انا احبك مابها زيف وخداع رغم الذي نخفيه والي نخافه

بارت ٢

قبل الفجر بنص ساعه قام الجد كايد الي يأذن بالمسجد بنفسه يتجول بالبيت ويدخل غرف العيال : قومو قومو صلو قبل يصلى علاكم.
قامو العيال وهم جالسين سند قام سند  يتأفأف ويفرك عيونه : اااف الله من العقوبه عاقبنا ذالشايب .
بتال انهار ضحك رغم انه توه صاحي ومنزعج من جده قام يربت على كتف سند: قم قم قدام يعود جدي عليك.
قام وتوجهو للحمام .
________________
في بيت مشعل الجد يدق الباب بعصاته بقوه : قم يامشعل صلاه صلاه يامشعل.
قام مشعل يشوف ترف  الي  تسخن المويه لان الجوء بارد جات ترف عند ابوها الي يموت في فيها اكثر من نجد وهي تبوس راسه : صبحك الله بالخير يبه سخنت لك الماء.
مشعل : الله يصبحك بالرضاء امي انتي صبي صبي عليه بلحق الصف الاول.
ترف ارتخت تصب على ابوها وشعرها الي يشبه سواد الليل يتناثر حواليها.
ارتفع صوت الاذان معلن صلاة الفجر والمعروف عن الجد كايد انه اذا اذن ودخل احد المسجد بعده ياويله لذلك يتسارعون للمسجد قبل ياذن .
_________________
عند هديل والعنود الي يجهزون فطور جدهم جات غزل بنت ام خلف الصغيره المعروف عنها انها طيبه ماهي نفس امها وخلف وريم : صباح الخير .
العنود وهديل : صباح النور.
غزل: جايه اساعدكم تحتاجون شي.
هديل : لا المطبخ فينا اليوم (ام كايد وبناتها)
غزل : ماعليه انتي طبختي العشاء عن امي البارح خليني اساعدتس.
العنود  تساسر هديل : خلينا نساعدنا ماحنا خدم عند اام خليف وبناتها.
هديل: تعالي تعالي جهز الحليب وكثري زنجبيل الجو بارد وجدي يحبه الزنجبيل.
دخلت غزل رغم صغر سنها وصارت تساعدهم وتجي ام خلف الي سندت يدها على الباب واليد الثانيه على خصرها وبصوت حاد: غزيل وجع.
غزل قامت وقفت بخوف : سمي يمه.
امها: ماقلت لتس ماتحتكين بجملا وبناتها.
العنود وهديل كانو ساكتين ويناظرون .
قامت غزل بتوتر وهي تمسح يدينها بجنوبها: يمه هديل طبخت عنك العشاء البارح لانك تعبانه قلت اساعدهم اليوم بالفطور ماعندي نوم.
امها : اطلعي اطلعي طلعت روحك عسره.
غزل طلعت بخوف وهي تلم كتوفها خايفه ان تضربها امها .
العنود : الله ياخذتس ويريحنا .
ام خلف عصبت وسمع خلف الصوت العالي وهو جاي قبل جده وابوه واخوانه ودخل يركض على اصواتهم امه وخواته يتهاوشون كانت ام خلف ماسكه العنود بشعرها وهديل تبعدها عن : شيلي يدتس عساها الكسر ان شاء الله.
خلف مسك هديل بشعرها وهو يبعدها عن امه دخلو عيال جملا الثلاثه كايد دخل بينهم وهو يفك العنود من ام خلف وبتال طاح ضرب في خلف لما شافه يضرب هديل دخل الجد وهو يتنحنح وبعدو بعض : بتال كايد خلف العنود وهديل الحقوني للمقلط.
سند كان واقف يطالع ام خلف بنظره حاده : والله لخليك تبوسين رجولنا يام الريحه .
ام خلف طالعته باستحقار وهي تتوجه لغرفتها.
_
بالمقلط دخل الجد وولده سعود الي كان مثل الشطرنج يحركه ابوه على كيفه.
ابوه وقف قدامهم : وش العلم ياكايد.
كايد : مدري ياجدي دخلنا لقينا خلف وامه يضربون خواتي.
جده : اسمها خالتي ام خلف توحي ولا لا
كايد : سم
ويجي عند بتال : وانت
بتال: مثل ماقال كايد.
جده : اييه وانت ياخلف
خلف تسذوب مثل امه: دخلت الا العنود وهديل يضربون امي يبونها تسوي الفطور مع ان السراء فيهم.
بتال طالعه : الله ماحبك في علوم الحريم.
جده صفقه كف كان مثل السكين بقلوب خواته الي قفلو عيونهم بقهر بتال اكثر واحد حنين عليهم وقلبه رهيف : الظاهر اني واقف ياولد جملا.
وراح عند هديل وبدون اي كلام ضربها كف براحة يده وبظهر يده يضرب العنود كف
كايد  كان وده يتقطع تقطيع بس مايضرب خواته .
الجد : انقلعي انتي وياها جهزن الفطور واسبوع كامل البيت فيتس انتي وياها.
هديل والعنود ماكانو يقدرون يفتحون افواهم بحرف .
طلعو من عنده والبنات يبكون وبتال بالع موس وساكت وكايد كان يغلي من داخله بس برضه مابيده حيله.
بتال كان حاضن اخواته لصدره وهو ماسك العنود وهو معلق يده اليمين على كتوفها ويده اليسار على كتوف هديل .
الي كانو يلملمون بعضهم ويروحون للمطبخ يكملون الفطور رغم الصياح الالم والقهر والغبنه الا انهم مجبورات يكملنه بتال شمر ثوبه وهو يربطه على وسطه ويشمر اكمامه ويبدا يساعدهن وهو مايدري كيف يلطف الجو ويضحكهن  رغم انه مقهور عندهن ومضروب معهن بس ماهمه الكف الي اكله .
