انا احبك مابها زيف وخداع رغم الذي نخفيه والي نخافه

بارت ٤

صار وقت الروحه للعزبه صار بتال يشيل بالاغراض
هديل : بنات ترا مافيه سياره ابوي وجدي وعماني راحو مع خلف وبتال سيارته بالمدينه وكايد وثنيان كل واحد خذا سيارته وراحو باقي بس بتال سيارة ابوي يقول اذا موافقين اخذكم بالحوض وامي وخالتي ام ثنيان وخالتي ام ترف معاه بالغماره.
ترف : احنا متعودين شوفي بنات عمي محسن.
ديم : انا موافقه ابي اجرب ركوب الحوض.
شوق بشوفة نفس : يع احس لا مقدر .
ديم : اجل خليك بالبيت لحالك.
ركبو الامهات قدام بالغماره والبنات بالحوض وشوق الي لو مابتجلس لحالها ماركبت بالحوض .
هديل : ديم تعالي ابي اوريك حركتي الشهيره.
ديم : تم وريني .
هديل: فلي شعرتس وتمسكي بهالحديده وانتي واقفه من هاه تمسكي مضبوط لان بتال بيفحط بنا .
وتدق التنديه(سطح السياره) : بتال فحط بنا.
بتال : امسي ياهديل.
هديل: تكفى بتال ماحد فيه .
بتال : يابنت الحلال تبين امي .
وقبل يكمل تضربه امه على راسه : سق وانت ساكت.
طبعا بتال ماكاه يدري انها حامل بس مرعوبه
بتال لف يطالعها: يمه علامتس .
امه : حرك حرك.
حرك بتال وبس بعدو عن البيوت وصار ظلام شوي هديل الي تدق التنديه: يالله بتال تكفى فحط بنا .
بتال : يالله تمسكن والي تطيح تراني بخليها تاكلها الذيابه.
البنات انخرشو شوق الي صارت تبعد عن الطرف : من جده ذا.
هديل وديم وترف الي واقفين متمسكين يتنظرون تفحيط بتال طبعاً هو مو يفحط ينطل على قولتهم اخف من التفحيط وترف وهديل متعودين على هالحركه بس ديم اول مره صار بتال ينطل فيهم والبنات يضحكون ويصرخون ويطيحون فوق بعض
ام كايد: يابتال ذبحتنا انت علامك.
ام ترف: والله ماخبل منك الا البنات وانا خالتك.
ام ثنيان: خلوهم ينبسطون وش فيكم عليه .
بتال الي اكتفى بالضحك .
وبعد مرور شوي من الوقت هديل : اجلسو اجلسو لفة العزبه .
جلسو البنات وعدلو حجاباتهم وتسنعو .
نزلو البنات لخيمتهم وامهاتهم وصارو العيال ينزلون الاغراض.
ديم : بنات برد ولا انا فيني شي .
هديل : الا برد.
ديم : انا لابسه بجامه بعد.
هديل : لايشوفتس جدي ينحرتس.
جلست ديم الي كانت ترجف من البرد وحاولو يدفونها بس مافيه شي يدفونها فيه .
ام كايد راحت يم عيالها : ياعيال الجو بارد معكم شيٍ ثقيل فريكم معكم
بتال: لاوالله يمه فروتي بالبيت
كايد : الا فروتي معي ابشري بسعدتس ..
ويتوجه لسيارته ياخذ الفروه ويعطيها امه الي توجهت للخيمه
__
عند ام كايد الي عطت ديم فروة كايد وعشان ماتحرجها قالت انها فروة عمك: هاتس وانا خالتس فروة عمتس سعود.
ديم خذتها ولبستها : ياي خالتي يمكن عمي يحتاجها.
ام كايد: لا لا ماعليتس جبتها من السياره لو يبيها ماخلاها بالسياره.
ديم قامت : عن اذنك خالتي خليني اروح للبنات اشوف وش يسوون .
خالتها : الي تبينه .
ديم قامت وتوجهت للبنات : وش تسوون بدوني.
هديل لفت وشافت فروة كايد : الله من وين جبتيها .
ديم : فروة عمي سعود خالتي جملا جابتها لي.
هديل : اااهااا فروة ابوي.
العنود دقتها تسكت وسحبت هديل ديم بطرف الفروه: اجلسي اجلسي.
