🦋 إسكريبتات شروق حسام 🦋

إسكريبت 🦋 دمية واحدة لا تكفي 🦋

إسكريبت 🦋 بقلم شروق حسام 🦋

_" مي يا حبيبتي أنا رايح شغل وهغيب أسبوع خلي بالك على نفسك والعيال "

مي بزعل " هو لازم تسافر أنا ملحقتش أقعد معاك ولا أشبع منك أنت بتفضل مسافر طول السنة يا زهير "

قرب منها وضمها بحب " حقك عليا يا روحي بأمن مستقبلك ومستقبل عيالنا عشان لو لقدر الله حصل لي حاجة ومت يبقى في حاجة تسندكم وماتعتمدوش على حد أو توطوا راسكم لأي حد  "

_" بعد الشر عليك يا حبيبي إن شاء الله العدويين ربنا يخليك ليا ولولادنا "

_" هو أسبوع هتغمضي عينك هتفتحيها هتلاقيني قدامك وهجيب لك حاجات حلوة كتير "

مي شدت على أحضانه وهي قلبها وجعها

مي بدموع " أنت عارف إنِ بحبك مش كده "

_" اه "

_" ماتوجعنيش ولا تكسرني أنا بثق فيك أنا بحبك أنت حب طفولتي ومرهقتي وشبابي "

زهير بص لها بثقة وقال " ولا عمري هكسر ثقتك لأنِ أنا كمان بحبك "

إتنهدت براحة من كلامه اللي دايمًا بيطمنها بيه وقت ما بتكون قلقانة ومتوترة وخايفة

⭑⭑⭑⭑⭑⭑⭑⭑⭑⭑⭑⭑⭑⭑⭑⭑⭑⭑

بعد يومين

في أحد شواطئ مرسي علم

كان خلص سباحة وطلع راح ناحية الكرسي بتاعه خد الفوطة وحطها حوالين رقبته وقعد بإرتياح وإستمتاع

_" مبسوط مش كده مبسوط وكل البنات بتبص لك "

_" ريم بطلي نكد يا حبيبتي إحنا جايين هنا أسبوع إجازة وعشان أستمتع وأشم نفسي "

ريم بغضب " زهير بطل برود هو أنت ليه مش بتحبني أنت واخدني أداة لرغباتك بس "

زهير ببرود " الله ينور عليكِ مافيش حاجة ببلاش أنتِ إتجوزتيني عشان الفلوس وأنا إتجوزك عشان أتسلي شوية وأنتِ عارفة الكلام ده كويس فمتعمليش نفسك عبيطة وهبلة "

_" هي فترة وهطلقك "

_" وتشوف غيري مش كده هي إزاي مراتك مستحملاك ومش شاكة فيك وإنك بتخونها ومتجوز عليها مرتين وناوي تتجوز للمرة الرابعة ومراتك التالتة بتحسب إنها الأولى والأخيرة في حياتك الغبية ومي بنفس التفكير "

زهير بغضب " سيرة مي ماتجيش على لسانك ملكيش دعوة خليكِ في نفسك أعمل اللي أعمله دي حياتي وأنا حر فيها "

_" أنتِ بومة بصحيح عكرتِ عليا مزاجي يا شيخة حسبي الله أنا هروح للي تدعلني وتهشتكني "

قام وسابها بتشيط ورجع على الفندق غير هدومه وخد شنطته ومشي من المكان كله

⭑⭑⭑⭑⭑⭑⭑⭑⭑⭑⭑⭑⭑⭑⭑⭑⭑⭑

تاني يوم

كان خرج من الفندق اللي كان بايت فيه بعد ما رجع من مرسي علم عشان يروح لمراته التالتة ويشوفها ويقضي باقي الأسبوع معاها

وهو في الطريق فيه واحدة شاورت له يقف وقف لها وهي ركبت بسرعة وبخوف

_" أمشي بسرعة يا سطا "

زهير بصدمة " أنتِ بتقولي إيه.... "

ردت بصراخ " بقول لك أمشي بسرعة هيموتني "

زهير سمع كده داس على البنزين وطار من المكان

بعد شوية كانوا بعدوا عن المكان ركن العربية وبص لها وياريته ما بص كانت جميلة وملامحها حادة بس هادية في نفس الوقت هي مزيج ما بين الأنثي الشرقية والأجنبية أتمني في اللحظة دي إنها تكون مراته وملكه

فاق من شروده على صوتها " شكرًا على التوصيلة "

كانت لسه هتنزل بس كلامه وقفها

_" إستني مش هتحكي لي حصل إيه ومين اللي كان بيطاردك "

بصت له بإبتسامة وغمزت له

_" لما أقابلك المرة الجاية هحكي لك وساعتها الكلام هيختلف "

خلصت كلامها ونزلت بسرعة من العربية وهو فضل باصص لها لحد ما إختفت وسط الناس وبعدت كتير عنه

#دمية_واحدة_لا_تكفي
#شروق_حسام