⭐️⭐️⭐️
ديرة ال مغيره
دخلت المطبخ وراها مستغفله الشيخة نورة، عشان تستفرد ببشاير الي كانت تجهز الغداء ومو حولها، وقفت جمبها تنادي باسمها لعلها تنتبه لها وفعلًا انتبهت : المها!..ماحسيت فيتس
تكتفت المها ترد : ادري..وش الي شاغل بالتس لهذي الدرجة؟
رفعت كتوفها بعدم معرفة تردف : مابه شي بس شردت شوي
رفعت المها يدها تجبرها تلف لها وتقابلها
شتت بشاير نظراتها ونطقت المها : رجعوا فتحوا معتس موضوع علي؟
تنهدت بشاير تردف : خلاص يالمها انا موافقه..الظاهر انه هو نصيبي
ميّلت المها راسها بعدم تصديق : موافقه! ومين الي كانت تبكي عشانها ماتبيه وخايفه منه وماتعرفه زين؟ كيف وافقتي بهالسهوله؟
مسحت بشاير على ملامح وجهها : ايه موافقه..خلاص لاتحاولين لاني استخرت وارتحت وهذا الي ابيه يصير
رفعت المها حواجبها تناظرها لفتره، وكيف التفتت بحجة انها تبي تكمل شغلها، نطقت المها بمحاولة اخيره : انا اقدر اسعادتس بس قولي لي..عمتي الي اصرت عليتس؟
هزت راسها بشاير ونطقت ببعض الهدوء الغير معتاد : ومابعد كلمة عمتي كلمه!
ارتسمت على ملامح المها بعض السخرية واليأس، ونطقت بنبرة يائسه : براحتس بشاير..بس فكري زين ولاتخلين العواطف تغلبتس!..انا اقدر اساعدتس وبساعدتس لو ودتس لكن لاتتأخرين
مالقت رد منها وتنهدت المها تطلع من المطبخ، تشوف ام عراب تنظف الحوش و الشيخة نورة طلعت من الدكة تردف : عراب جاي يجيب خبر عزومة بن عفيف لنا بكره
عقدت المها حواجبها بخفه : وش المناسبه؟
جلست الشيخة نورة تردف : وقفتنا معاهم..لااوصيتس ياام عراب نبي ضيافة مرتبه
ام عراب : ابشري ابشري
الشيخة نورة تردف لالمها الواقفه: تعالي اجلسي جمبي
استجابت لها تجلس بجنبها وكملت ؛ زين ان ودينا مهره عندهم..ورجعت المياه لمجاريها والله ان كان قلبي محترق على هالبنت
ام عراب : الحمدلله الي صار خيره من الله..والقلوب صفّت
تمتمت الشيخة نورة ب " الحمدلله " لكن سرعان ماتذكرت ونطقت : عساها ماتفشلني قدام العرب وماتزيّن شي
المها : لا مااعتقد..بتشوفينها افضل من ماكانت هنا
الشيخة نورة : عسى يثمر فيها بس..عالعموم خلكم جاهزين بعد العزومه عندنا ملكة
سكتت المها كونها تعرف الموضوع وشتت نظرها تسمع سؤال ام ناصر الي نزلت من الدرج : ملكة من؟
ابتسمت الشيخة نورة بنوع من الانتصار : بنتس بشاير
وقفت ام ناصر مكانها مصدومه، واردفت بابتسامه: وشيخ من هو سعيد الحظ؟ ولا ولد شيخ؟
ابتسمت المها بسخرية مخفيه، واردفت الشيخة نورة : ولد الشيخ نبهان..علي
