مُناي يهل غيثك ويسقي جفا روحي

Part 17

أمجاد:افا اجل انا ادز ؟
عروب جلست على السرير تنطق:ياخي طفشت الديرة ذي
مافي أخبار تسر كلها نكد !
ابتسمت امجاد توقف قدامها تنطق ببسمه:طيب انا عندي خبر حلو
عروب تعدلت:وشهو
أمجاد بسعاده:من فتره كنت شاكه اني حامـل والحين تأكدت
عشان كذا تأخرت مانزلت بدري ! وترا فيصل مايدري ان الحمل صحيح
وقفت عروب بذهول تنطق بفرحه:احلفيي !
امجاد بضحكه:الحين تاكدت انكم اخوان على ردة الفعل هذي
نطت عروب بحماس تضمها تنطق:الله يتممم لشش على خير يارب
بس هي بنت ولا ولد ؟
« بيت الجد محمد »
" العصر "
رجع سلمان للبيت واستقبلته الجده:متى جيت؟
سلمان:توي
نطقت الجده بإبتسامه وهي تمد الحوافظ له:خذ تيه وودها لبيت ابو غدي
ارتمى سلمان على المساند بتعب:والله مالي حييييل
قربت الجده ونطقت بغضب:بتوديها وأنت ماتشوف الدرب تسمع؟
سلمان بقلة حيله:خير إن شاء الله،بس خليني اتنفس من اليوم واقف بهالمحل
تنهدت الجده وهي تنطق:بس شوي،وراحت بعد ماحطت الحوافظ على الأرض
أخذ رموت التلفزيون وهو يقلب بالقنوات لين طلعت له سبيستون تنهد بإبتسامه
من مر طيف الذكريات:اخ ياذكريات الطفوله،ليتنا قعدنا أطفال ولانشيل هم ولانبالي لشي
نزل الرموت وهو يتابع جزيرة الكنز ويتذكر كيف كانوا يسوون في أوراق الدفاتر سيوف صغيره
ويحاربون،ضحك بخفه واستوعب على نفسه من جته الجده عبير
وهي تنطق بعصبيه:وبعدين؟متى بتوديها،ولا ودك البس لك العبايه واروح أوديها انا
قام وهو ياخذ الحوافظ وينطق بهدوء:هذاني رايح أوديها،
راح لبيتهم ودق الباب تنحنح من جاه صوت بنت ناعم يقول:مين؟
سلمان:انا سلمان الجده عبيره اعطتني حوافظ تقول اعطيكم اياها،
غدي:اوه يعطيك العافيه ويعطيها العافيه الجده ماتقصر،نزلها هنا وانا باخذها
سلمان:يعافيش،نزل الأغراض،ودفت غدي الباب من شافت صرصور تحت حافة الباب
صرخة وانكبت الحوافظ بالأرض وصقع سلمان بالباب،
-
ناظر من بعيد وأشتدت نظرته بصدمه،لفت تطالع فيه وتناظر لوين هو يطالع
وشافت ذاك الرجال الي نص جسمه جوه والثاني برا وكان منظر سلمان من برا
كأنه يسالف مع احد،اشتعلت هي الثانيه غضب وهي تنطق بصراخ:وششش يسوييي هذااا
-
نطقت غدي بصراخ:معليشش اسفهه
رجع سلمان للخلف وهو يصد:حصل خير شكلها مو من نصيبكم!
مافهمت غدي واخذت الحوافظ ونطقت بلعثمه:ا،بروح اغسلها واجيبها لك
هز راسها بإيجاب وراحت..
-
نزل والطامه الكبرى من شاف انه سلمان انتبه له سلمان وهو ينطق:نعم؟
ابو عزيز بسخريه:ماعلومك أهلك تدق الباب!.
رفع حواجبه بصدمه من كلامه وعدم فهمه لأيش يقصد بالضبط:ايششش!،لا
واضح ان يدك تحكك على المشاكل،رح رح ،ناظره بغضب وهو يتحرك لسيارته
وينطق بنفسه:هيين والله لأوريك،تحسب بمشيها مرور الكِرام؟!
