⭐️
الشيخة نورة بخفوت : لاحول ولا قوة الا بالله! استهدي بالله وعيني خير! لو انها مسويه شي كان شفتي بن عفيف برجالهم عند مدخل الديرة!
لفت ام ناصر بتجاهل لكلام الشيخة نورة وناظرت مهره الصادة عنهم وتهز رجلها بصبر : بتتكلمين ولا شلون؟
نطقت المها بتنهيدة وبنبرة شبه عاليه : ام ناصر! الشيخ رماح اعطاني الامر بأني اشوف الوضع ورح يحلها ان شاء الله انتِ بس اهدي!
عفست ام ناصر ملامحها بكِره : يلا شوفي الوضع! انا ابي اشوف شلون بتشوفينه
اخذت المها نفس عميق ونطقت بهدوء : بتفضون الغرفة ولا اخذها معي؟
ناظرتها الشيخة نورة لوهله واشرت لبرا لام ناصر بدون كلمة، وبعد ثواني معدوده اتخذت ام ناصر موقفها للصمت وطلعت بدون ايّ كلمه زايدة بعد ماشافت جدية الوضع، ووراها بشاير واخرهم كانت الشيخة نورة
تقدمت المها لمهره الي تركت عناء دموعها بالنزول من بعد ماحست بالغرفة تفضى، ضمتها المها تحاول تهديها وتربت على شعرها وبعد القليل من الوقت ابتعدت مهره تمسح دموعها وملامح وجهها وتحاول تنظم انفاسها، ونطقت المها بعد ماشافت هدوئها : تقدرين تتكلمين الحين؟
هزت راسها مهره بالايجاب تناظر المها بعيون دامعه : عرف عن الحبوب وعصّب كثير وضربني
حطت المها يدها على فمها بذهول، ومدت يدينها ليدين مهره تربت عليها : توقعت هالشي يصير يامهره بس مو وقت العتاب الحين..بس توصل فيه للضرب؟
هزت راسها مهره بالايجاب وبنبرة بكاء : ولا رضى انه يسمعني وكأنه صار شخص ثاني! يعني انا نسيت وحطيته جمب سريري بعد مااخذت الحبه وبعدين هو اول مادخل ماانتبه ولما طلع من دورة المياة وانا كنت داخلها شافه وانقلب وجهه!
عقدت المها حواجبها باستغراب: دقيقه دقيقه! هو دخل دورة المياة بعدين طلع ودخلتي انتِ بعده ووقتها هو شافه
هزت راسها بالنفي ونزلت نظرها تنطق بخفوت : كنا مع بعض داخل
رخت ملامح المها يحمّر وجهها ونطقت بتلعثم : طيب ماعلينا..بعد ماشافه ضربتس على طول؟
اخذت مهره نفسك عميق : كان يقول قبل اني استغفلته ومارضى يتفاهم معي ابدًا وقال اني كنت انتظرتس ومستغرب ولما قلت له من الي جابه هو ضربني
مدت يدها المها لراسي بصدمه : قلتي له ان عراب الي جابه!!!
صدت مهره تكتم صوت بكائه ودموعها تنزل، تتجاهل السؤال الي اجابته تعتبر من اكبر اخطائها، تسمع المها وهي تكمل كلامها : مو صاحيه انتِ مهره! شلون تقولين له ان ولد عمتس هو الي جاب لتس حبوب منع الحمل!! انا كنت مصدومه من فعلتس وش كيف هو! غلط الي سويتيه واكبر غلط!
لما لمحت المها وجه مهره المحمّر والي بأيّ ثانيه رح تنفجر هي هدت نفسها ونطقت : اسمعيني الحين
لفت مهره لها تستقبل اصابع المها الي مسحت دموعها وكملت : انا لازم اقول لعمتس الي صار بطريقتي
هزت راسها مهره بالنفي تكرارً لكن المها نطقت قبلها : اسمعيني! هو لو كان ناوي يحاسبتس كان حاسبتس من زمان ماكان انتظرني وعطاني امره بأني اكون بينكم..مهما كان الي سويتيه انا رح احاول افهمه وجهة نظرتس واخليها بصفتس طيب؟
سكتت مهره لثواني ونطقت بعدها بتساؤل : وش تتوقعينه يسوي طيب؟
ناظرتها المها لوهله بسكون ثم نطقت بتردد : الي في بالي حلّين لكن مدري اذا هو رح يفكر بشي ثاني غيرهم
مسحت دموعها مهره تنطق : وش هم؟
تنهدت المها : الاول انتس ترجعين له والثاني اذا ماتبين الطلاق
رخت ملامح مهره تناظر المها بسكون، الطلاق! شي ماتوقعت انه يصير ولا تتخيل، بداية زواجها وقبل ماتتقبل هي كانت تتمنى الخلاص لكن الحين وبعد تعلّقها فيه شافت انه خيار مستبعد، وهزت راسها بالنفي تنطق المها : مستحيل انه بيجي يعتذر لان انا اشوف انه معه كل الحق
مهره : بس ضربني!
هزت راسها المها بالايجاب: لو انك قلتي له مثلا انتس اخذتي الحبوب مني او من ايّ بنت هنا في البيت رح يضربتس؟
سكتت مهره تصد عنها وتشوف الصحيح بكلامها، رجعت تلف تناظر المها الي كملت : صح هو غلط وماسمعتس ولا تفاهم بس انتِ غلطتس اكبر! اتوقع الحين جاء رماح بقول له بعد الفطور ونشوف وش بيقول
هزت راسها مهره بالايجاب واتخذت الصمت رد، وكلام المها يسري في عقلها، كل هذا الوقت كانت مابين انها صح ومابين انها غلط لكن لما جات وصارحتها بأن الغلط عليها اكبر؟ غمضت عيونها تاخذ نفس عميق بهدوء