ديم جلست وهي تشيل طرف الفروه من عند صدرها وهي تشمها : والله ريحة عمي سعود تموت .
هديل بعباطة : وش ريحة ابوي.
ديم وهي تشمها : ريحة عطر مع شبة النار عاد ياويلي جابت راسي .
ترف كانت عارفه انها فروة كايد بس سكتت عشان ماتحرجها وتنجبر تنزلها وديم كل شوي ترجع تشم الريحه وتمدح وهديل بالقوه ماسكه نفسها وهي تعلق تعليقات جانبيه مع العنود .
__
عند العيال الي يحوفون القهوه على شبة النار.
ثنيان ماكان يتحمل النار : ياعيال حرقتني كيف تتحملونها كذا.
بتال: عيال الديره حرشان ضد الحراره
كايد : خليتنا ضبان يابتال .
ثنيان : ههههههههه محشومين ياولد عمي.
بتال يصب قهوه لثنيان : هاك هاك انت تحب قهوه العزبه.
ثنيان : ايوالله لو تنباع بالكوفيهات تلاقيهم طوابير عليها.
كايد : والله ياغير القهوه السعوديه ماتنشرب.
ثنيان : تعال عندي واخليك تغير كلامك.
كايد: ابد لان مغير رايي ولا شي قهوتنا مامثلها.
بتال: ايوالله بهاذي صادق .
هذال : سند وينه.
كايد: تلقاه يدوج يدور عقارب ويذبحها هاذي شغلته من يوم هو صغير كل ماجينا للعزبه.
ثنيان: ياولد انتبهو له لاينقرص.
بتال: والله انه حتى الثعابين يذبحها.
ثنيان: احس سند سابق عمره عقله اكبر منه.
بتال: اي بسم الله عليه .
هنا سمع كايد امه تنادي : قهوتك وينها ياكايد
كايد : يالله يالله جايك.
قام كايد وهو يشيل الدله ويتوجه لامه الي شافها لابسه فروته وتغسل يدينها من الوايت وكان فيه شوية ظلام كايد يحاوط رقبتها بيده ويبوس خدها : تبين قهوتي اجل.
طبعا كايد المعروف عنه دايم بفمه عود اسنان عاده يعني واذا جاء يبوس امه يغز العود بخدها وهي تهاوشه وتسفل فيه
عند كايد باس خد امه : تبين قهوتي اجل.
وسمع شهقتها بس حست بالعود بخدها وهي تلف تطالعه وانصدم لما لفت وكانت ديم الي دفته بسرعه وطاحت الدله الي حرقت يد كايد الي ماحس بالالم من كثر ماهو متفشل ومنصدم بعد وهو يشوف ديم لابسه فروته صد عنها وهو يقول بصوت مهزوز ومحرج : انا اسف اسف انا..
وقبل يكمل كلامه يسمع شهقتها وهي تبكي وتركض للخيمه قابلوها البنات ودخلوه الخيمه : وش فيك. ليش تصيحين.
ديم كانه بس تشاهق وتصيح.
هديل شافت كايد واقف عند الوايت وهو يناديها وجات عنده : تعالي هنه.
هديل: هاه علامك ياخي خلوني ارتاح منكم ااااف.
كايد سحبها باذنها عنده : يوه ياكايد بشويش اذني ابيها.
كايد : مين الي لابسه فروتي .
هديل : ديم ليش لايكون تحرشت فيها.
كايد تنهد : ياليل وش هاالليل بعدين تعالي وش عرفك بالتحرش.
هديل تورطت: ياخي مدري.
كايد: دواك عندي بعدين بس اسمعي ابيك تروحين تعتذرين لي منها.
هديل : علمني وش سويت اول شي.
كايد: مالتس بلي سويته بس فيه بيتين شعر ابيتس تقولينها لها.
هديل : ياعيني ياعيني حتى سويره ماقلت لها شعر.
كايد: اولاً املي فمك وقلي ساره ثانياً ديم. غلطت بحقها واصدق اعتذر الشعر ولاديم اعدها وحده منكن ماني يمها يابنت الحلال.
هديل تنهدت: ااااخ بس هات هات البيتين .
