🦋 إسكريبتات شروق حسام 🦋

الجزء الثاني 🦋

بقلم شروق حسام 🦋

رحمة بسرعة وخوف " مفيش يا حضرت اروى بس بتحب تهزر مش كده يا اروى "

رحمة بصت لها بترجي عشان توقف اللي هي بتعمله

اروى بسماجة " اه بهزر يا حضرة الظابط "

كملت بهمس ليه " المرة دي مش بهزر بس عديت والمرة الجاية هبلغ عليهم بجد فإستناني تمام حتي لو ماجتش "

يحي بحماقة وعدم إستيعاب " اه اه تمام هستناكي "

خلص كلامه ومشي وخالتها وأمها إستلموها

رحمة بغضب " بقى هي دي آخره تربيتي ليكِ عايزة تبلغي علينا إتفو علي تربيتك الوسخة "

_" هو أنتِ ربتيني أصلًا هو بالنسبة لك دي تربية الإهانة والشتيمة والضرب والزعيق وعدم الإهتمام بالنسبة لك تربية لا تبقى أنتِ غلطانة ده أنتِ جبتي لي عقدة نفسية من كل حاجة من الجواز ومن الخلفة ومن حياتي كلها بجد تعبت تعبت بسببك وبسبب قلة إهتمامك وأسلوبك أنتِ متأكدة إنك مش مرات ابويا "

رنا برفعة حاجب " بت لمي نفسك وبطلي قلة أدب وإتكلمي مع أمك بأسلوب أحسن من كده "

_" أنتِ بالذات ماتتكلميش يا خالتي أنتِ أصلًا من زمان مش بتحبيني ولا عمرك هتحبيني ودايمًا بتوسوسي وبتحرضي ماما عليا "

رحمة بحدة وقسوة " من الآخر عايزة إيه يعني لو مش متحملانا ولا متحملة العيشة غوري إطلعي بره "

_" ما أنا فعلًا هطلع وهعيش لوحدي ومش عايزة حد يجي يسأل عليا "

رنا بقرف " غوري ولا أصلًا هنسأل ويلا بره من غير حتي شنطة هدومك يلا بررره "

اروى مدعية القوة " هاخد حاجتي اللي أبويا جابها لي بتعبه قبل ما يموت ومحدش هيقدر يمنعني "

اروى دخلت وخدت شنطة هدومها اللي كانت لسه مافضتهاش وبعدين سابت البيت كله وخرجت

⭑⭑⭑⭑⭑⭑⭑⭑⭑⭑⭑⭑⭑⭑⭑⭑⭑⭑

علي الناحية التانية 

_" أبوس إيدك يا علي ماتضربنيش أبعد عني طب حتي عشان العيال "

علي وهو حاضنها بس مش في عقله بسبب المخدرات والخمر اللي بيشربه " بت هتشربي معايا ولا أضربك ما هو....ما هو مش معقولة أفضل أعمل في مزاج لوحدي تعالِ بس جربي معايا وهيعجبك أوي صدقيني "

زينب حاولت تبعد عنه وتزقه في صدره بس هو مش بيتحرك

_" خلاص خلاص هجرب بس هغير هدومي الأول "

كملت بغمزة " عشان يبقي المزاج عالي يا حبيبي "

_" هههه أيوه كده أحبك وأنت بتسمع الكلام يا جميل يلا خشي بسرعة وماتتأخريش "

_" فوريرة وهبقى هنا "

زينب دخلت أوضتها وهي عمالة تفكر تعمل إيه في المصيبة اللي بره بصت حواليها لحد ما عيونها وقعت علي الدولاب راحت ناحيته بسرعة ولبست هدوم الخروج وعليهم الروب وحطت كل الفلوس والذهب بتاعها في شنطة وجهزت شنطة صغيرة ليها وللعيال

وبعدين خرجت بره

علي بعدم تركيز " كده يا زيزي تتأخري كل ده "

زينب وهي بتديله بملة السرير علي دماغه " معلش بس خد "

علي بوجع وهو بيحط إيده على راسه اللي بتجيب دم " اه يا بنت ال "

مكملش كلام وهوب أغمي عليه

زينب شافت كده قلعت الروب وراحت بسرعة ناحية أوضة الولاد وصحتهم وهربت بسرعة بيهم من البيت

⭑⭑⭑⭑⭑⭑⭑⭑⭑⭑⭑⭑⭑⭑⭑⭑⭑⭑

بعد نص ساعة

_" زينب بتعملي إيه في الوقت ده بره مع العيال "

زينب بأنفاس متقطعة " كنت....علي....هربت....راحة......لماما "

اروى بقلق وحنان " أهدي بس وحاولي تظبطي نفسك "

لحظات وكانت زينب خدت أنفاسها وإتكلمت بخوف " كنت راحة لماما يا اروى أنا عايزة أطلق مابقتش مستحملة العيشة معاه تخيلي النهاردة كان عايز يشممني من القرف اللي بياخده وعايزني أشرب كمان "

اروى وهي بتضرب علي صدرها " يلهوووتي مخدرات وخمرة "

كملت بصرامة " بس هو أنتِ إيه ماعندكيش كرامة بعد كل اللي حصل ولسه عايزة ترجعي لها أحب أقول لك إنها هترجعك ليه تاني دي محرضة ماما عليا من زمان وأديني أهو هعيش لوحدي عشان مشتني من البيت إفهمي بقى إحنا مولودين بين ناس تفكيرهم قديم أهم حاجة عندهم البنت تكون متجوزة مش مهم بقي إذا كان جوزها بيضربها ولا لأ الله يرحمك يابابا لو كنت عايش مكنتش شوفت الذل ده "

اروى إتنهدت بعمق وبعدين كملت بأمل " تعالِ نسافر ونبعد عن هنا "

زينب بصدمة " نسافر نروح فين وبعدين هو أنس هيرضي يخليكِ تسافري "

_" مبقاش ليه حكم عليا أنا خلاص إتطلقت منه "

_" يا بختك نفسي أنا كمان أتطلق وأخلص "

كملت بحزن " بس عندك حق في اللي قولتيه ها معرفش إحنا ليه حياتنا عاملة كده "

_" ربنا مخبي لنا الأحسن وأنا متأكدة "

#خزلان_و_لكن
#شروق_حسام