انا احبك مابها زيف وخداع رغم الذي نخفيه والي نخافه

بارت ١

الجد كايد ابو سعود يعيش بالديره شيخ جماعته صارم وصاحب راي وماحد يطلع عن شوره قبيلة  تحكمها العادات والتقاليد المتوارثه بين الاجيال تستمر لتصبح جزء لايتجزء منهم .
_______________
بيت ابو كايد (سعود)
الزوجه الاولى ام كايد( جملا)
الزوجه الثانيه نوره ام خلف وتصير بنت عم سعود
عيال ام كايد
كايد الكبير سمي جده
بتال الوسط
هديل
العنود
سند  البطل
شهد
عيال ام خلف
ريم
خلف
غزل
___________
بيت ابو ثنيان (محسن )
ام ثنيان (لطيفه)
ثنيان بطل
هذال
شوق
ديم
_____________
بيت ابو ترف ( مشعل)
ام ترف( فاطمه)
ترف بطله
نجد
__________
نتعرف على الشخصيات بالروايه
يوجد شخصيات ثانويه
_____
في الديره يسكن الجد هو وعياله الجد الصارم الي عياله مايعترضون على كلامه ولازم احفاده يمشون على هالاساس من كثر مالجد صارم يخافون يقولون كلمه تغضبه عليهم لذلك دايماً يسوون الي يناسبه هو والي يبيه
"""
"بيت سعود"
كان فيه عشاء ومتجمعين عنده كان العيال ثنيان وكايد وبتال وهذال وسند.
جالسين يسولفون
ينطق جدهم : الا ماتبون العرس ياكايد انت وثنيان
يبتسم كايد : ابد ياجدي الي تبيه يصير
يهز راسه : ايييي لا لا بعدكم صغار يبالكم كم سنه زياده بنات الريجيل مانهن بلعبه .
ينطق : الي تشوفه .
يطالعه يبي يختبره : الا ان كان في خاطرك بنت علمنا منهي .
توسعت عيونه : اعوذ بالله لاوالله مافي الخاطر احد ولاني براعي هالخرابيط ياجدي.
هز راسه بإعجاب : كفو والله بسميي ايه هاذي علوم الريجيل .
ينط سند الي ماعنده سيره غير ترف وزواجه منها : انا ياجدي احب وحده
وضحكو منه ابوه وعمانه
ابو كايد : منهي هالوحده علمنا بها
ينطق : ترف بنت عمي مشعل.
جده : ترف اكبر منك ب١٠ سنين .
ينطق بابتسامه : ماعليه بكبر واعرس عليها .
جده بعصبيه : سند.
ينطق : سم ياجدي
جده بعصبيه : الكلام ذاه عيب لاعاد اوحيه فاهم ولالا.
بلع ريقه بخوف : ابشر ياجدي .
ابو كايد : سند يمزح يابوي ورع لاتاخذ بكلامه.
سند بغضب  يقوم يوقف : ماني ورع يبه انا رجال عمري ١٧ سنه
ويناديه جده الي ضربه كف قوي : انقلع جب القهوه يالله وخل عنك العلوم الرديه.
يقوم يوقف يمسك خده ودمعته الي علقت بعينه ويروح يجيب القهوه
وهو يتنظر القهوه يتذكر ترف وكل مايقول ابي ترف يضربه جده .
،،فلاش باك ،،
وعمره ١٠
تستقبله ترف الي تحبه من هو صغير : هلا سنود وش تبي .
سند : القهوه والمه
ترف وهي تاخد بخاطره : اي بس انت من مزعلك .
يصد عنها : ماحد زعلني بس جيبي القهوه
تمسك خده : ليش خدك احمر
يرفع عينه يطالعها : جدي ضربني لاني قلت بتزوجك..
ضحكت من كلامه : تتزوجني انا
يهز راسه : اي انتي ليش تضحكين انا ماني بزر انا رجال
تمسح على راسه : وزينة الرجال ياسنود ماعليك منه انا موافقه اتزوجك بس اكبر شوي .
يبتسم :لاتتزوجين انتظريني اكبر .
تعطيه القهوه : هاك هاك ود القهوه لايزعل جدي .
اخذ القهوه وطلع .