كايد: قولي لها كايد يقول :
ياحفيدة من توضى بالفعول وكبّر
‏ اعذري كايد عن الي صار و بدر
‏الخطاء وراد وانا كلي عذر
سقت لك عذري ولا ودي شكر .
هديل: ياعزتي لتس ياديم.
كايد دفها : طسي طسي بسرعه .
هديل : طيب لاتدف ياخي ماني بصغر عيالك
‏وراحت هديل عند ديم الي تصيح من الفشله وجلست جمبها والبنات حواليهم .
هديل : بنات خلونا لحالنا روحو عند النار .
راحو البنات ولفت هديل لديم: كايد ناداني.
ديم لفت لها بصدمه وهي تمسح دموعها .
هديل : وش فيتس متروعه ماهو ماكلتس انا مدري وش قالتس يمكن ضربتس يمكن هاوشتس.
ديم تطمنت انه ماعلمها بلي صار واردفت هديل: ارسل لك بتين شعر معي .
ديم كان شوي ويوقف قلبها من الي صار ومن كثر ماهي مستحيه ماسالتها وش البيتين.
هديل حطت يدها على صدر ديم : يمه قلبك يرقع امانه امانه وش قالك تكفين لاتاخذين عنه فكره تراه ماهو متوحش مثل مايقولون بس تعرفين مزح العيال ثقيل عاد كايد مايعرف يمزح نتف شوشتي من كثر مايسحبني ويقول امزح.
ديم انفجرت ضحك وجهها منفوخ وخشمها احمر وكحلها سايح ومع ذلك كانت ايه بالجمال.
هديل : ماتبين تسمعين وش ارسل لتس كايد.
ديم ابتسمت: الا قولي.
قالت لها هديل البيتين وديم بس سمعت البيتين ابتسمت وهي تمسح دموعها : قولي ديم تقول ادري انه مفكرني وحده من خواته خصوصاً اني لابسه فروة عمي.
هديل كان ودها تاخذها رايح جاي طقطقه وتقول لها ان الفروه لكايد بس سكتت لان ديم مو ناقصه احراجات.
هديل قامت : اجل بروح له ينتظرني عند الوايت .
ديم : طيب.
وراحت هديل وضربته بكتفه ولف بسرعه وانخرشت هديل: بسم الله بشويش جيت بروعك وروعتني.
كايد: وش قالت .
هديل: مين تقصد.
كايد كان يشوف اسم ديم صعب ويضيعه : بنت عمي محسن .
هديل قامت تستعبط: اي وحده فيهم.
كايد سحبها باذنها : ماهو وقت خبالك ياهديل.
هديل بعدت : طيب طيب اذني هالضعيفه صارت اكبر من الثانيه من كثر ماتسحبني فيها.
كايد قفل عيونه بعصبيه: الله يعيني عليتس بس اخلصي بروح للعيال ينتظروني.
هديل : طيب طيب بقول
كايد: اخلصي
هديل: تقول ادري انه غلطان ويحسبني وحده منكم خصوصا اني لابسه فروه عمي.
كايد باستغراب: فروتي هاذي.
هديل: ندري بس امي قالت هاذي فروة عمتس سعود عشان ماتعيي عنها.
كايد : امم خير ان شاء الله اول ماتاخذينها منها اغسليها مبي تعلق ريحتها فيها.
هديل: ليه خايف تجيب راسك.
كايد رجع سحبها باذنها: لا طبعاً بس بنت ماهي من محارمي شلون تلبس فروتي .
هديل: تقدر تحطها من محارمك طيب.
كايد بقهر : ياويل كايد ويلاه انتي كيف تفهمين هاه.
هديل : امزح بس اترك اذني لو سمحت .
تركها كايد : انقلعي يالله.
هديل : مو كل مره تسحبني باذني اليسار ياخي اوزن الامور مره اليسار ومره اليمين على الاكل يكبرون سواء .
كايد : والله انتس انتي الي تموتين ماكبرتي .
وراح لقسم الرجال وهديل رجعت للبنات
____
عند العيال.
ثنيان على جواله ويضحك فجاه: ياخي البنات عقوبه.
كايد: ليه
ثنيان: ديم تقول السهره عليها هي وترف بنت عمي مشعل ويبوني اسري البقاله.
كايد: وين المشكله .
ثنيان : والله مالي جلاده .
