انا احبك مابها زيف وخداع رغم الذي نخفيه والي نخافه

بارت ٣

في بيت مشعل الي ماكان كبير قد بيت سعود ونادراً يجيه ضيوف كانو عنده ابوه واخوانه وعيالهم وكم شايب من الديره.
كان كايد يقهويهم ويحرف عليهم (يخدمهم)
بتال وسند راحو يضرمون الحلال قام الشيبان يسولفون ويتذكرون الماضي
قام قال احد الشيان
ابو عبدالعزيز :مجلسك صغير يامشعل كبر مجلس ابوك منول يوم كان طفران مايلقى عشاه .
كايف شاف جده لاول مره ينحرج ويسكت لان الرجال صادق بكلامه.
ابو كايد: مير ابوي كانو ينصونه صغار القبيله وكبارهم.
يقاطعه كايد الي انفعل : جدي مايلقى عشاه مير مايشح به عن ضيوفه وصيته يعرفه القاصي والداني ولا انت يابو عبدالعزيز ماحد يعرفك الا مرتك وعيالك.
جده برد صدره وارتخت ضلوعه وابتسم بس سمع كلام كايد الي دافع عن جده بكل شموخ تصدى لابو عبدالعزيز الي باقي بخاطره كلام ويبي يهين كايد وعياله وحفيده بعد ذالكلام .
ابو عبدالعزيز يلف لجارهم سلطان : ابك انا ماقلت شي مغير اقول سبحان من عطاه هالرزق عقب ماكان مجلسه مترين.
كايد : انت على كبر مجلسك ماحدن يدله.
ابو عبدالعزيز يطالعه بحده وقرر كايد يهينه اكثر قرب منه وارتخى وهو يصب له قهوه وقاله هالبيتين الي الجمته والكل انصدم كيف كذا كايد شاعر وماحد عنده خبر :
ياكبر بيت الطيب لو كان مترين
مدام عكفان الشوارب تحوفه
قل للعفون مكبرين الدواوين
مساحة المجلس بكثرة ضيوفه.
ماحس كايد هنا الا بجده الي قال بكل اندفاع وحماس: حي عينه سمي جده.
كايد لف لجده : تحيى ياجدي.
الكل طارت عيونهم في كايد كيف افحم ابو عبدالعزيز بهالبيتين الي زعل وضاح وكرم وحط فنجاله وقام راح بيته وهو مافطر .
الجد كايد وهو يأشر لكايد على مركاه : تعال تعال هنه وانا جدك .
كايد طالعه باستغراب وتوتر لانه ماتعود يجلس قريب من جده وجاء وتكى معه وجده يمدحه ويثني عليه وخلف كان متضايق ومايبي هالقرب بين كايد وجده وقام طمر واخذ الدله : فنجالك ياجدي.
جده ماكان معه كان مشغول بكايد : سميي شاعر وانا ماعندي علم .
كايد ابتسم : شاعر .
جده سمعنا .
كايد توتر ماهو متعود كذا من جده وهو يدري انه شوي ويقلب عليه خصوصا لو شاف خلف زعلان : وش اسمعك امرني.
____
عند البنات الي افطرو وتوزعو بالبيت.
ديم كانت تحب بنات عمها سعود وتحب اجواء الديره عكس شوق الي شايفه نفسها ..
كانو بنات سعود بالغرفه يلعبون كيرم شهد والعنود وغزل وهديل.
هديل : يييوووووه ياغزل والله انك فاغره .
غزل : على اساس انك بتفحمينهم انا الي العب انا وانا .
هديل : يد وحده ماتصفق لازم تساعديني وبنفوز.
العنود : والله لتفحطين ماتفوزين.
هديل : والله مايعرف لك الا بتال وكايد.
العنود: بتال غشاش وكايد ياويلك تفوزين عليه .
وهي تعقد حواجبها تقلد كايد : ابو حواجب
دخلت هنا ديم الي تحب جمعتهم وسواليفهم : وش تسوون .
هديل : نفحط بالغرفه .