-
كان يفكر بكلامه الغريب:وش جاه ذا بعد..،قطعت تفكيرها
من نطقت بإستحياء:هذي الحوافظ واسفه مره ثانيه
سلمان:يابنت الحلال حصل خير ،يلا فمان الله،،راح سلمان وطلعت غدي نص
وجهها تتبادى على سلمان تبسمت وقفلت تدخل للبيت،،
دخل وهو يحط الحوافظ جت الجده عبير مبتسمه:ها ود..،
سلمان:طاحت علي بالشارع،انا بروح أريح شوي أول مايأذن صحوني
طلع سلمان تارك الجده بصدمه،نطقت بحسره:اوه يا أكلي الي راح هبًأ منثورى،
فتح غرفته الي كانت بأخر الممر وأنسدح بتعب كان اليوم كله واقف لوحده بالمحل
ومستصعب كُل شيء حرفيًا تعب فضييييع وسرعان ماغطى بنومه...
«أبها البهيّة »
أبتسم يطلع من المركز بوناسه خصوصًا لأن اليوم
ماعنده مهام وماخذ إجازه بينزل لأهله ، دخل الشقة
وأنتبه لوجود أيمن وحمد سلم عليهم ونطق:انا نازل عند اهلي
بقعد أسبوع تقريبا
حمد بصدمه:مسرع ياولد !
ضحك رعد يصافحه ويروح لأيمن ينطق:ناوي تمسكني انت ؟
حمد بضحكه:لا ياورع انقلع سماح هالمرة
دخل رعد لغرفتها ولم أغراضها بسرعه وخرج
ينطق ببسمه:سلموا على باقي العيال
حمد وأيمن بصوت واحد:يوصل ان شاء الله
نزلوا يودعونه برا ومشى متوجه للديرة ، أبتسم يشغل
شيلات وعلى ممشاه أمطرت بقوه وفتح شباك سيارته
وقبل ينزل للديره وقف على الطريق ياخذ شاهي نعناع
وكمل طريقه للديرة وهو يتأمل الخط وبيده الثانيه
متكي على الشباك مفتوح كامل ، بعد ساعات وصل للديره
وشاف الجد محمد جالسه يسقي زرعه تقدم ينطق بصوت جمهوري:قوّة
فز يطالعه بصدمـة يترك بزبوز الماء يصب على الأرض وتقدم
يضمّه بقوه ينطق:يالله ان تحييهم
ضحك يبادله الحضن ويسلم على راسه:اف اف كل ذا شوق ؟
نزلت دموع الفرح من عين الجد محمد ينطق:والله ان البيت من دونك
مايسوى يابوي انت
ابتسم ببهجه ينطق:الله يطعني عنك
ضربه بحده ينطق:مجار ولاسمعك تعيدها
ضحك رعد بقوه ينطق:طيب بروح اسلم على جدتي وانام
شوي وصحوني
هز راسها بالإيجاب وبعد ماسلم توجه لغرفته يريّح له شوي
أمّا بالخارج تقابل مع خالد وهو راجع ابتسم له يناديه التف خالد
بعد ماعرف صاحب الصوت ركض عنده وهو يسلم على راسه
ويدينه وينطق:هلا والله أرحبب كيفك
الجد محمد نطق والإبتسامه تتطاغه:البقى بخير
خالد:ماشاء الله وش هالزييين ناوي الثانيه؟
ضحك الجد محمد وضربه بخفه على راسه ونطق بحده:مابعد ام عُدي ثانيه
خالد نطق بضحكه:كفو والله بس ترا كنت امزح
الجد محمد:اي ان ماوراك الا المزح لازواج ولاحياة
وسع خالد عيونه بدهشه وضحك:افاا ياجدي انك زوجني عشان تشوف الحياة صح
تحرك الجد محمد يدخل ونطق:والله انت مطلبك شغله وانا جدك مو فاضي لك
خالد بأسترسال للحكي:ياجد شفت سيارة رعد هو جاء ؟
الجد محمد:ايه دخل يريح له شوي لاتزعجه
كاد ان يتكلم خالد لولا الصوت الي جاهم من بعيد
لف الجده له وخالد التف يناظر معه جاهم ابو غدي والواضح من بعيد
انه معصب ومو رايق لأي أحد اقترب منهم ونطق الجد محمد بإبتسامه:السلام عليكم كيف حالك يابو غدي
ابو غدي نطق بغضب:ردي اي والله الحال ردي من سوات ولد ولدك هالي مايستحي
عقد خالد حواجبه ورفع الجد محمد حواجبه بصدمه ينطق بحده:افا يذا العلم!وش مهبب
فيه الولد يوم انك تغلط عليه؟
ابو غدي نطق بسخريه:بنقعد واقفين عند الباب يابو عدي؟
الجد محمد:تفضل المجلس ، دخلوا للمجلس ونطق الجد محمد:القهوه ياخالد واستعجلوا فيها
هز راسه بإيجاب وراح دخل جوا ولقى الجده جالسه بالصالة نطق بسرعه:ياجده القهواي سريع
عندنا ضيف ، وقفت وهي تنطق:طيب انتظر لأنها بتطول شوي
خالد بعجله:لا انا بروح واذا جهزت بجي أخذها راح قبل يسمع ردها
«مجلس الرجال»
الجد محمد نطق بعلو صوته:أسلم يابو غدي قولي وش مهبب فيه ولد عُدي يوم تسبهه !
