .
كايد اخذ شاهيه وهو يروح للمقلط.
محسن وهذال مشو للمدينة.
_____________
عند ثنيان وديم بمطعم يفطرون .
ديم: بتخطب امل.
ثنيان: مو الحين .
ديم: ليه لايكون تضحك عليها.
ثنيان: لا اعوذ بالله مالقيت العب الا على بنت خالتي الا ابيها وميت عليها بس ادرس الحين مقدر اعرس.
ديم: اهم شي لاتكسر قلبها.
ثنيان : ابد مالك هم
___
بالديره
سوو التحاليل وطلعت النتيجه وحددو الخميس الملكه وصار استنفار في بيت ابو كايد وهم يجهزون وطلعت ام خليف وريم.
_____________
هديل : كايد نبي السوق.
كايد : متى.
هديل: الحين اذا ماعندك شي.
كايد : ابد اركبن ماعندي شي بس من انتن.
هديل: شقيقاتك وامك وغزل وترف ونجد وخالتي ام ترف.
كايف: يبي لكم جمس ابوي اجهزو على ماروح اخذ المفتاح واجيكم.
هديل كانت مبسوطه لكايد وبنفس الوقت مقهوره عند ديم الي ماتدري وش صار عليها . وراحت ركض لبيت عمها مشعل وهي تدق الباب بقوه ويفتح عمها مشعل مرعوب : علامكم فيكم شي.
هديل: لا ياعمي بس نبي السوق وبناخد خالتي البنات.
عمها: روعتيني الله يهب لتس عقل.
هديل : امين امين بس ناد البنات.
عمها: ذالحزه.
هديل: حلات السوق الصبح مايكون فيه زحمه.
عمها : ادخلي انتي ناديهم وتراهم رقود بشويش لاتروعينهم.
هديل : ازهل ياعمي الحلو بطبطب عليهم.
وتدخل وهي تهابد وتسحب اللحاف ويفزون بخوف ورعب : بسم الله وش فيتس روعتينا.
هديل: الي تبي السوق تقوم كايد يحترينا.
ترف قامت : الله ياخذك دخت حسبي الله.
هديل وهي تضحك : روحي قومي امتس بسرعه.
ترف راحت تصحي امها وهديل شالت لحاف نجد الي فتحت عيونها بكسل : هاااااه.
هديل :قومي بلا كسل السوق مره بس كايد مو رايح يوديك لحالك .
نجد قامت وهديل بنص الصالهه بسرعه بسرعه لانتاخر.
عمها كان يغسل ويضحك على خبال هديل الي الكل يموت فيها.
____________
عند كايد الي بالجمسً وازعجهم بالبوري ام كايد وام ترف ركبو وباقي البنات الي ماعندهم شي غير يراكضون من غرفه لغرفه وهديل الي لابسه نعالها برجل ورجل لا وتركض وهي شوي تنط وشوي تعرج واخيرا ركبو البنات وهديل اخر شي بس شافها كايد حرك بنذاله وهي تركض وراه .
امه: ياكايد حرام عليك وقف.
وهو مبتسم ويناظرها بالمرايه مابعد وقف وهي جت تركض وركبت : والله ماقوم بعرسك يالخايس.
كايد : لاتكفين خلاص والله لشتري لتس هديه.
هديل ماصدقت وهي تسمع طاري الهديه : سامحتك خلاص .
كايد: ابيتس تحوفين عرسي حوف.
هديل: ماعليك انا اخت العريس الكبيره وكل خواتي تحت رجلي.
العنود وشهد ضربوها: تعقبين .
كايد: كنتس تحمستي.
هديل: اقصد تحت امري.
العنود: برضه تخسين.
كملو الطريق وهديل ماسكتت طول الطريق مره هواش ومره ضحك
__
ناخذكم شوي لبيت سلطان ( ابو فيصل) راجعين من السوق
ساره الي جالسه مع امها : تدرين يمه مقهوره انه ماعندي اخوات الحين يجهزون معي وفرحانين فيني.
محمد: والله انتس متيه على النكد مالقيتي شي تحزنين عليه قلتي ماعندي خوات.
ساره: وش عليك انت عندك ٣ .
امها: قلي ماشاء الله واخوانتس يحبونتس وشايلينتس شيل.
ساره: المهم يمه وش رايتس بفستاني.