العنود: تعالي تعالي تعرفين تلعبين كيرم.
ديم : لا ماعرف .
هديل تذكرت شي ونطت بخوف : يوووه نسيت اسقي الزرع ،
ديم قامت : خذيني معك .
هديل : تعالي .
وطلعو للحوش يسقون الزرع هديل كان معها لي المويه الي دفعه قوي بس يفتحونه على الاخير : ديم افتحي المويه وانا بمسك اللي لاتفتحينه للاخير .
ديم الي سمعتها تقول افتحيه للاخير راحت وفتحته للاخير هديل حاولت تسيطر على اللي الي انفلت من يدها وغرق ديم الي تعبت مويه وهديل تحاول تسيطر عليه تبللت هي وانعدمت ملابسهم وكان ضحكهم بشكل هستيري واصل لبيت عمهم مشعل الي بينهم بس جدار الحوش . هنا دخل كايد الي من كثر ماهو معصب مانتبه لديم وهو يتوجه لهديل : وش هالضحك خبله انتي خبله فيه رجال عند عمي مشعل .
ديم شافته وهو ماشافها قامت وهو معطيها ظهره وكانت اول مره تشوف كايد وقامت وهربت تدخل داخل ولف شافها بس من ورى : تعالي . من الخبله ذي .
طبعا كان يقصد خواته .
هديل الي كانت مليانه مويه وتراب وباقي تضحك : اووص هاذي بنت عمي محسن ديم.
كايد صد عن الباب بسرعه وراح للمويه يقفلها : تقلعي يالله لا افصل عليتس الحين.
هديل قامت وهي تضحك بصوت عالي وهالشي استفز كايد الي طلع نعاله وهو يرميه عليها وهي تركض: تموت هديل وهي خبله.
___
بالمجلس جاء كايد راجع وجلس
الجد: خلف قم اسبقنا للمحل افتحته وانا وابوك شوي ونحلقك.
خلف قام : ابشر ياجدي.
جده : خذ كايد معك .
خلف الي لوى وجهه : مايحتاج .
جده : خذ اخوك ياخلف .
خلف يطالع كايد : قم .
كايد : بلحقك بسيارتي
خلف هز راسه بطيب وركب خلف سيارته وسبق كايد لحقه بعد كم دقيقه.
وبس وصل خلف المحل كانو عيال عبدالعزيز ينتضرونه بعد ماعلمهم ابوهم بلي صار وكانو يبون يضربون خلف لانهم يدرون ان جده يفضله على خوانه .
نزل خلف الي انصدم من عيال ابو عبدالعزيز الي واقفين بمشاعيبهم(عصي دايم بسيارات اغلب الشباب) خلف توتر وهو يطالعهم وهو يدري وش يبون تقدم عبدالعزيز الي بيده عصا : من انتم عشان تهينون الرجال بمجلسكم ياعيال كايد .
فجاه يسمع صوت من وراه : المجالس تنهان فيها اشباه الرجال امثالك انت وابوك.
لف عبدالعزيز ويلفون خوانه وكان كايد الي جاي يمشي وهو مامعه غير شماغه الي ماسكه كل طرف بيد وهو يلفه ويعقله على رقبته ويردف : وانا الي هنت ابوك بتضرب تعال .
عبدالعزيز الي رفع العصا وهو بيضربه ويتصدى له كايد بيدينه يمسك العصاء ويركله على صدره ويطيح عبدالعزيز والعصا تصير بيد كايد الي ضرب شجاع اخو عبدالعزيز على راسه بالعصا قبل يغدر في خلف الي يتعارك مع اخوهم الثالث سلمان .
هنا يقوم عبدالعزيز الي يتوجه لكايد الي تعاركو وتضاربو ويتفرقون بس يسمعون صوت ابو عبدالعزيز وجدهم .
جدهم : كايد .
ابو عبدالعزيز : وش العلم.
كايد وهو يالله يتنفس : العلم انك مرسل عيالك يستفردون باخوي .
الجد: صح هالكلام يابو عبدالعزيز.