بتال: ترف ماعندها اخوان يعني مافيه الا انت دام اختك شريكة السهره.
ثنيان : قلت لها ماني برايح.
كايد: اجل انا الي بروح.
هذال: وانت وش دخلك .
كايد : ترف اختي والي تبيه نجيبه .
هذال قام : اجل انا معك.
سند : وانا بعد بقضي لترف بنفسي.
كايد ابتسم من كلام سند : يالله قم مشينا وانت ياهذال .
توجه لقسم الحريم ياخذ ورقة ترف وديم.
___
البنات الي يسولفون.
ديم : بنات ثنيان عيى يروح البقالة
ترف: يوه مو حلوه السهره بدون خرابيط.
ديم: هو كذا ثنيان نرجسي مايهمه الا راحته
ترف كان قلبها يرفرف من تسمع طاري ثنيان.
هديل : اجل ياديم ريحة ابوي اعجبتس.
ديم ابتسمت : اي تدرين عاد اول مره احس للحنان ريحة شميته بفروة عمي.
هديل : ياعزتي لتس بس.
ديم : ليه تقولين كذا.
قبل تتكلم هديل سمعت صوت كايد ينادي وقامت راحت : هاه ياعقوبه وش تبي.
كايد : هاتي ورقة ترف بروح اقضي لها.
هديل: الله اكبر عاد لو هي انا مارحت.
كايد: عن الكذب عاد ورحي جبيها.
سند: قولي سند يقضي لتس.
هديل: والضعيفه ديم مين بيقضي لها اذا اخوها هلامه.
كايد: عيب تقلين عن ولد عمتس هلامه وانقلعي جبي الورقه.
هديل : زين زين لاتدف بروح.
____
ترف: لو اقول لابوي راح يجيبها بس مابيه يروح حرام برد.
هديل: مافيه داعي تقلين له كايد جاي بنفسه يطلب ورقتس انتي وديم.
ترف بابتسامه: اما
هديل بدقه : اي المتوحش المفترس
ترف : هو عن متوحش متوحش .
هديل: انتي مانتس وجه حشيمه.
ديم: خلاص خلاص بدون مضاربات خذي .
هديل خذت الورقه وراحت لكايد: هاك وانا تعرف وش احب.
كايد : والله ماعرف بتال الي يعرف مو انا.
هديل : ااااف بس قول معي .
وجلست تعد له وش يجيب لها وراح كايد هو وسند لهذال الي ينتظرهم بالسياره.
__
عند الشيبان.
الجد كايد : الا يابو كايد وش رايك نخطب لكايد ونجوزه .
ابو كايد: الي تبيه يبه يصير
الجد : شورو عليه من. تبونا نجوزه.
مشعل: بناتنا صغار جوزه من بنات الديره.
الجد يفكر شوي ويلتفت لسعود: وش رايك في بنت سلطان .
سعود: ساره.
ابوه: ايه هي وحيدة اهلها ماله بنات غيرها والباقي عيال.
سعود: ايه ايه ادري .. والله سلطان ونعم فيه وهي متربيه مع كايد ويعرفها وتعرفه ولانا بلاقين احسن من نسب سلطان.
الجد: اجل نادو كايد .
مشعل: ايوالله لازم نشاوره.
الجد بعصبيه: منهو الي نشاوره تبى تخرب طبعهم ماعندنا مشاور حنا نخطب له وهو يعرس بس.
سعود ومشعل: ابشر ، الي تبيه يبه.
الجد: قم ياسعود ناد ولدك.
قام سعود وتوجه للعيال الي فارشين بعيد شوي عنهم ويلعبون ورقه.
—
عند الحريم.
ام كايد: ياخواتي انا بعلمكن بقصتنٍ جرت عليه مير لا تزرون عليه(يعني لاتنقدون عليه)
ام ثنيان : لا ان شاءالله مانزرى عليك.
ام ترف: وش انتي مسويه اخبرتس اجوديه.
ام كايد: هاه العلم مايطلع من بينا توحن ولا توحن.
ام ثنيان: اخلصي ياجملا هاتي علمك.
ام كايد وهي مدنقه بفشله: انا حامل.