جات ام خلف : انت تخبز مع خواتك.
بتال بعصبيه: فكينا شرتس يامره وانقلعي غرفتس .
ام خلف ديورت ورجعت غرفتها وام كايد كانت اخس من سعود الي ساكت ومايقدر يفتح فمه بكلمه .
جاء كايد الي يحاول يلطف الجو : ارسلني جدي اجيب لبن تبون شي.
البنات بصوت مكسور : لا.
بتال : الا الا جيب لهم على مقاضيهم الي البارح.
كايد وهو يتلمس جيوبه يدور الورقه : خلاص لقيتها .
ومشى للبقاله بتال كان يفرد والبنات يخبزون.
__
افطر الجد وعياله مشعل وسعود وعيال سعود .
كايد : من رخصتكم بروح دوامي
الكل : الله معك.
بتال اخذ كايد على جنب : انت بداوم وانا بروح عشان الجامعه ونخلي خواتي عند خليف وامه.
كايد بقهر : وش تبيني اسوي ماباليد حيله وانا اخوك اذا ابوي ماقدر يفتح فمه حنا الي بنعارض جدي.
سند : ماعليكم رحو انا موجود.
بتال الي يعجبه سند من صغرته :  تقدر
سند: اي اقدر كبرت انا لامتى تشوفوني ورع.
بتال :هههههههههههههههه كفو والله اجل خواتك بامانتك.
__
في بيت مشعل صحت ترف بدري تجهز الفطور وهي متعوده تصحى بدري كل يوم كروتين الديره جهزت الفطور وسنعت البيت وبخرته وجهزت القهوه وهي تنتظر رجعت ابوها من بيت عمها ابو كايد.
__
راحو دوامهم كايد وبتال وبقي سند مع خواته صح  هو اصغر خوانه  بس ذكي وفطين كانو متجمعين بغرفة البنات
هديل : الله لايوفقها لازم نبعد عنها قد مانقدر مانبي نحتك فيها تطلع حرتها فينا هي وولدها الرخمه .
العنود :  انا اشوف انها خربانه خربانه ان مدت يدها نتوطى ببطنها دام جدي واقف بصفها ويطقنا بدون مايسال ويشوف من الغلطان .
سند : خلوها علي بس اطلعو كلكم ياثلاثه للحوش بسرعه.
شهد : ليش.
سند: انتم. اطلعو انتظروني هناك.
طلعو البنات وبعد شوي طلعت ام خلف تتمحرش فيهم ووقفت على باب البيت وهي متكيه على الجدار بيدها وكان بالصاله شباك يطل على الجهه الثانيه من الحوش اذا كان مفتوح ودخل الهواء يضرب الباب بقوه والباب كان حديد كبير وثقيل تسلل سند لشباك وهو يفتحه بهدوء وثبت اطراف الشباك حتى يضمن انه مايتقفل ام خلف: وين قهوة الضحى انتي وياها .
العنود وهي تغمض عيونها بغضب : اللهم طولك ياروح .
هديل مسكت العنود بركبتها الي بدت تعصب وتلف لام خلف: الساعه ٨ والقهوه عشر كذا تعودنا.
ام خلف وهي تهز جسمها باستهزاء : اقول .
وقبل تكمل كلامها الا الباب الي جاء طاير وهو يشيلها  ويطيرها من فوق الدرج وهي تصرخ وسند الي نط من الشباك برا حتى ماحد يشك فيه وجو الكل يركضون والكل فهم انها طايحه لحالها لان بنات جملا كانو بعيد عنها وهي كانت تصرخ حاولو يوقفونها خلف وريم بس ماقدرت : ساقي ساقي مكسور ااااه رجلي رجلي.
سعود فزع يجيبب السياره وهو يسندها مع خلف وياخذها للمستشفى.
وراحت معها ريم وخلف سند الي جاء من وراء البيت وهو يطق اصبع ويرقص : طق طق طق. طيرنا ام ريحه.
البنات هنا فهمو انها خطه منه وقامو كلهم يحضنونه هديل والعنود كان يضحكون لدرجة دموع دموع من كثر الضحك
هديل: يازين اخوي الرجال والله انك كفو
العنود وهي منهاره ضحك : شفتي كيف طارت والله يان حرتي بردت فيها يارب يارب فيها رضوض وكسور.
___
بالرياض في بيت محسن
عند ثنيان الي اخذ رقم بنت خاله امل من شوق بموافقتها وصارو يتراسلون ويسولفون وعايشين قصة حب.
ثنيان : راح اخطبك من خالي بس اخلص جامعه.
امل : متى بس.
ثنيان : باقي سنتين.
امل: انا ابي اخلص دراستي بعد .
ثنيان : وش تخصصك .
امل : طب.
ثنيان الي كان متفتح بحكم تربيته بالمدينه : حلو برافو عليك.
امل: وانت .
ثنيان : انا ادارة اعمال لاني احب الاعمال المكتبيه ماحب امشي واتحرك.
امل: هههههههههههه كسول.
ثنيان جلس يبرر لها ويشرح
___
عند سعود بالمستشفى بلغه الدكتور ان ام خلف فيها كسر بالساق وشعر بالظهر.
ريم: يبه انا بجلس معها انتم روحو وانت ياخلف جيب لها ملابس خل غزل تحطها لك.
خلف: طيب طيب الله لايعود ذالباب الي طول عمره مسبب لنا ازمه.
سعود: انا رابطه بالشباك الي جمبه مدري من فكه.
___
عند البنات جات ترف وهي تدري ان كايد وبتال ماهم فيه جات بس لابسه شيلتها وهي فاله شعرها الي متناثر حواليها بدون عبايه فتح سند باب الحوش : هلا بترف .