هديل: وش فيه سند
ترف بضحكه : كالعاده يبي يتزوجني ياحليله مايدري انه بتزوج واخلف وهو باقي بزر..
هديل : وانتي كالعاده تسلكين له .
ترف : وش اسوي تبيني اقول له .
هديل : حب طفوله بكره يكبر وينساك
ترف :شكلها كذا بس تعالي نحوف العشاء ..
وراحت هديل معها
____
حالياً
اخذ سند القهوه من خواته ورجع للمجلس بالقهوه وحطها عند جده : هاك
جده ماكانت تعجبه حركات سند لانه كان عنيد ويعانده
كايد: اسمها سم ياسند مهيب هاك .
الجد: اي علمه وانا جدك ابوك الظاهر انه نسي يربيه
ابو كايد : افا يبه والله اني اعلمه وانبه عليه لكنه عنيد ماطلع على خوانه.
الجد: لو الخيزرانه تلعب على ظهره كان مارفع عينه فلي اكبر منه وهو يرادد ويعاند لكن الرباده شانه وانا ابوك الظاهر انك كبرت ودبرت وخليته بدون تربيه لكن انا الي بربيه
سند خاف من تهديد جده و عشان يخارج نفسه منه نزل القهوه عند كايد : صب قهوه لجدي ياكايد انا بروح الحمام.
كايد اخذها وقام يصب لجده .
وسند طلع يجلس برا وتذكر زمان قبل تتغطى ترف عنه
يوم كان جده يطرده ويطلع يلعب برا
،،فلاش باك،،
ترف الي جايه من بيتهم لبيت جدها وتنادي سند بصوت واطي : سنود تعال تعال.
سند يروح عندها يركض : سمي
ترف : هاك العصر سويت لك الكيكه الي تحبها ورديت لك شوي .
سند اخذها منها : بس رديتي لي انا ماحد ثاني غيري .
ترف تضحك وهي تمسح على راسه : اي بس لك اعرفك تحب كيكتي لكن انا بروح قبل يشوفني احد .
سند : اي ادخلي فيه رجال بيجون للعشاء.
دخلت ترف وسند جلس ياكل الكيكه وهي ماسكه بيدينه الي كلها تراب وثوبه الي انعدم من اللعب برا
ابتسم سند وهو يرجع للواقع بس سمعهم ينادونه وقام ودخل
______________
حالياً
عند الجد
ثنيان الي ساكن بالمدينه وبتال كان يدرس عندهم بما ان الجامعه اقرب للمدينه
ثنيان : بنمشي الرياض انا وبتال بعد يومين عشان الجامعه عندنا ترم صيفي .
بتال : ايوالله دوبنا نتجهز
جدهم : رحو لكن هه اياني وياكم تلتمون على عيال المدن تراهم ماهم مضبوطين انتبهو لنفسكم وخلكم ريجيل والتو على بعضكم مثل النشاما.
بتال : ابشر
ثنيان : ان شاء الله لاتوصينا حنا تربيتك
الجد: ان شاء الله وبعد ماتوظفون ان شاء الله نجوزكم ونفرح فيكم .
ثنيان :ان شاء الله
بتال :على خير
____
طبعاً علاقة حريم سعود متذبذبه ودايما مشاكل خصوصا انهم ساكنين ببيت واحد صح البيت كبير بالحيل بس بالنهايه ساكنين مع بعض
هديل وترف يزينون العشاء
هديل ٢٠
ترف ٢٣
دخلت ام خلف مرت سعود ابو هديل: سوي شاهي لخلف بسرعه وزودي السكر تخبرينه يحب السكر زياده .
هديل كانت تغسل الرز : انا مشغوله قولي لبناتس يزيننه انا ماني خدامه لتس ولعيالتس .
ام خلف : والله ان مازينيته لعلم عمي كايد يربيتس ياقليلة الحياء.
ترف: هديل صادقه وين بناتس ريم وغزل.
ام خلف: انتي وش دخلتس هاه.
هديل وهي تحط رز الذبيحه وتغطي القدر : شاهي ماني بمزينته واعلى مافي خيلتس اركبيه.