ام ثنيان انهارت ضحك وام ترف ردة فعلها نفس ردة فعل ام كايد: يافضحتس فضحاه وانتي صاحيه ولا مجنونه يوم تحملين بعد ذالعمر.
ام كايد: والله يختي مدري مير ان وش اسوي شورن عليه.
ام ثنيان: انتن علامكن وش فيها لاحملتي عيب ولا حرام.
ام ترف شهقت: اي بالله عيب تحمل ذاكبرها الحمل على كبر ماهوب زين وان اختس.
ام كايد: والله اني مدري كيف اعلم سعود بينقد عليه.
ام ثنيان: ياسلام بينقد عليك اجل يوم انه مايبيك تحملين لا يقرب منك.
ام كايد : واخليه لنوره والله ماقاله الله .
ام ثنيان: تعالو تعالو نتمشى شوي برا الجوء براد.
قامو وام ترف وام كايد يتحلطمون وام ثنيان ناقده عليهم.
_____
عند البنات
هديل : ديم بيني وبينك كذا لو خطبناك لكايد بتوافقين.
ديم انحرجت : يوووووه ياهديل وش هالكلام .
هديل: علميني والله لسعى لك فيه اذا تبينه.
ديم بلعت ريقها بتوتر : الصدق اني استلطف كايد احس اني اعرف له الكل يشوفه صعب انا اشوفه شفاف.
هديل : يعني تحبينه.
ديم الي ماقدرت تبوح بمشاعرها بشكل مباشر خصوصا انها تدري انه يحب ساره : مو حب بس مشاعر حلوه.
هديل: طيب ترا الفروه حقته الي عليتس مو حقت ابوي .
ديم توسعت عيونها : يعني الريحه الي بالفروه ريحة ...
هديل تهز راسها بالايجاب : كايد
ديم بدون ماتحس : عشان كذا باسني.
هديل بصوت عالي : بااااااسك .
ديم نطت وقفلت فم هديل بيدها: اسكتي فضحتينا .
هديل تبعد يد ديم وهي ترخي صوتها: كايد باسك.
ديم هزت راسها : اي .
هديل ضمتها وهي تدري ان ديم رايحه وطي : ياعمري يابنت عمي الله لايكتب له غيرتس نصيب.
ديم بعدت : بس هو يحب ساره .
وقامت وهي تنزل فروته.
هديل : خليها ليش نزلتيها.
ديم صار وجهها احمر : احتريت خلاص.
وجلست وهي تهوي وجهها بيدها وتستنشق الهواء وتزفره بقوه.
هديل مسكت يدينها : ترا ادري تحبينه .
ديم طالعتها وعيونها مغروقه : تكفين لاتنشبينه براسي .
هديل : على اساس مانشب.
ديم قامت وهي تهب برا الخيمه بخطوات سريعه وهديل تلحقها وهي تدري انها ضاعت بس عرفت ان الريحه الي طول الليل
طلعت ريحة كايد وهي تشوف ديم الي انفجرت صياح بحرقه
__
عند كايد الي رجع وهو جايب اغراض البنات وينادي هديل الي كانت متوجهه لديم تواسيها ولفت ورجعت لكايد الي كان مروق: خذي جبت لتس اغراضتس شفي اذا ناقص شي.
هديل كانت وقتها كارهته مع ان ماله ذنب بلي صار وهي تسحب الاكياس من يده بنظرة حاده: هات.
كايد : انتي من مزعلتس.
هديل وهي تسحب باقي الاغراض: انتم يالرجال عقوبه الله ياخذ حقنا منكم.
كايد ابتسم: اخس يالزعول ماعرفتس بعدين وش جاتس عشان ياخذ حقتس منا ماتعرفين غير ابوي وجدي وانا سند وبتال.
هديل : اااااخ بس .
وهي تلف بتروح ويمسكها بيدها : من زعلتس قلي الصدق.
هديل: انت بس لاتسالني كيف لاني حتى انا مدري كيف.
كايد ترك يدها وهو مبتسم بصدمه : خبله ماتدري وش قاعده تقول .
وراح للعيال الي زفو له بشارة خطبتة من بنت سلطان كايد الي توسعت عيونه بفرح: قل والله يابتال.
بتال: ايوالله ابوي جاء يبيك ومالقاك.
كايد انطلق يم جده وابوه يركض واول مادخل باس راس جده: سم ياجدي يقولون تبيني.