ترف ابتسمت وهي تغطي وجهها : هلا بسنود.
ابتسم  وهو يحب يسمع سنود منها هي تحديدا ،، دخلت وهو راح للمجلس.
العنود وهديل نطو عندها مسكوها : تخيلي وش صار.
وجلسو يحكون لها .
ترف: احسن تستاهل الله يجعلها ماتطلع من المستشفى قولو امين.
طل الجد كايف من الشباك وهو يشوف ترف واقفه مع بنات سعود تسولف وبديها طاسه: شعندتس ياترف هاه.
ترف الي اختبصت واختبصو البنات : ابد ياجدي جايه اخذ رز بنقعه عشان الغدا.
جدها: اييييه قومي عطيها هديل .
هديل فزت وهي تاخذ الطاسه وتناظرها: هاذي طاستنا.
ترف: مابي رز بس اربكني جدي وكذبت.
الجد : اعجلي ياهديل.
هديل دخلت داخل
اما سند يتذكر جده يوم منعه يشوف ترف
"فلاش باك"
بعمر ١٢ سنه .
كان وقتها يطالع سند الي يتأمل ترف وماكانت نظراته نظرات طفل وهو مايدري انها اخر مره بيشوف ترف : ولد سند.
سند فز وهو يلتفت لجده: سم ياجدي.
الجد: تعال انت وترف للمجلس ابيكم .
ترف تقدمت بخوف وبصوت خافت تلف لسند: وش يبي.
سند : ماعليتس انا معتس.
ترف : دامك معي ماعلي خلاف .
سند ابتسم وهم يدخلون عند جدهم.
الجد: اسمعوني زين انت وياها انتي صرتي مره وهو صار رجال من اللحظه هاذي تتغطين عن سند حاله حال خوانه.
سند انزعج وضاق خاطره: بس انا صغير ياجدي.
جده: همانك تقول انا رجال جوزوني ترف.
سند: مو الحين لاكبرت ياجدي.
جده بحده : اسمعني واقطع الصوت ترف ماعاد تشوفها فاهم ولالا.
سند الي انطلق يركض ويطلع برا الحوش وهو يصيح ويبكي
ترف : ابشر ياجدي الي تبيه يصير.
الجد: يالله تقلعي ولاعاد اشوفتس بدون عباه.
ترف الي لفت طرف شيلتها على نصف وجهها وهي تتغطى عن سند وتروح بيتهم
هديل تلحقها: وش فيتس وجهتس مختبص.
ترف : بعدين احكي لتس .
وطلعت ترف وهديل رجعت للبيت لان الشمس احترت.
قطع تفكير سند جده: وراك قاعد وبنت عمك بالحوش تراك رجال لاتقعد بناتنا
سند: بس انا ماصبرتها ياجدي
جده دفه: انقلع انقلع لابارك الله فيك
وطلع سند وهو شوي ويصيح من قهره.
اما جملا الي خلصت صلاة الضحى : زينن القهوه لجدكن يابنات.
هديل : ابشري الحين ازينها .
ودخلت تزينها. بعد ماراحت ترف
صار العصر وجاء كايد الي مستلم راتبه اليوم ومحمل لاخوانه وخواته كل شي بخاطرهم.
استقبلوه البنات وهم يركضون ويشيلون معاه كانت اخته غزل واقفه بعيد تناظرهم من الشباك وهي مقهوره انهم اخوانها بنفس البيت ماتقدر تكلمهم خصوصاً انها طيبه وحبوبه عكس امها وريم هديل ام قلب رهيف شافتها تطل: تعالي ياغزل امتس بالمستشفى.
غزل رحت يمهم بخطوات ركيكة وهي متفشله كايد يتلفت : وين سند.
هديل مدري من الظهر مابين.
كايد الي رمى اغراضهم بالارض وطلع  يدور سند الي لقيه نايم ورى البيت بالشمس كايد جلس يقومه : سند سند وراك راقد هنه ياخوك ضاق بك البيت.
سند: اي جدي ضيق عيشتي ياكايد.
كايد الي كان ينبهر دايم بكلام سند الي اكبر منه : ليه وش مسوي .
سند: ناشب لي عند ترف
كايد: انت المفروض ماقلته انك تحبها جدي اي شي نحبه يبعده عنا بس قم قم قرب الاذان خلنا ندخل نتوضى ونحلق الصلاه.
_______________
عند محسن
شوق وديم الي بالمطبخ : ليه حرقتي فستاني الله يحرقتك
الشغاله: سوري ماما .
شوق وهي تتأفأف : الحين كيف اروح وش البس .
طلعت وهي تفتش بالدلاوب : يوووه ياديم العشاء الليله.
ديم : البسي شي قديم .
شوق :صحباتي بينقدون عليه.
ديم:  ماعليك من احد الي يريحك سويه.
شوق : شرايك اخذ من عندك لبسه.
ديم  الي توسعت عيونه بابتسامه : والله فكره قومي تعالي معي غرفتي.
وراحت معاها.
_________________
عند سند الي مثل العاده مايشترون شي الا يحط لبنات عمه مشعل اذا ماكان بتال موجود لانه هو الي دايم يحط لهم .
شهد : عطني ادويه.
سند : لا انا بوديه.
وقام توجه للباب ويوقفه صوت جده لما قال: وين رايح
سند لف وبنظره حاده:  بروح بيت عمي مشعل.
الجد: عود عط شهد توديه.
شهد قامت وتوجهت لسند الي زعل وتضايق ورمى الاغراض بالارض
شهد بصوت خافت : سند ياويلك لو شافك جدي.
دخل سند وهو زعلان ودخل عند كايد الي منسدح بالمقلط  ويفصفص: بتروح للعزبه.
كايد : اكيد مافيه الا انا .
سند : تدري وين ام ريحه.