بعدين اي واحد فيهم
ابو غدي بسخريه:سلمان! الي مسوي لي رجال
رفع حواجبه ونطق بوسع ثغره:افا!! انّ وش مهبب فيه علمني؟؟
ابو غدي نطق بحده:سوى سوات ماتتحاكىو، مو الي يبي بنت الناس يدق الباب؟
وش مقصر فيه الباب يوم انه يحاكيها من ورا اهلها واهله!!.
أنجلم الجد محمد وسرعان ماضحك بخفه ونطق:أكيد انك مشبه ومن الصدمه ماوازنت كلامك
وقف ابو غدي بقوه:الا والله موزون ومعتدل بس من كثر مانكم متأملين فيه هالردي
ماعدتو تشوفون ذنوبه انا مدري كيف لعب على البنت وصدقت بس
والله انها مابتسلم من الضرب الي بيجيها!
وقف ابو عدي ونطق:أجلس وعلمني بكل شي عشان افهمك لاتجيني بالألغاز!
جلس ابو غدي وبدا يحكي له كل الي صار تحت صدمة الجد محمد وهو مو مصدق هالكلام ابدًا
كان خالد يتسمع لهم وضعه مايختلف عن جده 
-
«الليل بيت الجد محمد»
صحى بإنزعاج من الأصوات الي فوق راسه وهو يسمعهم يصارخون
وكل واحد قافله معه
الجد محمد:والله ان ياخذها ويستر عليها وهو كلب
الجده عبير:يابو عُدي الله يهديك كيف تبي تظلم الولد!
عقد حواجبه بإنزعاج ودهشه لكل الي سمعه،التف الكل حوله وهم
يشوفونه صحصح،نطق بصدمه:وش السالفه؟ليه كلكم مجتمعين
رعد بسخريه:ومسويه ماتدري بعد؟مجتمعين على مصيبتك!
قام ونطق بحده:أي مصيبه هاا!ولاتبون تتبلوني بعد
رفع الجد محمد يده امام وجهه ونطق بحده:شوف صحيح اني تركتك على هاوك
تسوي الي تبي،بس هذا مو معناته تروح تصيع وتضيع وانا مدري عنك وش لعبت بعقل هالبنت
وصدقتك بس والله ان تتزوجها وتستر عليها وعليك تفهمم!؟وكلام مافي والي عندي قلته واليوم
الحين بعد صلاة العشاء وجهك على باب بيت ابو غدي نخطبها ولابي اسمع ولانفس!،كان يسمع
كل كلمه ومذهول!!مو مصدق ولامستوعب حاجه وش يهببون فيه ذول!؟
نطق بصدمه:اي بنت واي خطبه،أحد يشرح وش صاييير!!!..
نطق الجد محمد بسخريه:لا مسوي البريئ الحين،غدي بنت ابوها وتعرفها زين
قفز سلمان بصدمه وهو يبرر:وقسم بالله اني ماسويت شي،ياجد انا تربيتكم وانت تعرف،
بعدين انت قُلي وش مهبب فيه أنا!
خالد:الحوافظ ياسلمان!