وهي تطلع من المطبخ وتلحقها ام خلف وهي تمسكها بشعرها وتسحبها بقوه وهديل تصرخ وهي تحاول تفلت من يد ام خلف ترف راحت عند الحريم الي جو ركض طبعا ام كايد انسانه مسالمه ماتأذي احد عكس نوره ضرتها الي مستقويه بعمها كايد.
ام كايد : اتركيها يم خلف الله يهديتس بس.
تعالت الاصوات ودخل الجد كايد وولده سعود وعياله بتال وكايد الي انطلقو عند ام خلف وهم يبعدونها عن اختهم.
كايد : مالتس حق تضربيها امها وابوها حيين.
بتال وهو يحضن هديل الي تقطع شعرها : الله يجعلها العطب .
صدمهم صوت جدهم الي اذا دخل يسكتون من قو هيبته وصرامته : اقطع الصوت انت وياه.
ام خلف ( نوره) كان عمها يحبها ويعاملها معامله خاصه عشانها بنت اخوه : وش العلم يانوره.
ام خلف: ابد ياعمي جيتها وهي تزين العشاء قلت زيني لخلف اخوتس شاهي وعيت تقول اخواني بتال وكايد وسند خلف اخو ريم وغزل.
الجد كايد توسعت عيونه : تعالي هنه ياهديل .
هديل تطالع باخوانها بخوف : والله انها كذابه والله ماقلت خلف ماهو اخوي قلت انا مشغوله ازين العشاء خلي ريم تزينه حتى ترف شاهده ياجدي .
الجد كايد بحده وهو ياشر قدامه : قلت تعالي هنه ياهديل .
هديل راحت عنده بخطوات ركيكة وبخوف وقفت قدامه وهي منزله راسها من كثر ماكان جدها هيبه ويخوف وشهقت بقوه وهي تحس بحرارة خدها بعد كف جدها الي علم على وجهها،، بتال وكايد كانو مقهورين عندها بس التزمتو الصمت قدام جدهم مثل ما ابوهم التزم الصمت قدام ابوه ويدف هديل : انقلعي الله يقلعتس .
هديل الي انطلقت للغرفه وهي تصيح وتستقبلها ترف الي حضنتها وجلست تواسيها .
الجد كايد : اسمعوني زين ياعيال جملا علمن ياصلكم ويتعداكم كلكم في ذال البيت عيال سعود ماحد دون احد وخلف اخوكم مثل ما انتم خوان من دونه.
سند رغم انه اصغرهم بس كانت شخصيته قويه وهو الوحيد الي كان يرد على جده : بس حنا ماقلنا ان خلف ماهو اخونا ياجدي امه هي الي توز براسه وتشين خاطره علينا.
جده رمى العصاء على سند الي انسحب وطلع برا.
__
عند ترف الي تواسي هديل الي ضربوها ونتفو شعرها دخلت شهد : هديل اخواني يبونتس برا.
هديل : مانيب رايحه مكان خلوني بحالي الله ياخذني ويريحكم
سند دخل وطلعت ترف للحريم .
جات ام خلف ؛ خلي عنك الرباده وقمي كملي عشاتس يالله اعجلي الرجال بالمجلس يحترونه
سند : ان كان هي فيها رباده انتي ورينا السنع وكملي العشاء.
ام خلف جت تضربه ومسك يدها ولفت له هديل ودفها : رح عند اخواني ياسند لاتحط عقلك بعقلها صغيرة العقل .
طلع بعد ماطست ام خلف وقفلت شهد الباب على هديل الي متفشله من الي صار ترف راحت عند العنود الي كانت تقهوي الحريم.
ترف: العنود تعالي بغيتس شوي.
العنود حطت القهوه وطلعت : وش فيه.
ترف : تعالي بنزين العشاء .
العنود : ليه وينها هديل.
ترف : مرت ابوتس هالغبراء قومت جدي على هديل وضربها وهي بعد قطعت شعرها.
العنود شهقت وهي تحط يدها على صدرها : الله يكسر يدينها وين هديل الحين وراكم ماعلمتوني.
ترف: هذاني علمتك وش بتسوين يعني.
العنود: بفزع لاختي حتى لو يكفخني معها.
ترف: هي تقول ابي اقعد لحالي وطلعت وخليتها بحالها بس تعالي نزين العشاء لايحترق ثم من يفكنا من جدي.