عبدالعزيز: لا ماهو صح عيالك تهجمو علي انا واخواني.
كايد : قل الصدق يالرخمه لاسويت شي خلك قده ولا لا تسويه.
خلف : كلام كايد صح تهجمو عليه بدون سبب .
ابو عبدالعزيز : انت بتصدقهم الواضح من الي هاجم على من عيالكم مافيهم اصابه وحده وشف عيالي وش لون كلهم دم.
كايد : عيالك رخوم مثلك ماعندهم الا لسانهم .
كان فيه شباب واقفين وصارو يشهدون بالحق .
سعد: الحق ينقال عيال ابو عبدالعزيز تهجمون على خلف لكن عزالله ان وراه رجال اثعى بهم ذيبان (يقصد كايد).
عبدالله: لقط لقط وراعينك يابو عبدالعزيز: الغراب مايجابه الصقر .
كايد ابتسم وهو يدري وش يقصد واخذ خلف بيده وهو يتوجه للمحل وخلف يفلت يده : فكني ماني ورع عندك.
كايد طالعه بدون اي رياكشن : استاذن انا ياجدي .
جده الي كان مبسوط وهو يسمع الرجال تمدح حفيده وسميه كيف قدر على عيال ابو عبدالعزيز لحاله: الله معك ياجدي وانتبه لنفسك.
كايد استغرب من كلمته بس ماهتم كمل طريقه لسيارته وشغل ومشى.
_____
عند البنات الي كانو جالسين بالحوش ويجي بتال وسند ويدخلون بنات محسن وامهم .
بتال : وين كايد
هديل: راح مع خليف للمحل.
بتال: وش الطاري .
وقبل تتكلم هديل يدخل كايد الي ثوبه كله دم وكان دم عيال ابو عبدالعزيز بس كان ثوبه كله تراب وصدره كله دم بتال فز اول ماشافه: اخو سند انت علامك.
وكلهم جوه يركضون هديل بس صافته صارت تصرخ : ياويلي هذا ايش من الي ضربك.
كايد :سكتها لا اطلع حرت خليف فيها.
بتال فهم ان خلف متضارب مع كايد و توسعت عيونه : العلم وشنهو .
هديل الي جت عنده وهو تتفقده : من وين يعورك جرحك وينه الله يكسر يدينك ياخليف.
كايد كان يطالعها وهو يبعد : تراك ادوختيني مافيني شي هذه دم شجاع وعبدالعزيز.
بتال : ضاربينك.
كايد : يخسون يضربوني بغو خليف وانا فزعت .
هديل دفته براسه بقوه بس سمعت انه فزع لخليف توسعت عيون كايد: صاحيه انتي .
هديل : ياملقوف ليش تفزع ليش ياليتك خليتهم يذبحونه.
كايد: يذبحون اخوي وانا واقف صاحيه انتي والله مايلمسونه وانا كايد .
بتال يربت على كتفه : حسافه ليتني معكم .
كايد الي ابتسم وهو يمثل بيده : اخذك المره الجايه بقول انتظرو لين يجي بتال.
بتال باستهزاء: هههاي
البنات يضحكون و كايد توجه للبيت
هديل باستغراب : ياحليله ينكت.
بتال: تعرفين تسكتين.
هديل : لا ماعرف وتراني بصير اعتزي بكايد اخوي الذيب ولا لا ليش يفزع لخليف كان خلاههم يرنونه.
بتال : حق من ربع راسك باربع كوايا يمكن تعقلين.
العنود وشهد انهارو ضحك
كايد قابلته امه على الباب وبخوف : انت علامك ورى ثوبك كله دم.
كايد يبوس يدينها : مافيني شي تضاربنا مع عيال بو عبالعزيز.
امه : وانت وش تبي بالمشاكل وانا امك لاتفجعني عليك دخيلك ياكايد.
كايد انقهر من كلمة دخيلك : يابعد عمري عمرتس لاتقلين دخيلك والله مابي المشاكل بس هم الي جونا للمحل.