امها : وانتي تلبسين شي ماهوب زين .
ساره : تدرين يمه ماكنت ابي كايد وكانو يقولون متوحش وشرير بس يوم دريت انه شاعر عرفت ان الشاعر مايكون شرير ومتوحش وهو يعبر عن مشاعره بالقصيد عشان بكره يكتب لي قصايد وهو يتغزل فيني.
محمد: انا ابن ابوي ياقليلة الادب.
ساره وهي تخبي وجهها ورى فستانها : امزح امزح تكفى .
محمد طلع من عندهم وهو مبتسم وهي رجعت تقيس وتتفرج على الاغراض.
____________
عند محسن.
ثنيان: يعني انتي ياشوق ماتبين الملكه.
شوق : يارجال كنت اروح مع امي وديم بالغصب الحين ماراح نروح بنجلس في بيتنا.
ثنيان : ترا بنروح الاربعاء .
شوق: ماعليه بنكلم امل تجي عندنا.
ثنيان: لا كذا بتخليني اهون.
ديم: روح روح استانس عقبال مانزفك على اموله.
ثنيان : يارب اجل انا بمشي اما وبتال اهله هنا بالسوق ويبي يروح يشتري مجند ومسدس مع كايد.
شوق: رح انت بعد اكشخ وارسل لي صوركم.
ثنيان: بنزلها سناب شفيها بعدين.
شوق: طيب
وطلع ثنيان
__________
عند كايد الي قروشته هديل : وش بتشتري لي هديه.
كايد: خلصو واركبو السياره بعدها انزلتس تاخذين هديه.
هديل : ابيي خلخال عشان ارقص والاجراس تدق برجلي.
كايد : الخلخال وشنهو وين ينحط.
هديل: ينحط بالساق شفته بساق ديم بنت عمي عاد هي بيضا مثل القطن مو سمراء.
كايد طالعها وهو يدري ان كلامها مبطن: امشي امشي لا ابيعتس على الهنود ذولي الحين.
هديل ابتسمت وهي تلحقه وهم يدخلون المحل الي البنات وامهاتهم فيه.
__
خلصو البنات والامهات من السوق الا غزل مالقت شي مناسب وكانت مستحيه تقول لكايد انها ماشرت شي ركب كايد : هاه خلصتن.
العنود: اي.
كايد: بنات عمي مشعل وامهم خلصتن.
ام ترف: ايه خلصنا الله انه يوفقك ويجعل بكرك ولد.
كايد تشقق من الدعوه : امين .
وهو يلف لامه: حلوة اللبن خلصتي.
امه: ايه يمه الله يرضى عليك.
كايد: وعليتس يابعد قلبي انتي،،بنات خلصتو العنود هديل.
هديل: ايه خلصنا .
كايد كان بيقول غزل وغلط: ساره .
هنا خواته : اوووووه ساره هاه.
هديل: لاوالله راح اخونا الله يعوض علينا.
كايد وهو يضحك : تعرفين تسكتين .
هديل: طيب طيب سكتنا ساره هاه ياقليل الخاتمه.
كايد : غزاله خلصتي.
هديل لفت لغزل الا ماكانت شايله الا فلوسها بيدها : لا ياكايد ماشرت شي.
كايد: افا ليه.
غزل: مالقيت شي مناسب.
كايد: نروح محل ثاني افا عليتس.
غزل ابتسمت تحب اهتمام كايد الي ماشافته من شقيقها خلف ويقاطعها صوت كايد: الظاهر ذوقتس صعب ياغزاله.
غزل : شوي .
كايد وهو يوقف : انزلي.
هديل : وانا انزل
كايد وهو يصرفها: لا خليتس بالسياره احرسيهن لا يضيعن.
هديل: والله لنزل اشتري هديتي.
كايد: الله يعني عليتس انزلي انزلي.
ونزلو غزل وهديل.
____________
في بيت محسن.
ديم: شوق جوعانه وامي نايمه.
شوق: قومي نسوي شي ناكله.
ديم: يالله.
وراحو للمطبخ.
ديم: ابي اندومي.
شوق : اص لاتدري امي انا نهرب الاندومي.
ديم :اخاف تقفطنا.
شوق : شرايك ناخذ الدافور ونطلع بالحديقه عشان الريحه .