سلمان بدهشه:وش بها؟،الجده اعطتني اياها وقالت ودها لبيت غدي وأعطيتها بس طاحت
وأنكبت!وين الغلط في ذا كله!؟
الجد محمد بعصبيه:وين الغلط ها!،ابوها جاي عندي يقولي كُل شي وشافك واحد وانت داخل
لبيتهم وتسالف مع بنت الناس من ورا الباب وتقولي وش مهبب فيه انا!،اسمعني زواج بيتم
بيتم برضاك ولا بدونه وتذكر بنت الناس ماهيب لعبه وبتتزوجها وتسترون على بعضكم!!،
التف بغضب للباقين وكمل،الي عندي قلته واحد فيكم يعترض بيلحقه،خفف من نبرته
ونطق بهدوء:واذا تحبني وتعزني وخايف علي لأتعب من كلامهم تزوجها ولا ترا مابرضى عنك ليوم الدين!
راح الجد محمد ونط سلمان وهو يبرر:وقسم بالي رفعها سبع وانزلها سبع اني ماعرف البنت
ورب المصحف والجلاله وياجعلي ماتوفق إن كنت أكذب في حاجه،ان البنت مالي صله فيها،
ياعالم وش فيكم انتم!!!انجنيتوووو!؟..تبوني اخذها بأي حققققق!..!
الجده عبير نطقت بحسره:والله اني مصدقتك من قبل لكن وش يفهم جدك!،بعدين ياولدي
انت قول ولد بتسلم من كلامهم بس الضيعفه تياك؟تحسب انها بتسلم من كلامهم!،واذا سلمت والله
ماتسلم من ابوها وامها انت ماتعرفهم شداد والبنت ماشاء الله عليها خلوقه وم..
سلمان:وانا وش ذنبييي!؟...مالي دخل والله ماخذها
قرب رعد منه حط يده على كتف سلمان ونطق بحده:ولد!كبر عقلك،تزوجها واستر عليها
بعدين بكيفك طلقها بس أهم شيء فكها من كلام الناس وهذا جدتي تقولك البنت مايعيبها شي
سلمان:ومن قالك أني احبها اصلًا!
رعد بسخريه:مو لازم تحبها تتعرفون على بعض بعد الزواج
دفها سلمان ونطق بحده:تخسى وتعقب!متشفق عليها!؟.تزوجها انت وخلاص انا شدخلني!
رعد:صادوك انت وهي عند الباب تسالفون وتقولي اتزوجها انا!محد ضربك على يدك وقلك كلمها
دامك ماتبيها ولاتفكر حتى فيها،وسواءًا رفضت ولا مارفضت بتتزوجها وانتهينا أصلًا جدي معطيهم
الموافقه من قبل ولاينتظر شورك،راح رعد معصب
قرب خالد وهو يقول:ماعليك منه انا وجدتي مصدقينك ونثق بك وعارفين،بس
اسمعني وطيعني الحين كل الديره تتكلم فيكم والبنت مالها ذنب وانت كمان مالك ذنب
بس محد بيصدق فيكم وجدي ربط رضاه في زواجك ومستحيل تعارضه انت؟..عشان كِذا
اقولك سواءا وافقت ولارفضت كلها واحد وسيرتكم على كل لسان!
أنفعل سلمان:حسبي الله ونعم الوكيل في الي نشر الخبر نتلاقى أمام العزيز الجبار!
خالد نطق بهدوء:يقلون الي وصّل الكلام لأبو غدي ابو عزيز
رفع حواجبه بدهشه وأستوعب من تذكر يوم قابله العصر:اي والله اني تذكرت هو!هو السبب
جاني العصر يوم طاحت الحوافظ قدام بيت ابو غدي ويقولي دق الباب وماستوعبت
عليه احسبه يخثرق مادريت انه خسيس وواطي للهدرجه!!
خالد نطق بصدمه:حسبي الله عليه!لهدرجه دني!
حط سلمان يدينه على راسه وهو يلف بالغرفه مثل المجنون مو قادر يستوعب
المصيبه الي هو فيها الحين! نطق بلعثمه:تكفى ياخالد نخيتك ساعدني
ضرب صدره خالد بحدّه من تعزوى فيه سلمان وأشتدّت
بداخله الشهامـة نطق بجمهورية :ابشر بعزّك والسعد !
توسعت ابتسامته من رد خالد عليه والي يثبت له مصداقيته
وهو يعرف ان خالد غييير عند الجد محمد والأكيد بيسمع منه
طلع خالد وقفل الغرفة وراه بعد مانطق:اسمعني لاتنزل الحين وخلك
في غرفتك عشان ماتزيد الطين بلّة !
