السلام عليكم غزيلاتي 🦌
وياگم الكاتبة فاطـمة الشمري
روايـة تجبر الرماد " الجزء الثاني" 🔥
صلو على محمد وال محمد قبل لا نبدي بالبارت
وحضرو النمنميات حتى تستمتعون ✨
واترككم مع الروايـة
🤍 اللهم صل على محمد، وعلى آل محمد، كما صليت على آل إبراهيم، وبارك على محمد، وعلى آل محمد، كما باركت على آل إبراهيم، في العالمين إنك حميد مجيد 🤍
ـــــــــــــــــــــــــــــــــــــــــــــــــــــــــــــــــ
" زهرة "
عقدت حواجبي واني مغمضة عيوني احس راسي انقسـم نصين الدنيا الصبح والشمس مشرقة كعدت اتلفت اني بالغرفة غمضت عيوني وتلقائيا اجتني ذكريات البارحة وحدة ورة وحدة عقدت حواجبي هاذا حلم ؟
شنو هااي ربي شحجيت شصخمت فتحت عيوني بصدمة من تذكرت شلون احضنه ووين نمت ؟؟ وخرت الغطة اتفحص نفسي وگلبي يرجف ويدك ملابسي نفسها ما متغيرة تلمست نفسي ماكو شي بجسمي يدل على انو صاير شي بلعت ريگي
اني شصارلي البارحة فقدت من شربني ذيج الحباية معقولة من المهدئ مالته ؟
كمت من الجرباية ابلع بريگي حركت شفايفي وعقدت حواجبي متوجعة تلمست شفتي ليش توجعني ؟
رحت على المراية اشوفها خاف مجروحة ماكو بس توجعني ومورمة شوية معقولة لان نمت هواي تذكرت شلون حجيتله كلشي وشنو رد عليه شسويت وشعاندت يمة
اخر شي اتذكرة هو فوكاية وغمضت عيوني ونمت اخاف صار شي زين هو شعندة فوكاية اتذكر يكول مو بوعيي يعني هم ماخذ من هل مهدئ هسة اني شسوي يربي شسويت اني
فتحت الباب شوية اباوع ماكو احد والشقة هدوء طلعت اتلفت همزين ماكو رحت للحمام غسلت اباوع لعيوني مورمة وشفتي مورمة وما اكدر اضغط عليها توجعني نفخت بضوجة وبحيرة ليش هيج صار
غسلت وتوضيت وصليت قريت بالقرأن ورحت سويت ريوك وتريكت اخذت ملابس ورحت سبحت حتى اصحصح طلعت ونشفت شعري ومشطته ولفيته فوك كباية رطبت وجهي وجسمي ورحت اكمل جم شغلة عندي
للضهـر صليت وتغديت وكعدت اباوع للتلفزيون
وبالي مو يمـة صافنة وحايرة افكر خاف صار شي اني نمت وما اتذكر شي
عدلت كعدتي بسرعة من الباب صار ينفتح عرفته هو لان بس هو يفتح الباب هيج بالمفتاح دخل باوعت عليه خجلانة ومقهورة من الي صار التفت يقفل الباب ودخل بوجهة البارد مثل العادة كعد على التخـم
ورجع راسة ليورة وغمـض بلعت ريگي
ـ عمو
ـ همم
ـ مـ متغدي
ـ اي
ـ ا اسويلك جاي
ـ لا
ـ عمو ...
ـ زهرة لا تلحيين راسيي يوجعني