ديم: يالله تم.
وشالو اغراضهم وراحو للحديقه يسوون اندومي بالخش والدس.
——
عند كايد بالسياره بعد ماخلصو وركبو السياره.
هديل: حرك ليش واقف.
كايد: بتال بيجي .
هديل : يوووووه يازين الطاري بزوجه على ذوقي.
كايد الي كان مشغول وهو يدور بتال بعيونه : من بتزوجينه .
هديل : نجد بنت عمي مشعل.
نجد قرصتها بقوه وصاحت هديل: ااااخ اهبي مابيتس له وش هالقرصه يم قلب اسود.
كايد: هديل.
هديل: لبيه .
كايد: تدرين اني شايل هم رجلتس الي بياخذتس بيردتس ثاني يوم.
هديل : ماعليك رجلي بسوي عنده اني ناعمه وهاديه ويادوب ينسمع صوتي .
كايد : ايه هين صوت هادي قلتي.
هديل : اي وش يعرفك انت المهم انا بسال دامك غلطت باسمها.
كايد: ياليل ياهديل من يفكنا منتس الحين.
هديل: المهم اسمع لو تضارب بتال مع خوان ساره مين بتفزع له.
كايد: ماني فازع بناديتس تفرعين.
هديل: يوه كايد قل الصدق .
كايد: وش رايتس انتي اكيد مع اخوي.
هديل : ابشرتس يمه باقي فيه رجاء ماراح كله.
وهي ناسيه غزل : واذا كان خليف بتفزع له.
كايد وهو ذاكر غزل : ثاني مره تجلسين جمبي قدام عشان اسد حلقتس من قريب .
هديل: وساره تسد حلقها.
كايد : لا هي تسد حلقي.
وتضربه على راسه: خلاص يمه راح كله الله يعوضتس ببتال وسندً.
وهنا تشوف بتال الي تموت فيه : بتال يازين الوجه ياناس .
كايد نزل له وسكر الباب.
هديل : يمه احس ان ولدتس ولدي مو ولدتس.
العنود: والله انك خبله صدق مو صاحيه.
وجاء ثنيان الي بس شافته نجد قرصت ترف الي كانت تطالعه وهو واقف مع العيال .
__________
في بيت سلطان
عند ساره جاء ابوها وحضنها : والله انتس غاليه عليه وانا ابوتس ولو ماهيب سنة الحياة ماجوزتس خليتس عندي مير بيتهم عانيه الجدار بالجدار متى مابغيتينا تجينا.
ساره وهي تبوس راسه ويده: ابشر يبه
امها : ترى جملا وبناتها اجوديات وان شاء الله ان كايد مثلهن.
ابوفيصل: اي بالله عيال سعود كلهم ريجيل.
ساره : يبه تبي قهوه.
ابوها: لا بروح يم ابو سعود وعياله في المحل .
وطلع وساره رجعت ترتب اغراضها.
___
عند العيال بالمحل وهم يقيسون ويبدلون ويعدلون واخيراً .
كايد وهو يعدل مجند بتال : هاه وش رايك انا اشوفه مناسب.
بتال: لاتنسى تاخذ لسند.
كايد: لا ماعليك ماني بناسيه .
ثنيان : ياعيال اخذ اسود ولا بني.
بتال : مدري نعالك وش لونها.
ثنيان يطالع نعاله وكان لابس سبورت : ابيض.
كايد : يقصد الي بتلبسه يوم الملكه.
ثنيان ضحك على فهاوته : اييييه جزمه بني .
بتال: اجل خذ مجند بني.
ثنيان : عندكم مسدسات.
كايد: اي عندنا .
ثنيان : يبي لي واحد.
كايد: بعطيك حقي ماعليك.
بتال: خلاص كذا خلصنا .
كايد : باقي اخذ اغراض سند.
بتال: اي تكفى لاتخليه.
كايد: ولا اقول لك بخليه وبكره بجيبه معي ياخذ الي يبيه.
بتال: ليش بتجي بكره.
كايد: اي بجي انا وامي ناخذ الشبكه والدبل واغراض الملكه .
بتال : طيب انا بمشي تبي شي.
كايد : لا سلامتك انتبه لنفسك.
بتال: سلم على امي والبنات لو مابنات عمي مشعل معكم مريتهم.