جده : اقعد اقعد.
كايد جلس وهو يتنفس بسرعه فرح : سم
جده : انا وابوك وعمانك تشاورنا وقررنا نجوزك انت تبي الجواز ولالا.
كايد: الي تشوفه ياجدي.
جده: الي تشوفه انت مانبيك تفضحنا عند الريجيل بكره يجوزونك بنتهم وتفضحنا فيهم.
كايد ابتسم: لا ماعليك ياجدي رجال واعجبك.
جده: على بركة الله بكره ان شاء الله نفطر عند سلطان ونخطبها لك قدام يمشي عمك محسن للمدينه.
كايد نط وهو يبوس راس جده بفرح وباس راس ابوه وعمانه : الله يخليك لي ياجدي .
سعود: بس جدك.
كايد: وانت يبه الله لايغيب شمسك .
ضحكو عمانه وابوه من حماسه حتى جده ابتسم وكايد طلع للعيال يركض وهو متشقق من الفرحه : ياعيال بيزوجوني ساره ياعيال.
ثنيان شك بفرحة كايد ان فيها شي : انت تبيها من قبل .
بتال :اي ميت عليها عنده دفتر كله شعر ودواوين من يوم هو صغير يحبها وهي ماتدري.
ثنيان: ليش ماعلمتها وخليتو قصة حبكم اسطوريه.
كايد: ماهو كايد الي يكلم بنات الرجال من ورى اهاليهم حبيتها وجيتها من الباب.
سند : يارب اكبر واجي عمي مشعل من الباب.
ضحكو العيال وهم يطقطقون على سند.
_
عند ديم الي جاتها هديل بعد ماخلتها لحالها تصيح وتفرغ مشاعرها الي حتى ديم ماتدري ليش صاحت هديل: هديتي.
ديم صارت تمسح دموعها وهي تكتف يدينها وتلمها : بردت ياهديل.
هديل: تعالي تعالي.
ديم: فروة كايد مابيها.
هديل: لا لاتخافين وديتها سيارته وجبت لك فروة ابوي صح قديمه بس ماعليه .
ديم دخلت وقامت شوق بخوف وهي تجي عندها : وش فيك ياديم ليش تصيحين.
ديم حضنت شوق وكملت صياح وشوق مفجوعه : وش فيك .
هديل : فيه كلب نبح عليها وخافت.
شوق عاد ماتطيق الديره: قايله لكم بلاش العزبه عصيتو هاذي الديره الي تنتظرين الويكند عشان ننزل لها اااف بس تعالي تعالي .
واخذتها وراحت لسيارة ثنيان وركبو فيها وهديل جلست بقهر: اما تحب الديره وتنتظر ينزلونها شكلتس ياديم طحت من زمان ماحد عنده خبر الله يجعلتس السلال يم خليف.
ترف: ههههههههه وام خليف وش دخلها الحين.
هديل: كيفي بدعي عليها اصلاً يقولون بكره راجعه البيت ااااف بس متى يجي فارس احلامي ياخذني لو على حمار انا راضيه اهم شي افارق خليف وامه.
غزل كانت جالسه ماقالت شي لانها تعرف لسان هديل ففضلت السكوت
وهنا سمعو صوت بتالي ينادي
هديل : قومي ياعنوي شوفيه تعبوني خوانك..
العنود انصدمت من هديل الي دايم تسابقها على خدمة خوانها وراحت تشوف بتال:هلا بتال وش فيه.
بتال : تخيلي وش صار.
العنود: وش صار
بتال: جدي بكره الصباح هو وابوي وعماني بيخطبون ساره لكايد.
العنود توسعت عيونها لانها تدري ان ساره ماتبي كايد حسب كلامها امس عنه وراحت تركض للخيمه قبل ترد على بتال الي ماهتم لردة فعلها فكرها مبسوطه وراح للعيال
العنود: هديل هديل .
هديل الي جالسه عند النار لفت بخوف : هاه .
العنود جلست : بكره الصباح بيخطبون ساره لكايد.
هديل نطت واقفه: قلي والله.
العنود : والله .
هديل راحت يم العيال ومسكتها العنود وترف: وين رايحه.
هديل: بترفضه بترفضه بتكسر قلبه.