العنود : يالله يالله بس بوصي شوق على القهوه واجيتس.
_
عند بتال وسند الي جالسين برا على الدرج ضايقه صدورهم من الي صار لهديل
بتال: حق من محطها بالخيزرانه لين تقول امين والله لولا جدي اني لامد يدي عليها.
سند: تراني لقيتها لاحقتها للغرفه تتمحرش بها تدور مشاكل ام الريحه.
بتال ضحك من كلامته: والله انها ام الريحه صدق .
سند : هههههههه سمعت جدي يوم يقول اسمعوني ياعيال جملا كلكم عيال سعود هههههههههههههه
بتال: هههههههههههه اي هجت معه قام يتخبط مايداني ام الريحه تزعل.
_
كملو العنود وترف العشاء وخذوه العيال لرجال وتعشو وكلن راح بيته بقي بس سعود وعياله بتال وكايد وسند راحو عند هديل يطيبون خاطرها دخل بتال الي كان يموت بهديل من بين كل خواته :‏ لاتضيق وينتثر دمعك وانا فوق البسيطه
‏اذخريه لاسمعوك اسمي وانا قدني تحتها.
هديل قامت وحضنته : بسم الله عليك لاتقول كذا والله لصيح صدق.
بتال ابتسم : بسم الله عليتس من الصياح.
كايد كان يشبه جده بصرامته وعصبيته وثقله الا انه مايحب احد يزعل امه خواته: تبين شي من البقاله نبي نسهر بالحوش.
هديل الي نست حزنها : ايوالله ابي.
كايد: اكتبي ورقتس وانا بروح اشوف جدي اذا رقد.
هديل مسحت دموعها وهي تاخذ ورقه وقلم وتكتب بتال يطالعها ومبتسم: يحبتس في بطنتس.
هديل : فيه احد مايحب بطنه بعدين انا ماتعشيت.
بتال يطالعها بقهر
____
في بيت مشعل
ترف جالسه تمشط شعرها الي يوصل لاسفل ظهرها كان اسود كثيف ناعم ثقيل
نجد: وش فيتس تتبوسمين.
ترف : افكر بالحياه
نجد: تدرين خاطري اكمل دراستي ويموت جدي ونترك هالديره.
ترف لفت بصدمه :اص لايسمعك ابوي وش هالكلام استغفر الله بس طفي طفي الضوء خلينا ننام.
قامت ترف تفتح الشباك وشافت عيال عمها سعود وبناته بالحوش ابتسمت ترف : شايفه يانجد كيف يحبون بعض وقلوبهم على بعض خالتي جملا صح ان شخصيتها ضعيفه بس تعجبني تربيتها لعيالها وبناتها
نجد : الي الله ياخذها ويريحنا منها ام خليف عله عله الله يكرها.
ترف : لو كان عندنا اخ تتوقعين بيحبنا نفس حب كايد وبتال وسند لهديل وشهد والعنود.
نجد: اي اكيد بس ربك ماكتب يمكن خيره بس يارب يعوضك بثنيان ويكون لك اخ وصديق وحبيب.
ترف وهي تتنهد : امين الله يسمع منك انا اكثر تعلقي بثنيان مابي الديره ابي اعيش بالمدينه.
نجد : بتتحقق ان شاء الله ماعليك.
____
عند محسن بالمدينه
شوق وديم وثنيان وهذال الي جالسين بالصاله
ثنيان جلس جمب شوق : شوق
شوق لفت : نعم
ثنيان: منهي البنت الي شفتها معك قبل ننزل الديره يوم جانا خالي عدنان هي وحده من بناته.
شوق: اوصفها لي .
ثنيان: شعرها كيرلي ولابسه فستان قصير اصفر.
شوق وهي عرفتها من الوصف : ايييييه هاذي امل بنت خالي بس ليس تسال.
ثنيان : الصدق اني عجزت اطلع صورتها من راسي ياشوق رحنا الديره وجينا وهي في بالي.
شوق: عجبتك.
ثنيان : ايوالله بالحيل.
شوق: تراها عمرها ب٢٠
ثنيان: ومن قال لك اني ابي الزواج الحين بس اني حطيت العين عليها.
شوق: ادرس ادرس وبعدها نتفاهم.