هز راسه بإيجاب وفورًا أخذ جواله يتصل على شخص متأكد
بينقضه لكن ماهي ثواني الا اغلق جواله بقهر من عطاه مشغول
نزل بهدوء يشوفهم جالسين بالصاله والوضع مرتبك
الجد محمد الي كان ساند ظهره على المساند وينطق بشده:والحين انتشر الخبر
بين اهل الديره كلهم وصار على كل لسان
الجده عبير:وين بنودي وجهنا منهم !
خالد تنحنح بأسترسال يبي يفتح الموضوع وخايف من ردة
فعل جده ورعد ، نطق بهدوء: كيف تصدقون شي عن سلمان وانت مربينه ؟
المفروض تكونون واثقين فيه وتعرفون انه لايمكن يسوي هالأشياء
التفت الجد بحده عليه:اصه بس انت اكرمنا بسكوتك ، الكل قام
يتشرّه علينا بسببه وحتى لو ماصحيح يستر على بنت الناس ونفسه
رعد بجديه:انت وش بعقلك بالله ؟ تحسب كلام الناس مزح
وبينسونه مع الأيام ! حرام في ذمّتي انهم بيمسكونه مسكه بالكلام
الشين واذا هو سلم فالبنت بتتعقد هذا غير ابوها الي مابيخليها صاحيه
خالد بقهر:مكبرينها وهي صغيره كلام الناس لايودي ولايجيب
عمر الناس مابيسكتون على أتفه الأشياء يتكلمون ومردهم ينسون
الجده عبير:ياولدي انت تقوله وتحسبها هينه والله مو بسيطه محد
بيرحمهم من كلام الناس والبنت ماشاء الله عليها مابيلقى احسن منها
زفر خالد بغضب ينطق:ياجده مختلفنا البنت زينه ماشاء الله الله يخليها
لأهلها وتشوف نصيبها لكن ماينفع تصدقون فيه شي يعني فرضاً بكره
أحد وصلكم علم بتصدقون الغريب عليه ؟
رعد بحده نطق:لاحول ولاقوة الابالله انت انهبلت ولا انجنيت
ولا وشوو بالضبط !! مجنوون أنت السالفه صارت على كل لسان
تعرف وش معناته ؟ تحسبه لعب أطفال هو
الجد محمد وقف يقطع النقاش بصراخ:شووف ياخويلد أن ماتزوجه
سلمانوه أنت بتاخذها ، فـ أبعد عن السالفه أحسن لك لاتنقلب عليك
بلع ريقه بصدمه من كلام جده وفار دمه على سلمان المسكين
نزل سلمان يختصر الموضوع عليهم ونطق بعلو صوته:أسمعوني..
لف الكل عليه ولكن ما أسعفه الوقت من طرق الباب بشكل قوي
ومخيف ، رعد بعصبيه:يلا تفضلوا جو الباقين
الجد محمد بحده ناظر بخالد ونطق: أفتح الباب
ركض خالد يفتح الباب وأنصدم من كان عزيز الي يتنفّس
بعصوبه بسبب ركضه
خالد بسخريه:يالله حيه ولد راعي المشاكل
رفع حاجبه عزيز وهو بس يبي يوصل الكلام الي شافه
لأنه مايرتاح الا ويقول كل حاجه:اقول عن التفاهه واسمعني
الحق على بنت ابو غدي تراها بتموت على يد أبوها بسبب سلمان
ركض يبعد بخوف بعد ماقال كلامه من شاف وجه خالد ورعد وسلمان
الي كانوا بالخلف يسمعون كلامه ، ركضوا لبيت ابو غدي ومن بينهم
سلمان وأنذهلوا من وجود أهل الديره وصراخ غدي بسبب ضرب أبوها لها
أبو هلال بخرعه:ياجماعه أحد يوقفه لاتموت بنته على يده!
كان الكل يصرخ بأسمه يبونه يوقف ولكن لاحياة لمن تُنادي
__________.
" قبل ساعات "
رجع ابو غدي لبيته وهو في قمّة عصبيته صرخ بقوه:غدددديي
تقدمت تركض لأبوها بخوف جاهله عن عصبيته نطقت بهدوء:هلا يبه
مسك بنته على طول وبدون نقاش ضربه كف ينطق بأهتزاز نبرته:انا
وشش قصرت عليش فيييه لأجل تسودين وجهي بين الخلايق ؟؟
كنت لش أب وأم وإخ واخت وكل حاجه عشانش ضحيّت بأغلى ماملك
وهم أهلي ! يوم شفتهم ماتقبلوش وحاولوا يجبروني اتزوج بنت عمي
وقفت بوجههم وأخذتش ربيتش بنفسي ! وماتزوجت على أمش عشانش
وفي النهاية تجازيني بأنش تكلمين ولد من وراي !!!