كايد معروف كشخصيه جامده ومو مهتم لشي : سمعت البنات يقولون بالمستشفى.
سند حكى له كل شي ابتسم كايد بصدمه : لالا.
سند : هذا الي صار .
كايد قام يتعارك مع سند الي يضحك ويقطعهم صوت جدهم : قم انت وياه خلو عنكم اللعب وتعلمو سلوم الريجيل
كايد نزل سند وفز واقف : سم.
جده : رح اخذ ابوك والحقوني بالعزبه عندنا شغل بكره بيجي عمك محسن وبنعشيه  بالعزبه.
كايد: اخذ خلف ولا اخليه.
جده : ايه اخذه وخذ الشيطان ذا  والحقوني انا بروح مع عمك مشعل.
كايد : ابشر ياجدي.
طلع الجد ولف سند لكايد : الحين انا شيطان ولا هو وبنت اخوه.
كايد  عقد حواجبه : عيب ياسند مهما كان هذا جدك.
سند طلع وهو يعدل طاقيته ويشيل ثوبه من تحت ويربط وسطه : مشينا مشينا والله مشتاق للحلال الصبح مارحت له.
كايد : يالله خلني بس انظف مكاني من الفصفص.
غزل  وهي داخله : انا اشيله انت روح لجدي لاتبطي عليه.
كايد هز راسه بالايجاب بدون اي رياكشن كطبيعة كايد المعروفه بالجمود والجديه يعني نادراً يمزح ويضحك تقدمت غزل وهي تلم القشر من الارض .
___
عند محسن
بتال وهذال وثنيان الي بالمجلس يسولفون .
ثنيان: احلى الحياه هنا ولا بالديره يابتال.
بتال ابو قلب رهيف الي مايحب الحياه بدون امه واخوانه وخواته : لاوالله بالديره عند امي.
ثنيان : ياخي اطلعو من الديره شوفو الحياه.
بتال: مانبي نشوفها كذا مرتاحين.
هذال : الا بسالك ماحبيت.
بتال ابتسم :وحنا لاقين وقت نحب جدي حتى النفس يحاسبنا عليه.
ثنيان: ايوالله لاجيتكم صدق استانس معكم بس جدي يضيق الخلق.
بتال: ماعليه يمون جدي.
ثنيان: لاوالله مايمون ما حنا ملكه يمشينا على كيفه.
بتال سند راسه على الكنب وهو مخنوق ومشتاق لديره وهو يتنهد تنهيده كادت تفجر صدره .
هذال : وش فيك متضايق بكره نازلين لديره جدي اصر الا نجي عنده عشاء لجاركم سلطان
بتال: والله ان جدي قال مالك بالجامعه بس انا مهبول.
ثنيان: والله انك مهبول اذا تركت جامعتك وضيعت مستقبلك بين احواض جدي ونياقه مستقبلك هنا هنا بالمدينه يابتال وانت كل ماجيتنا بعد الاجازه الا ماتبي الدراسه.
هذال : بشويش عليه ياثنيان تراه ماهو ناقصك .
___
في بيت مشعل ترف تسوي كيكتها الي يحبها سند وجالسه تقطعها بعد مابردت.
نجد: جدي من جده ناشب لسند.
ترف : ايه ياعزتي له سنود عشان قال بتزوج ترف حقد عليه جدي.
نجد: يستاهل سند وش يبي بهالكلام قدام جدي .
ترف : اسكتي تكفين الا سنود يازينه مهما كبر بيظل بعيني ورع.
نجد : تخيلي يزوجك جدي كايد.
ترف : لاتكفين كايد ماينفع  زوج ينفع يكون اخ  الله يعين الي بتاخذه .
نجد :سبحان الله ماخذ من صفات جدي كثييييير العصبيه والجمود والهيبه والنفسيه وكل صفاته الشينه .
ترف: لاحد يسمعك تقلين ماخذ كل صفات جدي الشينه عيب الكلام ذا
نجد : اتخيل شكله مع زوجته وهو جدي معها وعاقد حواجبه ودايما معصب وساكت
ترف تتنهد: خلينا من كايد الحين كيف اودي كيكة سنود وجدي قاعد لنا.
ترف شافت امها متوجه للباب وهي تلحقه : يمه يمه
امها تلف : هاه يمه
ترف: بس بغيت اسالك وين رايحه
ابوها : رايح يم خالتك جملا نتقهوى بغيتي شي
ترف : اليوم جدي معصب مدري وش فيه وانا سويت كيكة وسند يحبها عادي تاخذينها له على دربك .
امها : سند ماهو هنه راحو للعزبه ماحد فيه من الرجال.
ترف: اجل بناخذ كيكتنا ونجي معك انا ونجد.
امها : اجل انا بروح وانتن الحقني البيوت عتبتها وحده الجدار على الجدار.
ترف : ابشري
___
عند محسن
ثنيان : بتال بطلع كوفي تجي معي .
بتال : لا بكره طالعين الديره والاحد دوام يادوب اجهز
ثنيان: قم قم خلنا نمر السوق ناخذ ملابس.
بتال: انا جاهز.
ثنيان : قل انك ماتبي تطلع معي.
بتال : لاوالله بس مالي مزاج.
ثنيان  يسحبه بيده: قم ياولد قم
بتال قام معاه وهو ماله مزاج بش نشب له ثنيان.
___
في بيت سعود  بالحوش جالسين بنات ابو مشعل وامهم وجملا وبناتها بتقهوون على كيكة ترف ومقاضي كايد الي جايبها كانو يسولفون وضحكهم عالي وغزل بغرفتها لحالها .
قامت ترف : انا بودي كيكة سنود بالمطبخ لاحد ياكلها.
شهد :  هاتيها احطها بدولابي لاياكلها خليف .