وهنا سمعو الجد وابوهم وخلف جايين كايد انسحب وراح يتروش.
___
في بيت مشعل ترف تطل من الشباك وفجاه تشوف ثنيان جالس بحوش بيتهم كان يراسل امل : نجد تعالي تعالي شوفي .
نجد طلت : مين ذا المزيون.
ترف : الظاهر انه ثنيان هذال صغير وعيال عمي سعود اعرفهم .
نجد: طلع مزيون
ترف : وش قاعد يسوي.
نجد : مدري بس بعدي بيت عمي سعود كاشف علينا لايشوفونا.
ترف بعدت وقفلت الشباك.
___
بمجلس الجد كايد تجمعو رجال العشيره كانو جايين يحلون المشكله.
خلف كان ماله طاري والكل يطري كايد وكايد .
دخل كايد الي تروش وبدل ملابس وكانو بتال وثنيان يقهوون الرجال : السلام عليكم يالله حيهم
الجد كايد وهو يبعد لحفيده : تعال وانا جدك تعال جمبي .
جاء كايد بعد ماسلم على الكل جاء وجلس جنب جده .
الجد: بتال خلف.
نطو الاثنين عنده: سم
رحو اذبحو ثنتين من الذبايح هاتوها .
العيال : ابشر .سم
وراحو ولان بتال مايحب خلف اخذ سند معاه الي بس يحارش خلف : صح كايد افتكك من عيال بو عبدالعزيز.
خلف سكت ولا رد ويردف سند : لو ماكان كايد معك كان رنوك رن.
خلف لف وهو بيضرب سند ويدخل بتال بينهم : انت صاحي من عقلك بتضربه.
سند بطقطقه : والله ان مد يده لاعلم كايد ماعاد يفتكه .
بتال: خلاص ياسند خلف اخونا.
سند: اخوي انت وكايد بس .
بتال اخذه بيده وهو يتوجه لشبك: لاتسوي مشاكل ثم ينقلب جدي علينا خله بحاله وحنا بحالنا.
سند تذكر جده : طيب طيب
_____
عند البنات فتحت العنود الدولاب ولقت كيكة ترف الي جابتها امس : اووف نسينا نعطي سند كيكته.
هديل : حطيها بالزباله مانبي منها شي.
العنود: حرام سند بيستانس .
هديل : من امس بالدولاب صاحيه انتي تعطينها سند يتسمم
العنود: هاك انا مالي دخل.
هديل خذتها وراحت ترميها وكانت ديم بالمطبخ : هاوشك كايد عشان المويه.
هديل : لاااا يهاوش عند الضحك غيرته فوق المعقول وراح حط حرته بعيال بو عبدالعزيز.
ديم: ليش وش سوى.
وجلست هديل تحكي وفجاه يسمعون شي طاح وصرخت العنود : يمه يمه .
هديل جات تركض وبس شافت امها تصيح وتبكي والصوت جاب كايد من المجلس يركض ويدق الباب وتفتح شهد وهي تصيح : انتم علامكم ليش تصيحين وش صاير .
شهد : امي اغمى عليها.
كايد : شفي لي درب .
وبعد دخلو البنات دخل كايد يشوف امه الي فاقده الوعي وهديل تصيح وهو مايدري يصحي امه ولا يسكت هديل الي صايره فضيحه وجلس يصحي امه : يمه يمه تسمعيني.
هنا دخلو بتال وسند
كايد بعصبيه : بتال سكت الفضيحه ذي فضحتنا .
سند بخوف وللحظه حس انه طفل : امي وش فيها ياكايد.
كايد وهو يشيل امه : بعد بعد.
واخذها لسياره.
بتال : العنود رحي معهم وانتي اسكتي فضحتينا.
العنود راحت ركض وهديل تصرخ بتال : يابنت اص .
هديل : الا امي الا امي يابتال تكفون .
بتال تلاشى غضبه لضعف وحنان على اخته حضنها : هي كيف طاحت.
شهد: مدري كانت واقفه فقدت الوعي وطاحت
بتال: خلاص اص انا بروح لريجيل واول مايكلمني كايد بطمنكم.