العنود: مو قلنا خليها ترفضه خل ينكسر قلبه وينسى مو ذا اتفاقنا.
هديل الي كانت دوج بالخيمه وهالمره هي الي ودها تصيح من قهرها.
_____
عند العيال قام ثنيان : يبي لها اغاني ولعب ياعيال.
بتال: ايوالله صادق.
كايد: قدام نلعب ليش مانلعب.
ثنيان : بروح اقدم سيارتي عندها واشغل لكم رفيحي.
كايد: عاد خاطري باللعب وجاء وقته
بتال: عجل علينا.
_____
عند ديم وشوق الي بسيارة ثنيان ياكلون شبس وغازيات جاء ثنيان وهو يفتح الباب: وش عندكن هنا.
شوق: ابد ماعندنا شي .
ثنيان: ابي سيارتي .
ديم: ليش.
ثنيان: بنلعب رفيحي.
شوق : الله خل نشوفكم من هنا بس غريبه وش طراه عليكم.
ثنيان : كايد بكره بنخطب له ساره .
هنا ديم شرقت وصارت تكح بقوه لدرجه فزع لها ثنيان وهو يفتح الباب وينزلها ويربت على ظهرها : خذي نفس انتي وش فيك الله يهديك انتبهي .
واخذ مويه : هاك اشربي مويه .
ديم نزلت دموعها الي ماتدري قهر ولا من الشرقه وهي تتنفس بعمق: خلاص خلاص راحت .
ثنيان فتح سيارة ابوه : تعالن هنا.
نزلت شوق وخذت اغراضهن وطلعت هي وديم لسيارة ابوهم وصارو يشوفون العيال الي شغلو الشيله وصارو يلعبون رفيحي
ديم كانت تشوف كايد لي رامي شماغه على متونه وهو يلعب رفيحي مع ثنيان الي متقنينه وباقي العيال يحيونهم ويهيصون .
كانت ديم مكتفه يدها اليمين وهي سانده كوعها اليسار عليه ومجمعه كفها اليسار الي حاطته على فمها وهي تناظرهم بقهر عكس شوق الي كانت مستمتعه وهي تطالعهم : والله كايد يلعب فكرته بس ثنيان.
ديم ماكانت ترد ولا انتبهت لدموعها الي كانت ماخذه مجراها من خدها الا لما قالت شوق: بنت وش فيك دموعك اربع اربع.
ديم انتبهت لنفسها وهي تمسح دموعها: لا بس من الشرقه دموعي لسى تنزل.
وتفتح الباب وهي تنزل وتركض عند امها الي كانت واقفه وتحضنها وتصيح : يمه خذيني من هنا تكفين.
امها وجملا وام ترف انصدمو وهم يهدونها ويسالونها وش فيها وهي بس متشعبطه بوسط امها وتصيح : يمه خذيني بيتنا يمه.
امها: بكره نمشي بعد الفطور.
ديم: طلبتك يمه سرينا تكفين يمه ماعاد ابي اقعد بالديره.
امها: ايه وش فيك مو انتي الي تموتين بالديره كل خميس تقولين هيا الديره وش الي جاك الحين.
ديم رفعت راسها : ماعاد اموت فيها الديره بتخنقني يمه ماعاد ابيها يمه تكفين وديني بيتنا.
ام كايد سحبت ديم لحضنها وهي تمسح على ظهرها وتقراء عليها وهي تبيها تهدى وماتدري انها ولعت قلب ديم وقهرها بس شمت ريحة ام كايد وهي تنسحب من حضنها وتروح لسيارة ابوها وهي منهاره مقفله اذونها عن صخب الشيلات الي صوتها يقهر ديم بعكس كايد الي يلعب ومستانس .وتلحقها شوق وهديل الي صارت تصيح وهي تدري ان الخبر وصلها .
ام ثنيان راحت للعيال وهي تنادي: ثنيان ياثنيان.
ينسحب ثنيان ويروح لها : مشينا .
ثنيان وهو يتنفس بصعوبه : وين يمه تو الناس.
امه : سرينا بيتنا.
ثنيان: بكره يمه بعد الفطور نمشي بكره بيخطبون بنت سلطان لكايد.
امه: الحين ياثنيان ابوك يقعد هو وهذال واذا خلصو يلحقونا.
