Planting Heart Parcel

Part-4 [တည်သီးချိုသည်]

သူတို့နေထိုင်ရမည့် အရှေ့ခြံဝန်းရှိအိမ်မှာ အလွန်ပင်အနုစိတ်လှသည်။ အိမ်ဒီဇိုင်းမှာ အဆင့်မြင့်ဇိမ်ခံအိမ်ပုံစံဖြစ်သော်လည်း  တစ်အိမ်လုံးကို သစ်သားများဖြစ်သာ တန်ဆာဆင်ထားသည်။ အိပ်ခန်း ၊ ဧည့်ခန်း ၊မီးဖိုချောင်ပါဝင်ပြီး အရှေ့တွင် သဘာတရားကိုခံစားရင်း စကားစမြည်ပြောရန် နေရာလွတ်ပင်ရှိသေးသည်။ အိမ်အရှေ့တွင်တော့ Jade Plant ပင်လေးများနှင့် တစ်ခြားသောပန်းပင်လေးများကို စိုက်ပျိုးထားသဖြင့် လူလောကနေရာနှင့်မတူဘဲ နတ်ဘုံလေးတစ်ခုအလားထင်မှတ်ရ၏။ 

လေးယောက်လုံးသည် အထုတ်အပိုးကိုယ်စီချ၍ အိမ်ပတ်ပတ်လည်ကို လှည့်လည်ကြည့်ကြရင်း ပါးစပ်ကနေပါ ချီးကျူးနေကြသည်။ အိမ်အတွင်းရှိ အသုံးအဆောင်များမှာလည်း သစ်သား ၊ ဝါး ၊ ရွှံ့ဆေးဖြင့်သာလုပ်ထားသည်။ 

ယခုအစီအစဉ်သည် ၃ ရက်လျှင် ၁ ကြိမ် ဧည့်သည်များကိုကျွေးမွေးတည်ခင်းပြီး ခြံထွက်များရောင်းချရမည်ဖြစ်သောကြောင့် ဒီသုံးရက်အတွင်း ဆောင်ရွက်ရမည်များကိုတိုင်ပင်ကြသည်။ ပထမဆုံးနေ့၌ ခြံဝင်းထဲရှိ အမှိုက်များ ၊ ပေါင်းပင်များရှင်းလင်းကာ အပင်များကို ရေလောင်း ၊ မြေဩဇာကျွေးမည်ဖြစ်သည်။ ဒုတိယရက်တွင် သီးပင်များခူးဆွတ်ကာ ဟင်းချက်နည်းများပြင်ဆင်မည်။ နောက်ဆုံးရက်တွင်တော့ ဧည့်သည်များအတွက် ပြင်ဆင်မည်ဖြစ်သည်။

သူတို့အားလုံးခြံဝန်းထဲဆင်းရန် အင်္ကျီများလဲကြသည်။ အင်္ကျီအောက်စကို ခါးမှာပတ်ချည်ပြီး ဝါးခမောက်ဆောင်းလိုက်သော်လည်း စိုက်ပျိုးရေးသမားများနှင့်မတူဘဲ ဖက်ရှင်အသစ်ကိုလက်တည့်စမ်းနေသည့် ဟော့ရှော့လူငယ်နှင့်ပင် ပို၍တူနေကြ၏။

၂ ယောက်တစ်တွဲစီခွဲကာ ပန်းအကြောင်းနားလည်သူပီပီ Girl Group မှမိန်းကလေးက ပန်းခင်းများကို တာဝန်ယူကာ အခန်းဖော်ကောင်လေးကတော့ ပေါင်းရှင်းလင်းရေးနှင့် ရေလောင်းခြင်းကို တာဝန်ယူလိုက်သည်။ ချန်ကျဲယွမ်ကတော့ သီးပင်နှင့် စားပင်များကိုလေ့လာရန် တာဝန်ယူပြီး ထန်ကျန့်စစ်ကတော့ စပ်စုဖို့တာဝန်ယူထားသည်။

"ဟေး ... ရှေ့နားကအပင်က တည်သီးပင်လား" ထန်ကျန့်စစ်က အပင်ရှိရာဆီ လက်ညှိုးထိုးပြရင်းမေးလိုက်သည်။