هديل : طيب
راحو بتال وسند لرجال
__
عند كايد بالمستشفى وهو ينزل امه على السرير وبهالوقت تكون صحت بالسياره : فقدت الوعي فجاه يادكتور.
الدكتور فحصها وسوو لها تحاليل.
امه : انا مافيني شي ردني للبيت .
كايد: والله ماردتس لين اتطمن عليتس.
العنود : يمه تكفين بس شوي تطلع النتيجه ونرجع للبيت.
ام كايد الي عصبت : انت علامك ماتفهم قلت لك ودني البيت.
كايد: بهاذي اعذريني يمه لازم اتطمن عليتس.
بعد معافر ومحاولات سكتت ام كايد وهي تنتظر معهم وفجاه يجي الدكتور : ماشاء الله تبارك انتي كم عمرك يامدام.
ام كايد : وش تبي بعمري .
كايد ابتسم من ردة فعل امه : عمرها ٤٥ سنه.
الدكتور : انت ولدها.
كايد : الله الله ولدها الكبير .
الدكتور : راح يصير عندك اخ امك حامل
كايد توسعت عيونه : هاااه.
ام كايد : تخسي ماني بحامل حامل ذاكبري
هنا كايد انفجر من الضحك وهو يغطي وجهه .
العنود : يمه علامتس مرعوبه .
ام كايد : انتي ماتوحين وش يقول هالسلوقي .
كايد لدكتور : حقك علي امسحها بوجهي تعرف تفكير كبار السن .
الدكتور: ماعليك متعود على حقين الديره .
ام كايد: علامهم حقين الديره هاه.
الدكتور قام توجه للباب العنود تناظر بامها: هالشخصيه الساطيه وينها عن ام خليف .
كايد : قومي قومي مشينا.
ام كايد : يافضحي فضحاه انا وش اقول للعرب.
كايد : يمه انتي علامتس وش فيها لاحملتي حرام ولا عيب.
امه : اي. بالله عيب وشق جيب احمل بعد هالعمر يافضحي فضحاه ياويلي ويلاه.
كايد وهو يسندها ويغمز لها : من بغى الدح ماقال اح.
امه ضربته على راسه : انت بتسكت ولا افجر راسك ذاه.
كايد : بسكت بسكت بس تراء ان كان ولد انا الي بسميه.
طلعو من المستشفى والام تتحلطم ومتفشله واول ماوصلو للبيت: اسمعني انت وياها.
كايد: سمي يمه.
امه: لاحد يدري اني حامل يافضحي انا وش اقول لابوك.
كايد توسعت عيونه : الله اكبر يمه ابوي شريكتس بالجريمه لازم يدري يشيل عنتس شىوي.
امه : جدك وش اقول له يالله لا تخزينا ييييك يافضحي فضحاه.
كايد: انزلي انزلي رحي بشري رجلتس خل عنتس هالحركات.
امه كانت عارفه انه يطقطق عليها كايد العاقل الراكد اخذها طقطقه كيف الباقين . نزلت وهي متفشله وكنها مسويه مصيبه.
اول مادخلت جتها هديل وحضنتها وتدفها امها : وخري عني هناك مايجي من وراكم خير.
هديل تطالع العنود: علامها نبع الحنان لايكون فقدت الذاكره بعد الطيحه وتحسبني بنت ام ريحه .
العنود: تخيلي طلعت حامل .
هديل صرخت بفرح وهنا دخلت كايد على صراخها ويطلع نعاله ويحذفها وهي تهج للغرفه : اهب ما اصرخ الا باذنه.
___
دخل كايد المجلس ويستقبله بتال: طمني امي علامها.
كايد: مافيها الا العافيه جبتها داخل.
بتال: وش قالو لها.
كايد : ماقالو شي عطوها علاج وجينا .
بتال : هاك هاك الدله بروح اشوفها.
كايد: ما انصحك تروح.
بتال: ليش وش صاير.
كايد: مافيه شي بس لاتروح.