ثنيان: عطيني رقمها
شوق توسعت عيونها: ايش
ثنيان : وش فيك ماني ماكلها.
هذال: ياويلك لو يدري ابوي
ثنيان : من قال انه بيدري بكلمها وابوي ماني بمعلمه لين اقول له يخطبها.
هنا جابت ديم السوني: يالله نلعب ياعيال.
وقام معها هذال
شوق:الا بتال ماجاء معك.
ثنيان: لا بيجي بعد يومين بيقعد مع هديل بعد ماضربها جدي.
شوق: والله وش عرفك.
ثنيان: اكيد مافيه الا هي
شوق : قوم قوم نلعب معاهم.
وقامو
___
عند سعود بالحوش طبعاً الجد يسكن مع سعود وعياله
هديل معي قارورة ببسي قزاز فاضيه خلونا نلعب لعبة مصارحه وكلكم بتجاوبون صدق.
الكل : طيب
هديل تلف القاروره وتجي عند بتال انه يسال سند .
بتال يطالع سند وهو يفرك يدينه بابتسامه : انا بتكلم معك في موضوع بعرف انت ليش كل ماطرى طاري قلت بعرس على ترف .
سند : اي بعرس عليها .
كايد : انت صغير وانا اخوك والبنت اكبر منك بست سنوات .
سند ترك كل الكلام وركز على العمر : جدي يقول ١٠ سنين .
العنود : لا بس سته بس جدي يحب يهول الامور.
سند : هي تحبني بعد
هديل : مو ذا كلامنا ياسند انا مابيك تتعلق فيها هي تشوفك صغير ماراح توافق .
سند يلف القاروره عشان يغيرون الموضوع: لفي لفي القاروره.
اخوانه طالعوه بقهر ولفت هديل القاروره
وكانت هي تسال كايد وهي تطالعه بخبث: ياويلك مني ياكايد.
كايد بحده: اخلصي
هديل : سوال لو خيروك تتزوج من بنات عماني من تختار.
كايد : مابي من بنات عماني.
الكل : اووووه
سند بخوف : اسكتو لا يسمعنا جدي.
الكل انتبه لصوته وخفضو الصوت .
هديل بصوت خافت: يالله جاوب.
كايد وهو يعقد حواجبه : بنات عماني ترف تربت معنا اعدها مثل اختي ونجد صغيره وبنات عمي محسن دلوعات مايصلحن لي.
بتال : طيب من تبي.
كايد الي متعود مايشارك احد اسراره الا انه تحمس وقال لهم : الصدق اني ابي ساره بنت جارنا سلطان اذكرها وهي صغيره كانت تلعب معي وحنا صغار كانت ماصعه قلبي.
البنات طالعو بعض العنود : اجل لو تشوفها الحين وش بتقول والله تاخذ عقلك ورى قلبك.
بتال :السوال هنا جدي بيوافق يزوجك اياها.
كايد بخيبه : والله مدري يابتال ماودي اتعلق ويصدمني.
العنود : السوال الاهم البنت تبيك ولالا.
هديل : هاذي بسيطه اجيب لك العلم.
كايد : لا لا لاتفضحينا ان وافق جدي خطبتها وان عيت يعني ماتبيني وان كانت ماتبيني الله يوفقها.
هديل : شف بكون صادقه البنات بالديره يخافون من طاريك خصوصا انك تشبه جدي دايم زعلان ومعصب ومالك خلق شي انا مستغربه ان ساره عاجبتك.
كايد الي زعل وتحسف انه فصح لهم مافي قلبه لانه مو متعود الا على الجمود والجديه : الشرهه علي الي سولفت لكم وقام توجه لغرفته .
بتال : فضفض لنا وضاق علينا.
هديل : ترا صدق غريبه يفضفض كايد بس زين اني عرفت ان قليبه ممصوع ويبي ساره .
هنا سمعو صوت شباك ام خلف الي فتحت الشباك وهي تهاوش : ماتخلون احد ينام ياعيال جملا ان راحت علينا الصلاه ذنبنا في رقابكم.
وكان كل قصدها انها تسمع عمها بس من حسن الحظ انه ماسمع قامو البنات والعيال هم كل واحد شايل شي ويركضون لداخل قبل يصحى جدهم
#علقو_