ثنيان : ابشري ابشري بروح اعلم ابوي واجيك.
امه:جدك لايدري ثم يحلف علينا.
ثنيان: ابشري.
وراح اخذ اذن ابوه ورجع : يالله يمه اجيب سيارتي بس.
امه راحت لديم : انزلي يمه انزلي ثنيان بيسرينا نزلت ديم وهي تحضن امها .
هديل انسحبت وهي تشوف ديم صاده عنها وكأن الزعل يشمل هديل .
بس شويه مشو ثنيان وامه وخواته للبيت ياخذون اغراضهم.
___
كايد جاء عند هديل الي واقفه وتصيح وهي تراقبهم وهم يبعدون الين اختفو من قدام عينها: علامهم سرو ياهديل.
هديل لفت وهي تمسح دموعها : ديم انهارت عليهم.
كايد: علامها.
هديل انهارت بكي : علامها تحبك ياكايد ديم ماتحملت تسمع خبر خطبتك من ساره الي بترفضك وبينكسر قلبك والله العالم مين الي بتلم لك قلبك بعد ماساره تدعسه برجولها.
ومشت وخلته واقف فتح فمه من الصدمه: اما تحبني ااااف ويني وينك ياديم عمرتس١٧ وشلون تحبيني.
راح كايد الي انقهر على ديم وهو يعرف وش شعورها وهي تحب شخص مايدري عنها جاء كايد وهو يفتح سيارته الي كانت فروته فيها وكان عطر ديم الي معبي المكان مختلط بعطره قرب من فروته يشمها : الله يجبر قلبتس يابنت عمي ويرزقتس الي ينسيتس كايد وحب كايد .
وركب سيارته وحرك وهذا هو كايد اذا تضايق شغل موتره وراح وين ماحد يدري .
____
عند ثنيان: علامك ياديم من مزعلك .
ديم: كانت بس تصيح.
شوق : تقول نبح عليها كلب بس ماظن هذا السبب.
ديم رفعت راسها لثنيان وهي يالله تاخذ نفسها : ووقف ياثنيان تكفى وقف.
ثنيان وقف على جنب وهو ينزل يفتح لها الباب وتنزل هي وتركض بعيد وهي تصرخ بصوت عالي كاد يقطع احبالها الصوتيه وتطيح على الارض وتبكي وكان كل ذا بعين كايد الي كان جالس على جبل ومطفي سيارته وجالس على صخره كبيره
ثنيان الي فهم علة اخته بدون ماتتكلم سحب ديم وهو يوقفها و يحاوط راس ديم بيدينه: انتي تحبين كايد.
ديم : لاتسالني هالسوال ياثنيان بس خذني من الديره ماعاد ابيها.
ثنيان اخذ هالاجابه : طيب طيب اذا انتي احسن خلينا نكمل طريقنا واوعدك ماعاد تجين الديره حتى لو اقعد معك مايهم.
ديم حضنته وباس راسها وشوق وامها بالسياره يناظرونهم شوي وطلع ثنيان وديم لسياره وكملو الطريق.
كايد وهو يناظرهم الين مشو بعد ماسمع صراخها : ياعزتي لتس ياليتني اقدر اداوي قلبتس بس انا مثلتس محتاج من يداوي قلبي.
_______
عند البنات
ترف : وش فيها ديم ياعمري هي .
شهد: شكل تلبسها جني .
هديل بصوت خافت : الا تلبسها كايد .
العنود: قطعت قلبي ديم ماتستاهل ياليته شوق الزفته.
غزل: بنات امرها غريب ديم فيه إنا بالموضوع.
هديل: وش بيكون الانا يابنت ام خليف حركات امتس هاذي خليها عننا .
غزل قامت بزعل ولفت العنود : هديل وجع وش تبين فيها .
هديل بصراخ : خلوني بحالي ياخي خلوني بحالي فقعتو كبدي.
ويجي جدها وابوها : علامتس ياهديل .
هديل : بغى يقرصني عقرب يبه .
جدها: ماتصيحين عيب .
هديل: ابشر ياجدي.
وبس راحو للقسم هديل : جدي اول حسنه بحياته يسويها عفسنا وش فيها لو غصبت كايد على ديم بتطيح السماء لازم ساره يعني لازم.
#👏🏻