بتال: الا بروح.
كايد هز راسه بطيب وراح بتال يشوفها.
___
عند البنات دخلت هديل تركض وتحضن امها وهالمره بقوه وامها تحاول تبعدها وهي متشعبطه فيها ورافضه تفكها
ام كايد: فكيني يابنت الله يصلحتس.
هديل: مبروك يابعد الدنيا مبروك يارب بنت يارب
هنا امها صفقتها على راسها بقوه وهديل تبعد بالم : اه يمه علامتس .
امها : مبروك على ايش هاه على سواد الوجه.
هديل: سواد وجه مين.
امها بعد ماجابت العيد: سواد وجهك .
هديل عرفت انها كانت تقصد نفسها بس قلبتها عليها وهنا تجي شهد: يمه بتال يبيك.
امها: انتم بتخلوني بحالي ولالا .
وتطالع بالعنود : وانتي مايقعد العلم بحلقتس صبيتيه باذن هالخبله الي بتفضحنا.
هديل : تخيلي جدي هو وعصاته يجيك يقول من قال لتس تحملين بدون اذني .
امها : والله ان ماعقبتي ياهديل اليوم اني لاصلي بتس شرق .
هديل : خلاص خلاص بروح سوي القهاوي ديم انكرفت اليوم ياعمري هي بنت عمي الصاحيه .
وراحت عند ديم وام كايد راحت عن ام ثنيان وبتال رجع للمجلس بعد ما انطرد.
______
هديل الي دخلت وهي مصدومه من الذبايح ثنتين: ياراسك ياهديل هاذي كلها ليش اخ ياربي تعبت ماكن في بيت سعود الا هديل .
ديم: ماعليك بساعدك.
هديل: قد طبختي.
ديم: لاوالله نطبخ برا بس ماعليه بساعدك.
هديل حضنتها: يازينتس بس .
وهنا تدخل ترف : تبين اساعدتس
هديل: ديم بتساعدني والعنود .
ترف بضحكه: ديم ماتسلق بيض تبينها تطبخ ذبايح.
هديل: ماعليه تتعلم.
ترف: انتي للحين زعلانه مني.
هديل: وانتي وش رايتس فازعه لبنت سلطان على بنت عمتس
ترف حضنت هديل: هديل لاتقلين كذا والله مو قصدي خلاص والله ماتنعاد.
هديل ابتسمت : يالله تعالي عاونيني الذبايح ثنتين.
ترف وهي تلم شعرها وتبدا تساعد هديل
____
في بيت سعود تحديداً بالمجلس
كانو الرجال يتناقشون بالمشكله الي صارت .
الجد كايد : انت يابو عبدالعزيز ضعيف نفس ولاتقول انك ماتدري عن عيالك رايحين يضربون خلف.
بو عبدالعزيز: انا ماني ضعيف نفس يابو سعود انا علمتهم بلي صار في وكيف ان حفيدك اهاني بمجلسك.
كايد: ماحد اهانك انت الي هنت نفسك ولا تقلل من الريجيل عشان مايهينونك.
سعود: كايد صادق يابو عايض هذا ماسوى بو عبدالعزيز وشهود عليه انا ومشعل اخوي
الجد كايد : باب مجلسي مفتوح له ولغيره وله صدر المجلس ولنا العتبه وانتم عارفين منهو كايد ولد مصلح.
الكل : ونعم ، اي والله نعرفه ،
__
عند البنات الي يطبخون الغدا بالحوش وسند كان يطل من بعيد يشوف ترف الي اشتاق يجلس ويسولف معها وفجاه يمسكه شخص بكتفه سند لف وهو يرجف خاف يكون جده واول مالف بصدمه: عمي مشعل .
مشعل: الرجال مايصبر المحارم.
سند وصوته يرجف : انا كنت بشوف امي.
مشعل: انا شفت الي شفته مدري عن نيتك لكن الي بقوله لك خلك رجال وترا بنات عمك شعر وجهك.
سند الي دنق بخجل : ابشر ابشر ياعمي والله ماعاد تنعاد.