ترف راحت مع شهد داخل كان باب غزل مردود وغزل جالسه مخدده (حاطه يدها على خدها وهي متكيه على ركبتها ) ترف دقت الباب وفتحته :  تعالي حنا بالحوش.
غزل ابتسمت : لا لا خليني كذا مرتاحه عشان مايصير مشاكل.
شهد دخلت : وش مشاكله امتس واختس بالمستشفى وخليف بالعزبه وبنات عمي مشعل معنا بالحوش وقفلنا باب الحوش اذا جو تدخلين مع ترف ونجد.
غزل طالعتهم وهي خاطرها بالطلعه مسكوها ترف وشهد بيدينها وسحبوها بالقوه
__
بالعزبه كايد الي كان مكروف لحاله وكان يفقد بتال بالحيل اذا راح للمدينه كان يجهز الخيمه لحاله سند يساعده وهويشوفه باقي صغير يعني مو اي شي يقدر يخليه يشيله وقف كايد بعد ماشد اطناب الخيمه وهو يسند يدينه على وسطه بتعب .
ابوه : رح عش النياق.
كايد مسح جبينه بتعب وتوجه لنياق يعشيها والصدمه ان سند كان معشيها كايد ابتسم ابتسامه جانبيه فهو صح ماهو كثير كلام بس ماينكر اعجابه بسند وهو يحاول يكون سند فعلاً لاخوانه وخواته : وشلون قدرت تشيل الشعير .
سند : كايد تراء عمري ١٧ .
كايد يربت على كتفه  باعجاب :  هات هات عنك انا بكمل.
سند : لاوالله انا بكمل خلاص استريح.
جلس كايد الي يلتقط انفاسه بتعب وهو يطالع سند الي فعلاً كبر وصار رجال يعتمد عليه من يوم هو  صغير ماكان يعجب جده لان سند عنيد ويسال ويعترض مو مثل اخوانه يلبي ويسكت رغم انهم مو راضين.
_
ام ترف : الا ياجملا ماودكم تجوزون كايد موظف والبيت كبير ماناقصه شي.
ام كايد : ان كانك بتعطينه ترف تراني جوزته.
ترف بصدمه وباندفاع وماحسبت حساب مشاعر امه وخواته وهي لاهيه تقطع لغزل كيكة : لا لا تكفين الا كايد الصغير فكوني منه كفايه كايد الكبير (تقصد جدها)
امها ضربتها على ركبتها خفيف ورفعت ترف راسها بفشله وهي تشوف وجيهم كيف ضربت : لا خالتي ماقصدي بس مابي اتزوج..
العنود : اصلاً كايد مايبيك يقول مابي من بنات عماني مايصلحن لي.
ام ترف بزعل : ليش وش فيهم بنات عمانه.
هديل: انشدي بنتك وش فيه كايد اول بغى يوقف قلبها .
ترف تحب بنات عمها وماتبي زعلهم : والله مو قصدي بنات بس كايد معروفه شخصيته هيبه وكلامه قليل وينقد على كل شي انا حتى طاريه يخوفني من كثر ماهو هيبه.
هديل : كله من ام  خليف ام الريحه مشوهه صورته بالديره.
غزل قامت وهي تسمعها تسب امها
شهد : هديل وش فيتس انتي ماعندتس فرامل.
هديل بزعل : خل تسمع هذا الصدق امها بكل بيت بالديره مسلفه على خواني وتمدح ولدها كل البنات مايبون كايد مو بس ترف .
ام كايد : خلاص اص كايد مايقيم طيب افعاله حريم ونصيبه بياخذه .
ترف سكتت وهي متفشله منهم بس فضلت تسكت وتلتزم الصمت
__________
عند ثنيان بالكوفي طلب لبتال قهوه : بالله جربها وعطني رايك.
بتال : والله مامثل  الشاذليه لافوحتها بالدله وهي تناثر وريحتها تشق الراس وتجلي العماس.
ثنيان : طيب جرب الكيكه
بتال : يازين الرطب والخلاص بس
ثنيان ابتسم وكمل قهوته.
__
صار يوم الخميس وجو محسن وعياله الحريم والبنات بغرفه يسولفون ويتقهوون .
وفجاه يسمعون صوت بتال ينادي  الي برضه ماجاء ويده فاضيه نطو بنات جملا يركضون : بتال صوت بتال.
اول من طلع هديل الي جاته تركض وحضنته وهو مبتسم : بشويش بشويش ماني بطاير.
هديل : ياشين الديره بدونك .
بتال : والله اني داري مانكم زينين بدوني.
هديل : الله اكبر عاد من زينك .
جو العنود وشهد وسلمو على بتال بحفاوه وجات غزل تمشي بهدوء شافها بتال : تعالي سلمي ياغزل.
غزل كانت تحس نفسها منبوذه بينهم مع انهم يعاملونها كويس بس كانت تستحي من فعايل امها واخوانها جات وسلمت  واستقبلها بحفاوه وهو يشد على يدها : شخبارتس عساتس طيبه.
غزل : الحمد لله انت وشلونك.
بتال يلطف جو : لوني اخضر ههههههه
هديل تضربه على كتفه : يع ياكرهك.
بتال :  وين امي .
الي سمع صوتها جايه وتحضنه وتسلم عليه : ياهلا وغلا بعين السيح.
البنات : ايه جاء حبيب القلب اذا حضر الماء بطل التميم.
بتال : وشلونتس يالغاليه عساتس طيبه.
امه : طيبه عساك طيب .
بتال وقف معهم شوي : بمشي للعزبه تبون شي ثنيان يترقبني براء.
البنات: لا
هديل تقرب تشمه : ياحلو ريحتك صاير تبرق.
بتال دفها : معطرني ثنيان .
العنود: خذني معك للمدينه تكفى بهج عن جدي.