كايد: وصل وصل ماعليك.
بتال: اسمع خذ اغراضي عطها هديل تشيلها عندها لين اجي وخذ لي ثوب من عندها فصل لي عليه.
كايد: تم.
ثنيان : الثوب فصله معي هنا عندي خياط ممتاز .
كايد : لالا حنا متعودين على خياط الديره انا بفصل له.
ثنيان: براحتك.
واخذ كايد اغراض بتال وراح لسياره.
_________
في بيت محسن .
ديم وشوق جالسين ياكلون الاندومي بالحديقه
شوق: الحين بسالك وش عاجبك بكايد.
ديم عقدت حواجبها : يوووه ياشوق خليني اكل .
شوق: اكلي محد ماسكك بس جاوبيني وش عاجبك فيه.
ديم: مدري احسه لغز وانا حله.
شوق : اااخس تقولين كلام اكبر منك.
ديم: احب جموده احب عقدة حواجبه احب بدواته احسه مايعرف خرابيط الشباب نظيف من داخل يعني مثلاً ثنيان ختم كل البنات مابقى احد ماكلمه بس كايد لا مستحيل يكلم احد.
شوق: وش عرفك
ديم: لانه ولد الديره لانه البدوي الي يغار على بنات الناس مثل خواته.
شوق: بس تراه مايناسبك ابد .
ديم بضيق : راح تتهنى فيه سوير.
وهي تحط الصحن وتقوم.
شوق: ماكلتي صحنك زي ماهو.
ديم: انسدت نفسي بطلع انام .
شوق : لا تعالي بالله .
ديم: والله مالي نفس.
وطلعت بدون ماتاكل وشوق تلوم نفسها انها فتحت الموضوع معها وهي تاكل
___
بالديره تحديدا في بيت سعود.
ريم: غزيل فازغه معهم مصدقه نفسها اخت المعرس.
امها: خليها تجي دواها عندي والله لقطع فستانها .
ريم: يمه صدق بيسوون ملكه مو مهتمين فيك وانك تعبانه.
امها: هي في  بيت سلطان لو انها عندنا ماسووها من ذالراس.
ريم: مانيب رايحه بقعد معك.
خلف: من خطب كايد.
ريم: ساره .
خلف بعصبيه: ومالقى الا ساره قلو بنات الديره.
ريم: لاتكون انت تبيها.
خلف: اي ابيها وهي تدري وبيننا رسايل.
امه : اص اص لايسمعك جدك والله ليهدم البيت فوق راسك.
ريم: خلف مافيه الا انا وامي اسالك بالله انت كلمتها.
خلف: وشايفها بعد سمراء وشعرها طويل متوسطة الطول.
امه مسكت راسها:  يالله لايربحك ولا يربحها معك يوم انها تبيك ليش ماعلمتنا.
خلف: والله لربيها كيف توافق على كايد وانا ابيها وهي تدري.
ريم: اكيد فيه شي خلاها توافق على كايد يا انها تضحك عليك من الاول ولا شافت بكايد شي ماهو فيك.
امه: صار شي بينكم.
خلف: لا يمه وش هالكلام بس اكلمها على الباب وشفتها كذا مره تطل عليه.
امه : خلاص اص اص ماهيب نصيبك ماهيب نصيبك قليلة الحياء الحمدلله الي فكك منها وصبها بحلق كايد اياني وياك تفتح فمك بكلمة فاهم ولالا هذا ذنبي ذنبي اووووه عساها بداية الفضايح
_______________
عند كايد بالسياره.
كايد ركب وهو يقفل الباب ويعدي اغراض على هديل ورى بدون مايلتفت: هديل امسكي.
هديل بحماس: وشو هديه ثانيه.
كايد: يابنت الحلال اغراض بتال.
هديل عاد تخق مع طاري بتال: وليدي حبيبي يازينه يمه تكفين لاتزوجينه .
وتفتح الكيس: فيه علبه وش .
كايد  تلخبط : هاتيها هاتيها لاتفتحينها.
هديل: قد فتحتها خلخال  لسوير ياغشاش ليش تقلدني .
كايد يمد يده : هاتيه ياحبتس للقافه .
هديل: والله انك غشاش احلى واكبر من حقي.
كايد: عن الحسد عاد حقك اخذتيه بيدك.