مشعل يربت على كتفه : بارك الله فيك .
راح سند للمجلس وهو فعلا من بعدها ماعاد طل او حاول يشوف ترف .
_____
عند البنات الي جالسين يسولفون.
ترف : الحين كايد ضرب عيال بو عبدالعزيز الثلاثه ولحاله.
هديل : ايه اخوي حبيبي ذيب
ترف : الا يروع الصدق احسه متوحش
ديم : الا بالعكس الي دايم متوحش على قولتك مع الرجال يكون احن قلب على اهل بيته امه واخواته .
هديل : صح كلامك مدري ليش مطلعين صيت على كايد انه يخوف مع انه ماسوى شي كله من ام خليف جعلها السلال.
وهنا يقاطعهم عمهم مشعل: عشتن عشتن.
البنات وهم يوقفون : تعيش ياعمي ،تعيش يبه.
مشعل يسلم على الكل : وش صار على غداكن.
هديل: ربع ساعه ياعمي انا طبخت ح وترف ذبيحه عاد اشهد بالحق من الي طبخها ازين.
مشعل: انتي عاد ياهديل مسنعة السنعات مير ترف ترف بنت ابوها عين السيح.
هديل: دامني مسنعة السنعات يعني مسنعة بنتك والله انك صادق ياعمي.
عمها ضحك على خبالها : ياحليلتس وانا عمتس مايفوتس شي.
ويطالع ديم : كبرتي وصرتي عروس ياديمه.
ترف : ديم يبه ديم ماهي ديمه.
مشعل : كلها واحد مير ادخلن ادخلن برسل ثنيان وكايد يصرفون الغداء.
هديل: ارسل بتال وكايد ابي اشرف عليهم .
عمها: تم الي تبينه يصير.
وراح مشعل وترف وديم راحو ووقفو عند الشباك يطلون على كايد وبتال بدون ماحد يشوفهم ،، بتال وكايد الي واقفين يجهزون صحون الذبايح وديم وترف يناظرونهم من الشباك
هديل : هذا قدري وهذا قدر ترفوه شوفو مين اسنع انا ولاهي.
كايد : مايبي لها اختي اسنع نعرفتس ونعرف نفتس بالطبخ.
بتال وهو يفتح قدر ترف ويتذوق ويعجبه طعمه : والله ترف بعد ماقصرت ذوق ذوق ياكايد.
كايد : مايحتاج اذوق ماتجي حول هديل.
هديل بصوت عالي وهي ناسيه ان فيه رجال : يييييي اخوي.
وقبل تكمل يصرخ عليها كايد : اص وقص الله ياخذ عدوتس فضحتينا.
هديل: يووه ياكايد انسى تعرفوني خبله ماعرف اهرج بشوش.
بتال: تبينا نقص من لسانك متر.
هديل: موافقه قصو مترو وخلو لي متر امشي فيه اموري.
بتال : ههههههههههههههه والله انتس زينة البيت وضحكته ياهديل.
هديل وهي تحضنه على جنب وهي تتمايل ويختل توازنها وكانت بتطيح بصحن كايد الي جالس يعافره ويدفها كايد بقوه : انتي صاحيه.
هديل طاحت ويطيح معها بتال وهم منهارين ضحك.
ديم وترف كان ينضارون المشهد .
ديم بابتسامه : فكرت خبالها بس معانا طلع حتى مع خوانها.
ترف: انتي شايفه كيف كايد شكله عكس صفاته يعني الي يشوفه يقول وش حليله مين يصدق ان ذا طق ثلاثه رجال لحاله.
ديم : خلاص راحو تعالي .
وطلعو عند هديل الي جالسه تاكل من الحكاكه : يووووه تسلم يدي صدق حتى العيال قالو طبخ ترف مو مره .
ترف: ترا شفنا كل شي من الشباك.
هديل بضحكه: يعني تبصبصين على خواني ياقليلة الادب.
ديم : وانا قليلة ادب معها بس الصدق عيال عمي طلعو حلوين .