رجفت بخوف وصرخة وهي تبكي:يببه وش قوومك علي
انا وش سويت قسم بالله وجيب المصحف أحلف لك اني ماكلم
احد ولاطلع مع أحد يبه أنت اكثر واحد يعرفني حتى اكثر من نفسي
انت الي ربيتني وعلمتني مستحيل أخون ثقتك وأغضب ربي
وأرضاها على نفسي
ابو غدي لوهله أهتز من كلامها لكن كل مايتذكر كلام أبو عزيز
يفور أكثر بضيق وحزن على بنته:سيييرتش على كل لسااان
الكل صار يتكلم فيش وبالزفت سلمان وبدو يتكلمون فيني وفي أمش!
غدي ببكى:يبه والله اني بريئه مستحيل اسويها انا تربيتك يايبه لاتسكرنيي
ابو غدي الي لأول مره يقسى على بنته ومايطالع فيها
ولا لضعفها أمامه أخذ سلك الألوان حق التلفزيون وجلدها فيه
بدون رحمة ، وجلس على هالحال لين أجتمعوا رجال الديره من شيبان
واباء وعيال وصغار وماكان يعرف انه بحركته ذي هو الي فضح نفسه
لأن الخبر ماكانوا متأكدين منه خصوصًا انه جاء من لسان ابو عزيز
الي متعودين على كذبه لكن بسببه تأكدوا الكل من شكوكهم
ابو عزيز بجديه:ها تأكدتوا الحين اني ماكذب !
رعد بحده:أجل انت سبب المشكله هذي ؟
ابو عزيز بعصبيه:أقطع وأخس ياورع الأمس تكلمني
بهذي الطريقة والله هذي سوات أخوك رديّ الساس
رعد بعصبية وبصراخ:اقول اقطع وأخس اخوي ماتجي مواصيله
وأخر من يتكلم أنت يانقّال العلوم الديره كلها تعرف بفعايلك لدرجة
محد صار يصدقك والكل يتنجبك !
الجد محمد بعصبيه:رعد اصهه ولانفس
رعد بقهر:انت ماتسمعه وش يقول يـ.
الجد محمد بحده:أسكت ومالك شغل الحين ذاك بنت بتموت
على يده بسببه وهو مو حاس فيها
زفر رعد يستغفر ربّه وسكت ، ناظر فيهم سلمان من زاد الصراخ
ومحد تحرك ولا سوا شي رفع طرف ثوبه ولف حول خصره
وطب قدّام الجميع على بيت ابو غدي
صرخوا شيبان الديره عليه ومن بينهم الجد محمد الي ماتحمل
سواته وأغمى عليه من تعبه ! مسكه رعد بسرعه يجلسه
وخالد حط يدها على راسه ينطق بنفسه؛الله يقلعك يحمار جبت لنفسك الشبهات
نزل سلمان يتنحنح وتثلم بشماغه يكسر الباب وأنذهل تمامًا من
شاف الدم على غدي أبعد ابوها بحده الي انجن من دخول سلمان
عليهم فجأة ونطق بصراخ:وشش تسووي هنننااا
سلمان بنفس تذبح بنتتك أنت صاحي ولا مهبوول البنت بتموت
على يدك من قوة الضرب
دفه ابو غدي ينطق بقهر:وطاب علي في بيتي بعد
وتدافع عن هالخسيسه والله لو ماتاخذها من وجهي وتتزوجها
لأنهيك سااامع جيب الشيخ الحيين !
سلمان وقف يبعد غدي خلفه ونطق بعلو صوته:وانا موافق وجاي اتزوجها
رغم انه كلامكم ذا باطل لكن حسيبي ربي منكم !