بتال : والله انها تجيب الغلقه يازين الديره بس لكن انا استاذنكم ولاتنسون بنات عمي مشعل هالكيسين لهن.
العنود: ماعليك ماعليك بنوصلها .
شهد: جبت اغراضي .
بتال : اي كل وحده اغراضها بكيس لحالها حتى ريم وغزل.
غزل ابتسمت ( ذاكر ريم رغم تعاملها الشين مع امه وخواته) مدت يدها تاخذ اغراض: الله يرزقك ويعوضك.
وهنا ثنيان الي يضرب بوري ويطلع بتال وهو يركض بعد ماباس راس امه وطلع.
وهم باقي واقفين الا صوت  كايد : ياهل البيت.
البنات : تعال تعال مافيه احد .
وبس يدخل الا ساره الي جايه يم البنات كايد اول ماشافها صد عنها وهو يطلع وعرف ملامحها الي ماتغيرت بس كبرت وصارت اجمل .
ساره كانت جايه مع شوق بنت عمهم محسن : مين ذا مو تقولون تعالو راح بتال.
غزل: ذا كايد توه دخل .
العنود : بشوفه دقيقه انتم خذو الاغراض ونادو بنات عمي مشعل وروحو للحوش تحت شباك غرفتها.
شهد تمسك غزل بيدها : تعالي نجهز الجلسه.
غزل فرحت لما طلبت منها شهد تساعدها وراحت معها.
__
العنود طلت تشوف كايد الي واقف وهو صافن بالارض  وعاقد  حواجبه : هاه كايد وش بغيت.
كايد لف بصدمه : وش جايبكن قسم الرجال ضاق بكن البيت.
العنود: كنا نسلم على بتال توه راح نادينا البنات الا انت جاي.
كايد : عطيني سكين اللحم بسرعه ابطيت على ابوي وجدي.
العنود : دقيقه.
ودخلت ركض وجات : هاك .
كايد توجه لسياره وتلقفت العنود : هاذي ساره حبيبة القلب.
كايد طالعها بطرف عينه : خلي عنتس اللقافه وادخلي عيال عمي محسن بالديره
وكمل طريقه لسياره .
العنود : مايبتسم لو بالغلط اف.
دخلت وقفلت الباب.
___
عند البنات بالغرفه
شوق : انتي كم عمرك ياساره.
ساره : ٢٢ .
ترف : اكبر مننا كلنا ما اكبر منك الا كايد ولدي عمي سعود شكلنا بنزوجكم .
ساره : لاتكفين الا كايد مابيه
هديل الي عصبت : ليش وش فيه كايد .
ساره : مافيه شي بس مابيه.
نجد: حرام كايد يحبك .
هديل لفت لنجد : كذابه من قال انه يحبها .
نجد: شهد قالت لي .
العنود فكرت ان ساره مستحيه عشان كذا قالت ماتبيه :  الا صح يحبك .
ساره  بضحكه : لا لا يحبني ولا شي يرحم امه يبعد عني بس
هديل عصبت : انتي قليلة ادب واخوي تحلمين بظفر اصبع رجله الصغير.
شوق : وش فيك ياهديل مو غصب تحبه.
هديل : انتي انطمي مالك دخل واخواني خط احمر امي طيبه وتسكت عن حقها بس حنا لا.
شوق : يابنت ماحد درى عنكم ريحينا بس.
ديم : خلاص ياشوق مهما كان ولد عمك.
ترف : والله نمزح وش فيكم .
العنود : اي مزح امس انتي واليوم هي انتي بالذات ياترف والله لو يبيك كايد لياخذك طرق .
ترف : تعقبين انتي وياه ليش شاه انا .
العنود تهدي هديل الي فار دمها وصارت تهاوش وقامت راحت للمطبخ وهي تغلي من غضبها ولحقوها خواتها حتى غزل.
______________
عند البنات
ديم :ترا مالكم داعي عيب تتكملون عنه كذا .
شوق : المعروف عن كايد قلناه كل العالم تدري بهالشي.
ترف: انا قهرتني وغلطت عليها ولا انا احبها هديل مثل اختي .
ساره : الي يزعل اليوم يرضى بكره.
___________
عند هديل الي شوي وتنفجر جات ديم حضنتها وهي تعتذر رغم انها ماغلطت وهنا صاحت هديل من قهرها
ديم انصدمت من صياح هديل وفهمت انه من الكبت والقهر وصارت تمسح دموعها وتهديها .
___
بالعزبه كايد الي كان يحوف العشاء من يوم شاف ساره اختبص وهو جالس يفكر فيها كيف للحين حلوه وصارت احلى ويجي بتال : ارم همومك عليه.
كايد قام وقف : يالله حيه متى جيتو.
بتال : جيت قبل ساعه مع ثنيان بسيارته وبرجع معه.
كايد: اقعد اقعد .
بتال جلس جمبه على حجرتين حاطينها من قبل عند مكان النار : علامك مختبص.
كايد : مافيني شي احوف لكم العشاء.
بتال : علمني اعرفك اذا مانك خالي.
كايد يتلفت يمين ويسار وكان بيتكلم بس هون باخر لحظه لانه مو متعود يفضفض لانه شخصيه منصته : مافيه شي  يارجال.
بتال قام وهو يرفع ثوبه على وسطه ويربطه: قم قم رح للخيمه انا بزين العشاء
كايد : لا  يارجال توك جاي .
بتال : والله ماحد يزين العشاء غيري بس قم.
كايد قام راح لرجال وبتال جلس يكمل العشاء وجاه سند يساعده : تبيني اعاونك.
بتال : ايوالله عب الابريق وهاته.
سند وهو يفز : ابشر
بتال ابتسم : الله يبشرك بالخير ياذيبان.
اخذ الابريق وراح يعبيه من الوايت.
