🦋 إسكريبتات شروق حسام 🦋

الجزء الثاني 🦋

بقلم شروق حسام 🦋

علاء شاف الصورة إتصدم منها ومن جمالها وشعرها اللي نازل على كتفها بنعومة دي أول مرة يشوف صورتها رغم إنهم عارفين بعض من فترة طويلة بس عمره ما شافها وحتي لما كانوا بيتكلموا فيديو كانت بتقفل الكاميرا

بعت لها رسالة علي الواتس

_" دي أنتِ؟! "

_" اه "

_" أبعتي لي رقم والدك أخد منه معاد عشان أتقدم لك "

_" حاضر "

بعتت له الرقم وهو دخل كلم والدها وفي دماغه ناوي على كارثة وبعد أكتر من 10 دقايق مكالمة قفل معاه بعد ما خد معاد يجي يشوفوه في نفس اليوم

⭑⭑⭑⭑⭑⭑⭑⭑⭑⭑⭑⭑⭑⭑⭑⭑⭑⭑

بليل

كان جيه لوحده من غير أهله وكان قاعد يتكلم مع حافظ والد أحلام وبعد ما إتفقوا على كل حاجة

علاء إتكلم بإحتقار " وبعد كل الرغي ده أنا مايشرفنيش أتجوز بنتك حتي لو كانت في سوق الجواري بساخ حتى "

حافظ بحدة " إحترم نفسك أنت هنا في بيتي يبقى تلم نفسك أحسن ما ألمك "

علاء طلع موبايله وفتح معرض الصور ووراه الصورة اللي أحلام كانت بعتتهاله

_" شوف بنفسك وأنت هتعرف أنا قولت كده ليه "

حافظ مسك الموبايل وشاف الصورة والدم غلي في عروقه

_" ومين دي إن شاء الله دي مش أحلام أنت إزاي تسمح لنفسك تفتري على بنتي يا عديم الضمير والدين "

علاء بسخرية " عارف إن الصدمة مأثرة عليك بس هي دي الحقيقة بنتك إنسانة حقيرة "

أحلام كانت بتسمع كل ده من أوضتها ومكنش باين على وشها أي تعبير

حافظ قرب منه وضربه بالقلم على وشه وأدي له بالروسية

وبعدين نادي على أحلام " أحلاااام "

خرجت بخطي بطيئة ووقفت جنب علاء اللي كان واقع على الأرض

_" نعم يا بابا "

علاء أول ما شافها إتصدم وعرف إنها خدعته وبعتت له صورة واحدة تانية جيه يتكلم راح حافظ طرده بره البيت

في الوقت ده كانت أحلام خدت موبايل علاء اللي كان واقع على الأرض ودخلت أوضتها بسرعة وفتحت الموبايل بالباسورد اللي كان معرفهولها قبل كده هو قالهولها عادي لأنه مكنش ناوي يقابلها في يوم من الأيام أصلًا

حذفت رقمها خالص من الموبايل وحذفت الشات اللي ما بينهم وكل حاجة وقبل ما تخرج من الواتس شافت اللي صدمها شاتات بينه وبين بنات كتير كسرهم نفس كسرتها

بصت للموبايل وإتنهدت وراحت عملت إعادة ضبط نظام للموبايل وبقى كأنه جديد وخرجت الشريحة من الفون وكسرتها

خرجت تاني لباباها وأدته الموبايل وقالت له إنها لقته وطبعًا لأن باباها مايعرفش حاجات في الموبايلات الحديثة فمخدش باله من إعادة الضبط اللي ظاهرة على الشاشة

خرج البلكونة ونادي على علاء وحدف له الموبايل علاء لحقه بسرعة قبل ما يقع على الأرض ولحسن حظه إنه إتحدف من الدور الأول بس

بص للموبايل وإتصدم من اللي شايفه بص فوق لقى أحلام بتبص له بإحتقار وبعدين دخلت وهو إتوعد لها فحتي لو قال حاجة عليها هو مابقاش عنده أي دليل ضدها

⭑⭑⭑⭑⭑⭑⭑⭑⭑⭑⭑⭑⭑⭑⭑⭑⭑⭑

بعد شهر

_" أحلام "

_" نعم يا ماما "

_" أنتِ لسه ... "

_" قفلي على الموضوع ده لو سمحتي "

سوسن بتنهيدة " طب أبوكِ بيقول لك إجهزي فيه عريس جاي لك وأبوكِ سأل عليه لقاه شاب كويس ومتجهز من مجاميعه "

أحلام بعد إهتمام وبرود للموضوع " حاضر أي أوامر تانية "

سوسن بصت لها بقهر وسكتت وخرجت بره عشان تجهز باقي الأكل والحلويات

⭑⭑⭑⭑⭑⭑⭑⭑⭑⭑⭑⭑⭑⭑⭑⭑⭑⭑

عدى الوقت

وأحلام جهزت والعريس جيه هو وأهله وفضل يتكلم مع والدها فترة وبعدين سوسن دخلت لها عشان تخرج تقدم القهوة والعصير وعشان تقعد تتكلم مع العريس وتشوفه

وبالفعل خرجت وعملت كل اللي طلبوه من عصير وقهوة وقعدت تمثل الكسوف كمان قدام العريس وهي أصلًا حاسة بملل فظيع من كلامه الكتير وهي كانت بترد الكلمة بكلمتها ويمكن ربع كلمة كمان هههه

_" آنسة يا آنسة آنسة أحلام أنتِ سمعاني "

أحلام بعدم إهتمام " اه اه سامعاك "

_" زي ما قولت لك تمام "

_" عيد تاني اللي قولته "

إبتسم بخفة وكرر " صلى إستخارة ولو إرتاحتي لي كان بها لو حصل العكس كل شئ قسمة ونصيب وإن شاء الله كله خير وإن شاء الله ترتاحي لي "

أحلام بهمس " ثقة كدابة "

_" تمام "

10 دقايق والعريس خد أهله ومشي

وأحلام دخلت أوضتها وصلت إستخارة ونامت وراحت في نوم عميق وبدأت تحلم بالعريس وشافته واقف في إيديه بوكيه ورد وبيبتسم لها وهي راحت ناحيته ومسكت إيديه مشيوا خطوتين وبعدين لقته إتحول لوحش وسابها مشيت كمان خطوتين لقته رجع طبيعي وماتحولش تاني إبتسمت بهدوء وبصت له وماتكلمتش وهو مكنش قادر يتكلم بعد لحظات فضل يتمتم بكلمات كتير ليها وبيبص لها بأمل

أحلام صحيت من النوم وهي مش حاسة بأي حاجة ومش فاكرة هي حلمت بإيه

إتنهدت وخدت شاور وغيرت هدومها وخرجت فطرت وبلغت والدها بموافقتها على عريس الغفلة

#إخترت_نفسي
#شروق_حسام