⭐️⭐️⭐️⭐️
بصعوبة وصلوا للمستشفى، بعد الكثير من القُبل والغزل والضحك والهدوء الي يناسب اجواء عزلتهم، والكثير من الحب الفائض والنابع منهم
الجانب الاخر من شخصية الشيخ رماح الي ماتظهر الا بوجودها ومابينهم دخيل، بكل المشاعر الجياشه والحلوه فاض عند المسافة بين الديرة والمستشفى
نطق " يلا " قبل ماينزلون من السيارة، وبعد ماتغطت بشيلتها وعدلت عباتها ولانه كان ينتظرها تنتهي ويشيك على شكلها، دخلوا للمستشفى يعطيهم معلوماتها واشروا له على الانتظار
قبل مايتجهون لجلسات الانتظار لمح رماح طيف سفاح يطلع من القسم، نده عليه باسمه لكن من شكل سفاح وملامحه الأكثر من غاضبه وشرار يتطاير من عيونه ماسمع الشيخ رماح
استغربت المها من حال اخوها، رفعت نظرها لرماح الي نطق بخفوت : انتظري هناك راجع لتس
هزت راسها بالنفي تنبس بنبرة خايفه : لا رماح اكيد فيه احد صاير له شي
تنهد رماح يفرد يده لخلف ظهرها ويمشي معها بخطوات شبه سريعه لبرا المستشفى خلف سفاح، وبخطوات شبه راكضه مسك كتفه يجبره على الوقوف
عقد حواجبه الشيخ رماح من حال سفاح ونطق : سفاح! وش بلاك ياخوك؟ احد صاير له شي ؟
ناظرت حال اخوها واردفت بخوف : تكفى سفاح تكلم وش صاير؟
تنهد سفاح يمسح على ملامح وجهه وشنبه بتعب ونطق : كذبت علي! لفقت انها حامل بس عشان تبقى على ذمتي..انلعب علي
عقدت حواجبها المها باستغراب: انت تتكلم عن ابتهال ؟
هز راسه يزفر انفاسه واكتفى رماح بالجمود كون ان فيه اشياء ماهو فاهمه ونطقت المها بعد مافهمت الوضع : حسبي الله عليها المجنونه! طيب وش سويت فيها؟
سفاح : طلقتها
حطت المها يدها على فهمها ونطقت بخفوت : وش بتقول لابوها؟
نطق سفاح بنبرة عاليه : الصدق! ان بنته كذبت وان يخليها عنده ابرك لاني ماني مرجعها
الشيخ رماح : اهدأ!
هز راسه سفاح يمسح على ملامح وجهه يحاول يهدي نفسه ونطق : وش عندكم انتو هناا؟
الشيخ رماح : نتطمن على حملها
هز راسه سفاح يتنهد ونطق : يالله استودعتكم الله
هم بالروحة ولاحظ رماح هدوء المها وسكونها ينطق باستغراب : وش جاتس؟
اخذت نفس عميق ونطقت : رماح لو طلعت انا مو حامل بتزعل؟
سكت لثواني واردف : ايه
بلعت ريقها بهدوء ودمعه غمرت عينها لكن حاولت تخفيها لما هزت راسها تلف بنية الرجعة للمستشفى لولا يده الي مسكتها بهدوء واردف يناظرها : لكن الي اكنه لتس بداخل ضلوعي اكبر واعمق..ومادري ليه طرى على بالتس هذا الشي لكن شيلي همي من على كتوفتس وخلتس مرتاحة
ابتسمت رغم انه مايشوفها لكن يشوف هدوئها ويحس براحتها من شدت على يده يدخلون للمستشفى
