🦋 إسكريبتات شروق حسام 🦋

الجزء الخامس 🦋

بقلم شروق حسام 🦋

عدى شهر

من وقت ما حيدر ضرب راكان

_" هتعملي إيه بعد كده يا براءة "

_" 30% من الخطة نجحت ناقص 70 % وال 70% دول هيعتمدوا عليك يا حيدر "

_" أحب المغامرات أنا "

_" هههه مش هقول لك مهمتك تفلس شركتهم وكده لأن ثروتهم كبيرة أنا عايزة يتعملهم فضحية تتهز ليها مصر كلها "

_" الله يستر منك بجد أنا بدأت أخاف إيه رأيك تنسي كل حاجة وتبدأي من جديد مع بنتك "

_" تؤ تؤ تؤ مش هنسي إزاي إضربت وإتهنت وبنتي إتاخدت مني بالقوة مش هنسي خداعه وخيانته وكدبه عمري ماهنساهم "

حيدر بتنهيدة " أنا معاكِ في كل حاجة من أول ما قابلتك فمش هاجي دلوقتي وأسيبك في نص الطريق "

بصت له وسرحت في الوقت اللي فيروز خبطتها فيه بالعربية واللي لحقها ساعتها كان حيدر ومحدش كان راضي يساعدها عشان مايروحش في داهية

وداها المستشفي وعالجها ووداها بيته وعرفها علي مامته وباباه اللي حبوها وإعتبروها زي بنتهم وأكتر

وإفتكرت قد إيه كان بيشجعها وبيحفزها وحولها من بني آدمه كانت مكتئبة وفاقدة الأمل والشغف لإنسانة قوية

إتنهدت وبصت له بإبتسامة " بجد شكرًا يا حيدر ماعرفش من غيرك كنت هعمل إيه "

حيدر بضيق " كله هيطلع عليكِ بعدين يا براءة بسبب الكلام اللي بتقوليه ده "

_" مع إن عدى وقت كبير لسه بتقولي يا براءة عمرك ما نادتني بإسمي الحقيقي "

حيدر بغمزة " بحب الإسم وهو لايق عليكِ يا براءة الأطفال أنتِ "

رهف بجدية " المهم إسمعني كويس عشان مايحصلش أي حركة غلط "

رهف بدأت تحكي له خطتهم وهيعملوا إيه وهو كان بيسمع لها بتركيز

⭑⭑⭑⭑⭑⭑⭑⭑⭑⭑⭑⭑⭑⭑⭑⭑⭑⭑

بعد يومين

في فيلا دويدار

كانت قاعدة في الصالون وهي حاطة رجل علي رجل وجنبها حيدر اللي بيبص للمكان بقرف

فيروز نزلت من على السلم وهي بتنادي علي الخدامة تحضر لها القهوة بس إتصدمت لما لقت رهف قدامها

_" أنتِ أنتِ بتعملي إيه هنا إيه اللي جابك مش كنتِ موتي "

رهف بإبتسامة وهي بتروح ناحيتها وبتحضنها وهي متجاهلة كلامها " أكيد أنتِ فيروز حماتي عسل أوي يا روزا "

رهف بهمس " شيطانة ياروزا بس هعلمك الأدب أصبري بس عليا "

فيروز جت تتكلم بس قاطعها نزول راكان الفرحان إنه شاف مراته قدامه

_" رهفي جيتي يا حبيبتي "

_" اه يا راكان عرفت إن كلامك صح وإنِ فعلًا مراتك أنا من حوالي 5 سنين كنت عملت حادثة فيه عربية خبطتني وجريت وسابتني مرمية علي الأرض وحيدر هو اللي جيه ساعدني "

كملت بتمثيل الحزن " بس للأسف مش فاكرة أي حاجة غير إنِ فوقت في المستشفي مش فاكرة حتى إسمي "

_" بتكلم مين يا راكاني "

راكان بتوتر " دي رهف يا جاسمين مراتي مش فاكراها "

جاسمين بغيرة وغضب " طبعًا فاكراها وهو دي حاجة تتنسي "

رهف بدهشة مصطنعة " مين دي يا حبيبي "

راكان بتوهان من كلمة حبيبي اللي إشتاق يسمعها منها " دي دي جاسمين... "

جاسمين بغيرة " قول يا حبيبها أنا مين "

_" جاسمين مراتي التانية "

رهف بصدمة " إيه بقى أنت متجوز عليا وعايزني أرجع لك عشان إيه أرجع لك إن شاء الله ده كفاية إنِ مش فاكرة حاجة يعني كنت هترجعني على عمايا يعني لولا ا
إنها جت وسألتك هي مين مكنتش هتقولي إنك إتجوزت تاني "

راكان بسرعة " لا مش كده حاولي تفهميني "

كمل بكدب " أنتِ اللي قولتي لي أتجوز تاني عشان أنتِ خلفتي سما وماخلفتيش تاني فالموضوع أثر في نفسيتك وطلبتي إنِ أتجوز تاني عشان أجيب الولد اللي كان نفسي فيه رغم إنِ حاولت معاكِ كتير بس أنتِ أصريتي وكنتِ هتطلبي الطلاق "

رهف بصت لحيدر بصدمة وهو بص لها بنفس الصدمة من كمية الكدب اللي سامعينه

جاسمين جت تتكلم وقفها صوت بنوتة صغيرة بتنادي عليها

_" مامااااا "

جاسمين بإبتسامة " تعالِ يا ياسمينا صحيتي من النوم "

رهف بصت لهم بجمود بس من جواها قلبها إتكسر مليون حته ماما بتقول لجاسمين ماما هي الوحيد اللي ليها الحق تتنادي بالإسم ده لا ومن بجاحتهم مغيرين إسم بنتها من سما لياسمينا عشان يبقى شبه إسم جاسمين

رهف بإبتسامة مصطنعة " مين دي "

راكان بحب " دي سما بنتنا "

_" أومال ليه قالت لها ياسمينا "

_" ده إسم الدلع بس أصل جاسمين بتحب سما أوي عشان كده بتقولها يا ياسمينا عشان قريب من إسمها "

_" إمممم على كده بقى بعد ما إتجوزت تاني جبت الولد اللي كنت بتحلم بيه "

راكان بص لها بتوتر وفضل يتلعثم في الكلام " بس..هو...أصل.... "

جاسمين بحدة ووجع " لا معندناش عيال إرتاحي بقى "

خلصت كلامها وسابتهم وطلعت علي أوضتها وكلمت نفسها بوجع ودموع هي ليه بيحصل لها كده ليه حب عمرها يطلع كده

#قلب_أحب_إمرأتين_و_لكن
#شروق_حسام