لف عليها يطالعها بحزن على حالها ومعد فيه مجال
الا انه ياخذها رحمها كثير من شاف حالها تنهد يرجع
يناظر بوجه ابو غدي ينطق:انا ماشي اجيب الشيخ ومره وحده
ملكه بس قسم بالله لو تمد يدك عليها لوريك شي مايعجبك تسمع ؟
ابو غدي بعصبيه:خذها بالي مايحفظك لا انت ولاهي نزلت راسي
بين اهل الديرة
طلع سلمان متجاهل سبه القوي وتوسّعت عينه من شاف الكل
يناظره بأستحقار نطق بعلو صوته وبطريقة مستفزّة: ليه تناظروني كذا؟
للهدرجة أنا وسيم ! عمومًا هذي خطيبتي وانا رايح اجيب الشيخ نملّك
كان بودّي أعلنها بس خفت من العين ومن الحين الي يجيبها بكلمة أو يحاول
يشوّة سمعتها وسمعتي نذرٍ علي ليصير بيني وبينه الدم
انصدموا الكل من كلامه اولهم الجد محمد أستقام وده يصفقه على وجهه
لكنه تمالك نفسه رص على أسنانه ينطق : جيبه وبنتفاهم بالبيت
عدّل رعد جلسة الجد وهو وخالد وبدو أغلب أهل الديرة يروحون
طلع ابو غدي ودخلهم بحفاوه عشان يكمّل الكذبه على أهل الديرة
كونه سمع كلام سلمان وتفشل من نفسهم وتفكيره الي بدال يصرفهم
جمّعهم أكثر وزاد الطين بلّة ، أول مادخلوا انصدموا من حفاوة ابو غدي
وهو يرحب ويهلل فيهم ما كنّه هو نفسه الي دخل عليهم بهمجيّه ،
ابو غدي:خذوا راحتم البيت بيتكم !
انهى جملته وطلع للدور الثاني كان بيته صغير وغالبًا
هذي بيوت الديرة المتعارف عليها ناس على قد حالهم
وأغلبهم بيتوهم من طين قديمه لكن كانت فكرة تجديده بالنسبة لهم
مستحيلة لأنهم يحافظون على أصالة بنيانهم مهما بان عليها من قِدم

دخل غرفة بنته ينطق:جهزي نفسش بعد شوي
بتروحين مع زوجش والشيخ بيجي تعطينه الموافقة وأن فكرتي
تكذبين علي ياغدي والله لوريك نجوم الليل بعزّ الظهر !
بلعت ريقها بصدمه من كلام أبـوها وهزّة راسها بنفي تنطق
بصراخ مابين دموعها:يببه تبييعني لرجّال غريب ماعرفه ؟
يبه انا بنننتتتش غدي ماسويها انت أكثر واحد تعرفني
ابتسم بسخرية ينطق:خنتي ثقتي فيش للأسف اقولها ماعندي
بنت أسمها غدي روحـي الله يستر عليش
صرخة بضعف وأقتربت من تحتضن رجله بدموع:يبيه لاا
كله الا هالكلمه ثقيييله على قلبي وروحي تكفى أنت بالذّات
لاتجي منك أنا بنتش انا غدي يايبه انا وحيدتك لاتتكرني لرجّال غريب كل الي أعرفه اسمه ،
ابو غدي بحده دفعها عنه يبعدها ونطق بصرامه:قلت لش
معد عندي بنت بهالأسم فارقي عنّي وجهزي أغراضش من
الحين لأن بيتي يتعذرش سواء الحين او بالمستقبل ، أنهى
كلامه وقفّل الباب عشان يضمن أنها ماتروح أي مكان تمالك
أعصـابه يطلع لهم بكامل قوّته وشموخه وبالواقع ضعفة نفسه
بعد ماردّد على مسامعها هالكلام القـاسي ، اذا هو بنفسه
ماستحمله كيف بنته بتقوى عليه ؟ هي الي تعودت على رقّته
وطيبته رفم شدّته لكن معها كان غييير تمامًا واليوم صدمها
بتغيّره عليها ، وقفت بدموع تشهق وتلم أغراضها تطيع كلام
أبوها ؛ أن كان في أحد بيوطّي راسك قدّام الجميع ماعاش !
لو كان أنـا يايبه ، طاحت على طولها تصيح من قسوته عليها
كيف باعها بسرعة وماصدقها بكت بحرقه على كلام أبوها
وتخليه عنها بهالسرعة لدرجة ماتعّب نفسه يبحث ورا الموضوع
وكيف بتعيش مع سلمان ؟ وهي ابسط معرفتها عنه أسمـه
والشي الوحيد الي تعرفه من كانت تزاور الجدّة عبير حياتهم
وبشكل مختصر ،