وكايد الي جلس مع الرجال يقهويهم لكن هالمره ماهو كايد الي يلقط الفنجال من يدين الرجال ويصب لهم قبل يطلبونه يصب هالمره كان صافن ويفكر ومن كثر مانادونه ويرجع يصفن عصب جده : هذال
هذال نقز يم جده : سم ياجدي.
جده : خذ القهوه قهونا
____________
عند الحريم.
ام ساره : الا بناتك يم ثنيان كم اعمارهم.
ام ثنيان: شوق ٢٠ وديم ١٧
ام ساره: ماتعطونا شوق لولدي محمد.
ام ثنيان لاوالله ياختي بنتي عايشه من صغرتها بالمدينه بتدفنينها بالديره.
ام ترف : من قالتس اننا مدفونين بالديره
ام ثنيان : ماقصدي الي فهمتيه .
ام كايد : الديره تربي عيالنا رجال وبناتنا سنعات.
_________
عند هديل الي لسى تصيح مسكتها ديم وخذتها للغرفه ودخلو وقفلو الباب : ليش تصيحين الحين كايد ماهو بحاجة شهاده من احد ماهو مريض ولا سكرجي عشان تصيحين مثل ماهو اخوك تراه ولد عمي ومارضى عليه بس قومي غسلي وجهك وخلينا نطلع لهم.
وهنا دخلت ترف : هديل انا اسفه والله ماكانا قصدي بس .
ديم : بدون بس وترجعون كايد وكايد اعتذرتي خلاص تقدرين تطلعين احنا شوي ولاحقينك.
طلعت ترف وديم جلست تقنع هديل تجي معاها.
___
تعشو ورجعو للبيت ومحسن وعياله بينامون عند سعود ويرجعون للمدينه يوم السبت.
هديل: اففف ابي بتال وين اجيه عيال عمي محسن هنا .
العنود : ليته يجينا بالحوش .
هديل : لازم اعلم بتال بلي صار .
العنود: وبتال وش بيده يسوي.
وهنا اندق شباكهم نطت هديل : بتال (هالحركه تكون بينهم اذا نام جدهم يدق شباك البنات يجونه بالحوش.
بتال بصوت خافت: تعالو بالحوش بنسمر شوي .
هديل ماكان مودها وخبالها الي يحبه بتال : العنود تكفين سوي شاهي وجيبي الفصفص.
العنود: عشانك زعلانه بس ابشري.
راحت هديل عند بتال وجلسو هديل كان واضح ان خاطرها ضايق .
بتال: وش فيتس من مزعلتس.
هديل هنا قامت تصيح بتال قام جلس جمبها وهو يسند راسها على كتفه : علامتس انتي ولا تدلعين على اخوتس.
هديل رفعت راسها : صار شي اليوم.
بتال: وش صار علميني.
هديل حكت له كل شي
بتال : وانا اقول علامه كايد اليوم مختبص اثره شايف ساره.
هديل : الي يقهر انها طول الليل تسبه وتقول مابيه تكفون الا كايد قهرتني الله يقهرها في عمرها.
بتال : وانتي ماعندتس الا دموعتس
هديل وهي تضربه على كتفه :لاوالله هاوشتها وحتى هاوشت ترف الكلبه.
بتال : شوفي وانا اخوتس لاتقلين لكايد شي.
هديل:  اكيد ماراح اقول له ماني مجنونه.
بتال: انتي تعرفين كايد مايرمي نفسه على احد يعني مافيه حل الا اننا نسكت ونخليه يخطبها وان عيت بيقفل هالباب للابد اخوي واعرفه.
العنود وهي تجلس بالشاي والفصفص: ياعمري ياكايد الله يجعل ام خليف بالجلطه.
هديل : انا مابيه يخطبها وتعيي ثم يكبر راسها .
بتال: قلت لتس كايد مايحب النقنقه وعلوم الحريم ماراح يسمع من احد خليه يخطبها وياخذ الرد بنفسه.
العنود: هاك شاهي.
بتال قام وهو متضايق: انسدت نفسي مابيه بروح عند كايد.
ودخل وهديل قامت دخلت العنود: شف الكلاب طلبو الشاهي وقامو وخلوني شكلهم كانو يصرفونتس يالخبله.
وقامت وهي تشيل الصينيه وتدخل.
بتال دخل عند كايد الي كان منسدح وحاط يده على جبينه متهيى للنوم بس ماكان يجيه نوم انسدح وهو يسرق له النظر وواضح انه موب خالي رفع كايد يده وهو يلتفت له: علامك تناظرني .
بتال : ابد بس قلت بسولف معك شوي دام العيال رقدو بالمجلس.
كايد الي ينقلب جهة بتال وهو يسند راسه على يده وبملامح حاده وهو يجمع حواجبه : اسمعك هات ماعندك.
بتال ابتسم : كيف تبيني اسولف وانت تناظرني تسذا.
كايد ابتسم ابتسامه شبه معدومه: لا لا ماعليك قل الي بخاطرك.
بتال تنهد : يارجال افكر اترك الجامعه واتوظف ولا اداوم يومياً من الديره صد رد كل يوم.
كايد رجع جمع حواجبه  لكن هالمره بضيق ونبره حاده وهو يقوم يجلس : لا لا ياويلك تتركها كفايه انا غصبوني ابوي وجدي اتوظف بالثانويه عشان بس كايد حفيد كايد توظف .
بتال: احمد ربك ماخذك ابوي معه للمحل وحطك صبي تبيع وتشري له.
كايد: ابوي تراه صغير وباقي متعافي وخليف معه مايخليه وعنده صبي يعني ماهو بحاجتي بعدين ابوي مايسوي شي غير الي جدي يبيه.
بتال: الصدق اني افكر بشي وماودي يكون صدق.