هديل : اي ماكنت ابي اكلف عليك.
كايد: ماعليه نعوضك مره ثانيه.
ام كايد: كايد.
كايد لف: سمي.
امه: بتال كيفه.
كايد: طيب ماعليه مبسوط.
هديل تفكر  بصوت مسموع : يافرقى ياسوير صدق .
كايد: خلتس من سوير وش تبون تاكلون.
هديل: ابي اكل خلخال سوير.
كايد: ياليل النشبه صدق.
العنود: ماعليك منها شوف لنا اقرب بوفيه جيب عصاير وفلافل ومويه.
هديل: ودنا مطعم تكفى.
كايد عصب : مايخسي الا انتي اوديك مطاعم  المطاعم ماهيب لكن
سكتت هديل بخوف.
___
في الديره تحديداً بيت سعود وقف كايد الي وصل لديره هو ومن معه نزل وهو يتمغط من الم الجلسه الطويله خلف الدركسون .
: انزلن انزلن وينها هديل الي رقدت بنص الطريق .
هديل فتحت عيونها وهي تتلفت: وصلنا
العنود: اي انزلي نملت  رجولي منك قومي عني .
صارو يجمعون اغراضهم يتهيئون لنزول .
ويقابلهم سند زعلان وهو يضرب كايد الي يتصدد عنه : ليش ماخذتني ليش خليتوني راقد.
كايد: باخذك بكره وعد بس اهجد فضحتنا .
سند وهو معصب : الله يجعلك ماتعرس ياكايد ياولد جملا.
امه الي خافت من دعوته وهي ترمي عليه حجر : اهيب ولا تسدك ياقليل  الادب تدعي على اخوك.
وسند يركض بعيد وهي يتحلطلم
كايد وهو يبوس راس امه : خليه يمون ابو سعود.
سند من بعيد : ابو تبن ماني ابو سعود .
نزلت ام ترف وبناتها وهم يتوجهون لبيتهم ويدخلون يقفلون الباب وكايد الي شاف ان سند زودها يشمر ثوبه ويعضه  وهو يلحق سند  ونعاله الي طارت من رجوله  وسند محناش وكايد يطرده .
_______________
في بيت محسن
صحت ام ثنيان العصر وهي تروح لغرفة ديم : بتروحين معي السوق ناخذ فساتين للملكه.
ديم الي كانت تشوف مسلسلها وكانت تصيح : لا يمه مانيب رايحه.
امها شافتها تصيح وجت عندها وبخوف : ليش تبكين.
ديم الي كانت جالسه على السرير  وقفت على ركبها وهي تمد شفتها السفليه بزعل وهي تبكي وتحضن امها: البطل زوجو حبيبته واحد ثاني..
امها دفتها بقوه : هذاه الي خربك وخلاك تخيلين هالبدوي ولد الديره بيطل بوجهك خيالاتك مع هالاتراك.
ديم : كوري يمه مو تركي .
امها اخذت ايبادها وهي ترميه على الارض : هذا الخراب.
ديم كانت تطالعها بصمت وبس طلعت امها نطت تشوف ايبادها الي مافيه ولا خدش : اووه اشوى اني حاطه له حمايه .
ورجعت تكمل المسلسل.
وامها توجهت لشوق وبعصبيه: وانتي بتروحين معي ولالا.
شوق خافت منها: الا الا بروح ابشري بس البس عبايتي.
____________
عند كايد الي مسك سند وهو يعامله وكأنه باقي طفل  شاله على كتفه وكل الاثنين بالقوه يتنفسون وسند كان يصيح : نزلني نزلني ماني بورع عندك.
كايد شاله الين دخله البيت وهو يعانده: هاتس يمه جبت لتس ورعتس.
سند صار يوجه له لكمات ببطنه وكايد يتبسم وهنا جاء جدهم : وينكم نهارنكم الساعه ٤ .
كايد : دوبنا ياجدي وتعرف الطريق ساعه ونص رايحين وساعه ونص جايين.
جده : ايه وعساكم خلصتو.
كايد: لاوالله باقي برجع انا وامي بكره.
هديل : وانا بعد.
جدها الي نقد عليها: الظاهر انتس تبين العرس.
هديل الي دنقت : لا والله مابيه.
ودخلت جوه وهي ودها الارض تنشق وتبلعها.