قاطعتهم العنود قبل ترد هديل: انتن عندكن غدا ولالا.
هديل : اي اي فيه تعالي شيلي الصحن انتي وديم .
ديم: لا انا ابي اساعدك خلي ترف تعاونها انا بغسل معك المواعين.
ترف: يالله تعالي .
شالو الصحن ترف والعنود ودخلوه ديم: انا بروح اجيب الفيري وليفة المواعين..
دخلت وجاء كايد الي من العادات عندهم ان العيال ياكلون بعد الضيوف : وش تسوين.
هديل : انظف شتبي.
ديم الي جات وهي تسكر الباب بقوه وبس لفت : جبتها .
رفع كايد عينه وهو مفكرها من خواته واول ماشافها صد وراح وهي لفت تبي تدخل وضربت بالباب وهديل انفجرت ضحك : ههههههههههههه والله مايصلح لك الا كايد ياديم تعالي تعالي راح.
ديم كان وجهها احمر من الخجل : يوووه ياهديل خلينا ندخل كفايه احراجات اليوم.
هديل : خلاص ادخلي انا بكمل
ديم : اعذريني العيال رايحين جايين.
هديل : خلاص معذوره نادي لي غزل تعاوني.
دخلت ديم وجات غزل تساعد هديل.
___
صار العصر واقترح الجد انهم يتعشون العزبه ويطبخون العيال العشاء.
ثنيان : ياعيال نبي نقنص.
كايد: ابد الساكتون جاهز.
ثنيان : بنحط جايزه للفايز.
بتال : لا مانصحك مالك مع عيال البر تراء
ثنيان: يارجال وش خسرانين كلها لعبه.
كايد: تم الي تبيه .
خلف لكايد : قوم قوم خل عنك الورعنه صيد وقنص.
كايد : لاتدخل في الي مايعنيك عشان ما امرغ خشمك بالتراب تسمع ولالا.
خلف دف كايد بصدره : لايكون صدقت انك شجاع صنديد .
كايد : لاحول ولا قوة الا بالله خليف فكني من شرك لاتستفزني.
خلف رجع دفه : وش بتسوي يعني.
كايد سدد لكمه على خشمه الي صار ينزف وصارو يتعاركون وثنيان وبتال يحاولون يفكونهم وتعالت الاصوات وجو الشيبان والبنات صارو يطالعونهم مع الشباك .
ابو كايد دخل بينهم : علامك انت وياه يالرخوم اليوم فازعين لبعضكم والحين معودين على بعض .
خلف الي صدره كان غرقان دم : هو الي مد يده عليه بالاول.
بتال : والله ماصدق يبه حتى انشد ثنيان.
ثنيان: خلف مخطي ياعمي .
وقامو يحكون له الي صار .
الجد كايد : وتضربه على خشمه.
كايد الي عصب: لا بخليه يندف فيه على كيفه.
جده ضربه كف بقوه انسحب كايد وهو يطلع من باب الحوش.
هديل هنا قامت تبكي: الله ياخذك خليف الله يسلط عليك كان تسلطت على كايد.
ديم حضنتها: خلاص ياروحي انتي كايد رجال والكف بالنسبه له ولا شي .
العنود: المساله فيها كبرياء قدام العيال ولا ندري ان كايد ماعليه من الكف بس احرجه جدي.
ترف كانت بعالم ثاني وهي تشوف ثنيان الي انطلق يركض وهو يلحق كايد الي زعل وطلع
______
عند البنات الي صارو يجهزون للطلعه للعزبه
هديل : الله يقهر خلف كنت ابي اغراض من البقاله وكايد زعل الحين وبتال سيارته بالمدينه مانزلها الديره.
ديم: ماعليك انا بكلم ثنيان بس علموني وش تبون.
العنود: لالا احراج.
هديل : لا مو احراج تعالي اقول لتس .
وجلست هي وديم وصارو يقررون وش يشترون لسهره بالعزبه
#تعليقاتكم_ وتفاعلكم _يزيدنا_حماس_نكمل👏🏻