كايد : الي هو.
بتال : جدي خلاك توظف وانا ارسلني ادرس جامعه وخليف ملتوي على ابوي والمحلات يعني خليف بيكون عون ابوي عشانه ولد نوره يكون فاهم الشغل كله ويمكن يخليه يمسك الحلال وحنا ياعيال جملا الي بناكل هواء.
كايد بصدمه وهو يحاول يكذب الي سمعه : لالا يابتال ماتاصل لا هنه.
بتال : الا تاصل ونص جدي دايم وهو يقول وحيد وانتم اخوان من دونه ياعيال جملا عشان تسذا بيخليه فوق روسنا .
كايد : عشان تسذا اقول لك ادرس ولاتضيع جامعتك ان تركت دراستك وجيت هنه والله ليحطك عند الحلال يارجال مايرحم احد امس جاي من الدوام يجي يرفسني برجله وانا راقد يقول قم صل ورح ضرم الغنم.
بتال ابتسم : يازين الغنم وطاريها ياكايد.
كايد: اي بالله يازينها وزين طاريها بس انا قصدي انه ماهميناه نتعب ولالا انت ياكايد قم وانت ياخليف ارقد عشان تخاوينا للمحل.
بتال كان اكثر واحد قريب لكايد ويممموت عليه بتال ومشاعره واضحه عكس كايد الي صح يحب امه وخواته وحنون عليهم بس مايعبر عن مشاعره ولا احد يدري وش بقلبه.
_____
عند ترف ونجد بفرشهم.
نجد: انتي تراك متغيره على هديل والعنود ماعاد لتس سالفه الا تجرحينهم باخوهم كايد.
ترف : والله اني اموت عليهم مثلك ويمكن اكثر بس مدري وش صار .
نجد: وش صار سبيتي اخوهن امس واليوم وكايد ماهو راعي مشاكل بس اخذ سمعة جدي الي تروع بس لانه سميه.
ترف : لا لا كايد انسان بدون مشاعر شخصيه ممله طول الوقت ساكت واذا عاد تكلم نقد عليك وعصبي ويهاوش  مدري كيف كل هالاشياء فيه بس انا مابيه.
نجد: ماتعرفينه عشان تقولين عنه كل ذا.
ترف: كلام خواته ماهو كلامي.
__
نامو الكل
قبل الفجر بنص ساعه كالعاده يجي  الجد يصحي الكل جاء وهو يرفس كايد برجله : كايد قم صل لا بارك الله بالرباده وميتت النار .
قام كايد وجلس وهو يفرك عيونه : ابشر ابشر ياجدي
ونفس الحركه يسويها مع بتال الي قام وجلس ويجي عند سند الي قام  وبعصبيه: خلاص خلاص ياجدي درينا .
الجد توجه لخلف وهو ينبهه بكل حب : خلف خلف ابوي قم صل.
بتال وكايد التفتو لبعض وهم يبتسمون على حركات جدهم الي مايخليها قام كايد وهو يتوجه لثوبه يلبسه لانه نايم بسروال وفانيله وراح يتوضى.
بتال فلت نفسه على مخدته وهو يفرك جبهته  بانزعاج طبعا عيال سعود الكبير كايد ثم خلف ثم بتال ثم سند.
____
عند البنات الي صحو  على فرشهم هديل كانت عيونها متورمه من الصياح لفت العنود الي انهارت ضحك بس شافت عيون هديل كيف منفخه وصغيره : هههههههههههههههههههههههههههههه وين عيونك يابنت هههههههههههههه اخ يابطني .
هديل قامت وهي تركض للمرايه وتشوف عيونها منفخه وهنا صارت تضحك غصب عنها : هههههههههههههه والله لدعسك ياعنود ياكلبه الله يجعل ام خليف الزلال الي يزيلها من وجه الارض .
العنود وهي يالله ماسكه ضحكتها : الحين كيف تجهزين الفطور معي.
هديل : مدري مابي احد يشوفني .
قامو وتوجهو للحمام توضو وصلو وراحو للمطبخ ودخلو كايد وبتال شارين اغراض للفطور .
بتال :  صبحهم وربحهم.
هديل كانت لافه على المجلى وترد عليه بدون ماتطالعه لانه تعرفه بياخذها طقطقه :  هلا بتال حط الاغراض هنا ورح.
كايد: بس بتال وانا طيب مافيه هلا.
هديل بنفسها ( كملت ياربي انا ناقصه الحين): هلا كايد كلكم هلا.
بتال : انتي وش فيتس وش الي كلكم هلا بعدين وراك صداه عنا ناظريني بشوف وجهتس الحلو .
هديل : مابي اناظر احد خلوني بحالي.
سند دخل واشر لبتال بغمزه وراح يشوفها : وجهتس علامه .
بتال وكايد توترو من سمعو الكلمه ولفت هديل تطالعهم وهي تصيح هنا ماقدرو يمسكون نفسهم من الضحك حتى كايد الي مايضحك شافو اسنانه اليوم وهو يضحك : شعندتس يالصينيه.
بتال انسدح وهو يضحك : ياقلبي قلباه انتي علام عيونتس.
العنود الي جابت العيد : من الصياح على كايد البارح.
كايد الي تلاشت ابتسامته : علامي عشان تبكين عليه.
الكل انلخم وهم يناظرون بعض .
هديل : شفتك بمنامني قارصك داب.
بتال بنفسه ( مالقيتي غيرها الله يقلعتس)
كايد : والله ماعندتس سالفه.
وطلع للمجلس بتال ضرب العنود على راسها بشويش : ماتعرفين تسكتين.. المهم لاتحزونا بالفطور بنفطر عند عمي مشعل.
البنات فرحو وهم بياخذون اجازه اليوم من فطور الرجال
#تفااعلو✋🏻